YOSHUA

1 Mosesa kalume wa Yehoba byo afwile, Yehoba waambijile Yoshua*+ mwana wa kwa Nuni, wa mwingilo+ wa kwa Mosesa amba: 2 “Mosesa kalume wami wafwa.+ Pano imana wabuke Yodano, obewa ne bano bantu bonse ne kuya mu kyalo kyo mbena kwibapa bena Isalela.+ 3 Mpunzha yonse pakanyanta maulu enu nkemupayo, byonkatu byo nalayile Mosesa.+ 4 Nyaunda yenu ikafuma ku kiselebwa kukafika ne ku Lebanoni ne ku mukola mukatampe wa Ufelata—kyalo kyonse kya bena Hiti+—kukafika ne ku Kalunga ka Mema Kakatampe* ka ku muzhika.*+ 5 Kafwako muntu nangwa umo ukakwimena mu moba onse a bumi bobe ne.+ Byonkatu byo najinga ne Mosesa, byo byo nkekala ne obewa.+ Kechi nkakusha bunke nangwa kukulekelela ne.+ 6 Chinchika ne kukosa,+ mambo yobe ukalengela bano bantu kuswana kyalo kyo nachipile ku bashakulu babo namba nkebapakyo.+

7 “Chinchika ne kukosa ne kulondela bulongo Mizhilo yonse Mosesa kalume wami yo akukambizhe kulama. Kechi ukasendukemo ne, nangwa ku kilujo nangwa ku kipiko ne,+ pa kuba’mba ukobenga bintu na maana konse konse ko ukayanga.+ 8 Uno buku wa Mizhilo kechi akafume mu kanwa kobe ne,+ ukamutangenga ne kulanguluka langulukapo mute ne bufuku pa kuba’mba ukalondelenga bulongo byonse byanembwamo;+ mambo mu kuba bino, jishinda jobe jikawama kabiji ukobanga bintu na maana.+ 9 Nakukambizha jibiji namba, ‘Chinchika ne kukosa.’ Kange ube moyo nangwa kukakilwa ne, mambo Yehoba Lesa wobe uji ne obewa konse konse ko ukaya.”+

10 Ponkapo Yoshua wakambizhe bantangi ba bantu amba: 11 “Pitañanai monse mu kampu ne kukambizha bantu amba, ‘Nengezhai mpao, mambo mu juba ja busatu mukabuka Yodano ne kutambula kyalo kyo abena kwimupa Yehoba Lesa wenu kwikala ke kyenu.’”+

12 Kabiji Yoshua waambijile bena Lubenyi, bena Gadi ne kichika kya mukoka wa bena Manase amba: 13 “Vulukai bimukambizhe Mosesa kalume wa Yehoba amba:+ ‘Yehoba Lesa wenu ubena kwimupa mutende kabiji wimupa kino kyalo. 14 Bakazhi benu, baana benu, ne bilelwa byenu bikekala mu kyalo kyo emupele Mosesa kuno ku bushiya* bwa Yodano,+ pakuba anweba babilobo bonse ba nkondo+ mwafwainwa kwabuka saka mwitanchika ne kutangilako kulutwe ya balongo benu.+ Mwafwainwa kwibakwasha 15 kufikatu ne Yehoba byo akapana mutende ku balongo benu byonkatu byo emupa anweba, kabiji bakatambule kyalo kyo abena kwibapa Yehoba Lesa wenu. Kepo mukabwela mu kyalo kyo bemupele kwikalamo ne kwikitambula, kyalo Mosesa kalume wa Yehoba kyo emupele ku musela wa Yodano.’”+

16 Abo bamukumbwile Yoshua amba: “Tukoba bintu byonse byo mwitukambizha, kabiji tukaya konse ko muketutuma.+ 17 Byonkatu byo twaumvwinanga Mosesa mu bintu byonse byo aambanga, ne anweba tukemumvwinanga. Yehoba Lesa wenu ekale ne anweba byonkatu byo ajinga ne Mosesa.+ 18 Muntu yense ukalengulula mikambizho yenu ne kubula kukookela bintu byonse byo mukamukambizha, wafwainwa kufwa.+ Pano bino, chinchikai ne kukosa.”+

2 Kabiji Yoshua mwana wa kwa Nuni watumine banabalume babiji mu bufyamfya kufuma ku Shitima+ kuya na kwendela kyalo. Wibabuujile’mba: “Yainga mukapikite kyalo, kikatakata Yeliko.” Ne abo bayile ne kukafika ku nzubo ya mwanamukazhi pite wa jizhina ja Lehaba,+ kabiji baikele konkakwa. 2 Mfumu wa mu Yeliko bamubuujile’mba: “Banabalume bena Isalela baiya muno bufuku na kwendela kyalo.” 3 Ponkapo mfumu wa mu Yeliko watumine jiwi kwi Lehaba amba: “Lupula banabalume baiya baji mu nzubo yobe, mambo baiya na kwendela kyalo kyonse.”

4 Bino uno mwanamukazhi wasendele bano banabalume babiji ne kwibafya. Kepo aambile’mba: “Ibyo, banabalume baji kwiya kwi amiwa, bino kechi nayuka ko baji kufuma ne. 5 Byo paji kufiita, byo kyaji pepi na kimye kya kushinka kibelo kya muzhi, bano banabalume baji kulupuka. Kechi nayuka ko baya ne, pano bino, inge mwibapupile bukiji, musakwibataana.” 6 (Nangwa byonkabyo, aye wibakanjizhe pa musemi ne kwibafya mu bukusa bo aanyikile pa musemi.) 7 Ponkapo banabalume bo batumine kwi mfumu, bapupijile aba banabalume mu jishinda jaya ku Yodano kufika ne ku myaba,+ kabiji abano bebapupijilenga byo balupukiletu, bashinkile kibelo kya muzhi.

8 Aba banabalume saka bakyangye kulaala, uno mwanamukazhi wakanjijile pa musemi po bajinga. 9 Wibambijile bano banabalume amba: “Nayuka namba Yehoba ukemupa kino kyalo,+ ne moyo wa kwimuchina witukwata.+ Bangikazhi bonse ba mu kyalo baakamwa bingi na mambo a anweba,+ 10 mambo twaumvwine Yehoba byo aabenye mema a mu Kalunga ka Mema Kachila ne anweba saka mutalako byo mwafumine mu Ijipita+ ne byo mwaubile ku bamfumu babiji ba bena Amoli, abo ba Sihona+ ne Oga+ bonka bo mwaipayijile ku bushiya* bwa Yodano. 11 Byo twaumvwine kino, twachiine* bingi, kabiji kafwako nangwa umo wachinchikile* na mambo a anweba ne, mambo Yehoba Lesa wenu, ye Lesa wa mwiulu ne pano pa ntanda.+ 12 Pano nemusashijila namba, munchipile luchipo kwi Yehoba, mambo nemumwesha butemwe bubula kwaluka, ne anweba mukamweshe butemwe bubula kwaluka ku ba mu nzubo ya batata; kabiji mwafwainwa kumpa kayukilo ka kine.* 13 Mwafwainwa kupulusha batata ne bamama, bakolojami ne bankasami ba balume ne ba bakazhi, ne bonse bo baji nabo, kabiji mwafwainwa kwitupokolola* ku lufu.”+

14 Ponkapo bano banabalume bamwambijile’mba: “Inge tukabule kuba kino, Lesa aketwipaye!* Inge ukabule kubulañana kyo twaishila, ne atweba tukakumwesha butemwe bubula kwaluka ne bukishinka kimye Yehoba kyo aketupa kino kyalo.” 15 Kepo ebekizhizhe pa kipenze na lutambo, mambo nzubo yanji yalamankene na nsakwa ya muzhi. Waikelenga peulu ya nsakwa.+ 16 Kabiji wibambijile’mba: “Yainga ku mpunzha ya mitumba mukafyame konkakwa moba asatu, kuchina’mba aba babena kwimupupila bakemutaana. Inge aba babena kwimupupila babwelamo, kepo mukemana ne kuya.”

17 Aba banabalume bamwambijile’mba: “Kechi tukekala na mambo pa luno luchipo lo witulengela kuchipa ne,+ 18 kanatu ukabule kukasa uno muzhinge uchila pa kipenze mo witwikizhizha byo tukeya mu kyalo. Wafwainwa kukonkanya pamo mu nzubo yobe bashobe, bainobe, bakolojobe ne bankasobe ne bonse ba mu nzubo ya bashobe.+ 19 Kabiji yense ukalupuka pangye ya nzubo yobe, mashi anji akamushinkamana mwine, ne atweba kechi tukekala na mambo ne. Bino umvwe kintu kyatama kikamwekele* bakekala mu nzubo, mashi abo aketushinkamane. 20 Bino umvwe ukabulañane kyo twaishila,+ kechi tukekala na mambo pa luno luchipo lobe lo witulengela kuchipa ne.” 21 Aye wibambijile’mba: “Kikale monka mo mwaambila.”

Ponkapo wibambijile kuya ne abo bayile. Kabiji wakashile muzhinge uchila mu kipenze. 22 Byonkabyo, bayile ku mpunzha ya mitumba ne kwikalako moba asatu, posotu ne bebapupijilenga byo babwelelemo. Aba bebapupijilenga bebakebelenga mu mashinda onse, bino kechi bebataaine ne. 23 Kepo aba banabalume babiji bakunkulukile kufuma ku mpunzha ya mitumba ne kwabuka mukola kabiji bafikile kwi Yoshua mwana wa kwa Nuni. Bamubuujile bintu byonse bibamwekejile. 24 Ponkapo babuujile Yoshua amba: “Yehoba witupa kyalo kyonse.+ Kabiji bangikazhi bonse ba mu kyalo baakamwa bingi na mambo a atweba.”+

3 Kepo Yoshua abuukile lukelokelo, kabiji aye ne bena Isalela* bonse bafumineko ku Shitima+ ne kuya ku Yodano. Balaajile konkakwa saka bakyangye kwabuka.

2 Byo papichile moba asatu, bantangi+ bapitañene monse mu kampu 3 ne kukambizha bantu amba: “Byo musakumonatu jikwachi ja lulayañano lwa Yehoba Lesa wenu saka bejisenda ku bañanga bena Levi,+ mwafwainwa kufuma mu mapunzha enu ne kwijilondela. 4 Mwafwainwa kwendela palepa ne ajo makyubichi 2,000;* bino kechi mwafwainwa kufwenya kwipi najo ne, pa kuba’mba muyuke jishinda ja kuyamo, mambo mukyangye kukipitamo kala.”

5 Yoshua waambijile bantu amba: “Izhijikai,+ mambo kesha Yehoba ukemubila bintu bya kukumya.”+

6 Kabiji Yoshua waambijile bañanga amba: “Shikulai jikwachi+ ja lulayañano ne kutangilako kulutwe ya bantu.” Byonkabyo, ne abo bashikwile jikwachi ja lulayañano ne kutangilako.

7 Kepo Yehoba aambijile Yoshua amba: “Kufuma juba ja lelo nsakukutumbijika ku meso a bena Isalela bonse,+ pa kuba’mba bayuke’mba nkekala ne obewa+ byonkatu byo najinga ne Mosesa.+ 8 Wafwainwa kukambizha bañanga basenda jikwachi ja lulayañano amba: ‘Byo musakunyanta mu mema a mu Yodano, mwimane monka mu Yodano.’”+

9 Kabiji Yoshua waambijile bena Isalela amba: “Iyai kuno mumvwe byaamba Yehoba Lesa wenu.” 10 Kepo Yoshua ebabuujile’mba: “Akino kyo kyo musakuyukilako amba Lesa mumi uji ne anweba,+ ne kuba’mba aye ukapanga ku meso enu bena Kenana, bena Hiti, bena Hivi, bena Pelizi, bena Giligashi, bena Amoli ne bena Yebusi.+ 11 Talai! Jikwachi ja lulayañano lwa Nkambo wa pano pa ntanda ponse jatangilako kulutwe yenu mu Yodano. 12 Pano salaimo banabalume 12 mu mikoka ya bena Isalela, mu mukoka umo mufume mwanamulume umo,+ 13 kabiji maulu a bañanga basenda Jikwachi ja Yehoba, Nkambo wa pano pa ntanda ponse byo asakunyantatu* mu mema a mu Yodano, mema a mu Yodano abena kupita kufuma kunundu asakuleka kupita kabiji asakwijinga nobe a pa kizhiba.”*+

14 Onkao mambo, bantu byo bafumine mu matente abo saka bakyangye kwabuka Yodano, bañanga basendele jikwachi+ ja lulayañano batangijileko kulutwe ya bantu. 15 Aba basenda Jikwachi byo bafikile ku Yodano ne bañanga basendele Jikwachi byo banyanchile maulu abo mu mema ku kitulu (mu kimye kyonse kya kunowa, Yodano wayulanga kufikatu ne ku kitulu),+ 16 mema afuminenga kunundu ejingile. Ejingile nobe a pa kizhiba* kukafika ne ku Adama muzhi uji kwipi na Zaletana, kabiji mema ayilenga ku Kalunga ka Mema ka ku Alaba, Kalunga* ka Mukele aumine. Alekele kupita ne bantu baabukijile patalañana na Yeliko. 17 Bañanga basendele jikwachi ja lulayañano lwa Yehoba baubiletu monka baimena pa mushiji wauma+ pakachi ka Yodano aku bena Isalela saka babuka pa mushiji wauma,+ posotu ne kisaka kyonse byo kyaabukile Yodano.

4 Aku kisaka kyonse kyabukatu Yodano, Yehoba waambijile Yoshua amba: 2 “Usalemo banabalume 12 mu bantu, mu mukoka umo usalemo mwanamulume umo,+ 3 ne kwibakambizha’mba: ‘Tolai mabwe 12 aji pakachi ka Yodano, na paimena bañanga,+ ne kwiasenda ne kukeatula pa mpunzha po musakulaajila.’”+

4 Byonkabyo, Yoshua waichile banabalume 12 bo atongwele mu bena Isalela, mu mukoka umo wasajilemo mwanamulume umo, 5 kabiji Yoshua wibabuujile’mba: “Pitai kulutwe ya Jikwachi ja Yehoba Lesa wenu ne kuya pakachi ka Yodano, pa muntu pa muntu musende jibwe pa bipuzhi byenu monka mwayila kuvula kwa mikoka ya bena Isalela, 6 kuba’mba kikekale kayukilo mukachi kenu. Inge baana* benu bakemushikishe’mba, ‘Nanchi ano mabwe a ka?’+ 7 Mukebakumbule’mba: ‘Mema a mu Yodano alekele kupita kulutwe ya jikwachi+ ja lulayañano lwa Yehoba. Byo jaabukilenga Yodano, mema a mu Yodano alekele kupita. Ano mabwe akekala ke kivuluko* kya myaka ne myaka ku bena Isalela.’”+

8 Onkao mambo, bena Isalela baubile byonkatu bibakambizhe Yoshua. Batolele mabwe 12 pakachi ka Yodano byonkatu Yehoba byo amukambizhe Yoshua, kwesakana na kuvula kwa mikoka ya bena Isalela. Beasendele ku mpunzha ko bakalaajile ne kwiatula konkakwa.

9 Yoshua naye walumbikile mabwe 12 pakachi ka Yodano ponka panyanchile maulu a bañanga basendele jikwachi ja lulayañano,+ kabiji ano mabwe mo akiji kufikatu ne lelo jino.

10 Bañanga basendele Jikwachi baubiletu monka baimena pakachi ka Yodano posotu ne bintu byonse Yehoba byo akambizhe Yoshua kubuula bantu kuba byo byapwile, monkatu mwayijile bintu byonse Mosesa byo akambizhe Yoshua. Bantu bonse baabukile bukiji. 11 Aku bantu bonse babukatu, Jikwachi ja Yehoba ne bañanga baabukile saka bebamona ku bantu.+ 12 Kabiji bena Lubenyi, bena Gadi ne kichika kya mukoka wa bena Manase batangijileko saka betanchika+ kulutwe ya bena Isalela bakwabo, byonkatu bibakambizhe Mosesa.+ 13 Bashilikale nobe 40,000 benengezhezhe kulwa nkondo baabukile ku meso a Yehoba ne kuya mu bisanzangala bya Yeliko.

14 Pa jonkaja juba Yehoba watumbijikile Yoshua bena Isalela bonse saka batalako+ ne abo bamunemekele* bingi moba onse a bumi bwanji, byonkatu byo banemekelenga Mosesa.+

15 Kabiji Yehoba waambijile Yoshua amba: 16 “Kambizha bañanga basenda jikwachi+ ja Lushimuno kutuntukamo mu Yodano.” 17 Byonkabyo, Yoshua wakambizhe bañanga amba: “Tuntukaimo mu Yodano.” 18 Bañanga basendele jikwachi+ ja lulayañano lwa Yehoba byo batuntukile kufuma pakachi ka Yodano ne maulu a bañanga byo anyanchile ku kitulu, mema a mu Yodano atatwile kupita ne kuyula kufika ne ku kitulu+ byonka byo ajinga kala.

19 Bantu batuntukile mu Yodano pa juba ja bujikumi mu ñondo mutanshi, kabiji batebelejile ku Giligala+ ku mupaka uji ku musela wa Yeliko.

20 Kabiji mabwe 12 o bafumishe mu Yodano, Yoshua wialumbikile mu Giligala.+ 21 Kepo aambijile bena Isalela amba: “Inge mu kimye kya kulutwe, baana benu bakepuzhe bashabo amba, ‘Nanchi ano mabwe abena kulumbulula ka?’+ 22 Mwafwainwa kulumbulwila baana benu amba: ‘Bena Isalela baabukile Yodano pa mushiji wauma+ 23 kimye Yehoba Lesa wenu kyo aumishe mema a mu Yodano saka batalako, posotu ne byo baabukile byonkatu Yehoba Lesa wenu byo aubile pa Kalunga ka Mema Kachila byo ekomishe saka tumonako posotu ne byo twikabukile.+ 24 Waubile kino pa kuba’mba mitundu yonse ya bantu baji pano pa ntanda iyuke bulume buji na kuboko kwa Yehoba,+ ne kuba’mba mukamwakamwenga kimye kyonse Yehoba Lesa wenu.’”

