Buku wa Bubiji wa Bamfumu

23 Onkao mambo, mfumu watumine mawi, ne kwita bakulumpe bonse ba mu Yuda ne mu Yelusalema.+ 2 Kepo mfumu ayile ku nzubo ya Yehoba na banabalume bonse ba mu Yuda, ne bangikazhi bonse ba mu Yelusalema, ne bañanga, ne bangauzhi, ko kuba’mba bantu bonse, kutendekelatu ku mwanyike kufika ne ku mukulumpe. Watangilenga saka bomvwa byambo byonse bya mu uno buku+ wa lulayañano+ ye bataaine mu nzubo ya Yehoba.+ 3 Mfumu waimene kwipi na jishiki ne kulayañana nabo lulayañano* ku meso a Yehoba+ amba, ukalondelanga Yehoba ne kulama mikambizho yanji, ne bya kuvululako byanji, ne malamuna anji na muchima wanji yense ne na mweo* wanji yense kupichila mu kulondela byambo bya mu luno lulayañano byonka byanembwa mu uno buku. Kabiji bantu bonse baswile luno lulayañano.+

4 Kepo mfumu akambizhe Hilikiya+ ñanga mwine mukatampe, ne bañanga balondelapo, ne bakalama ba bibelo kuba’mba balupule mu nzubo ya Yehoba bipe byonse byo balengejile Baela, ne bya kichi kya mulumbulumbu kyazhila*+ ne bya bintu byonse bya mwiulu. Kabiji wibisokejile pangye ya Yelusalema ku matelo a Kedolona, kabiji watwajile buto bwabyo ku Betele.+ 5 Wafumishemo bañanga ba balesa ba bubela, bonka bo batongwele ku bamfumu ba mu Yuda kuba’mba basokenga bitapisho bya kufutumuna pa mapunzha atuntama mu mizhi ya Yuda ne mu mapunzha azhokoloka Yelusalema, kubikakotu ne boba basokanga bya kufutumuna kwi Baela, ku juba, ku ñondo, ku kipashañano kya myala ya nshansha, ne ku bintu byonse bya mwiulu.+ 6 Wafumishemo kichi kya mulumbulumbu kyazhila*+ mu nzubo ya Yehoba ne kwikitwala kunsa ya Yelusalema ku Kimpachiko kya Kedolona, kabiji wakekisokejile+ mu Kimpachiko kya Kedolona ne kwikivingaula ke butotu ne kwibusansanya pa bilende bya bantutu.+ 7 Kabiji wakundawile ne mazubo ajinga ku nzubo ya Yehoba a banabalume belaalanga na banabalume bakwabo,+ ajinga ku nzubo ya Lesa kabiji konka banabakazhi ko bapikwilanga matente a bichi bya milumbulumbu byazhila.*

