Nkalata ya Bubiji ku Bena Kolinda
6 Byo tubena kwingijila nanji pamo,+ twimusashijila namba mutambule lusa lukatampe lwa Lesa kabiji kange mwilwalule kwikala ke lwatutu ne.+ 2 Mambo aye waamba’mba: “Mu kimye kyaitabilwa nakutelekele, kabiji mu juba ja lupulukilo nakukwashishe.”+ Pano kino kyo kimye kyaitabilwa. Jino jo juba ja lupulukilo.
3 Kechi tuba bintu bya kwituntulako bantu ne, pa kuba’mba mwingilo wetu abulwe kunenwa bibi;+ 4 bino mu bintu byonse twilumbulula kuba’mba twi ba mingilo ba Lesa,+ kupichila mu kuchinchika mu byavula, mu bya malwa, mu kukajilwa, mu byakatazha,+ 5 mu bipumo, mu tuleya,+ mu biwowo, mu mingilo yakosa, mu bya kutoñama ne mu kubula kajo;+ 6 kupichila mu kwikala bwikalo bwawama, mu kulondela bintu byo twayuka, mu kutekanya,+ mu kumwesha lusa,+ mu mupashi wazhila, mu butemwe bwabula bukamfutumfutu,+ 7 mu kwamba bya kine mu bulume bwa Lesa;+ na bilwilo bya bololoke+ biji mu kuboko kwa kilujo* ne kwa kipiko,* 8 mu lukumo ne mu kulengululwa, mu masawakya atama ne awama. Betumona nobe bajimbijimbi bino saka twamba bya kine, 9 betumona nobe bantu babula kuyukanyikwa bino saka twayukanyikwa, betumona nobe tubena kufwa* bino saka tuji bomi,+ betumona nobe betukambula* bino kechi betwipaya ne,+ 10 tumweka nobe tuji na bulanda bino saka tusekela moba onse, nobe bayanji bino saka tunonkesha bavula, nobe babula bintu bino saka tuji na bintu byonse.+
11 Twaasamika tunwa twetu kuba’mba twambe* kwi anweba bena Kolinda, kabiji twimushinkwila michima yetu. 12 Kechi twaleka kwimutemwa ne,+ bino anweba yenu mwaleka kwitutemwa. 13 Onkao mambo, mbena kwamba kwi anweba nobe mbena kwamba ku baana bami. Ne anweba shinkwishai michima yenu.*+
14 Kechi mwikase* kikonkoji kimo na babula kwitabila ne.+ Nanchi bololoke ne bubi byendela pamo nyi?+ Nangwa kyeya ne mfishi byumvwañana nyi?+ 15 Nanchi Kilishitu ne Beliala* bakonsha kupwanañena pamo nyi?+ Ñanyi kwipasha kuji pa muntu waitabila* ne wabula kwitabila?+ 16 Nanchi bankishi bakonsha kwikala mu nzubo ya Lesa nyi?+ Mambo atweba twi nzubo ya Lesa mumi;+ byonkatu Lesa byo aamba’mba: “Amiwa nkekala nabo+ ne kwenda mwi abo kabiji nkekala Lesa wabo ne abo bakekala bantu bami.”+ 17 “‘Onkao mambo, lupukaimo mwi abo ne kwabana nabo,’ byo byaamba Yehoba,* ‘kabiji kange mukwate ku kintu kya muzhilo ne’”;+ “‘ne amiwa nkemutambulwila.’”+ 18 “‘Kabiji nkekala shenu,+ ne anweba mukekala baana bami ba balume ne ba bakazhi,’+ byo byaamba Yehoba* wa Bulume Bonse.”