5 Bamfumu bonse ba bena Amoli+ baikalanga ku bushiya* bwa Yodano ku muzhika, ne bamfumu bonse ba bena Kenana+ baikalanga kwipi na kalunga ka mema, byo baumvwine’mba Yehoba waumishe mema a mu Yodano ne bena Isalela saka bamonako kufikatu ne byo baabukile, baakaminwe*+ bingi ne bulume bonse bwibapwile* na mambo a bena Isalela.+

2 Pa kyonkakya kimye, Yehoba waambijile Yoshua amba: “Lenga mipenyi ya mabwe ne kutwala banabalume bena Isalela ku mukanda.”+ 3 Onkao mambo, Yoshua walengele mipenyi ya mabwe ne kutwala banabalume bena Isalela ku mukanda ku Gibeata-haalalota.*+ 4 Yoshua wibatwajile ku mukanda na mambo a kino: Banabalume bonse bena Isalela bafumine mu Ijipita, nzhita* yonse yafwijile mu kiselebwa byo bafuminenga mu Ijipita.+ 5 Bantu bonse bafumine mu Ijipita bayile ku mukanda, pakuba bantu bonse basemekejilwe mu kiselebwa kimye kyo bafumine mu Ijipita kechi bayile ku mukanda ne. 6 Bena Isalela baendele mu kiselebwa myaka 40+ posotu ne kino kisaka kyonse byo kyazhiile, ko kuba’mba nzhita yonse yafumine mu Ijipita yabujile kukookela jiwi ja Yehoba.+ Yehoba wachipile’mba kechi bakamona kyalo+ kyo achipile Yehoba ku bashakulu babo kwitupa ne,+ kyo kyalo kyavula mukaka ne buki.+ 7 Onkao mambo, pe abo wapingizhepo baana babo.+ Abano Yoshua bo bo atwajile ku mukanda; bebatwajile ku mukanda mambo kechi bayile ku mukanda byo bajinga pa lwendo ne.

8 Byo bapwishishe kutwala kisaka kyonse ku mukanda, batwajijile kwikala ponka po bajinga monka mu kampu posotu ne byo bakosele.

9 Kepo Yehoba aambijile Yoshua amba: “Ja lelo nafumyapo pe anweba myendeleko ya Ijipita.” Onkao mambo, aya mpunzha beitongola’mba Giligala*+ kufikatu ne lelo jino.

10 Bena Isalela batwajijile kwikala mu kampu ku Giligala, kabiji bajiile Kijiilo kya Lupitailo pa juba ja bu 14 ja ñondo+ mabanga mu bisanzangala bya Yeliko. 11 Kabiji byo bapwishishe kuja Kijiilo kya Lupitailo, batendekele kuja kajo ka mu kyokya kyalo, shinkwa wabula mbizho+ ne kajo ka museke ka kukanga pa jonkaja juba. 12 Kabiji manna alekele kumweka pa juba jalondejilepo kimye kyo bajiile kajo ka mu kyokya kyalo; manna alekele kwikala kajo ka bena Isalela,+ bino abo batendekele kuja kajo ka mu kyokya kyalo kya Kenana mu yenkawa mwaka.+

13 Yoshua byo ajinga kwipi na Yeliko, wainukile ne kumona muntu+ saka aimana kulutwe yanji wajinga na mpoko mu kuboko kwanji yo asomwene mu kikwa.+ Yoshua wayile ko ajinga ne kumushikisha’mba: “Nanchi muji ku lubaji lwetu nyi, inyi muji ku lubaji lwa balwanyi betu?” 14 Uno muntu wamukumbwile’mba: “Ine, bino amiwa naiya mambo nemukulumpe* wa nzhita ya Yehoba.”+ Ponkapo Yoshua waponene panshi kinkuvumene ne kumushikisha’mba: “Ñanyi kintu nkambo kyo musakumbuula amiwa kalume wenu?” 15 Uno mukulumpe wa nzhita ya Yehoba wakumbwile Yoshua amba: “Vuula makwabilo aji ku maulu obe, mambo mpunzha yo waimanapo yazhila.” Ponkapo Yoshua waubile byonkabyo.+

6 Bibelo bya Yeliko bebishinkile kya kine kine na mambo a kuchina bena Isalela; kabiji kafwako nangwa umo walupukilenga nangwa kutwela ne.+

2 Kepo Yehoba aambijile Yoshua amba: “Tala, nakupa Yeliko ne mfumu wanji ne babiyangala banji bajimo.+ 3 Anweba banabalume bonse ba nkondo, mumuzhokoloke muzhi, mumuzhokoloketu jimo. Abino byo byo mwafwainwa kuba pa moba atanu na jimo. 4 Kabiji bañanga batanu na babiji bakasende nsengo ya mikooko ilume itanu na ibiji ne kutangilako kulutwe ya Jikwachi. Bino pa juba ja butanu na bubiji, mwafwainwa kuzhokoloka muzhi jitanu na jibiji ne bañanga bafwainwa kuvumya nsengo.+ 5 Kimye kikavuma lusengo wa mukooko mulume, aku mumvwatu kuvuma* kwa lusengo, bashilikale bonse bafwainwa kubijika na jiwi ja peulu. Kepo nsakwa ya muzhi ikakunduka,+ ne bantu bafwainwa kunyukukilamo saka bashinkamanatu kulutwe.”

6 Onkao mambo, Yoshua mwana wa kwa Nuni waichile bañanga ne kwibambila’mba: “Shikulai jikwachi ja lulayañano, ne bañanga batanu na babiji basende nsengo ya mikooko ilume itanu na ibiji ne kutangilako kulutwe ya Jikwachi ja Yehoba.”+ 7 Kepo abuujile bashilikale amba: “Yainga mumuzhokoloke muzhi ne bashilikale+ bafwainwa kutangilako kulutwe ya Jikwachi ja Yehoba.” 8 Kabiji byonkatu Yoshua byo abuujile bashilikale, bañanga batanu na babiji basendele nsengo ya mikooko ilume itanu na ibiji ku meso a Yehoba batangijileko ne kuvumya nsengo, ne jikwachi ja lulayañano lwa Yehoba jibalondejilenga. 9 Kabiji bashilikale batangijileko kulutwe ya bañanga bavuminyenga nsengo, ne kunyuma kwajinga balondejilenga Jikwachi ne nsengo yatwajijile kuvuma.

10 Bino Yoshua wakambizhe bashilikale amba: “Kange mubijike ne, nangwa mawi enu kange omvwanyike ne. Mu kanwa kenu kechi mwafwainwa kufuma kyambo nangwa kimo ne, posotu juba jikafike jo nkemwambila namba, ‘Bijikai!’ Ne anweba mwafwainwa kubijika.” 11 Byonkabyo, wazhokolweshe Jikwachi ja Yehoba ku uno muzhi, bamuzhokolokeletu jimo, kabiji babwelele mu kampu ne kulaala monkamwa.

12 Juba jalondejilepo, Yoshua wabuukile lukelokelo, ne bañanga basendele Jikwachi+ ja Yehoba, 13 kabiji bañanga batanu na babiji basendele nsengo ya mikooko ilume itanu na ibiji batangijileko kulutwe ya Jikwachi ja Yehoba saka bavumya nsengo kwa kubula kuleka. Bashilikale batangijileko kulutwe yabo ne bashajile kunyuma saka balondela Jikwachi ja Yehoba, ne nsengo batwajijiletu na kwiivumya. 14 Pa juba ja bubiji bazhokolokele uno muzhi jimotu, kepo babwelele mu kampu. Abino byo byo baubile pa moba atanu na jimo.+

15 Pa juba ja butanu na bubiji babuukiletu lukelokelo, ku makya kabiji bazhokolokele muzhi jitanu na jibiji byonkatu byo baubile patanshi. Pa jonkaja juba po po bazhokolokele muzhi jitanu na jibiji.+ 16 Kabiji pa kimye kya butanu na bubiji, bañanga bavuminye nsengo ne Yoshua waambijile bashilikale amba: “Bijikai,+ mambo Yehoba wimupa muzhi! 17 Muzhi ne bintu byonse bijimo mwafwainwa kwibyonauna;+ byonse bya kwa Yehoba. Lehaba+ pite ye yenka ye mwafwainwa kupulusha, ne bonse bo aji nabo mu nzubo, mambo wafile baluwe bo twatumine.+ 18 Bino anweba kechi mwafwainwa kukwata ku kintu kyafwainwa konaunwa ne,+ pa kuba’mba mukabule kukumbwa ne kusenda kintu kyafwainwa konaunwa+ ne kulengela kampu wa bena Isalela kwikala kintu kyafwainwa konaunwa ne kumuletela bya malwa.*+ 19 Pakuba siliva ne ngolode ne bipe byonse bya mukuba ne bya kapotwe byazhila kwi Yehoba.+ Mwafwainwa kwibitwala mu nzubo ya Yehoba mo balamina bya buneme.”+

20 Kabiji nsengo byo beivuminye, bashilikale babijikile.+ Aku bashilikale bomvwatu kuvuma kwa lusengo, babijikile na jiwi ja peulu, ne nsakwa ya kundukile.+ Byo bapwishishe kuba bino, bashilikale bavukukijile mu muzhi saka bashinkamanatu kulutwe ne kumulukuka. 21 Baonawine bintu byonse byajinga mu muzhi ne kwipaya na mapoko banamulume ne banabakazhi, banyike ne bakulumpe, bañombe, mikooko ne bambongolo.+

22 Yoshua waambijile banabalume babiji bayile na kwendela ntanda amba: “Yainga mu nzubo ya pite mumulete ne bonse bo aji nabo byonkatu byo mwachipile kwi aye.”+ 23 Byonkabyo, aba bansongwalume baendejile ntanda batwelele ne kulupula Lehaba pamo ne bashanji, bainanji, bakolojanji ne bankasanji ne bonse bo ajinga nabo; balupwile kisemi kyanji kyonse+ ne kwibatwala bulongo ku mpunzha pangye ya kampu wa bena Isalela.

24 Kabiji basokele muzhi ne bintu byonse byajingamo. Bino siliva, ngolode, bipe bya mukuba ne bya kapotwe, bebitwajile mu nzubo ya Yehoba mo balaminanga bya buneme.+ 25 Pakuba Lehaba pite ne ba mu nzubo ya bashanji, ne bonse bo ajinga nabo, Yoshua+ kechi wibepayile ne; kabiji wikala mu Isalela kufika ne lelo jino,+ mambo wafile baluwe Yoshua bo atumine kuya na kwendela Yeliko.+

26 Pa kyokya kimye, Yoshua wachipile luno luchipo* amba: “Afingwe kwi Yehoba muntu ukeba kushimukulula uno muzhi wa Yeliko. Byo akaala kitendekesho kya muzhi, mwananji mubeji akafwe kabiji umvwe akemike binzhilo bya muzhi, mwananji mukala akafwe.”+

27 Byonkabyo, Yehoba wajinga ne Yoshua+ kabiji nkuwa yanji yakumbene pano pa ntanda ponse.+

7 Bino bena Isalela kechi bajinga na bukishinka ku bintu byafwainwe konaunwa ne, mambo Akana+ mwana wa kwa Kami, Kami mwana wa kwa Zabadi, Zabadi mwana wa kwa Zela wa mu mukoka wa bena Yuda, wasendelepo bintu byafwainwe konaunwa.+ Kabiji Yehoba wibazhingijile bingi bena Isalela.+

2 Kabiji Yoshua watumine banabalume kufuma ku Yeliko kuya ku Ai+ uji kwipi na Bete-avena ne ku musela wa Betele+ ne kwibambila’mba: “Yainga na kwendela kyalo.” Byonkabyo, bano banabalume bayile na kwendela Ai. 3 Byo babwelele kwi Yoshua bamubuujile’mba: “Kechi bashilikale bonse bafwainwa kuyako ne. Bashilikale biumbi bibiji nangwa bisatu bafwainwa kushinda Ai. Kange mukookeshe bantu bonse na mambo a kwibatuma kokwa ne, mambo abo bakepa bingi.”

4 Onkao mambo, bashilikale 3,000 bo bayileko, bino bebapangishe ku bena Ai.+ 5 Bena Ai batapile bantu 36, kabiji bebapangishe kufuma ku bibelo bya muzhi kukafika ne ku Shebalimu,* kabiji batwajijile na kwibatapa byo bakunkulukilenga. Na mambo a kino, bantu bazakaminenga* ne kukankalwa kuchinchika.

6 Ponkapo Yoshua watabwile bivwalo byanji ne kupona panshi kinkuvumene kulutwe ya Jikwachi ja Yehoba kufikatu ne mabanga, aye ne bakulumpe ba bena Isalela batwajijile na kwifukwila maloba ku mitwe yabo. 7 Kepo Yoshua aambile’mba: “Anweba Nkambo Mfumu Yehoba, mambo ka o mwaabushishe bano bantu Yodano ne kwitupana ku bena Amoli kuba’mba betwipaye? Nanchi inge twaikeletu ku bushiya* bwa Yodano! 8 Anweba Yehoba, ndekelaiko mambo, nanchi ñambe’mba ka bena Isalela byo banyema* balwanyi babo? 9 Inge bena Kenana ne bangikazhi bonse ba mu kyalo bakomvwe kino, baketuzhokoloka ne kuzhimañanya jizhina jetu pano pa ntanda; nanchi mukooba byepi na jizhina jenu jikatampe?”+

10 Yehoba wakumbwile Yoshua amba: “Buuka! Mambo ka o waponena panshi kinkuvumene? 11 Bena Isalela baleenga mambo. Bazhilulula lulayañano+ lo nebakambizhe kulama. Basendelepo bintu bimo byafwainwe konaunwa+ ne kwibiba+ kabiji bebifya mu bintu byabo.+ 12 Onkao mambo, bena Isalela kechi bakakonsha kushinda balwanyi babo ne. Bakaluluka ne kunyema balwanyi babo, mambo baikala ke kintu kyafwainwa konaunwa. Kechi nkekala nenu jibiji ne, kanatu mukonaune bintu byafwainwa konaunwa byo muji nabyo.+ 13 Imana uzhijike bantu!+ Wibabuule’mba, ‘Kesha mukezhijike, mambo Yehoba Lesa wa Isalela waamba’mba: “Anweba bena Isalela, muji na kintu kyafwainwa konaunwa. Kechi mukakonsha kushinda balwanyi benu ne, kanatu mukafumyemo kintu kyafwainwa konaunwa kyo muji nakyo. 14 Kesha lukelo mukakonkane pamo, mukoka pa mukoka, kabiji mukoka Yehoba ye akasala+ wafwainwa kufwenya kwipi, kisemi pa kisemi, kabiji kisemi Yehoba kyo akasala kyafwainwa kufwenya kwipi, nzubo pa nzubo, kabiji nzubo Yehoba yo akasala yafwainwa kufwenya kwipi, muntu pa muntu. 15 Muntu ye bakataana na kintu kyafwainwa konaunwa bakamusoka mu mujilo,+ ne bonse bo aji nabo, mambo wazhilulula lulayañano+ lwa Yehoba kabiji wauba kintu kya bumvu mu bena Isalela.”’”

16 Kepo Yoshua abuukile lukelokelo ne kuleta bena Isalela kwipi, mukoka pa mukoka, kabiji mukoka wa Yuda bamusajile. 17 Kabiji waambijile bisemi bya Yuda kufwenya kwipi ne kusala kisemi kya bena Zela,+ kepo aambijile kisemi kya bena Zela kufwenya kwipi, muntu pa muntu ne Zabadi bamusajile. 18 Kabiji aye waletele kwipi ba mu nzubo yanji, muntu pa muntu, ne Akana mwana wa kwa Kami, Kami mwana wa kwa Zabadi, Zabadi mwana wa kwa Zela wa mu mukoka wa bena Yuda, bamusajile.+ 19 Kepo Yoshua aambijile Akana amba: “Mwanami, nemeka Yehoba Lesa wa Isalela ne kusolola mambo o walenga. Mbuule kyo wauba. Kange umfye ne.”

20 Ponkapo Akana wabuujile Yoshua amba: “Kine yami nalenga mambo kwi Yehoba Lesa wa Isalela, kabiji abino byo byo nauba. 21 Byo namwene kivwalo kyawama kya mu bipukulwa bya ku Shinala+ ne mashekele* a siliva 200 ne kyela kimo kya ngolode kyanema mashekele 50 nebikumbilwe, onkao mambo nebisendele. Nebifya panshi mu tente wami ne mali aji munshi yabyo.”

22 Ponkapo Yoshua watumine baluwe ne abo bayile lubilo ku tente, kabiji kivwalo wikifile mu tente wanji ne mali ajinga munshi yakyo. 23 Onkao mambo, bebifumishe mu tente ne kwibileta kwi Yoshua ne ku bena Isalela bonse, kabiji bebitujile ku meso a Yehoba. 24 Kepo Yoshua ne bena Isalela bonse bo ajinga nabo basendele Akana+ mwana wa kwa Zela, siliva, akya kivwalo, kyela kya ngolode,+ baana banji ba balume ne baana banji ba bakazhi, bañombe banji, bambongolo banji, mikooko yanji, tente wanji ne bintu byanji byonse, kabiji bebiletele ku Kimpachiko* kya Akola.+ 25 Kabiji Yoshua waambile’mba: “Mambo ka o wituletelela bya malwa?*+ Yehoba usakuleta bya malwa pe obewa lelo jino.” Ponkapo bena Isalela bonse bamwashile mabwe,+ kabiji bebasokele mu mujilo.+ Byonkabyo, bonse bebashile mabwe. 26 Kepo balumbikile pe aye mulumba mukatampe wa mabwe, ukijipo ne lelo jino. Ponkapo bukaji bwa Yehoba bwapwile.+ O ene mambo aya mpunzha o itelelwa’mba Kimpachiko kya Akola* kufika ne lelo jino.

