BUKU WA BUBIJI WA SAMWELA

1 Saulo byo afwile, ne Davida byo abwelele kufuma ko ayile na kushinda* bena Amaleki, waikele mu Zikilagi+ pa moba abiji. 2 Pa juba ja busatu, kwaishile muntu wafumine ku nzhita ya kwa Saulo ne bivwalo byanji saka byatabauka ne maloba ku mutwe. Byo afikile kwi Davida, waponejile panshi ne kulaala kinkuvumene.

3 Davida wamwipwizhe’mba: “Wafuma kwepi?” Ne aye wakumbwile’mba: “Napuluka ku nzhita ya bena Isalela.” 4 Davida wamwipwizhe’mba: “Kyajinga byepi? Mbuuleko.” Kepo aambile’mba: “Bantu banyemako ku nkondo, bavula bafwa balaalazhamatu. Kabiji Saulo ne Yonafwanyi mwananji nabo bafwa.”+ 5 Kepo Davida aipwizhe uno nsongwalume waletele sawakya amba: “Wayuka byepi amba Saulo ne Yonafwanyi mwananji bafwa?” 6 Uno nsongwalume wakumbwile’mba: “Byo najinga pa Mutumba wa Giliboa+ ponkapotu namwene Saulo saka ashakamina ku jifumo janji, kabiji makalaki ne bantu benda pa bambili bamutaaine.+ 7 Byo aalulukile ne kummona, wangichile, ne amiwa naitabile namba, ‘Amiwa bano!’ 8 Wangipwizhe’mba, ‘Yobe ñanyi?’ Namukumbwile namba, ‘Nemwina Amaleki.’+ 9 Kepo aambile’mba, ‘Napopwela iya ungipaye, mambo nji mu misongo ikatampe, bino nkiji mumi.’* 10 Onkao mambo, nayile po ajinga kabiji namwipayile,+ mambo byo aponejile panshi saka bamukozha, nayukile namba kechi usakupuluka ne. Kepo nashikwile munchinya* wajinga ku mutwe wanji ne jikosa jajinga ku mukoko wanji, byo bino byo naleta kwi anweba nkambo.”

11 Ponkapo Davida watabwile bivwalo byanji, ne bantu banji bonse bo ajinga nabo baubile byonkabyo. 12 Kabiji bajijile mabingo ne kuzhikilwa na nzala+ kufikatu ne mabanga na mambo a kwa Saulo ne Yonafwanyi mwananji, ne na mambo a bantu ba Yehoba ne ba mu nzubo ya Isalela,+ mambo bebatapile na mpoko.

13 Davida washikishe nsongwalume wamuletejile sawakya amba: “Wafuma kwepi?” Aye wamukumbwile’mba: “Amiwa nemwana wa muntu wa ku kyalo kingi, mwina Amaleki.” 14 Kepo Davida amushikishe’mba: “Mambo ka o wabujile kuchina kutanyika kuboko kobe ne kwipaya mushingwa wa Yehoba?”+ 15 Kepo Davida aichile nsongwalume umo ne kumwambila’mba: “Iya umutape.” Ne aye wamutapile, ne kufwa wafwile.+ 16 Davida wamwambijile’mba: “Mashi obe akushinkamane, mambo kanwa kobe ko kakushiina byo waamba’mba, ‘Amiwa yami naipaya mushingwa wa Yehoba.’”+

17 Kepo Davida aimbile uno lwimbo wa bulanda* wa kujila Saulo ne Yonafwanyi mwananji+ 18 ne kwamba’mba bena Yuda bafwainwa kwibafunjisha lwimbo wa bulanda utelwa’mba “Buta bwa Mukanda,” wanembwa mu buku wa Yashala:+

19 “Anweba bena Isalela, bantu balamba balaala saka bafwa pa mapunzha enu atuntama.+

Babilobo byo balaala saka bafwa!

25 Babilobo byo balaala saka bafwa mu nkondo!

Yonafwanyi walaala saka afwa pa mapunzha enu atuntama!+

Butemwe bo wantemenwe bwakijile butemwe bwa banabakazhi.+

2 Pa kupitapo kimye, Davida waipwizhe Yehoba+ amba: “Nanchi ngye ku muzhi umo wa mu mizhi ya bena Yuda nyi?” Yehoba wamukumbwile’mba: “Yanga.” Kepo Davida aipwizhe’mba: “Nanchi ngye kwepi?” Aye wamukumbwile’mba: “Ku Hebulona.”+ 2 Byonkabyo, Davida wayile kokwa na bakazhi banji babiji, Ahinoamu+ wa ku Yezelela ne Abigaila+ wajinga muka Nabala mwina Kamela. 3 Davida wasendele ne banabalume bo ajinga nabo,+ muntu yense na ba mu nzubo yanji, kabiji baikele mu mizhi yazhokolokele Hebulona. 4 Kepo banabalume bena Yuda baishile, kabiji konkakwa bamushingile manyi Davida kuba’mba ekale mfumu wa bena Yuda.+

