Buku wa Bubiji wa Samwela
5 Mu kuya kwa moba, mikoka yonse ya bena Isalela yaishile kwi Davida ku Hebulona+ ne kumwambila’mba: “Umvwai! Atweba twi bikupa byenu kabiji twi mubiji wenu.*+ 2 Kala Saulo byo akijinga mfumu wetu, anweba yenu mwatangijilanga bena Isalela ku makondo.*+ Kabiji Yehoba wimwambijile’mba: ‘Yobe ukafunganga bantu bami bena Isalela, kabiji ukekala ntangi wa bena Isalela.’”+ 3 Byonkabyo, bakulumpe bonse ba bena Isalela baishile ku mfumu ku Hebulona, kabiji Mfumu Davida walayañene nabo lulayañano+ mu Hebulona ku meso a Yehoba. Kepo bamushingile manyi Davida kuba’mba ekale mfumu wa bena Isalela.+
4 Davida wajinga na myaka 30 kimye kyo aikele mfumu, kabiji walamine myaka 40.+ 5 Mu Hebulona walamine bena Yuda myaka itanu na ibiji ne bañondo batanu na umo; kabiji myaka 33 walamine bena Isalela bonse ne bena Yuda mu Yelusalema.+ 6 Kabiji mfumu ne bantu banji bayile ku Yelusalema na kulwa na bena Yebusi+ baikalanga mu kyalo. Bamwendelekelenga Davida amba: “Kechi ukatwelamo muno ne! Bampofu ne bilema bakakupangisha.” Balangulukilenga amba, ‘Davida kechi ukatwelamo muno ne.’+ 7 Nangwa byonkabyo, Davida washinjile muzhi wa Ziona wajinga na nsakwa yakosa, luno ke Muzhi wa Davida.+ 8 Onkao mambo, pa jonkaja juba Davida waambile’mba: “Aba basakuya na kulukuka bena Yebusi, bapichile mu bwina bukatampe mupichila mema ne kutapa ‘bilema ne bampofu,’ bonka bashikwa Davida!”* O ene mambo o bambila’mba: “Bampofu ne bilema kechi bakatwelamo mu nzubo ne.” 9 Kepo Davida aikajile mu muzhi wajinga na nsakwa yakosa, kabiji bamutumbile* amba Muzhi wa Davida; kabiji Davida watatwile kushimika masakwa ne bintutu bikwabo pa Kituntaulo*+ ne mu mapunzhatu akwabo ajinga mu mizhi.+ 10 Byonkabyo, Davida wayilengatu na kutumbalala,+ kabiji Yehoba Lesa wa mabumba wajinga nanji.+
11 Hilama+ Mfumu wa ku Tila watumine baluwe kwi Davida, kabiji watumine ne bichi bya sida,+ basendwe ba bichi, ne basendwe ba mabwe ba kushimika masakwa, ne abo batatwile kushimika nzubo* ya kwa Davida.+ 12 Kabiji Davida wayukile’mba Yehoba wakosesha bufumu bwa bena Isalela+ ne kuba’mba watumbijika bufumu bwanji+ na mambo a bantu banji bena Isalela.+
13 Davida wajinga na bantombo ne banabakazhi bavula+ mu Yelusalema kimye kyo afumine ku Hebulona, kabiji Davida wasemejilepo ne baana bakwabo ba balume ne ba bakazhi.+ 14 Bano bo baana bo asemejile mu Yelusalema: Shamuwa, Shobaba, Natana,+ Solomone,+ 15 Ibala, Elishuwa, Nefega, Yafiya, 16 Elishama, Eliada ne Elifeleta.
17 Bena Filishitiya byo baumvwine’mba Davida bamushinga manyi kwikala mfumu wa bena Isalela,+ bena Filishitiya bonse baishile na kukeba Davida.+ Davida byo aumvwine kino, wafyamine mu nkonkoso.+ 18 Kepo bena Filishitiya baishile ne kukumbana mu Kimpachiko* kya Lefwaimu.+ 19 Davida waipwizhe Yehoba+ amba: “Nanchi ngye na kulwa na bena Filishitiya nyi? Nanchi musakwibapana mu kuboko kwami nyi?” Ponkapo Yehoba wamwambijile Davida amba: “Yanga, mambo kine bena Filishitiya nsakwibapana mu kuboko kobe.”+ 20 Byonkabyo, Davida wayile ku Baela-pelazimu, kabiji wibatapijile konkakwa. Kepo aambile’mba: “Yehoba wanshinjilako balwanyi bami,+ byonkatu mema byo apomona mushime.” O ene mambo o atumbijile yoya mpunzha amba Baela-pelazimu.*+ 21 Bena Filishitiya bashile bankishi babo konkakwa, kabiji Davida ne bantu banji basendele bano bankishi.
22 Pa kupitapo kimye, bena Filishitiya baishile jikwabo ne kukumbana mu Kimpachiko* kya Lefwaimu.+ 23 Davida waipwizhe Yehoba, bino aye wamukumbwile’mba: “Kange wibashinkamane ne. Pano bino, wibazhoke ne kwibeshila kunyuma yabo kwipi na bipupu bya baka. 24 Kabiji byo usakumvwa ncholoko peulu ya bipupu bya baka, wibavundumikile mambo Yehoba watangilako kulutwe na kutapa nzhita ya bena Filishitiya.” 25 Byonkabyo, Davida waubile byonkatu byamukambizhe Yehoba, kabiji watapile bena Filishitiya+ kufuma ku Geba+ kukafika ne ku Gezela.+