8 Kepo Yehoba aambijile Yoshua amba: “Kange ube moyo nangwa kukakilwa ne.+ Senda banabalume ba nkondo bonse ne kuya na kulwa na bena Ai. Tala, nakupa mfumu wa Ai, bantu banji, muzhi wanji ne kyalo kyanji.+ 2 Bena Ai ne mfumu wabo ukebobe byonka byo waubile muzhi wa Yeliko ne mfumu wabo,+ bino mwafwainwa kupukula bipukulwa byanji ne bilelwa byanji. Ukabike ba kubelamina kunyuma ya muzhi.”

3 Onkao mambo, Yoshua ne banabalume bonse ba nkondo bayile na kulwa na bena Ai. Yoshua wasajile babiyangala ba nkondo 30,000 ne kwibatuma bufuku. 4 Wibakambizhe’mba: “Umvwai, mwafwainwa kubelamina muzhi kunyuma yanji. Kange muye kwalepa na muzhi ne, kabiji anweba bonse mwinengezhezhe jimo. 5 Pakuba amiwa ne bantu bonse bo nji nabo tusakuya kwipi na muzhi, kabiji byo basakulupuka amba tulwe nabo byonka byo baubile patanshi,+ tusakwibanyema. 6 Byo basakulupuka ne kwitulondela, tusakwibatwala kwalepa na muzhi, mambo basakwamba’mba, ‘Betunyema byonka byo baubile patanshi.’+ Ne atweba tusakwibanyema. 7 Kepo anweba mwimane kufuma po musakufyama ne kulukuka muzhi; Yehoba Lesa wenu usakwimupaye. 8 Byo musakumulukuka muzhi, mwafwainwa kumusoka.+ Mwafwainwa kuba monka mwayila byaamba Yehoba. Umvwai, byo nemukambizha.”

9 Kepo Yoshua ebatumine ne abo bayile ku mpunzha ko babelamijile; babelamijile pakachi ka Betele ne Ai, ku muzhika wa muzhi wa Ai, pakuba Yoshua washajile na bantu abwa bufuku.

10 Byo apwishishe kuba bino, Yoshua wabuukile lukelokelo ne kukonkanya* nzhita, aye ne bakulumpe ba bena Isalela beitangijile ku muzhi wa Ai. 11 Banabalume bonse ba nkondo+ bo ajinga nabo bayile ne kufyama kwipi na muzhi. Batebelejile ku kabeta ka ku buyeke bwa Ai, kabiji pakachi kuya ku Ai pajinga kimpachiko. 12 Kabiji wasendele bantu kampe 5,000 ne kwibafya+ pakachi ka Betele+ ne Ai, ku muzhika wa muzhi. 13 Byonkabyo, bantu balengele kampu mukatampe ku kabeta ka ku buyeke bwa muzhi,+ ne nzhita ya kunyuma yajinga ku muzhika wa muzhi,+ kabiji bonkabwa bufuku Yoshua wayile pakachi ka kimpachiko.*

14 Mfumu wa Ai byo amwenetu kino, aye ne bantu ba mu muzhi, balupukile lubilo lukelo kuya na kulwa na bena Isalela, pa mpunzha patalañene na kisanzangala. Bino aye kechi wayukile amba kuji bamubelamina kunyuma ya muzhi ne. 15 Byo bebalukukile ku banabalume bena Ai, Yoshua ne bena Isalela bonse banyemejile mu jishinda jaya mu kiselebwa.+ 16 Kepo bantu bonse bajinga mu muzhi bebechile kuba’mba beye bebapangishe; kabiji byo bapangishenga Yoshua, abo bebatwajile kwalepa na muzhi. 17 Kafwako mwanamulume nangwa umo washajile mu Ai ne mu Betele wabujile kuya na kupangisha bena Isalela ne. Bashile muzhi kyashi ne kupangisha bena Isalela.

18 Ponkapo Yehoba waambijile Yoshua amba: “Tanyikila ku Ai+ jifumo jiji mu kuboko kobe, mambo nsakumupana mu kuboko kobe.”+ Byonkabyo, Yoshua watanyikijile jifumo jajinga mu kuboko kwanji mu muzhi. 19 Byo atanyikiletu kuboko kwanji, aba babelamijile baimene bukiji po bafyamine ne kunyemena mu muzhi ne kumulukuka. Ponkapotu muzhi bamusokele.+

20 Bena Ai byo baalulukile, bamwene bwishi saka bufutumuka mu muzhi, kafwako ko bakonsheshe kunyemena ne, mambo kechi bajingapo na bulume bwa kunyema ne. Kepo bantu banyemejile mu kiselebwa baalukijile aba bebapangishenga. 21 Yoshua ne bena Isalela bonse byo bamwene’mba aba babelamine muzhi, bamulukuka ne kumona bwishi saka bufutumuka mu muzhi, baalulukile ne kulukuka bena Ai. 22 Ne bakwabo baishile kufuma mu muzhi na kwibasambakana kya kuba bena Ai bajinga pakachi, bena Isalela bamo bajinga ku lubaji lumo ne bakwabo ku lubaji lukwabo, kabiji bebatapile kya kuba kafwako nangwa umo wapulukile nangwa washajilepo ne.+ 23 Pakuba mfumu wa Ai+ bamukwachile mumi ne kumuleta kwi Yoshua.

24 Bena Isalela byo bapwishishe kwipaya bena Ai bonse bajinga mungye, mu kiselebwa mo bebapangijile ne byo baipayile wapeleleko na mpoko, bena Isalela bonse po po babwelele ku Ai ne kwibatapa na mpoko bashajile mu muzhi. 25 Bonse bafwile pa joja juba, kutatwila ku banabalume ne banabakazhi, bajinga 12,000, ko kuba’mba bantu bonse ba mu Ai. 26 Yoshua kechi wikubwezhezhe kuboko kwanji ko atanyikijile jifumo+ ne, posotu ne byo aipayile bangikazhi bonse ba mu Ai.+ 27 Kabiji bena Isalela basendele bilelwa ne bipukulwa bya mu muzhi, monka mwayijile mikambizho Yehoba yo apele Yoshua.+

28 Kabiji Yoshua wasokele Ai ne kumushatu ke bikulukulu bya myaka ne myaka,+ kufikatu ne lelo jino. 29 Wakujikile mfumu wa Ai pa kichi kufikatu ne mabanga, kabiji juba byo jajinga pepi kuzhika, Yoshua wakambizhe kuba’mba mubiji wanji wafwa bamufumye pa kichi.+ Kepo bamubikile pa kibelo kya muzhi ne kulumbikapo mulumba mukatampe wa mabwe, yenka ujipo kufika ne lelo jino.

30 Kino kyo kimye Yoshua kyo ashimikile kya kusokelapo bitapisho kwi Yehoba, Lesa wa Isalela pa Mutumba wa Ebala,+ 31 byonkatu Mosesa kalume wa Yehoba byo akambizhe bena Isalela kabiji byonkatu byo kyanembwa mu buku wa Mizhilo+ ya Mosesa amba: “Kya kusokelapo bitapisho kya mabwe atuntulu a kubula kusonga na kyela.”+ Kabiji balambwijilepo milambo ya kusoka kwi Yehoba ne bitapisho bya mutende.+

32 Kepo pa ano mabwe anembelepo Mizhilo+ Mosesa yo anembejile bena Isalela.+ 33 Bena Isalela bonse, bakulumpe babo, bantangi babo ne bamitonyi babo baimenejile ku mbaji ibiji ya Jikwachi kulutwe ya bañanga bena Levi basendanga jikwachi ja lulayañano lwa Yehoba. Bantu bafumine ku byalo bingi ne bene bena kyalo bajinga konka.+ Kichika kimo kyaimenejile kulutwe ya Mutumba wa Gelizimu ne kichika kikwabo kyaimenejile kulutwe ya Mutumba wa Ebala,+ (byonkatu Mosesa kalume wa Yehoba byo akambizhe),+ na kupesha bena Isalela. 34 Byo apwishishe kuba bino, watangile byambo byonse bya Mizhilo na jiwi ja peulu,+ watangile mapesho+ ne mafingo,+ monka mwayijile byonse byanembwa mu buku wa Mizhilo. 35 Kafwako kyambo nangwa kimo Mosesa kyo akambizhe kyo abujile kutanga Yoshua na jiwi ja peulu kulutwe ya kipwilo kyonse kya bena Isalela ne,+ pajinga banabakazhi ne baana ne bantu bafumine ku byalo bingi+ bo baikalanga* nabo.+

9 Bamfumu bonse baikalanga ku muzhika wa Yodano,+ byo baumvwine bintu byamwekele, aba baikalanga mu mpunzha ya mitumba, mu Shefela, ku musezho wa Kalunga ka Mema Kakatampe,*+ ne kulutwe ya Lebanoni—bena Hiti, bena Amoli, bena Kenana, bena Pelizi, bena Hivi ne bena Yebusi+— 2 bakwatankene pamo kuba’mba balwe ne Yoshua ne bena Isalela.+

3 Bena Gibeona+ nabo baumvwine Yoshua byo aubile muzhi wa Yeliko+ ne Ai.+ 4 Onkao mambo, baingijishe maana ne kunengezha mpao mu mafukuta afwa ne kwiabika pa bambongolo babo pamo na mafukuta a biseba a binyu asabika o bakasaikile; 5 kabiji ku maulu abo bavwajileko ne makwabilo afwa o batupikile, ne bivwalo byatabauka. Shinkwa wabo yense waumine kabiji watebaukilenga. 6 Kepo bayile kwi Yoshua mu kampu ku Giligala+ ne kumwambila aye ne banabalume bena Isalela amba: “Twafuma ku kyalo kya kwalepa bingi. Pano layañanai lulayañano ne atweba.” 7 Bino banabalume bena Isalela baambijile bena Hivi+ amba: “Kampe mwikalatu pepi ne atweba. Pano twakonsha kulayañana byepi lulayañano ne anweba?”+ 8 Abo bakumbwile Yoshua amba: “Atweba twi bakalume* benu.”

Kabiji Yoshua wibashikishe’mba: “Nanchi yenu bañanyi, kabiji mwafuma pi?” 9 Abo bamukumbwile’mba: “Bakalume benu bafuma ku kyalo+ kya kwalepa bingi na mambo a jizhina ja Yehoba Lesa wenu, mambo twaumvwa nkuwa yanji ne bintu byonse byo aubile mu Ijipita+ 10 ne bintu byonse byo aubile ku bamfumu babiji ba bena Amoli bajinga ku bushiya* bwa Yodano, ko kuba’mba Sihona+ Mfumu wa Heshibonyi ne Oga+ Mfumu wa Bashana wajinga mu Ashatalota. 11 Onkao mambo, bakulumpe betu ne bangikazhi ba mu kyalo kyetu betwambijile’mba, ‘Sendai mpao ya pa lwendo ne kuya na kwibasambakana. Mukebabuule’mba: “Atweba tukekala bakalume benu;+ pano layañanai lulayañano ne atweba.”’+ 12 Uno shinkwa ye twasendele wakijingatu wa kyuya kimye kyo twafuminenga ku mazubo etu pa kwiya kuno ko muji. Pano talai wauma kabiji ubena kutebaukatu.+ 13 Kabiji ano mafukuta a biseba a binyu ajingatu a katataka kimye kyo twalongelemo, pano luno asabaika.+ Kabiji bivwalo byetu ne makwabilo etu byafwa na mambo a kulepa kwa lwendo.”

14 Ponkapo banabalume ba bena Isalela bashikwilepo* kajo kabo kamo, bino kechi baipwizhe Yehoba ne.+ 15 Onkao mambo, Yoshua walayañene nabo lulayañano lwa mutende+ ne kulayañana nabo lulayañano lwa kuba’mba bakekala bomi, kabiji bantangi ba jibumba nabo byo byo bachipile kwi abo.+

16 Byo papichile moba asatu kufuma kimye kyo balayañene nabo lulayañano, baumvwine’mba bekalatu kipikipi monka mu nyaunda yabo. 17 Kepo pa juba ja busatu bena Isalela baimene lwendo ne kufika mu mizhi yabo; mizhi yabo yajinga Gibeona,+ Kefila, Beelota ne Kiliata-yealimu.+ 18 Bino bena Isalela kechi balukukile bano bantu ne, mambo bantangi ba jibumba bachipile luchipo kwi abo mu jizhina ja Yehoba,+ Lesa wa Isalela. Onkao mambo, jibumba jonse jatendekele kunyinyita bantangi. 19 Ponkapo bantangi bonse baambijile jibumba jonse amba: “Na mambo a kuba twachipile luchipo kwi abo mu jizhina ja Yehoba Lesa wa Isalela, kechi twafwainwa kwiboba kintu kyatama ne. 20 Abino byo byo tusakuba: Tusakwibaleka na bumi pa kuba’mba Lesa abule kwituzhingijila na mambo a luchipo lo twachipile kwi abo.”+ 21 Kabiji bantangi banungilepo’mba: “Balekai bekale na bumi, pano bino, basakuchabanga nkunyi ne kutapula mema a jibumba jonse.” Abino byo bibalayile bakulumpe.

22 Ponkapo Yoshua wibechile ne kwibashikisha’mba: “Mambo ka o mwitubepejile ne kwamba’mba, ‘Twafuma ku mpunzha kwalepa,’ bino saka mwikalatu pepi?+ 23 Pano kufuma lelo mwafingwa,+ kabiji mukekalangatu bazha kikupu ba kuchaba nkunyi ne kutapula mema mu nzubo ya Lesa wami.” 24 Bamukumbwile Yoshua amba: “Twaubile kino na mambo a kuba atweba bakalume benu betubuujile patoka kuba’mba Yehoba Lesa wenu wakambizhe Mosesa kalume wanji kwimupa kino kyalo kyonse ne konauna bangikazhi bonse bajimo.+ Onkao mambo, twachiine kufwa na mambo a anweba.+ O ene mambo o twaubijile kino.+ 25 Pano tubilai lusa.* Tubai kintu kyonse kyo mwamona amba kyawama kabiji kyaoloka.” 26 Kabiji bino byo byo ebobile; wibapulwishe ku bena Isalela, kabiji kechi bebepayile ne. 27 Bino pa jonkaja juba, Yoshua wibapele mwingilo wa kuchaba nkunyi ne kutapula mema a jibumba+ ne a ku kya kusokelapo bitapisho kya Yehoba pa mpunzha yo akasala,+ kabiji baikele ke bazha kufikatu ne lelo jino.+

10 Adoni-zedeke Mfumu wa Yelusalema byo aumvwinetu amba Yoshua washinda muzhi wa Ai ne kumonauna, kabiji wauba muzhi wa Ai ne mfumu wanji+ byonkatu byo aubile muzhi wa Yeliko ne mfumu wanji,+ ne kuba’mba bena Gibeona balayañana lulayañano lwa mutende na bena Isalela+ kabiji babena kwikala nabo, 2 waumvwine moyo mukatampe,+ mambo Gibeona wajinga muzhi mukatampe, byonkatu biji mizhi ilamwa na mfumu. Wabayile kukila muzhi wa Ai,+ ne banabalume bonse bajingamo bajinga babiyangala. 3 Onkao mambo, Adoni-zedeke mfumu wa Yelusalema watumine mawi kwi Hohama mfumu wa Hebulona,+ kwi Pilama mfumu wa Yalamuta, kwi Yafiya mfumu wa Lakishi ne kwi Debila mfumu wa Egalona+ amba: 4 “Iyai munkwashe kulwa na muzhi wa Gibeona, mambo bangikazhi banji balayañana lulayañano lwa mutende ne Yoshua ne bena Isalela.”+ 5 Ponkapo, bamfumu ba bena Amoli batanu+—mfumu wa Yelusalema, mfumu wa Hebulona, mfumu wa Yalamuta, mfumu wa Lakishi ne mfumu wa Egalona—bakonkene pamo na mazhita abo, kabiji bayile ne kukatebelela ku Gibeona kuba’mba balwe nanji.

6 Kepo banabalume bena Gibeona batumine mawi kwi Yoshua ku kampu ku Giligala+ amba: “Kange mwibalekelele* bazha benu ne.+ Iyai bukiji! Tupokololai ne kwitukwasha! Bamfumu bonse ba bena Amoli bafuma ku mpunzha ya mitumba baiya na kwitulukuka.” 7 Onkao mambo, Yoshua wafumine ku Giligala na banabalume banji bonse ba nkondo ne babiyangala.+

8 Kepo Yehoba aambijile Yoshua amba: “Kange wibachine ne,+ mambo nebapana kwi obewa.+ Kafwako nangwa umo mwi abo usakukonsha kukushinda ne.”+ 9 Kabiji Yoshua wibalukukile kwa kubula kuketekela mambo waendele bufuku bonse kufuma ku Giligala. 10 Yehoba wibavulañenye ku meso a bena Isalela,+ kabiji bebepayile bavula bingi ku Gibeona, kwibapupila mu jishinda jatuntukila ku Bete-holona na kwibatapa kukafikatu ne ku Azeka ne ku Makeda. 11 Kabiji byo banyemenenga kufuma ku bena Isalela byo bafikile ku matelo a Bete-holona, Yehoba wanokeshe pe abo mvula wa mabwe akatampe kukafikatu ne ku Azeka ne abo bafwile. Kabiji aba bafwile na mvula wa mabwe bavujile kukila boba bo baipayile na mpoko ku bena Isalela.

12 Pa jonkaja juba Yehoba po po aipayile bena Amoli ku meso a bena Isalela, Yoshua waambile kwi Yehoba ne bena Isalela saka bomvwa’mba:

13 Byonkabyo, juba jaimene ne ñondo kechi waendele ne, posotu ne kisaka byo kyashinkenye na balwanyi bakyo. Nanchi kino kechi kyanembwa mu buku wa Yashala nenyi?+ Juba jaimetu pakachi ka jiulu kabiji kechi jazhikile bukiji ne, jaubiletu monka jaimena juba jonse. 14 Kechi kwakikalapo kala juba jiji nobe joja nangwa panyuma ya jino juba, Yehoba po aumvwijile jiwi ja muntu ne,+ mambo Yehoba walwijilengako bena Isalela.+

15 Ponkapo Yoshua pamo ne bena Isalela bonse babwelele ku kampu ku Giligala.+

16 Nangwa byonkabyo, bano bamfumu batanu banyemene ne kukafyama mu jiyengo ku Makeda.+ 17 Kepo bamubuujile Yoshua amba: “Bamfumu batanu bafyama mu jiyengo ku Makeda.”+ 18 Onkao mambo, Yoshua waambile’mba: “Alumwinaipo mabwe akatampe pa kibelo kya jiyengo ne kubikako banabalume bakwibasopa. 19 Pakuba anweba mwashala kange mwimane ne. Pupilai balwanyi benu ne kwibatapa saka mwibalondela panyuma.+ Kange mwibaswishe kutwela mu mizhi yabo ne, mambo Yehoba Lesa wenu wibapana mu maboko enu.”