Bamwambijile Davida amba: “Bena Yabeshi-gileada bo bazhiikile Saulo.” 5 Onkao mambo, Davida watumine baluwe ku bena Yabeshi-gileada ne kwibambila’mba: “Yehoba emupeshe, mambo mwamwesheshe nkambo yenu Saulo butemwe bubula kwaluka byo mwamuzhiikile.+ 6 Pano Yehoba emumweshe butemwe bubula kwaluka ne bukishinka. Ne amiwa nsakwimubila lusa mambo mwaubile kino kintu.+ 7 Pano kosai ne kwikala banabalume bachinchika, mambo nkambo yenu Saulo wafwa, kabiji ba mu nzubo ya kwa Yuda banshinga manyi amba ngikale mfumu wabo.”

8 Bino Abina+ mwana wa kwa Nela, mukulumpe wa nzhita ya kwa Saulo, wasendele Ishibosheta+ mwana wa kwa Saulo, ne kumutwala ku bushiya ku Mahanaimu+ 9 ne kumuswanyika ke mfumu wa Gileada,+ ne wa bena Ashula, ne wa bena Yezelela,+ ne wa bena Efelaimu+ ne wa bena Benjamina, ne wa bena Isalela bonse. 10 Ishibosheta mwana wa kwa Saulo, wajinga na myaka 40 kimye kyo aikele mfumu wa bena Isalela, kabiji walamine pa myaka ibiji. Nangwa byonkabyo, bena Yuda balondejilenga Davida.+ 11 Davida waikele mfumu wa bena Yuda mu Hebulona, myaka itanu na ibiji ne bañondo batanu na umo.+

12 Mu kuya kwa kimye, Abina mwana wa kwa Nela ne bakalume ba kwa Ishibosheta mwana wa kwa Saulo, bafumine ku Mahanaimu+ ne kuya ku Gibeona.+ 13 Kabiji Yoaba+ mwana wa kwa Zeluya+ ne bakalume ba kwa Davida nabo bayile na kulwa nabo ku kizhiba kya ku Gibeona; kabiji jibumba jimo jaikele ku lubaji lumo lwa kizhiba, ne jibumba jikwabo jaikele ku lubaji lukwabo lwa kizhiba. 14 Kepo Abina aambijile Yoaba amba: “Baswishe bansongwalume bemane, balwe* saka tumonako.” Yoaba waambile’mba: “Bambile bemane.” 15 Byonkabyo, baimene ne kuya saka bebabala, mu jibumba ja bena Benjamina ne Ishibosheta mwana wa kwa Saulo mwafumine bantu 12 ne mu bakalume ba kwa Davida mwafumine bantu 12. 16 Muntu yense wakwachile mukwabo ku mutwe ne kwasa mpoko mu mbavu ya mulwanyi wanji, kabiji bonse beponeshe panshi. Onkao mambo, aya mpunzha iji mu Gibeona, beitumbile’mba Helekata-hazulimu.

17 Kabiji nkondo yalondejilepo aja juba yakosele bingi, kabiji Abina ne banabalume bena Isalela bebashinjile ku bakalume ba kwa Davida. 18 Kabiji baana basatu ba kwa Zeluya+ bajinga konka abo ba Yoaba,+ Abishai+ ne Asahela;+ kabiji Asahela wanyemangatu byonka binyema lupaala mungye. 19 Asahela wapangishe Abina, kabiji kechi wasendukijile ku kilujo nangwa ku kipiko pa kupangisha Abina ne. 20 Abina byo atajile kunyuma waipwizhe’mba, “Nanchi yobe Asahela nyi?” Ne aye wakumbwile’mba, “Ee.” 21 Kepo Abina amwambijile’mba: “Sendukila ku kilujo nangwa ku kipiko ne kukwatapo nsongwalume umo, ne kumwangata byonse byo aji nabyo wibisende.” Bino Asahela kechi wakebelenga kwikileka kumupangisha ne. 22 Onkao mambo, Abina waambijile Asahela jikwabo amba: “Kileke kumpangisha. Mambo inge ne, nsakukutapa. Inge nkwipaye, nkamonañana byepi na mulongo wobe Yoaba?” 23 Bino watwajijile kukana, onkao mambo, Abina wamwashile mu jivumo na jifumo,+ ne jifumo japulankene ne munyuma; kabiji waponene panshi ne kufwila ponkapa. Muntu yense wafikilenga pa mpunzha palaajile Asahela saka afwa, waimenenga ne kutulumana ponkapa.