8 Kepo afumishemo bañanga bonse mu mizhi ya mu Yuda, kabiji wazhilulwile mapunzha atuntama bañanga po basokelanga bya kufutumuna, kufumatu ku Geba+ kukafika ne ku Belesheba.+ Kabiji wapalañenye ne mapunzha atuntama a ku bibelo ajinga ku kibelo kya kwa Yoshua mukulumpe wa muzhi, kyajinga ku kipiko pa kutwela pa kibelo kya muzhi. 9 Bañanga ba pa mapunzha atuntama kechi baingijilanga ku kya kusokelapo bitapisho kya Yehoba kyajinga mu Yelusalema ne,+ bino bajangako shinkwa wabula mbizho pamo na balongo babo. 10 Kabiji wazhilulwile Tofweta,+ yenka wajinga mu Kimpachiko kya Baana ba kwa Hinomu,*+ pa kuba’mba muntu nangwa umo abule kusoka* mwana wa mulume nangwa wa mukazhi kwi Moleka.+ 11 Kabiji wakanyishe bambili ba bamfumu ba mu Yuda bo bapaine ku juba kuba’mba baleke kutwela mu nzubo ya Yehoba mu kibamba* kya kwa Natanameleki kinemanga wa mfumu, kyajinga ku kazubo ka ku kibelo; kabiji wasokele makalaki a juba+ mu mujilo. 12 Mfumu wakundawile bya kusokelapo bitapisho bamfumu ba Yuda byo bashimikile pa musemi wa kibamba kya peulu+ kya kwa Ahaza, kubikapotu ne bya kusokelapo bitapisho Manase byo ashimikile mu mabanza abiji a nzubo ya Yehoba.+ Wibivingakenye ne kutaya buto bwabyo mu Kimpachiko kya Kedolona. 13 Kabiji mfumu wazhilulwile mapunzha onse a patuntama atalañene na Yelusalema ajinga ku kabeta ka ku bulenge* bwa Mutumba wa Lonaiko,* onka Solomone mfumu wa Isalela o ashimikijile Ashatoleta lesa wa mukazhi wa bunya wa bena Shidona; ne Kemoshi lesa wa bunya wa bena Moabu; ne Milikomu+ lesa wa bunya wa bena Amonyi.+ 14 Wamokawile mashiki azhila ne kutetaula bichi* bya milumbulumbu byazhila+ kabiji po byajinga wayuzhizhepo bikupa bya bantu. 15 Wakundawile kya kusokelapo bitapisho kyajinga mu Betele, ne kupalañanya mpunzha yatuntama Yeloboma mwana wa kwa Nebati yo alengele yonka yalengejile bena Isalela kuba bubi.+ Byo akundwile kya kusokelapo bitapisho ne kupalañanya mpunzha yatuntama, wasokele mpunzha yatuntama, ne kwiivingaula ke lukungutu, ne kusoka kichi kya mulumbulumbu kyazhila.*+

16 Yosiya byo aalulukile ne kumona bilende pa mutumba, wasendele bikupa byajinga mu bilende ne kwibisoka pa kya kusokelapo bitapisho, ne kwikizhilulula, monka mwayijile byambo bya Yehoba byaambile muntu wa Lesa wa kine yenka waambijile jimo kuba’mba bino bintu bikamweka.+ 17 Kepo aambile’mba: “Nga aja jibwe ja pa kilende jo mbena kumona kokwa ja bañanyi?” Ponkapo bantu ba mu muzhi bamwambijile’mba: “Ke kilende kya muntu wa Lesa wa kine wafumine ku Yuda+ yenka waambijile jimo bintu byo mwauba ku kya kusokelapo bitapisho kya mu Betele.” 18 Onkao mambo, waambile’mba: “Mulekai akokoloke. Kange muswishe muntu nangwa umo kusunkenya bikupa byanji ne.” Byonkabyo, bashile bikupa byanji kwa kubula kwibisunkenya, kubikapotu ne bikupa bya ngauzhi wafumine ku Samaliya.+

19 Kabiji Yosiya wakundwile ne mazubo onse a kupopwelamo a pa mapunzha atuntama ajinga mu mizhi ya mu Samaliya,+ onka ashimikile bamfumu ba mu Isalela ne kufichisha Lesa ku muchima, kabiji waubile kintutu kimo kwi abo byonka byo aubile ku Betele.+ 20 Onkao mambo, pa bya kusokelapo bitapisho watapishepo bañanga bonse ba pa mapunzha atuntama bajinga konkakwa, ne kusokelapo bikupa bya bantu.+ Kepo abwelele ku Yelusalema.

21 Kabiji mfumu wakambizhe bantu bonse amba: “Nengezhai Kijiilo kya Lupitailo+ kya Yehoba Lesa wenu byonka byo kyanembwa mu uno buku wa lulayañano.”+ 22 Kafwako Kijiilo kya Lupitailo kyaesakene pamo na kino kyajingako kufumatu mu moba bamitonyi o bachibilanga mambo bena Isalela nangwatu mu moba onse a bamfumu ba Isalela ne a bamfumu ba mu Yuda ne.+ 23 Bino mu mwaka wa bu 18 wa bukalama bwa Mfumu Yosiya, kino Kijiilo kya Lupitailo kya Yehoba kyaikejile mu Yelusalema.