20 Yoshua ne bena Isalela byo bapwishishe kwipaya bano bantu ne kwibavizha, kufumyakotu aba bapulukile banyemejile mu mizhi ya masakwa akosa, 21 bantu bonse babwelele mutende kwi Yoshua ku kampu ku Makeda. Kafwako muntu nangwa umo waesekele kwamba byambo byatama* pa bena Isalela ne. 22 Kepo Yoshua aambile’mba: “Shinkulaipo pa kibelo kya jiyengo ne kwibalupulamo mu jiyengo bamfumu batanu mwibalete kwi amiwa.” 23 Byonkabyo, bafumishe mu jiyengo bano bamfumu batanu ne kwibaleta kwi aye: mfumu wa Yelusalema, mfumu wa Hebulona, mfumu wa Yalamuta, mfumu wa Lakishi ne mfumu wa Egalona.+ 24 Bano bamfumu byo bebaletele kwi Yoshua, waichile banabalume bonse bena Isalela ne kwambila bakulumpe ba banabalume ba nkondo bo ayile nabo amba: “Fwenyai kwipi. Nyantai maulu enu pa mashingo a bano bamfumu.” Byonkabyo, bafwenyenye kwipi ne kunyata maulu pa mashingo abo.+ 25 Kabiji Yoshua wibambijile’mba: “Kange mube moyo nangwa kukakilwa ne.+ Chinchikai ne kukosa, mambo abino Yehoba byo byo akoba balwanyi benu bonse bo mubena kulwa nabo.”+

26 Kepo Yoshua ebatapile ne kwibepaya ne kwibakobeka pa bichi bitanu, kabiji bakobekelwe pa bichi kufikatu ne mabanga. 27 Juba byo jazhikile, Yoshua wakambizhe’mba bebakobolepo pa bichi+ ne kwibataya mu jiyengo mo bafyamine. Kepo baalumwijilepo mabwe akatampe pa kibelo kya jiyengo kabiji po po aji kufika ne lelo jino.

28 Yoshua washinjile muzhi wa Makeda+ pa joja juba kabiji waipayile bangikazhi na mpoko. Waipayile mfumu wanji ne bonse* bajingamo, kafwako nangwa umo wapulukilemo ne.+ Waubile mfumu wa Makeda+ byonkatu byo aubile mfumu wa Yeliko.

29 Kabiji Yoshua pamo ne bena Isalela bonse bafumine ku Makeda ne kuya ku muzhi wa Libina na kulwa na bena Libina.+ 30 Yehoba wapaine ne uno mfumu+ mu maboko a bena Isalela ne abo bamonawine na mpoko ne bantu bonse* bajingamo, kafwako nangwa umo wapulukilemo ne. Byonkabyo, uno mfumu bamubile byonkatu byo baubile mfumu wa Yeliko.+

31 Kabiji Yoshua pamo ne bena Isalela bonse bafumine ku Libina ne kuya ku muzhi wa Lakishi+ ne kukatebelela konka ne kulwa nanji. 32 Yehoba wapaine muzhi wa Lakishi mu maboko a bena Isalela, ne abo bamushinjile pa juba ja bubiji. Bamonawine na mpoko+ ne bantu bonse* bajingamo byonkatu byo baubile muzhi wa Libina.

33 Kepo Holama mfumu wa Gezela+ ayile na kukwasha muzhi wa Lakishi, bino aye ne bantu banji bebatapile kwi Yoshua posotu ne byo pabujile kupulukapotu nangwa umo.

34 Kabiji Yoshua pamo ne bena Isalela bonse bafumine ku Lakishi ne kuya ku muzhi wa Egalona+ ne kukatebelela konka ne kulwa nanji. 35 Bamushinjile pa jonkaja juba ne kumonauna na mpoko. Pa jonkaja juba baipayile bantu bonse* bajingamo, byonkatu byo baubile muzhi wa Lakishi.+

36 Kabiji Yoshua pamo ne bena Isalela bonse bafumine ku Egalona ne kuya ku muzhi wa Hebulona+ ne kulwa nanji. 37 Bamushinjile ne kumonauna na mpoko, mfumu wanji, tumizhi twanji ne bantu bonse* bajingamo, kafwako nangwa umo wapulukilemo ne. Wamonawine ne bantu bonse* bajingamo byonkatu byo aubile muzhi wa Egalona.

38 Kyapeleleko Yoshua pamo ne bena Isalela bonse bayile ku Debila+ ne kulwa nanji. 39 Wamushinjile, mfumu wanji ne tumizhi twanji tonse, kabiji baonawine bantu bonse* bajingamo na mpoko,+ kafwako nangwa umo wapulukilemo ne.+ Muzhi wa Debila ne mfumu wanji, wamubile byonkatu byo aubile Hebulona ne Libina ne mfumu wanji.

40 Yoshua washinjile kyalo kyonse kya mitumba, Negeba, Shefela,+ mikolo ne bamfumu babo bonse, kafwako nangwa umo wapulukilemo ne; byonsetu byapemenenga wibyonawine,+ byonkatu Yehoba Lesa wa Isalela byo akambizhe.+ 41 Yoshua wibashinjile kufuma ku Kadeshi-balaneya+ kukafika ne ku Gaza+ ne kyalo kyonse kya Goshenyi+ kukafika ne ku Gibeona.+ 42 Yoshua washinjile bano bamfumu bonse ne byalo byabo pa kimye kimotu, mambo Yehoba Lesa wa Isalela ye walwijilengako bena Isalela.+ 43 Kepo Yoshua ne bena Isalela bonse babwelele ku kampu ku Giligala.+

11 Yabina mfumu wa Hazola byo aumvwinetu byamwekele, watumine mawi kwi Yobaba mfumu wa Madona,+ ne kwi mfumu wa Shimilona, ne kwi mfumu wa Akashafwa,+ 2 ne ku bamfumu bajinga ku kabeta ka ku buyeke bwa mpunzha ya mitumba, ne ku boba bajinga mu misanza* ku kabeta ka ku bulenge bwa Kineleta, ne ku boba bajinga mu Shefela ne ku mikolo ya Dola+ ku muzhika, 3 ku bena Kenana+ bajinga ku musela ne ku muzhika, ku bena Amoli+, ku bena Hiti, ku bena Pelizi ne ku bena Yebusi bajinga mu mpunzha ya mitumba, ne ku bena Hivi+ bajinga munshi ya mutumba wa Helemone+ mu kyalo kya Mizipa. 4 Byonkabyo, baishile na mazhita abo onse, avula bingi nobe busenga bwa ku kitulu kya kalunga ka mema, pamo na bambili bavula bingi ne makalaki a nkondo avula. 5 Abano bamfumu bonse baumvwañene kusambakana pamo kabiji baishile na kutebelela bonse pamo ku mema a ku Meloma amba balwe na bena Isalela.

6 Ponkapo Yehoba waambijile Yoshua amba: “Kange wibachine ne,+ mambo kesha pa kyonka kino kimye, nkebapana bonse saka bafwa ku bena Isalela. Bambili babo ukebachibe mishipeshipe ya ku bijoma+ byabo kabiji makalaki abo wafwainwa kwiasoka mu mujilo.” 7 Yoshua pamo na banabalume ba nkondo bonse balukukile bano bantu ku mema a ku Meloma kwa kubula kuketekela. 8 Yehoba wibapaine mu maboko a bena Isalela,+ kabiji bebashinjile ne kwibapangisha kukafika ne ku Shidona Mukatampe+ ne ku Misalefota-maimu,+ ne ku Kimpachiko kya Misipa ku musela, kabiji bebepayiletu bonse kechi pashajilepotu nangwa umo ne.+ 9 Kepo Yoshua ebobile byonkatu byamubuujile Yehoba; wachibile mishipeshipe ya bambili babo ne kusoka makalaki abo mu mujilo.+

10 Kabiji Yoshua waalulukile ne kushinda muzhi wa Hazola ne kutapa mfumu wanji na mpoko,+ mambo muzhi wa Hazola ye wajinga kala muzhi mukatampe wa buno bufumu bonse. 11 Bonse* bajingamo bebatapile na mpoko ne kwibonauna.+ Kafwako nangwa umo wapemenenga washajilemo ne.+ Kepo asokele muzhi wa Hazola na mujilo. 12 Yoshua washinjile mizhi yonse ya bano bamfumu ne kushinda bamfumu bayo bonse na mpoko.+ Wibepayile bonse+ byonkatu Mosesa kalume wa Yehoba byo akambizhe. 13 Bino bena Isalela kechi basokele mizhi yonse yajinga pa milumba ya masala ne, kanatu muzhi wa Hazola; ye yenkatu Yoshua ye asokele. 14 Bipukulwa byonse bya mu ino mizhi ne bilelwa, bebipukwile bena Isalela.+ Batapile bantu bonse na mpoko posotu ne byo bebavizhizhe bonsetu pelu.+ Kechi bashilepo mumi nangwa umo ne.+ 15 Byonkatu Yehoba byo akambizhe Mosesa kalume wanji, ne Mosesa byo byo akambizhe Yoshua,+ kabiji Yoshua byo byo aubile. Kechi washilepo kuba kintu nangwa kimo Yehoba kyo akambizhe Mosesa ne.+

16 Yoshua washinjile kino kyalo kyonse, mpunzha ya mitumba, Negeba+ yense, kyalo kya Goshenyi kyonse, Shefela,*+ Alaba,+ ne mpunzha ya mitumba ya Isalela ne mapunzha a mwakunama, 17 kufuma ku Mutumba wa Halaka, wakafika ku Seila ne ku Baela-gadi+ ku Kimpachiko kya Lebanoni munshi ya Mutumba wa Helemone,+ wakwachile bamfumu babo bonse ne kwibashinda kabiji wibepayile. 18 Yoshua walwile nkondo na bano bamfumu bonse pa kimye kyabaya. 19 Kafwako muzhi walayañene lulayañano lwa mutende na bena Isalela ne, kanatu bena Hivi baikalanga mu Gibeona.+ Bashala bonse bebashinjile mu nkondo.+ 20 Yehoba ye waswishishe michima yabo kukosa+ kuba’mba balwe nkondo na bena Isalela, pa kuba’mba ebonaune kwa kubula kwibobila lusa.+ Bebavizhizhe byonkatu Yehoba byo akambizhe Mosesa.+

21 Pa kyonkakya kimye, Yoshua wavizhizhe bena Anaki+ ku mpunzha ya mitumba, mu Hebulona, mu Debila, mu Anaba ne mu mpunzha yonse ya mitumba ya Yuda ne mpunzha yonse ya mitumba ya Isalela. Yoshua wibepayile ne konauna mizhi yabo.+ 22 Kafwako mwina Anaki nangwa umo washajile mu kyalo kya bena Isalela ne; bashajiletu+ mu Gaza,+ mu Gata+ ne mu Ashadoda.+ 23 Byonkabyo, Yoshua washinjile kyalo kyonse byonkatu Yehoba byo alayile Mosesa,+ kabiji Yoshua wikipaine kwikala kya buswanyi ku bena Isalela kupichila mu kwikyabanya monka mwayijile mikoka yabo.+ Kabiji mu kyalo kechi mwajingapo nkondo ne.+

12 Bamfumu bajinga mu kyalo bena Isalela bo bashinjile, bena kyalo kyo batambwile kwikala ke kyabo ku musela wa Yodano kufuma ku Kimpachiko kya Alanonyi*+ kukafika ne ku Mutumba wa Helemone+ ne Alaba yense ku musela, bajinga:+ 2 Sihona+ Mfumu wa bena Amoli waikalanga mu Heshibonyi kabiji walaminenga kufuma ku Aloa,+ wajinga kwipi na Kimpachiko kya Alanonyi*+ ne pakachi ka kimpachiko ne lubaji lumo lwa Gileada kukafika ne ku Kimpachiko* kya Yaboka kumupaka na bena Amonyi. 3 Kabiji walaminenga ne mu Alaba kukafikatu ne ku Kalunga ka Mema ka Kineleta*+ ku musela ne ku Kalunga ka Mema ka Alaba, Kalunga ka Mema ka Mukele,* kukafika ne ku musela kutala ja Bete-yeshimota ne ku kabeta ka ku bulenge munshi ya mikolo ya Pishika.+

4 Ne nyaunda ya kwa Oga+ Mfumu wa Bashana, wapeleleko mu bena Lefwaimu+ kabiji waikalanga mu Ashatalota ne mu Edeleyi 5 kabiji walaminenga kyalo kyajinga ku Mutumba wa Helemone, mu Saleka ne mu Bashana+ yense kukafika ne ku mupaka na bena Geshula, bena Maakata+ ne lubaji lumo lwa Gileada kufika ne ku nyaunda ya kwa Sihona Mfumu wa Heshibonyi.+

6 Mosesa kalume wa Yehoba ne bena Isalela bo bebashinjile,+ kepo Mosesa kalume wa Yehoba apaine kyalo kyabo ku bena Lubenyi, bena Gadi ne kichika kya mukoka wa bena Manase kwikala ke kyabo.+

7 Abano bo bamfumu bajinga mu kyalo Yoshua ne bena Isalela bo bashinjile ku muzhika wa Yodano, kufuma ku Baela-gadi+ mu Kimpachiko kya Lebanoni+ kukafika ne ku Mutumba wa Halaka+ yenka wafika ne ku Seila,+ kabiji Yoshua wapaine kyalo kyabo ku mikoka ya bena Isalela kwikala ke kyabo,+ 8 ku mpunzha ya mitumba, mu Shefela, mu Alaba, ku mikolo, mu kiselebwa ne mu Negeba+ kyalo kya bena Hiti, bena Amoli,+ bena Kenana, bena Pelizi, bena Hivi ne bena Yebusi:+

13 Yoshua wakotele ne myaka yanji yavujile bingi.+ Onkao mambo, Yehoba wamwambijile’mba: “Obewa wakota ne myaka yobe yavula; pano bino, kwakishala kyalo kyabaya kya kutambula.* 2 Akino kyo kyalo kyashalako:+ bibunji byonse bya bena Filishitiya ne bya bena Geshula+ 3 (kufuma pasangila Mukola wa Nile* ku musela wa* Ijipita kukafika ne ku mupaka wa Ekelona ku kabeta ka ku buyeke, yonka yo bamonanga kala amba nyaunda ya bena Kenana)+ kuvwangakotu ne bamfumu batanu ba bena Filishitiya+—bena Gaza, bena Ashadoda,+ bena Ashekelona,+ bena Gata,+ bena Ekelona;+ kyalo kya bena Avi+ 4 kiji ku kabeta ka ku bulenge; kyalo kyonse kya bena Kenana; muzhi wa Meala, yenka wa bena Shidona+ kukafikatu ne ku Afeki ne ku mupaka wa bena Amoli; 5 kyalo kya bena Gebala+ ne Lebanoni yense ku musela, kufuma ku Baela-gadi munshi ya Mutumba wa Helemone kufika ku Lebo-hamata;*+ 6 bangikazhi bonse ba mu mpunzha ya mitumba, kufuma ku Lebanoni+ kufika ku Misalefota-maimu;+ ne bena Shidona+ bonse. Nkebapanga* kufuma ku bena Isalela.+ Ukekipane ku bena Isalela kwikala buswanyi, byonkatu byo nakukambizha.+ 7 Wafwainwa kwabanya kino kyalo ku mikoka itanu na ina ne ku kichika kya mukoka wa bena Manase kwikala buswanyi.”+

8 Lubaji lukwabo lwa mukoka, bena Lubenyi ne bena Gadi batambwile buswanyi bwabo bo ebapele Mosesa ku bushiya bwa Yodano ku musela, byonkatu Mosesa kalume wa Yehoba byo ebapele:+ 9 kufuma ku Aloa+ uji kwipi na Kimpachiko kya Alanonyi*+ ne muzhi uji pakachi ka kimpachiko ne ku mutunta* konse kwa Medeba kukafika ne ku Dibona; 10 ne mizhi yonse ya kwa Sihona Mfumu wa bena Amoli, walaminenga mu Heshibonyi kukafikatu ne ku mupaka wa bena Amonyi;+ 11 ne Gileada ne nyaunda ya bena Geshula ne bena Maakata+ ne Mutumba yense wa Helemone ne Bashana+ yense kukafikatu ne ku Saleka;+ 12 ne monse mwapichile bufumu bwa kwa Oga mu Bashana, walaminenga mu Ashatalota ne mu Edeleyi. (Ye wapeleleko mu bena Lefwaimu.)+ Mosesa wibashinjile ne kwibapangamo.*+ 13 Bino bena Isalela kechi bapangilemo*+ bena Geshula ne bena Maakata ne, mambo bena Geshula ne bena Maakata bekala mu bena Isalela kufika ne lelo jino.