24 Kabiji Yoaba ne Abishai bapupijile Abina. Juba byo jazhikilenga, bafikile ku katumbatumba ka Ama, katalañana na Giya mu jishinda jaya ku kiselebwa kya Gibeona. 25 Konkakwa bena Benjamina bakonkene pamo kuzhokoloka Abina, kabiji balengele jibumba jimo ne kwimana peulu ya katumbatumba kamo. 26 Kepo Abina abijikile kwi Yoaba amba: “Nanchi mpoko isakutwajijilatu kwipayañana nyi? Nanchi kechi wayuka’mba musakufumatu makatazho nenyi? Pano ñanyi kimye kyo usakwambila bantu kuleka kupupila balongo babo?” 27 Kepo Yoaba aambile’mba: “Kine, byonkatu Lesa wa kine byo aji na bumi, inge kechi waji kwamba ne, kesha lukelo bantu inge po po balekele kupupila balongo babo.” 28 Ponkapo Yoaba wavuminye lusengo, ne bantu banji bekilekele kupupila bena Isalela, ne kulwa kwapwile.

29 Kepo Abina ne bantu banji bapichile mu Alaba+ abwa bufuku bonse ne kwabuka Yodano ne kupita mu kimpachiko kyonse* ne kufika bafikile ku Mahanaimu.+ 30 Yoaba byo afumine na kupangisha Abina, wakonkenye bantu bonse pamo. Pa bakalume ba kwa Davida pabujijile bantu 19, kubikapo ne Asahela. 31 Bino bakalume ba kwa Davida bashinjile bena Benjamina ne bantu ba kwa Abina, kabiji bantu babo 360 bafwile. 32 Basendele Asahela+ ne kukamuzhiika mu kilende kya bashanji, kiji ku Betelema.+ Kepo Yoaba ne bantu banji baendele bufuku bonse, kabiji bafikile ku Hebulona+ kumakya.

3 Nkondo yajinga pakachi ka ba mu nzubo ya kwa Saulo ne ba mu nzubo ya kwa Davida yakosejilengakotu;+ kabiji Davida wayilengatu na kukosa, bino ba mu nzubo ya kwa Saulo bayilengatu na kukooka.+

2 Kabiji Davida wasemene baana mu Hebulona.+ Mubeji wajinga Aminona+ ye asemejile mwi Ahinoamu+ wa ku Yezelela. 3 Wa bubiji wajinga Kilyaba ye asemejile mwi Abigaila,+ wajinga muka Nabala mwina Kamela; kabiji wa busatu wajinga Abisalomo+ mwana wa kwa Maaka, mwana wa mukazhi wa kwa Talamai+ mfumu wa Geshula. 4 Wa buna wajinga Adoniya+ mwana wa kwa Hagita, ne wa butanu wajinga Shefwatiya mwana wa kwa Abitali. 5 Wa butanu na umo wajinga Iteleamu, Davida ye asemejile mu mukazhanji aye Egela. Abano Davida bo bo asemejile mu Hebulona.

6 Nkondo yajinga pakachi ka ba mu nzubo ya kwa Saulo ne ba mu nzubo ya kwa Davida byo yatwajijile, Abina+ watwajijile kukosesha kifulo kyanji mu ba mu nzubo ya kwa Saulo. 7 Saulo wajinga na ntombo wa jizhina ja Lizipa,+ mwana wa kwa Aya. Pa kupitapo moba, Ishibosheta+ waipwizhe Abina amba: “Mambo ka o wilaajile na ntombo wa batata?”+ 8 Ponkapo Abina wazhingijile bingi na mambo a bino byambo byaambile Ishibosheta ne kwamba’mba: “Nanchi amiwa yami kabwa wa bena Yuda nyi? Kufikatu ne lelo jino, amiwa namwesha butemwe bubula kwaluka ku ba mu nzubo ya bashenu ba Saulo, ne ku balongo babo ne balunda nabo, kabiji kechi nemusolola kwi Davida ne; bino lelo anweba mubena kunshinawina na mambo a mwanamukazhi. 9 Lesa akankambule bingi amiwa Abina inge nkabule kubila Davida byonkatu Yehoba byo achipile kwi aye:+ 10 kutuntulula bufumu kufuma ku ba mu nzubo ya kwa Saulo ne kwikajika jitanda ja kwa Davida pa bena Isalela ne pa bena Yuda, kufumatu ku Danyi kukafika ne ku Belesheba.”+ 11 Ishibosheta wakankelwe kumukumbula Abina, mambo wamuchiinenga.+

12 Ponkapo Abina watumine baluwe kwi Davida ne kwamba’mba: “Nanchi kino kyalo kya kwa ñanyi?” Kabiji wanungilepo’mba: “Layañanai ne amiwa, kabiji nsakwimubila kyonse kyo nakonsha* kuba pa kuba’mba ndengele bena Isalela bonse kwalulukila ku lubaji lwenu.”+ 13 Ne aye wakumbwile’mba: “Kyawama! Nsakulayañana ne obewa. Kintu kyo mbena kukebatu kwi obewa ke kya kuba’mba kechi wafwainwa kumona kilungi kyami ne, poso ukalete Mikala+ mwana wa mukazhi wa kwa Saulo pa kwiya na kummona.” 14 Kepo Davida atumine baluwe kwi Ishibosheta+ mwana wa kwa Saulo ne kwamba’mba: “Mundetele Mikala mukazhami ye naipangwizhe na tulomolomo 100 twa bena Filishitiya.”+ 15 Byonkabyo, Ishibosheta watumine muluwe wa kuya na kumusenda ku mwatawanji aye Palatiela+ mwana wa kwa Laishi. 16 Bino mwatawanji wamulondejilenga munyuma saka ajila kukafikatu ne ku Bahulimu.+ Kepo Abina amwambijile’mba: “Bwelamo!” Ponkapo ne aye wabwelelemo.

