Buku Mutanshi wa Bamfumu

16 Byambo bya Yehoba bya kwambila Baasha byaishile kwi Yehu+ mwana wa kwa Hanani+ amba: 2 “Amiwa nakubuushishe kufuma mu lukungu ne kukutongola kwikala ntangi wa bantu bami bena Isalela,+ bino obewa watwajijiletu kwenda mu jishinda ja kwa Yeloboma ne kulengela bantu bami bena Isalela kulenga mambo kya kuba bamfichishe ku muchima na mambo a bubi bwabo.+ 3 Onkao mambo, nkavizha Baasha ne ba mu nzubo yanji, kabiji nkalengela nzubo yanji kwikala nobe nzubo ya kwa Yeloboma+ mwana wa kwa Nebati. 4 Muntu yense wa kwa Baasha ukafwila mu muzhi bakamuja ku bakabwa; kabiji muntu wanji yense ukafwila mu jisaka bakamuja ku bañonyi.”

5 Bintu bikwabo byonse byapichilemo Baasha, bintu byo aubile ne mingilo yanji ikatampe, nanchi kechi byanembwa mu buku wa bintu byapichilengamo bamfumu ba mu Isalela nenyi? 6 Kepo Baasha bamutwajile na kulaala kwalaala bashakulu banji kabiji bamuzhiikile mu Tiliza;+ ne Ela mwananji wamuswaine pa bufumu. 7 Kabiji byambo bya Yehoba byaishile kupichila mwi ngauzhi Yehu mwana wa kwa Hanani bya kwambila Baasha ne ba mu nzubo yanji, na mambo a bintu byonse byatama byo aubile ku meso a Yehoba kupichila mu kumufichisha ku muchima na mambo a byubilo byanji, ne kwikala nobe ba mu nzubo ya kwa Yeloboma, ne na mambo a kuba wamwipayile.*+

8 Mu mwaka wa bu 26 wa bukalama bwa kwa Asa Mfumu wa mu Yuda, Ela mwana wa kwa Baasha waikele mfumu wa bena Isalela mu Tiliza, kabiji walamine myaka ibiji. 9 Kalume wanji aye Zimuli mukulumpe wa kichika kya bashilikale benda pa makalaki, wamusatukijile kimye kyo ajinga mu Tiliza saka atoma ne kupendwa ku nzubo ya kwa Alaza, yenka wajinga mukulumpe wa pa nzubo mu Tiliza. 10 Zimuli waishile na kumwipaya+ mu mwaka wa bu 27 wa bukalama bwa kwa Asa Mfumu wa mu Yuda, kabiji wamuswaine pa bufumu. 11 Byo aikele mfumu, aku wikalatu pa jitanda, waipayile bonse ba mu nzubo ya kwa Baasha. Kechi washilepo mwanamulume* nangwa umo, nangwa mulongo* wanji nangwa mulunda nanji ne. 12 Byonkabyo, Zimuli wavizhizhe bonse ba mu nzubo ya kwa Baasha, monka mwayijile byambo bya Yehoba byo aambijile Baasha kupichila mwi ngauzhi Yehu.+ 13 Waubile kino na mambo a bubi bonse Baasha ne mwananji Ela bo baubile ne bubi bo balengejile bena Isalela kuba ne kufichisha Yehoba Lesa wa Isalela ku muchima na bankishi babo batutu.+ 14 Kabiji bintu bikwabo byapichilemo Ela, ne byonse byo aubile, nanchi kechi byanembwa mu buku wa bintu byapichilengamo bamfumu ba mu Isalela nenyi?