14 Mukoka wa bena Levi ye yenkatu ye abujile kupa buswanyi.+ Milambo ya kusoka pa mujilo kwi Yehoba Lesa wa Isalela bo buswanyi bwabo,+ byonkatu byo ebalayile.+

15 Kabiji Mosesa wapele buswanyi mukoka wa bena Lubenyi monka mwayijile bisemi byabo, 16 ne nyaunda yabo yafumine ku Aloa, uji kwipi na Kimpachiko kya Alanonyi* ne muzhi uji pakachi ka kimpachiko ne konse ku mutunta ku Medeba; 17 Heshibonyi ne mizhi yanji yonse+ yajinga ku mutunta, Dibona, Bamoti-baela, Bete-baela-meona,+ 18 Yahaza,+ Kedemota,+ Mefwata,+ 19 Kiliataimu, Sibima+ ne Zeleta-shahala uji pa mutumba wa ku kimpachiko,* 20 Bete-peola, mikolo ya Pishika,+ Bete-yeshimota,+ 21 mizhi yonse yajinga ku mutunta, ne monse mwapichile bufumu bwa kwa Sihona Mfumu wa bena Amoli, yenka walaminenga mu Heshibonyi.+ Mosesa wamushinjile+ ne bamfumu ba mu Mijanyi, Evi, Lekema, Zula, Hula, ne Leba,+ ne babitumbafumu* ba kwa Sihona bonka baikalanga mu kyalo. 22 Balamu+ mwana wa kwa Beola, ñanga wa lubuko,+ ye ye batapile na mpoko ku bena Isalela pamo na bakwabo bo baipayile. 23 Mupaka wa bena Lubenyi wajinga Yodano; kabiji ino nyaunda yo yajinga buswanyi bwa bena Lubenyi monka mwayijile bisemi byabo, pamo na mizhi ne mande ayo.

24 Kabiji Mosesa wapele mukoka wa bena Gadi buswanyi, wapele bena Gadi monka mwayijile bisemi byabo, 25 kabiji mu nyaunda yabo mwajinga ne Yazela+ ne mizhi yonse ya Gileada ne kichika kya kyalo kya bena Amonyi+ kukafika ne ku Aloa, watalañana na Laba;+ 26 ne kufuma ku Heshibonyi+ kufika ku Lamata-mizipe ne Betonimu, ne kufuma ku Mahanaimu+ kufika ku mupaka wa Debila; 27 ne mu kimpachiko* kya Bete-halama, Bete-nimila,+ Sukota,+ Zafona ne monse mwapichile bufumu bwa kwa Sihona Mfumu wa Heshibonyi,+ Yodano ye wajinga mupaka kufuma kwapelela Kalunga ka Mema ka Kineleta*+ ku bushiya bwa Yodano ku musela. 28 Abuno bo bwajinga buswanyi bwa bena Gadi monka mwayijile bisemi byabo, pamo na mizhi ne mande ayo.

29 Kabiji Mosesa wapele buswanyi kichika kya mukoka wa bena Manase, wapele kichika kya mukoka wa bena Manase monka mwayijile bisemi byabo.+ 30 Kabiji nyaunda yabo yafumine ku Mahanaimu+ ne kupita monse mu Bashana, monse mwapichile bufumu bwa kwa Oga Mfumu wa Bashana ne mizhi yonse ya matente a kwa Yaila+ mu Bashana, yonse pamo yajinga mizhi 60. 31 Kabiji lubaji lumo lwa Gileada, Ashatalota ne Edeleyi,+ mizhi mwapichile bufumu bwa kwa Oga mu Bashana, beipaine ku baana ba kwa Makila+ mwana wa kwa Manase, beipaine ku kichika kya baana ba kwa Makila monka mwayijile bisemi byabo.

32 Abuno bo bwajinga buswanyi Mosesa bo ebapele mu biselebwa bya Moabu ku bushiya bwa Yodano, ku musela wa Yeliko.+

33 Bino ba mu mukoka wa bena Levi, Mosesa kechi wibapelepo buswanyi ne.+ Yehoba Lesa wa Isalela bo buswanyi bwabo, byonkatu byo ebalayile.+

14 Bino byo bintu bena Isalela byo batambwile kwikala ke buswanyi bwabo mu kyalo kya Kenana, byo bebapele kuswana kwi Eleaza ñanga ne Yoshua mwana wa kwa Nuni ne bakulumpe ba bikota bya mikoka ya bena Isalela.+ 2 Buswanyi bwabo bebwabenye kupichila mu kuta bubale,+ byonkatu Yehoba byo akambizhe kupichila mwi Mosesa kupa mikoka itanu na ina ne kichika kya mukoka.+ 3 Mosesa wapaine buswanyi ku mikoka ibiji ikwabo ne kichika kya mukoka ku bushiya* bwa Yodano,+ kabiji bena Levi kechi wibapelepo kya buswanyi mukachi kabo ne.+ 4 Baana ba kwa Yosefwa bo bajinga mikoka ibiji,+ Manase ne Efelaimu;+ kabiji abo kechi bapelepo bena Levi mpunzha ne, kanatu mizhi+ yonka ya kwikalamo ne mapunzha ayo a kujishishamo banyama babo ba kulela, bañombe ne mikooko ne bipe byabo.+ 5 Onkao mambo, bena Isalela baabenye kyalo byonkatu Yehoba byo akambizhe Mosesa.

6 Kepo banabalume bena Yuda baishile kwi Yoshua mu Giligala,+ kabiji Kaleba+ mwana wa kwa Yefune mwina Kenizi wamwambijile’mba: “Anweba mwayukishatu bulongo bintu Yehoba byo aambijile+ Mosesa, muntu wa Lesa+ wa kine pa mambo a anweba ne amiwa ku Kadeshi-balaneya.+ 7 Najinga na myaka 40 kimye Mosesa kalume wa Yehoba kyo antumine kufuma ku Kadeshi-balaneya kuya na kwendela kyalo,+ kabiji naletele sawakya wawama bingi.*+ 8 Nangwa kya kuba balongo bami bo nayile nabo balengejile bantu kuchina,* bino amiwa nalondejile Yehoba Lesa wami na muchima yense.+ 9 Mosesa wachipile pa joja juba amba: ‘Mpunzha yonse panyanchile kulu kobe ikekala buswanyi bobe ne bwa baana bobe bwa myaka, mambo walondela Yehoba Lesa wami na muchima yense.’+ 10 Byonkatu byo alayile,+ Yehoba wandama na bumi+ ino myaka 45 kufuma kimye Yehoba kyo alayile uno mulaye kwi Mosesa, bena Isalela byo baendelenga mu kiselebwa;+ nafikizha myaka 85, kabiji po nkiji. 11 Ne lunotu nakikosa byonkatu byo nakosele kimye Mosesa kyo antumine. Bulume bwami bwa kulwa nkondo ne kwingilatu mingilo ikwabo bukijitu byonka byo bwajinga pa kyokya kimye. 12 Onkao mambo, mpai ino mpunzha ya mitumba yo andayile Yehoba pa joja juba. Nangwa kya kuba pa joja juba mwaumvwine’mba mo mwaikalanga bena Anaki+ bajinga na mizhi iji na masakwa akatampe akosa,+ kine* Yehoba ukekala ne amiwa+ kabiji nkebapangamo,* byonkatu Yehoba byo alayile.”+

13 Onkao mambo, Yoshua wamupesheshe ne kupana Hebulona kwi Kaleba mwana wa kwa Yefune kwikala buswanyi bwanji.+ 14 O ene mambo Hebulona o aikela wa kwa Kaleba mwana wa kwa Yefune mwina Kenizi kwikala buswanyi bwanji kufika ne lelo jino, mambo walondejile Yehoba Lesa wa Isalela na muchima yense.+ 15 Jizhina ja Hebulona kala jajinga Kiliata-alaba+ (Alaba ye muntu wayile nkuwa mu bena Anaki). Kabiji mu kyalo kechi mwajingapo nkondo ne.+

15 Kyalo kyo bapele*+ mukoka wa bena Yuda monka mwayijile bisemi byabo kyafikile ku mupaka wa Edomu+ mu kiselebwa kya Zini ne kukapelela ku Negeba ku kabeta kanji ka ku bulenge. 2 Mupaka wabo wa ku kabeta ka ku bulenge wafumine kwapelela Kalunga ka Mukele,*+ ku kiito kyatala ku kabeta ka ku bulenge. 3 Kabiji wafikile ku kabeta ka ku bulenge bwa Akalabimu,+ kukafika ne ku Zini, kepo afumine ku kabeta ka ku bulenge kuya ku Kadeshi-balaneya+ kukafika ne ku Hezelona ne ku Adala, kabiji wachimpukile kuya ku Kalaka. 4 Kepo mupaka apichile ku Azimona+ ne kukafika ku Kakola* ka Ijipita,+ kabiji wakapelejile ku Kalunga ka Mema.* Uno ye wajinga mupaka wabo wa ku kabeta ka ku bulenge.

5 Mupaka wa ku musela wajinga Kalunga ka Mukele* kufika kwapelela Yodano, kabiji mupaka wa ku kabeta ka ku buyeke wajinga ku kiito kya kalunga ka mema kwasangila Yodano.+ 6 Mupaka wafikile ku Bete-hogala+ ne kukapita ku kabeta ka ku buyeke bwa Bete-alaba,+ kabiji mupaka wakafikile ku jibwe ja kwa Bohana+ mwana wa kwa Lubenyi. 7 Kabiji mupaka wafikile ne ku Debila ku Kimpachiko* kya Akola+ ne kuchimpukila ku kabeta ka ku buyeke bwa Giligala,+ uji na ku jishinda jatuntukila ku Adumimu uji ku kabeta ka ku bulenge bwa kakola, kabiji mupaka wakapichile ku mema a ku Ene-shemeshi,+ kabiji wakapelejile ku Ene-logela.+ 8 Kabiji mupaka wapichile ku Kimpachiko kya Mwana wa kwa Hinomu+ mu mikolo ya Yebusi+ ku kabeta ka ku bulenge, ko kuba’mba Yelusalema,+ kabiji mupaka wakapichile peulu ya mutumba watalañana na Kimpachiko kya Hinomu ku muzhika kiji kwapelela Kimpachiko* kya Lefwaimu ku kabeta ka ku buyeke. 9 Kabiji mupaka wafumine peulu ya mutumba kukafika ku nsulo ya mema a ku Nefetoa,+ kabiji wakafikile ku mizhi iji ku Mutumba wa Efulona; kabiji mupaka wafumine ku Baelaya, ko kuba’mba Kiliata-yealimu.+ 10 Kabiji mupaka wachimpukile kufuma ku Baelaya ku muzhika kufika ku Mutumba wa Seila ne kupitaila mikolo ya Mutumba wa Yealimu ku kabeta ka ku buyeke, ko kuba’mba Kesalona, kabiji wapichile ku Bete-shemeshi+ kukafika ku Timina.+ 11 Kabiji mupaka wafikile ku mukolo wa Ekelona+ ku kabeta ka ku buyeke, kabiji mupaka wafumine ku Shikelona ne kukapita ku Mutumba wa Baelaya kabiji wakafikile ne ku Yabanela, kabiji mupaka wakapelejile ku kalunga ka mema.

12 Kabiji mupaka wa ku muzhika wajinga ku Kalunga ka Mema Kakatampe*+ ne ku kitulu kyako. Uno ye wajinga mupaka wa ba mu kisemi kya kwa Yuda monka mwayijile bisemi byabo kuzhokoloka konse konse.

13 Kabiji Kaleba+ mwana wa kwa Yefune, wamupele mpunzha mukachi ka ba mu kisemi kya kwa Yuda byonkatu Yehoba byo akambizhe Yoshua, ko kuba’mba Kiliata-alaba (Alaba ye wajinga shanji Anaki), yenka Hebulona.+ 14 Onkao mambo, Kaleba wapangilemo baana basatu ba kwa Anaki+: Sheshai, Ahimanyi ne Talamai,+ ba mu kisemi kya kwa Anaki. 15 Kabiji wafumine kokwa ne kuya na kulwa na bangikazhi ba ku Debila.+ (Jizhina ja Debila kala jajinga Kiliata-sefela.) 16 Kaleba waambile’mba: “Yense usakulukuka muzhi wa Kiliata-sefela ne kumushinda, nsakumupa mwanami aye Akisa kwikala mukazhanji.” 17 Kabiji Otoniela+ mwana wa kwa Kenaza,+ nkasanji Kaleba, wamushinjile muzhi. Onkao mambo, wamupele mwananji aye Akisa+ kwikala mukazhanji. 18 Akisa byo ayilenga ku nzubo, waambijile mwatawanji amba ambile Kaleba muko wanji amupe bujimi. Kepo Akisa aikijilepo pa mbongolo wanji.* Kaleba wamushikishe’mba: “Ñanyi kintu kyo ubena kukeba?”+ 19 Aye wakumbwile’mba: “Mwane mpeshai, mambo anweba mwampele mpunzha ku kabeta ka ku bulenge;* mpai ne Gulota-maimu.”* Onkao mambo, wamupele Gulota uji Kwatuntama ne Gulota uji Kwakunama.

20 Buno bo bwajinga buswanyi bo bapele mukoka wa bena Yuda monka mwayijile bisemi byabo.

21 Mizhi yajinga ku mupaka wa mukoka wa bena Yuda kwipi na mupaka wa Edomu+ ku kabeta ka ku bulenge yajinga: Kabizele, Edela, Yagula, 22 Kina, Dimona, Adada, 23 Kedeshi, Hazola, Itanana, 24 Zifu, Telema, Beyalota, 25 Hazola-hadata ne Kelita-hezelona, ko kuba’mba Hazola, 26 Amama, Shema, Molada,+ 27 Hazala-gada, Heshimonyi, Bete-peleta,+ 28 Hazala-shuala, Belesheba,+ Biziotia, 29 Baelaya, Imu, Ezema, 30 Eletolada, Kesila, Holama,+ 31 Zikilagi,+ Madamana, Sanasana, 32 Lebaota, Shilihima, Aina ne Limonyi+—mizhi ikatampe 29 ne mizhi yayo icheche.

33 Kabiji mizhi yajinga mu Shefela+ yajinga: Eshitaola, Zola,+ Ashina, 34 Zanoa, Ene-ganimu, Tapua, Enama, 35 Yalamuta, Adulama,+ Soko, Azeka,+ 36 Shalaimu,+ Aditaimu ne Gedelaya ne Gedelotaimu*—mizhi ikatampe 14 ne mizhi yayo icheche.

37 Zenana, Hadasha, Migidala-gadi, 38 Dileana, Mizipa, Yokotela, 39 Lakishi,+ Bozakata, Egalona, 40 Kabona, Lamama, Kitelishi, 41 Gedelota, Bete-dagona, Naama ne Makeda+—mizhi ikatampe 16 ne mizhi yayo icheche.

42 Libina,+ Etela, Ashana,+ 43 Ifita, Ashina, Nezibu, 44 Keila, Akeziba ne Malesha—mizhi ikatampe itanu na ina ne mizhi yayo icheche.

45 Ekelona ne mande anji* ne mizhi yanji icheche; 46 kufuma ku Ekelona na ku muzhika ne mapunzha onse ajinga ku jishinda jaya ku Ashadoda ne mizhi yanji icheche.

47 Ashadoda+ ne mande anji* ne mizhi yanji icheche; Gaza+ ne mande anji ne mizhi yanji icheche kufika ku Kimpachiko kya Ijipita, Kalunga ka Mema Kakatampe* ne kibunji kyajinga kwipi.+

48 Kabiji mu kibunji kya mitumba mwajinga Shamila, Yatila,+ Soko, 49 Dana, Kiliata-sana, ko kuba’mba Debila, 50 Anaba, Eshitemo,+ Animu, 51 Goshenyi,+ Holona ne Gilo+—mizhi ikatampe 11 ne mizhi yayo icheche.

52 Alabya, Duma, Eshana, 53 Yunimu, Bete-tapua, Afeka, 54 Humata, Kiliata-alaba, ko kuba’mba Hebulona,+ ne Ziola—mizhi ikatampe itanu na ina ne mizhi yayo icheche.

55 Maona,+ Kamela, Zifu,+ Yuta, 56 Yezelela, Yokedeama, Zanoa, 57 Keni, Gibea ne Timina+—mizhi ikatampe jikumi ne mizhi yayo icheche.

58 Halahula, Bete-zula, Gedola, 59 Malata, Bete-anota ne Eletekona—mizhi ikatampe itanu na umo ne mizhi yayo icheche.

60 Kiliata-baela, ko kuba’mba Kiliata-yealimu,+ ne Laba—mizhi ikatampe ibiji ne mizhi yayo icheche.

61 Mu kiselebwa mwajinga Bete-alaba,+ Midina, Sekaka, 62 Nibishana, Muzhi Mukatampe wa Mukele ne Enagedi+—mizhi ikatampe itanu na umo ne mizhi yayo icheche.

63 Pakuba bena Yebusi+ baikalanga mu Yelusalema,+ bakankelwe kwibapangamo ku banabalume bena Yuda,+ onkao mambo, bena Yebusi bekala mu Yelusalema pamo na bena Yuda kufika ne lelo jino.

16 Kabiji kyalo kyo baabenyejile ba mu kisemi kya kwa Yosefwa+ kupichila mu kuta bubale+ kyatendekejile ku Yodano kwipi na Yeliko kufika ku mema a ku Yeliko ku musela ne kupita mu kiselebwa kyatalañana na Yeliko kufika ku mpunzha ya mitumba kya ku Betele.+ 2 Kabiji kyafumine ku Betele wa ku Luza ne kufika ku mupaka wa bena Alaka ku Atalota, 3 kepo kyapichile ku muzhika ku mupaka wa bena Yafeleta kukafika ne ku mupaka wa Bete-holona+ uji Kwakunama ne ku Gezela,+ kabiji kyapelejile ku kalunga ka mema.

4 Onkao mambo, ba mu kisemi kya kwa Yosefwa,+ abo bena Manase ne bena Efelaimu, batambwile kyalo kyabo.+ 5 Mupaka wa ba mu kisemi kya kwa Efelaimu monka mwayijile bisemi byabo wajinga bino: Mupaka wa buswanyi bwabo ku musela wajinga Atalota-adala+ kukafika ne ku Bete-holona uji Kwatuntama,+ 6 kabiji mupaka wafikile ku kalunga ka mema. Mikimetata+ wajinga ku kabeta ka ku buyeke, ne mupaka wazhokolokele ku musela kufika ku Tanata-shilo ne kupita ku musela wa Yanoa. 7 Kabiji mupaka wafumine ku Yanoa kuya ku Atalota ne Naala kabiji wafikile ku Yeliko+ ne ku Yodano. 8 Kufuma ku Tapua+ mupaka wapichile ku muzhika wa Kakola ka Kana kabiji wapelejile ku kalunga ka mema.+ Abuno bo buswanyi bwa mukoka wa bena Efelaimu monka mwayijile bisemi byabo; 9 ba mu kisemi kya kwa Efelaimu nabo bajinga na mizhi ikatampe mukachi ka buswanyi bwa bena Manase,+ mizhi yonse ikatampe ne mande ayo.

