Masalamo

83 Anweba Lesa, kange muzhindametu ne;+

Kange mwikaletu nzoo* kwa kubula kubapo kintu nangwa kimo ne, anweba Lesa.

 2 Mambo talai! balwanyi benu babena kuba kiwowo;+

Aba bemushikwa babena kwitota.*

 3 Mu bujimbijimbi balanguluka kwiboba byatama bantu benu;

Bomvwañena bantu benu bo mwanemeka.*

 4 Bamba’mba: “Twayai tuvizhe kisaka kyonse,+

Pa kuba’mba jizhina ja Isalela jikabule kuvulukwapo jibiji.”

 5 Baumvwañana kuba kintu kimo;*

Bakwatankana* kuba’mba balwe ne anweba+—

 6 Ba mu matente a Edomu, bena Ishimela, bena Moabu+ ne bena Haguli,+

 7 Bena Gebala, bena Amonyi,+ bena Amaleki,

Ne bena Filishitiya+ bakwatankana pamo na bangikazhi ba mu Tila.+

 8 Kabiji bena Asilya+ nabo benunga kwi abo;

Babena kukwasha* baana ba kwa Lota.+ (Selah)

 9 Mwibobe byonka byo mwaubile bena Mijanyi,+

Byonka byo mwaubile Sisela ne Yabina ku kakola* ka Kishonyi.+

10 Baonaikijile ku Ene-dola;+

Kabiji baalukile ke mbolezha ya mushiji.

11 Alulai babinemanga babo bekale nobe Oleba ne Ziba+

Ne babinemanga* babo bekale nobe Zeba ne Zalamuna,+

12 Mambo baamba’mba: “Twayai twangate kyalo mwikala Lesa.”

13 Anweba Lesa wami, balulai bekale nobe nsono yauma yo basenda ku kanzhimbiji,+

Nobe makunzhi o bolulula ku mwela.

14 Byonkatu biji mujilo usoka jisaka,

Ne lubebe lusoka mitumba,+

15 Byonkabyo ne anweba mwibapange na kipuupu kyenu+

Kabiji mwibalengeshe moyo na kinkunkwila kyenu kikatampe.+

16 Balengeshai* bumvu balwanyi,

Pa kuba’mba bantu banemekenga jizhina jenu anweba Yehoba.

17 Mwibalengeshe bumvu kabiji bekale na moyo myaka ne myaka;

Kibalenge bumvu ne konaika;

18 Bantu bayuke’mba anweba, yenka wa jizhina ja Yehoba,+

Yenu bunketu Mwine Wakila pano pa ntanda ponse.+