Buku Mutanshi wa Bamfumu

10 Kabiji mfumu wa mukazhi wa ku Sheba waumvwine nkuwa ya kwa Solomone na mambo a jizhina ja Yehoba,+ onkao mambo, waishile na kumweseka na mepuzho akatazha.*+ 2 Wafikile mu Yelusalema na jibumba jikatampe,*+ ne na bangamela basendele manyi a balasama+ ne ngolode yavula bingi ne mabwe akwabo a buneme. Wayile kwi Solomone ne kumubuula bintu byonse byajinga ku muchima wanji. 3 Kepo Solomone akumbwile mepuzho anji onse. Kafwako kintu nangwa kimo kyakatezhe* mfumu kyo abujile kumulumbulwila ne.

4 Mfumu wa mukazhi wa ku Sheba byo amwene maana onse a kwa Solomone,+ ne nzubo yo ashimikile,+ 5 ne kajo kajinga pa tebulu+ wanji ne bakalume banji byo baikele ku tebulu, ne bantu banji baleta kajo ku tebulu ne byo bavwajile, ne bakaseya banji ne bitapisho byanji bya kusoka byo atapishanga ku nzubo ya Yehoba kimye kyonse, ponkapo bulume bonse bwamupwile.* 6 Onkao mambo, waambijile mfumu amba: “Sawakya ye naumvwine mu kyalo kyami pa mambo a mingilo* yenu ne maana enu wa kine. 7 Bino awa sawakya kechi namwitabijile ne, poso byo naiya ne kwimwena na meso ami. Kabiji bintu byo bambuujile byajingatu bicheche. Maana enu ne bunonshi bwenu byakila sawakya ye naumvwine. 8 Bantu benu bo ba lusekelo, kabiji bakalume benu bemana kimye kyonse kwi anweba na kuteleka ku maana enu, bo ba lusekelo!+ 9 Atotwe Yehoba Lesa wenu,+ yenka wasekela mwi anweba pa kwimubika pa jitanda ja bena Isalela. Na mambo a butemwe bubula kupwa bwa Yehoba bo atemwa bena Isalela, wimutongwele anweba amba mwikale mfumu wa kuchibila mambo monka mo aolokela.”

10 Kepo apele mfumu matalenta* a ngolode 120 ne manyi a balasama+ avula bingi ne mabwe a buneme.+ Kechi kwaishilepo jikwabo manyi a balasama avujile nobe oa mfumu wa mukazhi wa ku Sheba o apele Mfumu Solomone ne.

11 Maato a kwa Hilama asendele ngolode kufuma ku Ofila,+ aletele ne bichi bya alemuga+ byavula bingi kufuma ku Ofila ne mabwe a buneme.+ 12 Ku bichi bya alemuga mfumu walengeleko bintu bya kukwata nzubo ya Yehoba ne nzubo* ya mfumu, ne byansa ne bijimba bya mizhinge bya banyimbi.+ Bino bichi bya alemuga bakyangye kwibiletapo jibiji nangwa kumwekapo jibiji kufika ne lelo jino.

13 Mfumu Solomone naye wapele mfumu wa mukazhi wa ku Sheba bintu byonse byo akebelenga ne byo alombele, kununga pa bintu byo amupele monka mwayijile bumpanyi* bwanji mwine. Kepo aimene ne kubwela ku kyalo kyanji, pamo na bakalume banji.+

14 Kabiji kinemenezhi kya ngolode yo baletelanga Solomone pa mwaka pa mwaka kyajinga matalenta a ngolode 666,+ 15 kununga pa yafumanga ku bapoteshi ne nsubu yafumanga ku basulu ne ku bamfumu bonse ba bena Alaba ne ku babitumbafumu ba mu kyalo.

16 Mfumu Solomone walengele makebo akatampe 200 a ngolode+ yapatakana na kyela kikwabo (jikebo jimo bejilengele na mashekele* a ngolode 600)+ 17 ne tumakebo tucheche 300 twa ngolode yapatakana na kyela kikwabo (kajikebo kamo bekalengele na mpondo* isatu ya ngolode). Kepo mfumu eabikile mu Nzubo ya Jisaka ja ku Lebanoni.+

18 Mfumu walengele ne jitanda jikatampe na meno a banzovu+ ne kwijishinga ngolode yo batubwile bulongo.+ 19 Kabiji ku jitanda kwajinga kya kukanjijilapo kyajinga na pa kunyanta patanu na kimo, kabiji kunyuma ya jitanda kwajinga ka musemi kazhinguluka, kabiji jajinga na pa kubika maboko konse kubiji, ne bipashañano bibiji bya mabokwe+ saka byaimana ku mbaji ya pa kubika maboko. 20 Kabiji kwajinga mabokwe 12 aimene pa kunyanta patanu na kimo, bokwe umo konse konse kwapela pa kunyanta patanu na kimo. Kechi kwajingapo bufumu bukwabo bwalengele jitanda jajinga nobe jino ne.

21 Bipe byonse bya Mfumu Solomone bya kutomenamo byajinga bya ngolode, ne bipe byonse bya mu Nzubo ya Jisaka ja ku Lebanoni+ byajinga bya ngolode yawama. Kafwako nangwa kimo kyo balengele na siliva ne, mambo mu moba a kwa Solomone siliva kechi beimonanga’mba yanema ne.+ 22 Kabiji mfumu wajinga na maato a ku Tashishi+ pa kalunga ka mema pamo na maato a kwa Hilama. Inge papita myaka isatu, maato a ku Tashishi aletanga ngolode ne siliva, ne meno a banzovu,+ ne mapombo ne mapikoko.

23 Onkao mambo, Mfumu Solomone wanonkele bingi+ kabiji wajinga na maana kukila bamfumu bonse ba pano pa ntanda.+ 24 Kabiji bantu ba pano pa ntanda ponse baiyanga na kumona* Solomone amba bomvwe maana Lesa o abikile mu muchima wanji.+ 25 Bonse pa muntu pa muntu baletanga bupe—bipe bya siliva, bya ngolode, bivwalo, bilwilo, manyi a balasama, bambili ne bamyule—kabiji batwajijile kuba bino pa mwaka pa mwaka.

26 Kabiji Solomone watwajijile kuvuzha makalaki ne bambili;* wajinga na makalaki 1,400 ne bambili* 12,000,+ kabiji wibibikile mu mizhi ya kulaminamo makalaki mu Yelusalema kwipi na kwaikelanga mfumu.+

27 Mfumu wavuzhizhe bingi siliva mu Yelusalema nobe mabwe, ne bichi bya sida byavujile nobe bichi bya mikuyu bya mu Shefela.+

28 Bambili ba kwa Solomone bebafumishe ku Ijipita, kabiji jibumba ja bapoteshi ba mfumu japotanga bambili mu bipanyi* pa mutengo umo.+ 29 Kalaki umo ye bafumyanga ku Ijipita bamupotanga na mali a siliva 600, ne mbili umo bamupotanga mali a siliva 150; ne abo bebipoteshanga ku bamfumu bonse ba bena Hiti+ ne ku bamfumu ba ku Silya.