10 Bino abo kechi bebapangilemo bena Kenana baikalanga mu Gezela ne,+ kabiji bena Kenana bekala mukachi ka bena Efelaimu kufika ne lelo jino,+ kabiji bengila mingilo ya buzha.+

17 Byo batele bubale,+ bebapele kyalo ba mu kisemi kya kwa Manase,+ mambo ye wajinga mubeji wa kwa Yosefwa.+ Na mambo a kuba’mba Makila+ mubeji wa kwa Manase kabiji shanji Gileada wajinga mwanamulume kitonzhi, watambwile Gileada ne Bashana.+ 2 Kabiji aba bashajilepo ba mu kisemi kya kwa Manase bebapele kyalo monka mwayijile bisemi byabo kupichila mu kuta bubale, baana ba kwa Abieza,+ baana ba kwa Heleka, baana ba kwa Ashiliela, baana ba kwa Shekema, baana ba kwa Hefela ne baana ba kwa Shemida. Abano bo bajinga ba mu kisemi kya kwa Manase, mwana wa kwa Yosefwa, baana ba balume monka mwayijile bisemi byabo.+ 3 Pakuba Zelofehada+ mwana wa kwa Hefela, Hefela mwana wa kwa Gileada, Gileada mwana wa kwa Makila, Makila mwana wa kwa Manase, kechi wasemenepo baana ba balume ne, wasemenetu baana ba bakazhi, kabiji ano o ajinga mazhina a baana banji ba bakazhi: Mala, Nowa, Hogala, Milika ne Tiliza. 4 Onkao mambo, baishile kwi Eleaza+ ñanga, kwi Yoshua mwana wa kwa Nuni ne ku bamfumu ne kwamba’mba: “Yehoba ye wakambizhe Mosesa kwitupa buswanyi mukachi ka balongo betu.”+ Na mambo a kulondela mukambizho wa Yehoba, bebapele buswanyi mukachi ka balongo ba bashabo.+

5 Kabiji bena Manase bebapele ne byalo jikumi byajinga ku bushiya* bwa Yodano kununga pa kyalo kya Gileada ne Bashana,+ 6 mambo banabakazhi ba mu mukoka wa bena Manase batambwile buswanyi pamo na baana banji ba balume, ne kyalo kya Gileada kyaikele kya boba bashajilepo ba mu kisemi kya kwa Manase.

7 Kabiji mupaka wa bena Manase watatwijile ku Ashela kufika ku Mikimetata+ watalañana na Shekema,+ kabiji mupaka wapichijile na ku kabeta ka ku bulenge* kufika ku kyalo kya bangikazhi ba mu Ene-Tapua. 8 Kyalo kya Tapua+ kyaikele kya bena Manase, pakuba muzhi wa Tapua waikejile ku mupaka wa bena Manase, wajinga wa ba mu kisemi kya kwa Efelaimu. 9 Kabiji mupaka wafikile ku Kakola ka Kana na ku kabeta ka ku bulenge bwa kakola. Mukachi ka mizhi ikatampe ya bena Manase+ mwajinga mizhi ikatampe ya bena Efelaimu, kabiji mupaka wa bena Manase waikejile ku kabeta ka ku buyeke bwa kimpachiko, kabiji wapelejile ku kalunga ka mema.+ 10 Mupaka waikejile ku kabeta ka ku bulenge wajinga wa bena Efelaimu, ne wa ku kabeta ka ku buyeke wajinga wa bena Manase, ne kalunga ka mema ko kajinga mupaka wabo,+ kabiji mupaka wa bena Manase wa ku kabeta ka ku buyeke wafikile* ku Ashela, ne ku musela, ku kyalo kya bena Isakala.

11 Bena Manase bebapele mizhi mu nyaunda ya bena Isakala ne ya bena Ashela, bebapele Bete-sheana ne mande anji,* Ibeleama+ ne mande anji, bangikazhi ba mu Dola+ ne mande anji, bangikazhi ba mu Ene-dola+ ne mande anji, bangikazhi ba mu Taanaka+ ne mande anji ne bangikazhi ba mu Megido ne mande anji, mapunzha asatu a mitumba.

12 Bino ba mu kisemi kya kwa Manase kechi bakonsheshe kutambula ino mizhi ikatampe ne; bena Kenana bakakachijile kwikala mu kino kyalo.+ 13 Bena Isalela byo bakosele, bapele bena Kenana kwingila mingilo ya buzha,+ pano bino, kechi bebapangilemo* bonsetu ne.+

14 Ba mu kisemi kya kwa Yosefwa bashikishe Yoshua amba: “Mambo ka o mwitupela* kyalo kimotu ne mpunzha imotu kwikala buswanyi bwetu?+ Atweba twavula bingi, mambo Yehoba witupesha kufika ne lelo jino.”+ 15 Yoshua wibakumbwile’mba: “Umvwe mwavula bingi, yainga mu jisaka mukawamishe kyalo kya bena Pelizi+ ne kya bena Lefwaimu,+ mambo mpunzha ya mitumba ya Efelaimu+ imukepela bingi.” 16 Kepo ba mu kisemi kya kwa Yosefwa baambile’mba: “Mpunzha ya mitumba itukepela, kabiji bena Kenana bonse bekala mu kimpachiko* baji na makalaki a nkondo+ aji na bikwakwa* bya kyela kya kapotwe, pamotu na boba bekala mu Bete-sheana+ ne ba mu mande anji* ne boba bekala mu Kimpachiko* kya Yezelela.”+ 17 Onkao mambo, Yoshua waambijile ba mu kisemi kya kwa Yosefwa, bena Efelaimu ne bena Manase amba: “Anweba mwavula bingi, kabiji muji bingi na ngovu. Kechi mukatambula kyalo kimotu ne,+ 18 bino mpunzha ya mitumba nayo isakwikala ke yenu.+ Nangwa kya kuba jisakatu, mukeiwamisha kabiji ko kukapelela nyaunda yenu. Mambo mukebapangamo bena Kenana nangwa kya kuba bakosa kabiji baji ne na makalaki a nkondo aji na bikwakwa* bya kyela kya kapotwe.”+

18 Jibumba jonse ja bena Isalela jakonkene ku Shilo+ kabiji japopejile tente wa lusambakeno konkakwa,+ mambo kyalo bekishinjile.+ 2 Pano bino, kwakishajile mikoka ya bena Isalela itanu na ibiji yabujile kutambula buswanyi bwayo. 3 Onkao mambo, Yoshua waambijile bena Isalela amba: “Nanchi bimye binga byo mukekalangatu kwa kubula kuya na kutambula kyalo kyo emupa Yehoba, Lesa wa bashakulu benu?+ 4 Mpai banabalume, mu mukoka umo mufume banabalume basatu kuba’mba nebatume; bafwainwa kuya na kupitañana mu kyalo kyonse na kunemba byo kiji monka mwayila buswanyi bwabo. Kepo bakabwela kwi amiwa. 5 Bafwainwa kwikyabana abo bene mu tubyalo tutanu na tubiji.+ Bena Yuda bakatwajijila kwikala mu nyaunda yabo ya ku kabeta ka ku bulenge,+ kabiji ba mu kisemi kya kwa Yosefwa bakatwajijila kwikala mu nyaunda yabo ya ku kabeta ka ku buyeke.+ 6 Pakuba anweba mukekinembe kyalo ne kwikyabanya mu tubyalo tutanu na tubiji, kabiji mukekilete kwi amiwa, ne amiwa nkemutela bubale+ konka kuno ku meso a Yehoba Lesa wetu. 7 Pakuba bena Levi kechi baji na kya kwibabilapo mwi anweba ne,+ mambo buñanga bwa Yehoba bo buswanyi bwabo;+ kabiji bena Gadi, bena Lubenyi ne kichika kya mukoka wa bena Manase+ batambula kala buswanyi bwabo ku bushiya bwa Yodano ku musela, bo bebapele kwi Mosesa kalume wa Yehoba.”

8 Banabalume benengezhezhe kuya, kabiji Yoshua wakambizhe boba bayilenga na kunemba kyalo amba: “Yainga mukapitañane mu kyalo ne kwikinemba ne kubwela kwi amiwa, ne amiwa nkemutela bubale ku meso a Yehoba ku Shilo.”+ 9 Byonkabyo, banabalume bayile na kupitañana mu kyalo ne kwikinemba monka mwayijile mizhi ikatampe itanu na ibiji, bekinembele mu buku. Kepo babwelele kwi Yoshua ku kampu ku Shilo. 10 Kabiji Yoshua wibatele bubale ku Shilo ku meso a Yehoba.+ Konkakwa Yoshua waabenye kyalo ku bena Isalela monka mwayijile tubyalo twabo.+

11 Bubale butanshi bwaponejile pa mukoka wa bena Benjamina monka mwayijile bisemi byabo, ne nyaunda yo bebapele yajinga pakachi ka bena Yuda+ ne ba mu kisemi kya kwa Yosefwa.+ 12 Mupaka wabo wa ku kabeta ka ku buyeke watendekejile ku Yodano, kabiji wakapichile ku mukolo wa Yeliko+ ku kabeta ka ku buyeke ne kupita pa mutumba ku muzhika, kabiji wafikile ku kiselebwa kya Bete-avena.+ 13 Kabiji mupaka wafumine kokwa kufika ku Luza ku mukolo wa ku kabeta ka ku bulenge bwa Luza, ko kuba’mba Betele;+ mupaka wapichile ku Atalota-adala+ pa mutumba uji ku kabeta ka ku bulenge bwa Bete-holona uji Kwakunama.+ 14 Ne mupaka bamuchibijile ku muzhika kabiji wapichile ku kabeta ka ku bulenge kufuma ku mutumba watalañana na Bete-holona ku kabeta ka ku bulenge; wapelejile ku Kiliata-baela, ko kuba’mba Kiliata-yealimu+ muzhi mukatampe wa Yuda. Uno ye mupaka wa ku muzhika.

15 Mupaka wa ku kabeta ka ku bulenge wafumine kwapelela Kiliata-yealimu, kabiji wafikile ku muzhika; wapichile ku nsulo ya mema a ku Nefetoa.+ 16 Uno mupaka wafikile kwapelela mutumba watalañana na Kimpachiko kya Mwana wa kwa Hinomu,+ kiji mu Kimpachiko* kya Lefwaimu+ ku kabeta ka ku buyeke, kabiji wapichile mu Kimpachiko kya Hinomu, kufika ku mukolo wa bena Yebusi+ wa ku kabeta ka ku bulenge ne ku Ene-logela.+ 17 Kabiji bamupishishe ku kabeta ka ku buyeke kufika ku Ene-shemeshi ne ku Gelilota, uji kwatalañana na jishinda jatuntukila ku Adumimu,+ kabiji wafikile ku jibwe+ ja kwa Bohana+ mwana wa kwa Lubenyi. 18 Kabiji wapichile ku mukolo wa ku kabeta ka ku buyeke watalañana na Alaba kabiji wafikile ku Alaba. 19 Kabiji mupaka wapichile ku kabeta ka ku buyeke ku mukolo wa Bete-hogala,+ kabiji wapelejile ku kabeta ka ku buyeke bwa kiito kya ku Kalunga ka Mukele*+ kiji kwapelela Yodano ku kabeta ka ku bulenge. Uno ye wajinga mupaka wa ku kabeta ka ku bulenge. 20 Yodano ye wajinga mupaka wa ku musela. Buno bo bwajinga buswanyi bwa ba mu kisemi kya kwa Benjamina monka mwayijile bisemi byabo, monka mwapichijile mipaka yabo konse konse.

21 Kabiji mizhi ikatampe ya mukoka wa bena Benjamina monka mwayijile bisemi byabo, yajinga: Yeliko, Bete-hogala, Emekekeziza, 22 Bete-alaba,+ Zemalaimu, Betele,+ 23 Avimu, Pala, Ofula, 24 Kefwala-amonyi, Ofuni ne Geba+—mizhi ikatampe 12 ne mizhi yayo icheche.

25 Gibeona,+ Lama, Beelota, 26 Mizipa, Kefila, Moza, 27 Lekema, Ilapela, Talala, 28 Zelaya,+ Haelefwa, Yebusi, ko kuba’mba Yelusalema,+ Gibea+ ne Kiliata—mizhi ikatampe 14 ne mizhi yayo icheche.

Buno bo bwajinga buswanyi bwa ba mu kisemi kya kwa Benjamina monka mwayijile bisemi byabo.

19 Kabiji bubale bwa bubiji+ bwaponejile pe Shimeona, pa mukoka wa bena Shimeona+ monka mwayijile bisemi byabo. Kabiji buswanyi bwabo bwajinga mukachi ka buswanyi bwa bena Yuda.+ 2 Buswanyi bwabo bwajinga Belesheba+ ne Sheba, Molada,+ 3 Hazala-shuala,+ Balaya, Ezema,+ 4 Eletolada,+ Betula, Holama, 5 Zikilagi,+ Bete-malakabota, Hazala-susa, 6 Bete-lebaota+ ne Shuluhena—mizhi ikatampe 13 ne mizhi yayo icheche; 7 Aina, Limonyi, Etela ne Ashana+—mizhi ikatampe ina ne mande ayo; 8 ne mande onse azhokolokele mizhi ikatampe kukafika ne ku Baalata-bele, ko kuba’mba Lama wa ku kabeta ka ku bulenge. Buno bo bwajinga buswanyi bwa mukoka wa Shimeona monka mwayijile bisemi byabo. 9 Buswanyi bwa ba mu kisemi kya kwa Shimeona bebufumishe mu bena Yuda, mambo kyalo kya bena Yuda kibabayijile. Onkao mambo, ba mu kisemi kya kwa Shimeona batambwile mpunzha mukachi ka buswanyi bwa bena Yuda.+

10 Bubale bwa busatu+ bwaponejile pa ba mu kisemi kya kwa Zebuluna+ monka mwayijile bisemi byabo, ne mupaka wa buswanyi bwabo wafikile ku Salida. 11 Uno mupaka wabo wapichile ku muzhika ku Maleala ne kufika ku Dabesheta kepo apichile ku kimpachiko* kya ku Yokeneama. 12 Kabiji wafumine ku Salida na ku musela kusamina juba, kufika ku mupaka wa Kisalota-tabola ne kupita ku Dabelata+ kukafika ne ku Yafiya. 13 Kufuma kokwa wapichile na ku musela kusamina juba kufika ku Gata-hefela,+ ku Eta-kazina kabiji wapichile ku Limonyi kufika ku Neya. 14 Kabiji wachimpukijile ku kabeta ka ku buyeke ku Hanatona ne kupelela ku Kimpachiko kya Ifwatahela, 15 ne Katata, Nahalala, Shimilona,+ Idala ne Betelema+—mizhi ikatampe 12 ne mande ayo. 16 Abuno bo bwajinga buswanyi bwa ba mu kisemi kya kwa Zebuluna monka mwayijile bisemi byabo.+ Ino yo yajinga mizhi ikatampe ne mande ayo.

17 Bubale bwa buna+ bwaponejile pe Isakala,+ pa ba mu kisemi kya kwa Isakala monka mwayijile bisemi byabo. 18 Kabiji mupaka wabo wajinga ku Yezelela,+ Kesulota, Shunema,+ 19 Hafwalaimu, Shiona, Anahalata, 20 Labita, Kishona, Ebeza, 21 Lemeta, Ene-ganimu,+ Ene-hada ne Bete-pazeza. 22 Kabiji mupaka wafikile ku Tabola,+ ku Shahazuma ne ku Bete-shemeshi ne mupaka wabo wapelejile ku Yodano—mizhi ikatampe 16 ne mande ayo. 23 Buno bo bwajinga buswanyi bwa mukoka wa bena Isakala monka mwayijile bisemi byabo,+ mizhi ikatampe ne mande ayo.

24 Kabiji bubale bwa butanu+ bwaponejile pa mukoka wa bena Ashela+ monka mwayijile bisemi byabo. 25 Mupaka wabo wajinga Helakata,+ Hali, Betena, Akashafwa, 26 Alameleka, Amada ne Mishala. Wafikile ku Kamela+ ku muzhika ne ku Shihole-libanata, 27 kabiji wachimpukijile ku musela ku Bete-dagona ne kufika ku Zebuluna ne ku Kimpachiko kya Ifwatahela ku kabeta ka ku buyeke, ku Bete-emeka ne ku Neyela kabiji wafikile ku Kabulu ku kipiko, 28 ne ku Ebalona, Lehoba, Hamona ne Kana kukafika ne ku Shidona Mukatampe.+ 29 Kabiji mupaka wachimpukijile ku Lama ne kukafika ku muzhi mukatampe wa Tila uji na nsakwa.+ Kepo achimpukijile ku Hosa kabiji wapelejile ku kalunga ka mema mu kibunji kya Akeziba, 30 Uma, Afeki+ ne Lehoba+—mizhi ikatampe 22 ne mande ayo. 31 Buno bo bwajinga buswanyi bwa mukoka wa bena Ashela monka mwayijile bisemi byabo.+ Ino yo yajinga mizhi ikatampe ne mande ayo.

32 Bubale bwa butanu na bumo+ bwaponejile pa ba mu kisemi kya kwa Nafitali, pa ba mu kisemi kya kwa Nafitali monka mwayijile bisemi byabo. 33 Mupaka wabo wafumine ku Helefa, kufuma ku kichi kikatampe kiji mu Zaananimi+ kukapita ku Adami-nekeba ne Yabanela kukafika ne ku Lakuma; kabiji wapelejile ku Yodano. 34 Mupaka wachimpukijile ku muzhika ku Azanota-tabola kabiji wapichile ku Hukoka ne kufika ku Zebuluna ku kabeta ka ku bulenge ne ku Ashela ku muzhika ne ku Yuda ne ku Yodano na ku musela. 35 Kabiji mizhi ikatampe ya masakwa yajinga Zidimu, Zelu, Hamata,+ Lakata, Kineleta, 36 Adamaya, Lama, Hazola,+ 37 Kedeshi,+ Edeleyi, Ene-hazola, 38 Yilona, Migadala-ela, Holema, Bete-anata ne Bete-shemeshi+—mizhi ikatampe 19 ne mande ayo. 39 Buno bo bwajinga buswanyi bwa mukoka wa bena Nafitali monka mwayijile bisemi byabo,+ mizhi ikatampe ne mande ayo.