15 Mu mwaka wa bu 27 wa bukalama bwa kwa Asa Mfumu wa mu Yuda, Zimuli waikele mfumu moba atanu na abiji mu Tiliza kimye nzhita kyo yatebelejile na kulwa na muzhi wa Gibetona+ wa bena Filishitiya. 16 Kabiji nzhita yajinga mu kampu yaumvwine saka bamba’mba: “Zimuli wasatuka kabiji waipaya ne mfumu.” Onkao mambo, bena Isalela bonse batongwele Omuli+ mukulumpe wa nzhita kwikala mfumu wa bena Isalela pa jo ja juba monka mu kampu. 17 Omuli ne bena Isalela bonse bo ajinga nabo bafumine ku Gibetona ne kuya na kulwa na muzhi wa Tiliza. 18 Zimuli byo amwene’mba muzhi bamwangata, wanyemejile mu kyamba kyakosa kya ku nzubo* ya mfumu ne kwisokela monka mu nzubo, ne kufwa wafwile.+ 19 Kino kyaubiwe na mambo a bubi bwanji bo aubile mwine byo aubilenga byatama kwi Yehoba kupichila mu kwenda mu jishinda ja kwa Yeloboma ne na mambo a bubi bo alengejile bena Isalela kuba.+ 20 Bintu bikwabo byapichilemo Zimuli ne byo asatukile, nanchi kechi byanembwa mu buku wa bintu byapichilengamo bamfumu ba mu Isalela nenyi?

21 Kino kyo kimye bena Isalela kyo baabene mu mabumba abiji. Jibumba jimo jalondejilenga Tibini mwana wa kwa Ginata, ne kukeba kumutongola’mba ekale mfumu, kabiji jibumba jikwabo jalondejilenga Omuli. 22 Bino aba balondejilenga Omuli bashinjile bantu balondejilenga Tibini mwana wa kwa Ginata. Onkao mambo, Tibini wafwile kabiji Omuli waikele ke mfumu.

23 Mu mwaka wa bu 31 wa bukalama bwa kwa Asa Mfumu wa mu Yuda, Omuli mo aikele mfumu wa mu Isalela, kabiji walamine myaka 12. Mu Tiliza walaminemo myaka itanu na umo. 24 Wapotele mutumba wa Samaliya kwi Shemela na matalenta* abiji a siliva, kabiji washimikile muzhi pa mutumba. Watumbile uno muzhi ye ashimikile amba Samaliya,*+ wamutumbile jizhina ja kwa Shemela wajinga mwina* uno mutumba. 25 Omuli waubilenga bintu byatama ku meso a Yehoba, kabiji wakijilemo kukila bonse bajingako kala.+ 26 Waendelenga mu mashinda a kwa Yeloboma mwana wa kwa Nebati ne mu bubi bo alengejile bena Isalela kuba ne kufichisha Yehoba Lesa wa Isalela ku muchima na bankishi babo batutu.+ 27 Bintu bikwabo byapichilemo Omuli ne byo aubile ne bintu bikatampe byo aubile, nanchi kechi byanembwa mu buku wa bintu byapichilengamo bamfumu ba mu Isalela nenyi? 28 Kepo Omuli bamutwajile na kulaala kwalaala bashakulu banji kabiji bamuzhiikile mu Samaliya; kabiji mwananji aye Ahaba+ wamuswaine pa bufumu.

29 Ahaba mwana wa kwa Omuli waikele mfumu wa bena Isalela mu mwaka wa bu 38 wa bukalama bwa kwa Asa Mfumu wa mu Yuda, kabiji Ahaba mwana wa kwa Omuli walamine bena Isalela mu Samaliya+ pa myaka 22. 30 Ahaba mwana wa kwa Omuli waubile bintu byatama bingi kwi Yehoba kukila aba bonse bajingako kala.+ 31 Kwi aye kyajingatu nobe kintu kicheche kulondela bubi bwa kwa Yeloboma+ mwana wa kwa Nebati, kabiji wasongwele Yezebeli+ mwana wa kwa Etibaela, mfumu wa bena Shidona,+ ne kutendeka kwingijila Baela+ ne kumufukamina. 32 Kabiji washimikile kya kusokelapo bitapisho kya kwa Baela ku nzubo ya kwa Baela+ yo ashimikile mu Samaliya. 33 Kabiji Ahaba walengele ne kichi kya mulumbulumbu kyazhila.*+ Ahaba waubile bintu byavula bya kufichisha Yehoba Lesa wa Isalela ku muchima kukila bamfumu bonse ba mu Isalela bajingako kala.

34 Mu moba anji, Hiela mwina Betele washimukulwile Yeliko. Pa kwala kitendekesho kya uno muzhi wafwishishe mwananji mubeji aye Abilama, kabiji pa kwimika binzhilo bya muzhi wafwishishe mukala wanji aye Seguba, monka mwayijile byambo bya Yehoba byo aambile kupichila mwi Yoshua mwana wa kwa Nuni.+