24 Kabiji Yosiya wafumishemo bantu bonse besambanga na mipashi, bantu baambanga bikamweka kulutwe,+ bankishi,*+ bankishi ba bunya,* ne bintu byonse bya bunya byajinga mu kyalo kya Yuda ne mu Yelusalema, pa kuba’mba afikizhe byambo bya mu Mizhilo+ byanembelwe mu buku yenka Hilikiya ñanga ye atulukile mu nzubo ya Yehoba.+ 25 Kala kechi kwajingapo mfumu wajinga nobe aye, wabwelele kwi Yehoba na muchima wanji yense ne na mweo* wanji+ yense ne na bulume bwanji bonse, monka mwayijile Mizhilo ya Mosesa ne; kabiji kafwako mukwabo walondejilepo wajinga nobe aye ne.

26 Nangwa byonkabyo, bukaji bwa Yehoba bo azhingijile bena Yuda kechi bwapwile ne, na mambo a bintu byonse byatama Manase byo aubile bya kumufichisha ku muchima.+ 27 Yehoba waambile’mba: “Nkafumya Yuda ku meso ami,+ byonka byo nafumishe Isalela;+ kabiji nkakana uno muzhi ye nasajile, Yelusalema, ne nzubo yo naambilepo namba, ‘Jizhina jami jikatwajijila kwikala monka.’”+

28 Bintu bikwabo byapichilemo Yosiya, bintu byonse byo aubile, nanchi kechi byanembwa mu buku wa bintu byapichilengamo bamfumu ba mu Yuda nenyi? 29 Mu moba anji, Felo Neko mfumu wa Ijipita waishile na kumonañana na mfumu wa Asilya ku Mukola wa Ufelata, kabiji Mfumu Yosiya wayile na kulwa nanji; bino Neko byo amumwene, wamwipayijile ku Megido.+ 30 Byonkabyo bakalume banji basendele mubiji wanji mu kalaki kufuma ku Megido kumuleta ku Yelusalema ne kumuzhiika mu kilende kyanji. Kepo bantu bonse ba mu kyalo baletele Yehoahaza mwana wa kwa Yosiya ne kumushinga manyi ne kumuswanyika pa bufumu bwa shanji.+

31 Yehoahaza+ wajinga na myaka ya kusemwa 23 kimye kyo aikele mfumu, kabiji walamine mu Yelusalema bañondo basatu. Inanji wajinga Hamutali+ mwana wa kwa Yelemiya wa ku Libina. 32 Watendekele kuba bintu byatama kwi Yehoba, ne kuba bintu byonse byaubilenga bashakulu banji.+ 33 Felo Neko+ wamutayile mu kaleya ku Libula+ mu kyalo kya Hamata, kuba’mba abulenga kulama mu Yelusalema, kabiji kyalo wikitongwejile kupana matalenta* a siliva 100 ne talenta wa ngolode umo.+ 34 Kabiji Felo Neko waswanyikile Eliakima mwana wa kwa Yosiya pa bufumu bwa kwa Yosiya shanji ne kumupimpula jizhina ke Yehoyakimu; bino wasendele Yehoahaza ne kumuleta ku Ijipita,+ konka ko akafwijile.+ 35 Yehoyakimu wapaine siliva ne ngolode kwi Felo, bino wasonkeshenga bantu ba mu kyalo pa kuba’mba apane siliva Felo yo akebelenga. Watambwilenga siliva ne ngolode yo atongwejile muntu yense wa mu kyalo kuba’mba eipane kwi Felo Neko.

36 Yehoyakimu+ wajinga na myaka ya kusemwa 25 kimye kyo aikele mfumu, kabiji walamine mu Yelusalema myaka 11.+ Inanji wajinga Zebida mwana wa kwa Pedaya wa ku Luma. 37 Waubilenga byatama kwi Yehoba,+ ne kuba bintu byonse byaubilenga bashakulu banji.+