40 Bubale bwa butanu na bubiji+ bwaponejile pa mukoka wa bena Danyi+ monka mwayijile bisemi byabo. 41 Kabiji mupaka wa buswanyi bwabo wajinga Zola,+ Eshitaola, Ila-shemeshi, 42 Shalabina,+ Ayalona,+ Itala, 43 Elona, Timina,+ Ekelona,+ 44 Eleteke, Gibetona,+ Baalata, 45 Yehuda, Bene-belaka, Gata-limona,+ 46 Me-yakona ne Lakona, mupaka saka atalañana na Yopa.+ 47 Bino nyaunda ya bena Danyi ibakepejile bingi.+ Onkao mambo, bayile na kulwa na bena Leshemu+ ne kwangata kyalo ne kwipaya bantu na mpoko. Kepo batambwile kyalo ne kwikalamo, kabiji jizhina ja Leshemu bejifumishepo ne kupingizhapo ja Danyi, jizhina ja kwa Danyi mushakulu wabo.+ 48 Buno bo bwajinga buswanyi bwa mukoka wa bena Danyi monka mwayijile bisemi byabo. Aino yo yajinga mizhi ikatampe ne mande ayo.

49 Onkao mambo, bapwishishe kwabanya kyalo ke kyabo kya buswanyi monka mwayijile manyaunda akyo. Kepo bena Isalela bapele Yoshua mwana wa kwa Nuni buswanyi mukachi kabo. 50 Na mambo a kulondela mukambizho wa Yehoba, bamupele muzhi mukatampe ye alombele, muzhi wa Timinata-sela,+ uji mu mande a ku mitumba ya Efelaimu, kabiji washimikile muzhi mukatampe ne kwikala monka.

51 Buno bo bwajinga buswanyi Eleaza ñanga, Yoshua mwana wa kwa Nuni ne bakulumpe ba bikota bya mikoka ya bena Isalela bo baabenye+ kupichila mu kuta bubale ku Shilo+ ku meso a Yehoba, konka ku kibelo kya tente wa lusambakeno.+ Onkao mambo, bapwishishe kwabanya kyalo.

20 Kepo Yehoba aambijile Yoshua amba: 2 “Buula bena Isalela amba, ‘Isajilai mizhi ya kufyamamo+ yo nemubuujile kupichila mwi Mosesa, 3 pa kuba’mba muntu waipaya mukwabo* kya mapuso* nangwa kwa kubula kuyuka akanyemene monka. Kabiji ikekala ya kufyamamo anweba ku muntu ushinkanya na mambo a mashi.+ 4 Wafwainwa kunyemena ku umo wa mu ino mizhi+ ne kwimana ku kibelo kya muzhi+ ne kulondolola mambo anji ne bakulumpe ba mu yewo muzhi saka bateleka. Kepo bakamutambwila mu muzhi ne kumupa mpunzha ne aye ukekalanga nabo. 5 Inge ushinkanya na mambo a mashi wamupupila, kechi bafwainwa kumupana kwi aye ne, mambo waipayile mukwabo kya mapuso,* kabiji kechi wamushikilwe ne.+ 6 Akatwajijile kwikala mu yewo muzhi kufikatu ne jibumba byo jikamuchibila mambo,+ kabiji akekale monka kufikatu ne kimye ñanga mwine mukatampe+ ukengilanga pa kyo kyo kimye byo akafwa. Kepo muntu waipayañene akabwela mu muzhi mo anyemene, kabiji wakonsha kutwela mu muzhi wanji ne mu nzubo yanji.’”+

7 Onkao mambo, bazhijikile* muzhi wa Kedeshi+ mu Ngalilea mu mpunzha ya mitumba ya kwa Nafitali, ne Shekema+ mu mpunzha ya mitumba ya kwa Efelaimu, ne Kiliata-alaba,+ ko kuba’mba Hebulona, mu mpunzha ya mitumba ya kwa Yuda. 8 Mu kibunji kya Yodano ku musela wa Yeliko, basajile Bezela+ uji mu kiselebwa kiji ku mutunta* mu mukoka wa bena Lubenyi, ne Lamota+ wa mu Gileada wa mu mukoka wa bena Gadi, ne Golanyi+ mu Bashana wa mu mukoka wa bena Manase.+

9 Ino yo yajinga mizhi yo basajijile bena Isalela bonse ne bantu bafumine ku byalo bingi bo baikalanga nabo, kuba’mba muntu yense waipaya mukwabo* kya mapuso akanyemenemo,+ pa kuba’mba bakabule kumwipaya ku ushinkanya na mambo a mashi saka bakyangye kumuchibila mambo ku kije.+

21 Bakulumpe ba bikota bya bena Levi, baishile kwi Eleaza+ ñanga, kwi Yoshua mwana wa kwa Nuni ne ku bakulumpe ba bikota bya mikoka ya bena Isalela, 2 kabiji baambile kwi abo mu Shilo+ mu kyalo kya Kenana amba: “Yehoba wakambizhe kupichila mwi Mosesa amba betupe mizhi ya kwikalamo ne mapunzha ayo a kujishishamo banyama betu ba kulela.”+ 3 Byonkabyo, na mambo a kulondela mukambizho wa Yehoba, bena Isalela bapele bena Levi mizhi+ ne mapunzha ayo a kujishishamo banyama kufuma mu buswanyi bwabo.+

4 Bubale bwaponejile pa bisemi bya bena Kohati,+ kabiji bena Levi ba mu kisemi kya kwa Alona ñanga, bebapele mizhi 13 kupichila mu kuta bubale* kufuma mu mukoka wa bena Yuda,+ mu mukoka wa bena Shimeona+ ne mu mukoka wa bena Benjamina.+

5 Kabiji bena Kohati bashajilepo, bebapele* mizhi jikumi kufuma mu bisemi bya mu mukoka wa bena Efelaimu,+ mu mukoka wa bena Danyi ne mu kichika kya mukoka wa bena Manase.+

6 Kabiji bena Geleshona,+ bebapele mizhi 13 kufuma mu bisemi bya mu mukoka wa bena Isakala, mu mukoka wa bena Ashela, mu mukoka wa bena Nafitali ne mu kichika kya mukoka wa bena Manase mu Bashana.+

7 Bena Melali+ bebapele mizhi 12 monka mwayijile bisemi byabo, kufuma mu mukoka wa bena Lubenyi, mu mukoka wa bena Gadi ne mu mukoka wa bena Zebuluna.+

8 Byonkabyo, bena Isalela bapele bena Levi ino mizhi ne mapunzha ayo a kujishishamo banyama kupichila mu kuta bubale, byonkatu Yehoba byo akambizhe kupichila mwi Mosesa.+

9 Byonkabyo, kufuma mu mukoka wa bena Yuda ne mu mukoka wa bena Shimeona, bebapele ino mizhi yo batongola mazhina,+ 10 kabiji beipaine ku baana ba kwa Alona ba mu bisemi bya bena Kohati bya mu bena Levi, mambo bubale butanshi bwaponejile pe abo. 11 Bebapele Kiliata-alaba+ (Alaba ye wajinga shanji Anaki), ko kuba’mba Hebulona,+ mu mpunzha ya mitumba ya Yuda ne mapunzha ayo onse a kujishishamo banyama. 12 Bino bujimi bwa mu muzhi ne mande abo bebipaine kwi Kaleba mwana wa kwa Yefune kwikala byanji.+

13 Kabiji baana ba kwa Alona ñanga, bebapele muzhi wa kufyamamo muntu waipayañana,+ bebapele Hebulona+ ne mapunzha anji a kujishishamo banyama ne Libina+ ne mapunzha anji a kujishishamo banyama, 14 Yatila+ ne mapunzha anji a kujishishamo banyama, Eshitemoa+ ne mapunzha anji a kujishishamo banyama, 15 Holona+ ne mapunzha anji a kujishishamo banyama, Debila+ ne mapunzha anji a kujishishamo banyama, 16 Aina+ ne mapunzha anji a kujishishamo banyama, Yuta+ ne mapunzha anji a kujishishamo banyama ne Bete-shemeshi ne mapunzha anji a kujishishamo banyama, mizhi itanu na ina kufuma mu ino mikoka ibiji.

17 Kabiji mu mukoka wa bena Benjamina bebapelemo: Gibeona+ ne mapunzha anji a kujishishamo banyama, Geba ne mapunzha anji a kujishishamo banyama,+ 18 Anatota+ ne mapunzha anji a kujishishamo banyama ne Alamona ne mapunzha anji a kujishishamo banyama, yonse pamo yajinga mizhi ina.

19 Mizhi yonse yo bapele ba mu kisemi kya kwa Alona, bañanga, yajinga mizhi 13 ne mapunzha ayo a kujishishamo banyama.+

20 Kabiji bisemi bya bena Kohati byashajilepo mu bena Levi bebipele mizhi kupichila mu kuta bubale kufuma mu mukoka wa bena Efelaimu. 21 Bebapele muzhi wa kufyamamo muntu waipayañana,+ bebapele Shekema+ ne mapunzha anji a kujishishamo banyama mu kibunji kya mitumba kya Efelaimu, Gezela+ ne mapunzha anji a kujishishamo banyama, 22 Kibazaimu ne mapunzha anji a kujishishamo banyama ne Bete-holona+ ne mapunzha anji a kujishishamo banyama, yonse pamo yajinga mizhi ina.

23 Kabiji mu mukoka wa bena Danyi bebapelemo: Eleteke ne mapunzha anji a kujishishamo banyama, Gibetona ne mapunzha anji a kujishishamo banyama, 24 Ayalona+ ne mapunzha anji a kujishishamo banyama, Gata-limona ne mapunzha anji a kujishishamo banyama, yonse pamo yajinga mizhi ina.

25 Kabiji mu kichika kya mukoka wa bena Manase bebapelemo: Taanaka+ ne mapunzha anji a kujishishamo banyama ne Gata-limona ne mapunzha anji a kujishishamo banyama, yonse pamo yajinga mizhi ibiji.

26 Mizhi yonse pamo ne mapunzha ayo a kujishishamo banyama yatambwile bisemi bya bena Kohati byashajilepo, yajinga jikumi.

27 Kabiji bena Geleshona+ ba mu bisemi bya bena Levi batambwile muzhi wa kufyamamo muntu waipayañana kufuma ku kichika kya mukoka wa bena Manase, bebapele Golanyi+ mu Bashana ne mapunzha anji a kujishishamo banyama ne Beeshatela ne mapunzha anji a kujishishamo banyama, yonse pamo yajinga mizhi ibiji.

28 Kabiji mu mukoka wa bena Isakala+ bebapelemo: Kishona ne mapunzha anji a kujishishamo banyama, Dabelata+ ne mapunzha anji a kujishishamo banyama, 29 Yalamuta ne mapunzha anji a kujishishamo banyama ne Ene-ganimu ne mapunzha anji a kujishishamo banyama, yonse pamo yajinga mizhi ina.

30 Kabiji mu mukoka wa bena Ashela+ bebapelemo: Mishala ne mapunzha anji a kujishishamo banyama, Abidona ne mapunzha anji a kujishishamo banyama, 31 Helakata+ ne mapunzha anji a kujishishamo banyama ne Lehoba+ ne mapunzha anji a kujishishamo banyama, yonse pamo yajinga mizhi ina.

32 Kabiji mu mukoka wa bena Nafitali bebapelemo: muzhi wa kufyamamo+ muntu waipayañana, bebapele Kedeshi+ mu Ngalilea ne mapunzha anji a kujishishamo banyama, Hamota-dola ne mapunzha anji a kujishishamo banyama ne Kalatana ne mapunzha anji a kujishishamo banyama, yonse pamo yajinga mizhi isatu.

33 Mizhi yonse ya bena Geleshona monka mwayijile bisemi byabo, yajinga mizhi 13 ne mapunzha ayo a kujishishamo banyama.

34 Kabiji bisemi bya bena Melali+ byashajilepo mu bena Levi, byatambwile kufuma ku mukoka wa bena Zebuluna:+ muzhi wa Yokeneama+ ne mapunzha anji a kujishishamo banyama, Kalata ne mapunzha anji a kujishishamo banyama, 35 Dimina ne mapunzha anji a kujishishamo banyama ne Nahalala+ ne mapunzha anji a kujishishamo banyama, yonse pamo yajinga mizhi ina.

36 Kabiji mu mukoka wa bena Lubenyi bebapelemo: Bezela+ ne mapunzha anji a kujishishamo banyama, Yahaza ne mapunzha anji a kujishishamo banyama,+ 37 Kedemota ne mapunzha anji a kujishishamo banyama ne Mefwata ne mapunzha anji a kujishishamo banyama, yonse pamo yajinga mizhi ina.

38 Kabiji mu mukoka wa bena Gadi+ bebapelemo: muzhi wa kufyamamo muntu waipayañana, bebapele Lamota wa mu Gileada+ ne mapunzha anji a kujishishamo banyama, Mahanaimu+ ne mapunzha anji a kujishishamo banyama, 39 Heshibonyi+ ne mapunzha anji a kujishishamo banyama ne Yazela+ ne mapunzha anji a kujishishamo banyama, mizhi yonse pamo yajinga ina.

40 Mizhi yonse yo bapele bena Melali monka mwayijile bisemi byabo kupichila mu kuta bubale, kufuma mu bisemi bya bena Levi byashajilepo, yajinga mizhi 12.

41 Mizhi yonse ya bena Levi yajinga mukachi ka mapunzha a bena Isalela, yajinga mizhi 48 pamo na mapunzha ayo a kujishishamo banyama.+ 42 Muzhi umo umo wajinga na mapunzha anji amuzhokolokele a kujishishamo banyama. Bino byo byajinga ino mizhi yonse.

43 Onkao mambo, Yehoba wapele bena Isalela kyalo kyonse kyo achipile kupa bashakulu babo,+ kabiji bekitambwile ne kwikalamo.+ 44 Kabiji Yehoba wibalengejile kukokoloka konse konse, byonkatu byo achipile ku bashakulu babo,+ kabiji kafwako mulwanyi nangwa umo wibakatezhenga ne.+ Yehoba wapaine balwanyi babo bonse mu maboko abo.+ 45 Kafwako mulaye* wa bintu byawama Yehoba byo alayile bena Isalela wabujile kufika ne; yonsetu yafikile.+

22 Kepo Yoshua aichile bena Lubenyi, bena Gadi ne kichika kya mukoka wa bena Manase 2 ne kwibambila’mba: “Mwauba bintu byonse Mosesa kalume wa Yehoba byo emukambizhe,+ kabiji mwakookela jiwi jami mu byonse byo nemukambizhe.+ 3 Kechi mwibalekelela balongo benu kufikatu ne lelo jino ne;+ kabiji mwalama mukambizho wa Yehoba Lesa wenu.+ 4 Pano Yehoba Lesa wenu walengela balongo benu kukokoloka byonkatu byo ebalayile.+ Pano mwakonsha kubwela ku matente enu aji mu kyalo kyo emupele Mosesa kalume wa Yehoba kwikala kyenu ku bushiya* bwa Yodano.+ 5 Pano mwafwainwa kuteshako bingi muchima kulama mikambizho ne Mizhilo Mosesa kalume wa Yehoba yo emupele,+ ne kutemwa Yehoba Lesa wenu,+ kwenda mu mashinda anji,+ kulama mikambizho yanji,+ kukakachila kwi aye+ ne kumwingijila+ na muchima wenu yense ne na mweo* wenu yense.”+

6 Kepo Yoshua ebapesheshe ne kwibambila’mba baye, ne abo bayile ku matente abo. 7 Kabiji Mosesa wapele kichika kya mukoka wa bena Manase buswanyi mu Bashana,+ kabiji Yoshua wapaine kyalo ku kichika kya mukoka ku muzhika wa Yodano+ pamo na balongo babo. Kabiji Yoshua wibapesheshe byo ebambijile kuya ku matente abo 8 ne kwibambila’mba: “Bwelai ku matente enu na bunonshi bwavula, na bilelwa byenu byavula, siliva ne ngolode, mukuba ne kyela kya kapotwe ne na bivwalo byavula.+ Sendai bipukulwa byo mwaangata+ balwanyi benu, kabiji mukebyabane na balongo benu.”

9 Byo bapwishishe kuba bino, bena Lubenyi, bena Gadi ne kichika kya mukoka wa bena Manase, bafumineko ku bakwabo bena Isalela ku Shilo mu kyalo kya Kenana kabiji babwelele ku kyalo kya Gileada,+ kyalo kyabo mo baikelenga monka mwakambizhizhe Yehoba kupichila mwi Mosesa.+ 10 Byo bafikile ku bibunji bya Yodano mu kyalo kya Kenana, bena Lubenyi, bena Gadi ne kichika kya mukoka wa bena Manase bashimikile kya kusokelapo bitapisho kyabaya bingi konkakwa kwipi na Yodano. 11 Kabiji bena Isalela bakwabo baumvwine kino+ ne kwamba’mba: “Talai! Bena Lubenyi, bena Gadi ne kichika kya mukoka wa bena Manase bashimika kya kusokelapo bitapisho ku mupaka wa kyalo kya Kenana, mu bibunji bya Yodano ku bushiya bwa bena Isalela.” 12 Bena Isalela byo baumvwine kino, jibumba jonse ja bena Isalela jakonkene ku Shilo+ kuba’mba baye na kulwa nabo.

