Mika
Mutumba paji nzubo ya Yehoba+
Bakamwikazha peulu kukila mitumba ikwabo,
Kabiji bakamusuntula kukila tutumbatumba,
Ne bantu ba mu bisaka byonse bakeya konka.+
2 Kabiji bisaka bya bantu byavula bikayako ne kwamba’mba:
“Twayai ku mutumba wa Yehoba
Ku nzubo ya Lesa wa Yakoba.+
Aye uketufunjisha mashinda anji,
Kabiji tukendanga mu mashinda anji.”
Mambo mizhilo* ikafuma mu Ziona,
Ne byambo bya Yehoba bikafuma mu Yelusalema.
3 Aye ukachibila mambo mitundu ya bantu yavula+
Kabiji ukolola bintu kuba’mba bisaka bya bantu byakosa biji kwalepa bikamwenemo.
Bakabundanga mapoko abo ne kwialula ke bya kujimako
Ne mafumo abo bakealula ke a kukopawilako misampi.+
Kisaka kya bantu kechi kikasuntwila mpoko kisaka kikwabo ne,
Kabiji kechi bakafunda kulwa nkondo jibiji ne.+
4 Muntu yense ukekala munshi ya muñanzañanza wanji ne munshi ya kichi kyanji kya mukuyu,+
Kabiji kafwako nangwa umo ukebalengesha moyo ne,+
Mambo kanwa ka Yehoba wa mabumba ko kaamba.
5 Mambo mitundu ya bantu yonse ikendanga mu mazhina a balesa babo,
Pakuba atweba tukendanga mu jizhina ja Yehoba Lesa wetu+ myaka ne myaka.
6 Yehoba waamba’mba, “Pa joja juba,
Nkakonkanya pamo awa* wasunkuchilenga,
Ne kukonkanya pamo aba bapalañene,+
Pamo na boba bo namanyikile.
7 Kabiji nkalengela yewa* wasunkuchilenga kushalapo,+
Ne yewa ye batwajile kwalepa ukekala ke kisaka kyakosa;+
Kabiji Yehoba ukekala ke mfumu wabo pa Mutumba wa Ziona,
Kufumatu luno kufika ne ku myaka ne myaka.
8 Pakuba obewa, kyamba kya jitanga,
Kituntaulo kya mwana wa mukazhi Ziona,+
Bukeya kwi obewa, kine bukalama butanshi* bukeya,+
Bufumu bwa mwana wa mukazhi Yelusalema.+
9 Pano mambo ka o ubena kubijikila?
Nanchi kechi uji na mfumu nenyi?
Nangwa abya bakukubuula maana bavila nyi?
Pa kuba’mba misongo ikukwate nobe mwanamukazhi ubena kusema nyi?+
10 Obewa mwana wa mukazhi Ziona, minyangala ne kubinza,
Nobe mwanamukazhi ubena kusema,
Mambo luno ukafuma mu muzhi ne kwikala mungye.
Ukaya ku Babilona,+
Kabiji konkakwa bakakupokolola;+
Konkakwa Yehoba ukakupotolola mu maboko a balwanyi bobe.+
11 Bisaka bya bantu byavula bikakonkena kwi obewa na kulwa ne obewa;
Bikamba’mba, ‘Twayai tumuzhilulule,
Ne meso etu amone kino kintu kisakumwekela Ziona.’
12 Bino abo kechi bayuka milanguluko ya Yehoba ne,
Kechi bakwatakanya bintu byo akeba ne;*
Mambo aye ukebakonkanya nobe bikuta bya kajo ko banowa katataka kaji ku kipujilo.
13 Imana ne kupuula, obewa mwana wa mukazhi Ziona;+
Mambo nkalula nsengo yobe ke kapotwe,
Kabiji nkalula mikono yobe ke mukuba,
Ne obewa ukavingakanya mitundu ya bantu yavula.+
Ukapana nsubu yabo ya bujimbijimbi kwi Yehoba,
Ne bunonshi bwabo kwi Nkambo wa kine wa ntanda yonse.”+