17 Kabiji Abina watumine mawi ku bakulumpe ba bena Isalela amba: “Pa moba avula, mwakebelenga’mba Davida ekale mfumu wenu. 18 Pano ubaipo kimo, mambo Yehoba waambijile Davida amba: ‘Kupichila mu kuboko kwa kalume wami Davida,+ nkapulusha bantu bami bena Isalela ku maboko a bena Filishitiya ne ku maboko a balwanyi babo bonse.’” 19 Kepo Abina esambile na bena Benjamina.+ Kabiji Abina wayile ne na kwisamba ne Davida ku mbaji ku Hebulona ne kumubuula byaumvwañene bena Isalela na ba mu nzubo yonse ya kwa Benjamina.

20 Abina byo afikile kwi Davida ku Hebulona na banabalume 20, Davida watekejile Abina kijiilo ne banabalume bo ajinga nabo. 21 Kepo Abina aambijile Davida amba: “Ndekai ngye nkakonkanye bena Isalela pamo kwi nkambo yami mfumu, kuba’mba bakalayañane ne anweba, kabiji mukekala ke mfumu pa bintu byonse byo mukeba.”* Davida wamwambijile Abina kuya, ne aye wayile mu mutende.

22 Pa kyonkakya kimye, bakalume ba kwa Davida ne Yoaba babwelele kufuma ko bayile na kulwa, saka basenda ne bipukulwa byavula. Abina kechi wajinga ne Davida ku Hebulona ne, mambo wamwambijile kuya mu mutende. 23 Yoaba+ ne nzhita yonse yo ajinga nayo, byo bafikile, Yoaba bamubuujile’mba: “Abina+ mwana wa kwa Nela+ waji kwiya kwi bamfumu, ne abo baji kumwambila kuya ne aye waji kuya mu mutende.” 24 Kepo Yoaba ayile kwi mfumu ne kumwambila’mba: “Ki ka kyo mwauba? Abina waji kwiya kwi anweba. Mambo ka o mwaji kumulekela kuba’mba aye mu mutende? 25 Mwamuyuka Abina mwana wa kwa Nela! Waji kwiya kuno na kwimujimbaika ne kuyuka mashinda enu onse ne bintu byonse byo mubena kuba.”

26 Onkao mambo, Yoaba wafumineko kwi Davida ne kutuma baluwe kwi Abina, ne abo bamubwezhezhemo kufuma ku mushima* wa ku Shilaya; bino Davida kafwako kintu nangwa kimo kyo ayukile ne. 27 Abina byo abwelele ku Hebulona,+ Yoaba wamusendele kwa bunke ku kibelo kuba’mba besambe nanji ku mbaji. Konkakwa wamwashile mu jivumo, ne kufwa wafwile;+ waubile kino na mambo a kumwipayila* mulongo wanji aye Asahela.+ 28 Davida byo aumvwine kino, waambile’mba: “Amiwa ne bufumu bwami tukatwajijila kubinga kwi Yehoba na mambo a mashi+ a kwa Abina mwana wa kwa Nela. 29 Amushinkamane Yoaba+ ne ba mu nzubo yonse ya bashanji. Mu nzubo ya kwa Yoaba mukatwajijile kwikala muntu wa kikola kya kusuuma ku binungwa bya lusemo,+ nangwa wa mbumba,+ nangwa muntu wingila na kakonkobele* ko bapikwilako bisapi, nangwa muntu ye batapa na mpoko, nangwa muntu wabula kajo!”+ 30 Byonkabyo, Yoaba ne mulongo wanji aye Abishai+ baipayile Abina,+ mambo Abina waipayile Asahela mulongo wabo mu nkondo+ ku Gibeona.

31 Kepo Davida aambijile Yoaba ne bantu bonse bo ajinga nabo amba: “Tabaulai bivwalo byenu ne kwinyinga bisapi bya majila ne kumujila Abina.” Mfumu Davida walondejilenga kunyuma ya makila. 32 Bamuzhiikile Abina ku Hebulona; kabiji mfumu wajijile bingi ku kilende kya kwa Abina, ne bantu bonse bajijile. 33 Mfumu waimbile pe Abina amba:

“Nanchi Abina wafwainwe kufwa nobe muntu wabula maana nyi?

Bakwipayile nobe muntu ye baipaya ku bambanzhi.”*+

Ponkapo bantu bonse bamujijile jibiji.