13 Ponkapo bena Isalela batumine Finease+ mwana wa kwa Eleaza ñanga kuya ku bena Lubenyi, ku bena Gadi ne ku kichika kya mukoka wa bena Manase mu kyalo kya Gileada, 14 ne babinemanga jikumi bajinga ne aye, kinemanga umo kufuma mu kikota kimo kya mikoka yonse ya bena Isalela, yense wajinga mukulumpe wa kikota kyanji mu biumbi bya bena Isalela.+ 15 Byo bafikile ku bena Lubenyi, ku bena Gadi ne ku kichika kya mukoka wa bena Manase mu kyalo kya Gileada, bebambijile’mba:

16 “Abino byo byaamba jibumba jonse ja Yehoba amba: ‘Mambo ka o mwaubila kino kintu kibena kumwesha kubula bukishinka+ kwi Lesa wa Isalela? Lelo jino, mwaleka kulondela Yehoba kupichila mu kushimika kya kusokelapo bitapisho anwe bene ne kumusatukila Yehoba.+ 17 Nanchi mambo o twalengele ku Peola ajinga acheche kwi atweba nyi? Kechi twitokesha ku ano mambo kufika ne lelo jino ne, nangwa kya kuba kinkunka kyaishile pa jibumba ja Yehoba.+ 18 Nanchi lelo mukeba kuleka kulondela Yehoba nyi? Umvwe lelo jino mumusatukile Yehoba, aye kesha ukazhingijila jibumba jonse ja bena Isalela.+ 19 Pano inge kyalo kyo mwatambula kyatama, abukilai ku kyalo Yehoba kyo atambula+ konka kuji tente wa lusambakeno wa Yehoba ne kwikala+ ne atweba, bino kange mumusatukile Yehoba ne, kabiji kange mwitulengele kwikala bansatuki kupichila mu kushimika kya kusokelapo bitapisho kikwabo kununga pa kya kusokelapo bitapisho kya Yehoba Lesa wetu ne.+ 20 Akana+ mwana wa kwa Zela byo aubile kintu kya kubula bukishinka pa mambo a kintu kyafwainwe konaunwa, nanchi bukaji kechi bwaishile pa jibumba jonse ja bena Isalela nenyi?+ Aye kechi ye yenkatu wafwile na mambo a bubi bwanji ne.’”+

21 Ponkapo bena Lubenyi, bena Gadi ne kichika kya mukoka wa bena Manase baambijile bakulumpe ba biumbi bya bena Isalela amba:+ 22 “Lesa wa balesa, Yehoba!* Lesa wa balesa, Yehoba!+ Aye wayuka ne bena Isalela nabo bakayuka kino. Inge twasatukile ne kubula kwikala ba kishinka kwi Yehoba, kange mwitupulushe lelo ne. 23 Inge twashimikile kya kusokelapo bitapisho kuba’mba tuleke kulondela Yehoba ne kulambwilapo milambo ya kusoka, milambo ya kajo ne bitapisho bya mutende, Yehoba uketukabisha.+ 24 Kuji kintu kitulengejile kuba kino, mambo twaambile’mba, ‘Kimye kya kulutwe baana benu bakambilanga baana betu amba: “Ñanyi luusa lo muji nalo lwa kupopwela* Yehoba, Lesa wa Isalela pamo ne atweba? 25 Yehoba wabika Yodano kwikala mupaka pakachi ketu ne anweba, bena Lubenyi ne bena Gadi. Kechi mujipo na kintu nangwa kimo kwi Yehoba ne.” Kabiji baana benu bakalengela baana betu kuleka kupopwela* Yehoba.’

26 “Onkao mambo, twaambile namba, ‘Twayai tubepo kintu kimo kupichila mu kushimika kya kusokelapo bitapisho, kechi kya kulambwilapo milambo ya kusoka nangwa bitapisho ne, 27 bino kikale ke kamonyi pakachi ketu ne anweba+ ne baana* betu bakasemwa kulutwe kuba’mba, tukengijilanga Yehoba na milambo yetu ya kusoka ne bitapisho byetu ne bitapisho byetu bya mutende,+ pa kuba’mba mu kimye kya kulutwe baana benu bakabule kwambila baana betu amba: “Kechi mujipo na kintu nangwa kimo kwi Yehoba ne.”’ 28 Onkao mambo, twaambile’mba, ‘Umvwe baketwambile bino ne kwambila baana* betu bakasemwa kulutwe, tukamba’mba: “Talai kya kusokelapo bitapisho kyapasha kya kusokelapo bitapisho kya Yehoba kyashimikile bashakulu betu, kechi kya kusokelapo milambo nangwa bitapisho ne, bino ke kamonyi pakachi kenu ne atweba.”’ 29 Kechi twakonsha kusatukila Yehoba lelo ne kuleka kulondela Yehoba+ kupichila mu kushimika kya kusokelapo bitapisho kya milambo ya kusoka, milambo ya kajo ne bitapisho, ne kubula kwibilambwila pa kya kusokelapo bitapisho kya Yehoba Lesa wetu kiji ku tente wanji wa lusambakeno ne!”+

30 Finease ñanga, babinemanga ba jibumba ne bakulumpe ba biumbi bya bena Isalela byo baumvwine byambo byaambile ba mu kisemi kya kwa Lubenyi, kya kwa Gadi ne kya kwa Manase, kibatokejile bingi ku muchima.+ 31 Onkao mambo, Finease mwana wa kwa Eleaza ñanga waambijile ba mu kisemi kya kwa Lubenyi, kya kwa Gadi ne kya kwa Manase amba: “Lelo twayuka kuba’mba Yehoba uji ne atweba, mambo kechi mwauba kino kintu kibena kumwesha kubula bukishinka kwi Yehoba ne. Pano mwapokolola bena Isalela mu kuboko kwa Yehoba.”

32 Kepo Finease mwana wa kwa Eleaza ñanga ne bakulumpe bafumineko ku bena Lubenyi ne ku bena Gadi mu kyalo kya Gileada, kabiji bayile ku kyalo kya Kenana ne kubwezha sawakya ku bena Isalela bakwabo. 33 Kabiji bena Isalela batemenwe bingi pa uno sawakya. Kepo bena Isalela batotele Lesa, kabiji kechi baambilepo kintu nangwa kimo pa mambo a kuya na kulwa na bena Lubenyi ne bena Gadi kuba’mba bonaune kyalo mo baikalanga ne.

34 Onkao mambo, bena Lubenyi ne bena Gadi bekitumbile jizhina akya kya kusokelapo bitapisho,* mambo baambile’mba kino ke “kamonyi pakachi ketu kuba’mba Yehoba ye Lesa wa kine.”

23 Byo papichile moba avula kufuma kimye Yehoba kyo akwashishe bena Isalela kukokoloka+ byo ebapokolwele ku balwanyi babo bebazhokolokele, ne Yoshua byo akotele ne kwikala myaka yavula,+ 2 Yoshua waichile bena Isalela bonse,+ bakulumpe babo, bakalama babo, bamitonyi babo ne bantangi babo+ ne kwibambila’mba: “Amiwa nakota; ne myaka yami yavula. 3 Kabiji mwimwena bintu byonse Yehoba Lesa wenu byo aubile ku bino bisaka byonse bya bantu na mambo a anweba, mambo Yehoba Lesa wenu ye wimulwijilengako.+ 4 Talai, nemupa kyalo+ kya bisaka bikwabo kyashajilepo kupichila mu kuta bubale kuba’mba kikale ke buswanyi bwa mikoka yenu,+ kuvwangakotu ne byalo bya bisaka byonse byo naonawine,+ kufuma ku Yodano kufika ne ku Kalunga ka Mema Kakatampe* ku muzhika.* 5 Kabiji Yehoba Lesa wenu ye wibifumisheko ku meso enu, kabiji wibipangilemo,*+ ne anweba mwatambwile kyalo kwikala ke kyenu, byonkatu Yehoba Lesa wenu byo emulayile.+

6 “Pano mwafwainwa kuchinchika kuba’mba mukalamenga ne kulondela byonse byanembwa mu buku wa Mizhilo+ ya Mosesa, pa kuba’mba mukabule kusendukamo ne kuya ku kilujo nangwa ku kipiko,+ 7 kupichila mu kubula kupwanañana na bino bisaka bya bantu+ byashala mwi anweba. Kechi mwafwainwa nangwatu kutela mazhina a balesa+ babo nangwa kuchipila mu jizhina jabo ne, kabiji kechi mwafwainwa kwibengijila nangwa kwibafukamina ne.+ 8 Bino mwafwainwa kukakachila kwi Yehoba Lesa wenu,+ byonkatu byo mwauba kufika ne lelo jino. 9 Yehoba ukapanga bisaka bikatampe kabiji byakosa kufuma kwi anweba,+ mambo kafwako muntu nangwa umo wakonsheshe kwimwimena kufika ne lelo jino ne.+ 10 Muntu umo mwi anweba ukapangishanga bantu kiumbi,+ mambo Yehoba Lesa wenu ubena kwimulwilako,+ byonkatu byo emulayile.+ 11 Onkao mambo, kimye kyonse+ saka muteshako muchima* kutemwa Yehoba Lesa wenu.+

12 “Bino umvwe mukabwele munyuma ne kukakachila ku bino bisaka byashala+ mwi anweba ne kusongozhanya+ nabyo ne kupwanañana nabyo, ne abyo bikobenga kintutu kimo kwi anweba, 13 mwafwainwa kuyuka’mba Yehoba Lesa wenu kechi ukatwajijila kwimupangilako* bino bisaka bya bantu ne.+ Bikekala kakose ne kitewa kwi anweba kabiji nobe kipumo munyuma yenu+ kabiji nobe miba mu meso enu, posotu ne byo mukavila mu kino kyalo kyawama Yehoba Lesa wenu kyo emupa.

14 “Pano talai! Amiwa njitu pepi kufwa,* kabiji mwayukishatu bulongo na michima yenu yonse ne na myeo* yenu yonse amba kafwako kintu nangwa kimo kya mu milaye yawama kimulayile Yehoba Lesa wenu kyabula kufika ne. Bintu byonse byafika kwi anweba. Kafwako nangwa kimo kyabula kufika ne.+ 15 Bino byonkatu milaye yawama Yehoba Lesa wenu yo emulayile byo yafika pe anweba,+ Yehoba byo byo akemuletela ne bya malwa byonse byo alayile* ne kwimonauna mu kino kyalo kyawama Yehoba Lesa wenu kyo emupa.+ 16 Inge mukazhilulule lulayañano lwa Yehoba Lesa wenu lo emukambizhe kulama, kabiji inge mukaye na kwingijila balesa bangi ne kwibafukamina, bukaji bwa Yehoba bukeya pe anweba+ kabiji mukavila bukiji mu kino kyalo kyawama kyo emupa.”+

24 Yoshua wakonkenye pamo mikoka yonse ya bena Isalela ku Shekema ne kwita bakulumpe babo, bakalama babo, bamitonyi babo ne bantangi babo,+ kabiji baimene ku meso a Lesa wa kine. 2 Yoshua waambijile bantu bonse amba: “Abino byo byaamba Yehoba, Lesa wa Isalela amba, ‘Ku bushiya bwa Mukola* ko kwaikalanga kala+ bashakulu benu+—Tela shanji Abalahama kabiji shanji Nahola—kabiji baingijilanga balesa bangi.+

3 “‘Kabiji amiwa nafumishe mushakulu wenu Abalahama+ ku bushiya bwa Mukola* ne kumupisha mu kyalo kyonse kya Kenana ne kuvuzha baana* banji.+ Namupele Izaka;+ 4 kabiji Izaka namupele Yakoba ne Isao.+ Isao namupele Mutumba wa Seila kwikala wanji;+ kabiji Yakoba ne baana banji ba balume bayile ku Ijipita.+ 5 Kabiji natumine Mosesa ne Alona,+ kabiji napumine bena Ijipita na bintu byo naubile mukachi kabo,+ kepo nemulupwilemo. 6 Byo nalupwilenga bashenu mu Ijipita+ ne byo mwafikile ku kalunga ka mema, bena Ijipita bapupijilenga bashenu na makalaki a nkondo ne bendapo kukafika ne ku Kalunga ka Mema Kachila.+ 7 Kabiji batendekele kunjijila amiwa Yehoba,+ byonkabyo nabikile jikumbi pakachi kenu ne bena Ijipita ne kubwezha kalunga ka mema pe abo ne kwibalobesha,+ kabiji mwimwenejile byo naubile mu Ijipita.+ Kepo mwaikele myaka* yavula mu kiselebwa.+

8 “‘Kabiji nemuletele ku kyalo kya bena Amoli baikalanga ku bushiya* bwa Yodano, ne abo balwile ne anweba.+ Bino nebapaine mu maboko enu kuba’mba mutambule kyalo kyabo kabiji mwamwene byo nebonawine.+ 9 Kepo Belaka mfumu wa Moabu mwana wa kwa Zipole, aimene ne kulwa na bena Isalela. Onkao mambo, waichile Balamu mwana wa kwa Beola amba emufinge.+ 10 Bino kechi natelekele kwi Balamu ne.+ Onkao mambo, wimupesheshe javula+ kabiji nemupokolwele mu kuboko kwanji.+

11 “‘Kepo mwaabukile Yodano+ ne kuya ku Yeliko.+ Kabiji bantangi* ba mu Yeliko, bena Amoli, bena Pelizi, bena Kenana, bena Hiti, bena Giligashi, bena Hivi ne bena Yebusi, balwile ne anweba, bino nebapaine mu maboko enu.+ 12 Kabiji natumine moyo* wa kwimuchina kulutwe yenu, kabiji wibapangilemo ku meso enu+—bamfumu babiji ba bena Amoli. Kechi mwibapangilemo na mpoko nangwa na buta bwenu bwa mukanda ne.+ 13 Onkao mambo, nemupele kyalo kyo mwabujile kwingijila ne mizhi yo mwabujile kushimika,+ kabiji mwaikele monka. Mubena kuja mañanzañanza ne maolivi o mwabujile kujimba.’+

14 “Onkao mambo, akamwainga Yehoba ne kumwingijila mu bukine* ne mu bukishinka,*+ kabiji tayai balesa baingijilanga bashakulu benu ku bushiya bwa Mukola* ne mu Ijipita,+ kabiji mwingijilenga Yehoba. 15 Pano inge kyatama kwi anweba kwingijila Yehoba, lelo jino musale anwe bene ye mukengijilanga,+ kana balesa baingijilenga bashakulu benu ku bushiya bwa Mukola*+ nangwa balesa ba bena Amoli bena kyalo kyo mubena kwikalamo.+ Pakuba amiwa ne ba mu nzubo yami, tukengijilanga Yehoba.”

16 Ponkapo bantu bakumbwile’mba: “Kechi twakonsha kusha Yehoba ne kuya na kwingijila balesa bangi ne. 17 Yehoba Lesa wetu, ye witufumishe atweba ne bashetu mu kyalo kya Ijipita,+ mu nzubo ya buzha,+ kabiji ye waubile biyukilo bikatampe ku meso etu,+ kabiji ye witulaminenga mu jishinda monse mo twaendelenga ne mu mitundu ya bantu bonse mo twapichilenga.+ 18 Yehoba wapangilemo mitundu yonse ya bantu kuvwangakotu ne bena Amoli baikelenga mu kino kyalo saka tukyangye kwikalamo. Onkao mambo, ne atweba tukengijilanga Yehoba, mambo ye Lesa wetu.”

19 Kepo Yoshua aambijile bantu amba: “Anweba kechi mwakonsha kwingijila Yehoba ne, mambo aye ye Lesa wazhila;+ ye Lesa ukeba bantu kumwingijilatu bunke bwanji.+ Aye kechi ukemulekelako mizhilulwila* yenu ne mambo enu ne.+ 20 Inge mukamushe Yehoba ne kwingijila balesa bangi, aye naye ukemwalukilamo ne kwimuvizha nangwa kya kuba wimubila bintu byawama.”+

21 Bino bantu baambijile Yoshua amba: “Atweba tukengijilanga Yehoba!”+ 22 Onkao mambo, Yoshua waambijile bantu amba: “Anweba bene mwi bakamonyi ba kwishiina amba, mwifuukwilapo kwingijilanga Yehoba.”+ Abo baambile’mba: “Twi bakamonyi.”

23 “Onkao mambo, tayai balesa bangi bo muji nabo, ne kutesha michima yenu kwi Yehoba Lesa wa Isalela.” 24 Bantu baambijile Yoshua amba: “Tukengijilanga Yehoba Lesa wetu ne kukookela jiwi janji!”

25 Onkao mambo, Yoshua walayañene lulayañano na bantu pa jonkaja juba ne kwibapa malamuna ne mizhilo mu Shekema. 26 Kepo Yoshua anembele bino byambo mu buku wa Mizhilo ya Lesa+ ne kushikula jibwe jikatampe+ ne kwijituula munshi ya kichi kikatampe kyajinga kwipi na nzubo yazhila ya Yehoba.

27 Yoshua wabuujile bantu bonse amba: “Talai! Jino jibwe jikekala kamonyi wa kwitushiina,+ mambo jaumvwa bintu byonse byaambile Yehoba kwi atweba, kabiji jikekala kamonyi wa kwimushiina, pa kuba’mba mukabule kukana Lesa wenu.” 28 Kepo Yoshua aambijile bantu kuya, au kwanji au kwanji.+

29 Byo apwishishe kuba bino, Yoshua mwana Nuni, kalume wa Yehoba, wafwile saka aji na myaka 110.+ 30 Onkao mambo, bamuzhiikile mu nyaunda ya buswanyi bwanji mu Timinata-sela,+ uji mu kibunji kya mitumba kya Efelaimu ku kabeta ka ku buyeke bwa Mutumba wa Gaasha. 31 Bena Isalela batwajijile kwingijila Yehoba mu moba onse a kwa Yoshua ne mu moba onse a bakulumpe bashajilepo Yoshua saka afwa kala bonka bayukile mingilo yonse Yehoba yo aubijile bena Isalela.+

32 Bikupa bya kwa Yosefwa+ bena Isalela byo bafumishe mu Ijipita, bebizhiikile mu Shekema mu bujimi Yakoba bo apotele ku baana ba kwa Hamola,+ shanji Shekema, na mali a siliva 100;+ kabiji bwaikele ke buswanyi bwa baana ba kwa Yosefwa.+

33 Kabiji Eleaza mwana Alona naye wafwile.+ Onkao mambo, bamuzhiikile mu Katumbatumba ka kwa Finease mwananji,+ ko bamupele mu mpunzha ya mitumba ya Efelaimu.