Ezikyo
25 Yehoba wañambijile jikwabo amba: 2 “Obewa mwana muntu, tala ku bena Amonyi+ ne kwaula bintu bikebamwekela.+ 3 Ukambe pa bena Amonyi amba, ‘Umvwai byaamba Nkambo Mfumu Yehoba. Nkambo Mfumu Yehoba waamba’mba: “Byo mwasangalele na mambo a kuba’mba nzubo yami beizhilulwile ne kyalo kya Isalela kyashajiletu masala ne kisaka kya Yuda bekitwajile mu buzha, 4 amiwa nkemupana ku bantu ba ku Musela kuba’mba mukekale ke bantu babo. Bakekala mukachi kenu ne kupopa matente* abo mu kyalo kyenu. Bakajanga kajo kenu ne kutoma mukaka wenu. 5 Nkalula muzhi wa Laba+ kwikala ke mpunzha mwa kujiila bangamela ne mizhi ya bena Amonyi ikekala ke bipaka bya mikooko; kabiji po po mukayuka’mba amiwa yami Yehoba.”’”
6 “Nkambo Mfumu Yehoba waamba’mba: ‘Na mambo a kuba mwapopwejilenga mu maboko+ ne kunyantaula maulu enu panshi, kabiji anweba* mwasangalele ne kuseka kyalo kya bena Isalela,+ 7 onkao mambo, amiwa nkatanyika kuboko kwami ne kwimupana kwikala nobe bipukulwa ku bisaka bya bantu. Nkemufumya mu mitundu ya bantu ne kwimonauna mu byalo.+ Nkemuvizha, kabiji po po mukayuka’mba amiwa yami Yehoba.’
8 “Nkambo Mfumu Yehoba waamba’mba: ‘Na mambo a kuba bena Moabu+ ne bena Seila+ baamba’mba, “Kisaka kya Yuda kyaaluka nobe bisaka bikwabo,” 9 amiwa nkasha patoka Bete-yeshimota, Bete-baela-meona ne Kiliataimu, ko kuba’mba mizhi yanji yawama yaikela ku mutumba* wa Moabu.+ 10 Ino mizhi nkeipana pamo na bena Amonyi ku bantu ba ku Musela+ kuba’mba bena Amonyi bakabule kwibavulukapo jibiji ku bisaka bya bantu.+ 11 Amiwa nkakambula bena Moabu,+ kabiji po po bakayuka’mba amiwa yami Yehoba.’
12 “Nkambo Mfumu Yehoba waamba’mba: ‘Bena Edomu bashinkanya na bena Yuda kabiji balenga mambo akatampe pa kushinkanya nabo;+ 13 onkao mambo, Nkambo Mfumu Yehoba waamba’mba: “Nkatanyikila kuboko kwami pa kyalo kya Edomu ne kwipaya bantu ne banyama bakulela bajimo kabiji nkekyalula ke masalatu.+ Aba baji mu muzhi wa Temanyi kukafikatu ne ku Dedanyi bakafwa ku mpoko.+ 14 Nkambo Mfumu Yehoba waamba’mba, ‘Nkengijisha bantu bami bena Isalela pa kushinkanya na bena Edomu.+ Bakamwesha bukaji bwami pa bena Edomu, kabiji bakamona kushinkanya+ kwami byo kuji.’”’
15 “Nkambo Mfumu Yehoba waamba’mba: ‘Na mambo a kukizhamo kukanama, bena Filishitiya bakebele bingi kushinkanya ne konauna bantu.+ 16 Onkao mambo, Nkambo Mfumu Yehoba waamba’mba: “Amiwa nkatanyika kuboko kwami pa bena Filishitiya+ kabiji nkepaya bena Keleta+ ne kuvizha boba bakashalapo bekala ku kitulu kya kalunga ka mema.+ 17 Nkashinkanya nabo kyabaya bingi ne kwibakambula, kabiji po po bakayuka’mba amiwa yami Yehoba mbena kushinkanya nabo.”’”