35 Kabiji bantu bamuletejile Davida kajo mute kuba’mba bamutekeneshe,* bino Davida wachipile’mba: “Lesa ankambule bingi inge juba saka jikyangye kuzhika njepo pa kajo nangwa pa bintutu bikwabo!”+ 36 Bantu bonse bamwene kino, kabiji kibatokejile ku muchima. Byonse byaubile mfumu, byatokeshe bantu ku muchima. 37 Onkao mambo, bantu bonse ne bena Isalela bonse bayukile pa joja juba amba, mfumu kechi ye waipayile Abina mwana wa kwa Nela ne.+ 38 Kepo mfumu aambijile bakalume banji amba: “Nanchi kechi mwayuka’mba, kinemanga mukatampe ye wafwa lelo jino mu Isalela nenyi?+ 39 Lelo, amiwa nakooka bingi nangwa kya kuba nemfumu ye bashinga manyi,+ kabiji bano banabalume, baana ba kwa Zeluya,+ banguba kintu kyatama bingi.+ Yehoba akamufwete ngubabibi monka mwayila bubi bwanji.”+

4 Ishibosheta+ mwana wa kwa Saulo byo aumvwine’mba Abina wafwila ku Hebulona,+ bulume bwamupwile* ne bena Isalela bonse bakakijilwe bingi. 2 Kwajinga banabalume babiji bajinga bakulumpe ba nzhita ya mwana wa kwa Saulo: umo jizhina janji wajinga Beana ne mukwabo wajinga Lekaba. Bajinga baana ba kwa Limonyi mwina Beelota, wa mu mukoka wa bena Benjamina. (Mambo mpunzha ya Beelota+ beibajilanga pamo na mpunzha ya Benjamina. 3 Bena Beelota banyemejile ku Gitaimu,+ ne kwikala bwenyi konkakwa kufikatu ne lelo jino.)

4 Yonafwanyi+ mwana wa kwa Saulo wajinga na mwana wa mulume walemene maulu.+ Wajinga na myaka itanu kimye kyaishile sawakya pa mambo a kwa Saulo ne Yonafwanyi kufuma ku Yezelela,+ awa wamulaminenga wamushikwile ne kunyema, bino byo anyemenenga na mambo a moyo, uno mwana waponene panshi ne kulemana. Jizhina janji wajinga Mefibosheta.+

5 Baana ba kwa Limonyi mwina Beelota, abo ba Lekaba ne Beana bayile ku nzubo ya kwa Ishibosheta mute saka a zonga, aye byo akokolokelenga pa kushinkamana kwa juba. 6 Batwelele mu nzubo uba nobe babena kukeba kutola wichi, ponkapo bamwashile mu jivumo; kepo Lekaba ne mulongo wanji aye Beana+ banyemene. 7 Byo batwelele mu nzubo, bamutaaine saka alaala pa mwanya wanji kukachi, kabiji bamutapile ne kumwipaya, ne kumuchibako mutwe. Kepo basendele mutwe wanji ne kwenda bufuku bonse mu jishinda jaya ku Alaba. 8 Kabiji baletele mutwe wa kwa Ishibosheta+ kwi Davida ku Hebulona ne kumwambila mfumu amba: “Uno ye mutwe wa kwa Ishibosheta mwana wa kwa Saulo mulwanyi+ wenu wakebelenga bumi* bwenu.+ Lelo jino Yehoba wimushinkenyako anweba nkambo yami mfumu pa mambo a kwa Saulo ne ba mu kisemi kyanji.”

9 Nangwa byonkabyo, Davida waambijile Lekaba ne mulongo wanji aye Beana, baana ba kwa Limonyi mwina Beelota amba: “Byonkatu Yehoba byo aji na bumi, yenka wampokolwele* mu bya malwa byonse,+ 10 muntu umo byo ambuujile’mba, ‘Saulo wafwa,’+ ne kulanguluka’mba waleta mambo awama kwi amiwa, namukwachile ne kumwipaya+ monka mu Zikilagi. Ino yo yajinga mfweto yo nafwetele yewa muluwe! 11 Kisakutamina bingi bantu babi baipayila muntu waoloka mu nzubo yanji ponka pa mwanya wanji! Nanchi kechi nafwainwa kwimutotolwesha na mambo a kwichila mashi anji+ ne kwimufumyapo pano pa ntanda nenyi?” 12 Kepo Davida akambizhe bansongwalume banji kwipaya bano bantu.+ Bebachibile maboko ne maulu ne kwibakobeka+ kwipi na kizhiba ku Hebulona. Bino bashikwile mutwe wa kwa Ishibosheta ne kukamuzhiika ku mpunzha ya kuzhiikamo ya kwa Abina monka mu Hebulona.

5 Mu kuya kwa moba, mikoka yonse ya bena Isalela yaishile kwi Davida ku Hebulona+ ne kumwambila’mba: “Umvwai! Atweba twi bikupa byenu kabiji twi mubiji wenu.*+ 2 Kala Saulo byo akijinga mfumu wetu, anweba yenu mwatangijilanga bena Isalela ku makondo.*+ Kabiji Yehoba wimwambijile’mba: ‘Yobe ukafunganga bantu bami bena Isalela, kabiji ukekala ntangi wa bena Isalela.’”+ 3 Byonkabyo, bakulumpe bonse ba bena Isalela baishile ku mfumu ku Hebulona, kabiji Mfumu Davida walayañene nabo lulayañano+ mu Hebulona ku meso a Yehoba. Kepo bamushingile manyi Davida kuba’mba ekale mfumu wa bena Isalela.+

4 Davida wajinga na myaka 30 kimye kyo aikele mfumu, kabiji walamine myaka 40.+ 5 Mu Hebulona walamine bena Yuda myaka itanu na ibiji ne bañondo batanu na umo; kabiji myaka 33 walamine bena Isalela bonse ne bena Yuda mu Yelusalema.+ 6 Kabiji mfumu ne bantu banji bayile ku Yelusalema na kulwa na bena Yebusi+ baikalanga mu kyalo. Bamwendelekelenga Davida amba: “Kechi ukatwelamo muno ne! Bampofu ne bilema bakakupangisha.” Balangulukilenga amba, ‘Davida kechi ukatwelamo muno ne.’+ 7 Nangwa byonkabyo, Davida washinjile muzhi wa Ziona wajinga na nsakwa yakosa, luno ke Muzhi wa Davida.+ 8 Onkao mambo, pa jonkaja juba Davida waambile’mba: “Aba basakuya na kulukuka bena Yebusi, bapichile mu bwina bukatampe mupichila mema ne kutapa ‘bilema ne bampofu,’ bonka bashikwa Davida!”* O ene mambo o bambila’mba: “Bampofu ne bilema kechi bakatwelamo mu nzubo ne.” 9 Kepo Davida aikajile mu muzhi wajinga na nsakwa yakosa, kabiji bamutumbile* amba Muzhi wa Davida; kabiji Davida watatwile kushimika masakwa ne bintutu bikwabo pa Kituntaulo*+ ne mu mapunzhatu akwabo ajinga mu mizhi.+ 10 Byonkabyo, Davida wayilengatu na kutumbalala,+ kabiji Yehoba Lesa wa mabumba wajinga nanji.+

11 Hilama+ Mfumu wa ku Tila watumine baluwe kwi Davida, kabiji watumine ne bichi bya sida,+ basendwe ba bichi, ne basendwe ba mabwe ba kushimika masakwa, ne abo batatwile kushimika nzubo* ya kwa Davida.+ 12 Kabiji Davida wayukile’mba Yehoba wakosesha bufumu bwa bena Isalela+ ne kuba’mba watumbijika bufumu bwanji+ na mambo a bantu banji bena Isalela.+

13 Davida wajinga na bantombo ne banabakazhi bavula+ mu Yelusalema kimye kyo afumine ku Hebulona, kabiji Davida wasemejilepo ne baana bakwabo ba balume ne ba bakazhi.+ 14 Bano bo baana bo asemejile mu Yelusalema: Shamuwa, Shobaba, Natana,+ Solomone,+ 15 Ibala, Elishuwa, Nefega, Yafiya, 16 Elishama, Eliada ne Elifeleta.

17 Bena Filishitiya byo baumvwine’mba Davida bamushinga manyi kwikala mfumu wa bena Isalela,+ bena Filishitiya bonse baishile na kukeba Davida.+ Davida byo aumvwine kino, wafyamine mu nkonkoso.+ 18 Kepo bena Filishitiya baishile ne kukumbana mu Kimpachiko* kya Lefwaimu.+ 19 Davida waipwizhe Yehoba+ amba: “Nanchi ngye na kulwa na bena Filishitiya nyi? Nanchi musakwibapana mu kuboko kwami nyi?” Ponkapo Yehoba wamwambijile Davida amba: “Yanga, mambo kine bena Filishitiya nsakwibapana mu kuboko kobe.”+ 20 Byonkabyo, Davida wayile ku Baela-pelazimu, kabiji wibatapijile konkakwa. Kepo aambile’mba: “Yehoba wanshinjilako balwanyi bami,+ byonkatu mema byo apomona mushime.” O ene mambo o atumbijile yoya mpunzha amba Baela-pelazimu.*+ 21 Bena Filishitiya bashile bankishi babo konkakwa, kabiji Davida ne bantu banji basendele bano bankishi.

22 Pa kupitapo kimye, bena Filishitiya baishile jikwabo ne kukumbana mu Kimpachiko* kya Lefwaimu.+ 23 Davida waipwizhe Yehoba, bino aye wamukumbwile’mba: “Kange wibashinkamane ne. Pano bino, wibazhoke ne kwibeshila kunyuma yabo kwipi na bipupu bya baka. 24 Kabiji byo usakumvwa ncholoko peulu ya bipupu bya baka, wibavundumikile mambo Yehoba watangilako kulutwe na kutapa nzhita ya bena Filishitiya.” 25 Byonkabyo, Davida waubile byonkatu byamukambizhe Yehoba, kabiji watapile bena Filishitiya+ kufuma ku Geba+ kukafika ne ku Gezela.+

6 Davida wakonkenye pamo jibiji bashilikale bena Isalela bonse bayuka kulwa, banabalume 30,000. 2 Kepo Davida ne bantu bonse bo ajinga nabo bayile ku Baelayuda na kusenda Jikwachi ja Lesa wa kine,+ jonka bantu jo bechilapo jizhina ja Yehoba wa mabumba,+ yenka waikala peulu* ya bakelubi.+ 3 Nangwa byonkabyo, babikile Jikwachi ja Lesa wa kine mu kikochikala+ kya katataka kwijifumya mu nzubo ya kwa Abinadaba+ yajinga pa katumbatumba; kabiji Uza ne Ahio, baana ba kwa Abinadaba bo batangijilenga kikochikala kya katataka.

4 Byonkabyo, basendele Jikwachi ja Lesa wa kine kwijifumya mu nzubo ya kwa Abinadaba yajinga pa katumbatumba, kabiji Ahio watangijileko kulutwe ya Jikwachi. 5 Davida ne bena Isalela bonse basekejilenga ku meso a Yehoba na mitundu yonse ya bijimba bya mapulanga a kichi kya yunipa, byansa, bijimba bikwabo bya mizhinge,+ minsakayi,+ mikakaashi ne nsonsolo.+ 6 Bino byo bafikile ku kipujilo kya Nakona, Uza watanyikile kuboko kwanji ne kukwata Jikwachi ja Lesa wa kine,+ mambo bañombe bakebele kwijiponesha. 7 Ponkapo Yehoba wabuukijile Uza bukaji, kabiji Lesa wa kine wamukambwile+ na mambo a kubula mushingi,+ ne kufwa wafwijile konka ku Jikwachi ja Lesa wa kine. 8 Bino Davida wazhingijile* mambo bukaji bwa Yehoba bwaishile pe Uza; kabiji aya mpunzha beitela’mba Pelezuza* kufikatu ne lelo jino. 9 Onkao mambo, Davida wamuchiine Yehoba+ aja juba ne kwamba’mba: “Nanchi Jikwachi ja Yehoba jikeya byepi kwi amiwa?”+ 10 Davida kechi wakebele kuleta Jikwachi ja Yehoba mu Muzhi wa Davida mo aikalanga ne.+ Davida wijitwajile ku nzubo ya kwa Obeda-edomu+ mwina Gata.

11 Jikwachi ja Yehoba jaikele bañondo basatu ku nzubo ya kwa Obeda-edomu mwina Gata, kabiji Yehoba watwajijile kupesha Obeda-edomu ne ba mu nzubo yanji.+ 12 Mfumu Davida bamubuujile’mba: “Yehoba wapesha ba mu nzubo ya kwa Obeda-edomu ne bintu byonse byo aji nabyo na mambo a Jikwachi ja Lesa wa kine.” Onkao mambo, Davida wayile na kusenda Jikwachi ja Lesa wa kine kwijifumya ku nzubo ya kwa Obeda-edomu ne kwijitwala ku Muzhi wa Davida saka asangalala.+ 13 Aba basendele+ Jikwachi ja Yehoba byo baendeleko ntampulo itanu na umo, aye watapishe ñombe ne nyama wanuna.

14 Davida wazhilenga na bulume bwanji bonse ku meso a Yehoba; waubilenga kino saka avwala* kajilaya kabula maboko ka kisapi kya linenyi.+ 15 Davida ne bena Isalela bonse baletelenga Jikwachi+ ja Yehoba saka bemba na lusekelo+ ne kuvumya lusengo.+ 16 Bino Jikwachi ja Yehoba byo jafikile mu Muzhi wa Davida, Mikala+ mwana wa mukazhi wa kwa Saulo wasumbijile mu kipenze ne kumona Mfumu Davida saka akilauka ne kuzha ku meso a Yehoba; kabiji wamulengulwile mu muchima wanji.+ 17 Byonkabyo, baletele Jikwachi ja Yehoba ne kwijibika pa mpunzha yajo mu tente, Davida ye ejipopejile.+ Kepo Davida alambwile milambo ya kusoka+ ne bitapisho bya mutende+ kwi Yehoba.+ 18 Davida byo apwishishe kulambula milambo ya kusoka ne bitapisho bya mutende, wapesheshe bantu mu jizhina ja Yehoba wa mabumba. 19 Kabiji bena Isalela bonse, mwanamulume ne mwanamukazhi, wibapele au shinkwa wanzhingwile, au shinkwa wanzhingwile, bashinkwa bo balengele na bisonga ne bashinkwa bo balengele na mañanzañanza auma, kepo bantu bonse bayile, au ku nzubo yanji, au ku nzubo yanji.

20 Davida byo abwelele na kupesha ba mu nzubo yanji, Mikala+ mwana wa mukazhi wa kwa Saulo wamutundaijile. Waambile’mba: “Mfumu wa Isalela byo aji kwitumbijikapo aye mwine byo aji kuvuula lelo jino ku meso a bazha ba bakazhi ba bakalume banji, byonkatu muntu wabula maana byo evuula aye mwine pa luntunanwa!”+ 21 Ponkapo Davida wamwambijile Mikala amba: “Naji kusekelanga kwi Yehoba, yenka wansajile ne kusha bashobe ne ba mu nzubo yabo bonse, kabiji yenka wantongwele kwikala ntangi wa bantu ba Yehoba, bena Isalela.+ Onkao mambo, nsakusekela ku meso a Yehoba, 22 kabiji nsakwipelula kukila ne pano, ne kwimona ami mwine kupela. Bino ku bazha ba bakazhi bo waambapo, nsakutumbijikwa.” 23 Onkao mambo, Mikala+ mwana wa kwa Saulo, kechi wasemenepo mwana ne, kufikatu ne juba jo afwile.

7 Mfumu byo aikele mutende mu nzubo* yanji+ ne Yehoba byo amulengejile kukokoloka ku balwanyi banji bonse bamuzhokolokele, 2 waambijile ngauzhi Natana+ amba: “Amiwa mbena kwikala mu nzubo ya bichi bya sida+ pakuba Jikwachi ja Lesa wa kine jaikala mu tente.”+ 3 Natana wamukumbwile mfumu amba: “Ubai kyonse kyasaka kuba muchima wenu, mambo Yehoba uji nenu.”+

4 Bonkabwa bufuku, Yehoba waambijile Natana amba: 5 “Yanga ukamubuule kalume wami Davida amba, ‘Yehoba waamba’mba: “Nanchi wafwainwa kunshimikila nzubo ya kwikalamo nyi?+ 6 Mambo nkyangye kwikalapo mu nzubo ne, kufuma juba jo nafumishe bena Isalela mu Ijipita kufika ne lelo,+ bino naendelengatu mu tente.+ 7 Kimye kyonse kyo naendelenga na bena Isalela* bonse, nanchi naambilepo kyambo nangwa kimo ku umo wa mu bantangi ba mikoka ya bena Isalela bonka bo natongwele kulama bantu bami bena Isalela byonka byuba kafunga, namba, ‘Mambo ka o mwabujile kunshimikila nzubo ya bichi bya sida nyi?’”’ 8 Pano umubuule bino kalume wami Davida amba, ‘Yehoba wa mabumba waamba’mba: “Nakusendele kufuma ku mpunzha ya munyemvu, ne kukulekesha kufunga mikooko,+ kuba’mba wikale ntangi wa bantu bami bena Isalela.+ 9 Kabiji nkekala nobe konse ko ukayanga,+ kabiji nkonauna* balwanyi bobe bonse saka umonako;+ nkatumbijika jizhina jobe,+ nobe mazhina a bantu batumbalala pano pa ntanda. 10 Bantu bami bena Isalela nkebatongwela mpunzha ne kwibekazha monka, ne abo bakekala monka kabiji kafwako ukebakatazhanga ne; kechi bakebamanyikanga jibiji ku bantu babi byonka byo baubanga kala ne,+ 11 kufumatu juba jo natongwele bamitonyi+ ba kulama bantu bami bena Isalela. Kabiji nkakulengela kukokoloka ku balwanyi bobe bonse.+

“‘“Kabiji Yehoba wakubuula’mba, aye Yehoba ukakushimikila nzubo.*+ 12 Moba obe byo akapwa,+ ne byo bakakulaajika kwalaala bashakulu bobe, nkaswanyikapo mwanobe* pe obewa, yenka ye ukasema,* kabiji nkekajika bufumu bwanji.+ 13 Ye ukashimika nzubo ya kutumbijikilamo jizhina jami,+ kabiji nkekajika jitanda ja bufumu bwanji myaka ne myaka.+ 14 Nkekala shanji, ne aye ukekala mwanami.+ Inge akoobe kyatama, nkamupuma na kamama ko bapuminako bantu ne na bikote byo bapuminako baana ba bantu.*+ 15 Kechi nkaleka kumumwesha butemwe bubula kwaluka byonka byo nalekele kwibumwesha kwi Saulo,+ ye nafumishe kwi obewa ne. 16 Kikota kyobe ne bufumu bobe bikekalangatu byakosa kikupu; kabiji jitanda jobe jikekala myaka ne myaka.”’”+

17 Natana wabuujile Davida bino byambo byonse ne kino kimwesho kyonse.+

18 Ponkapo Mfumu Davida watwelele ne kwikala panshi ku meso a Yehoba ne kwamba’mba: “Nanchi yami ñanyi, anweba Nkambo Mfumu Yehoba? Kabiji nzubo yami yo ya byepi byo mwangubila bino bintu byonse?+ 19 Kabiji kununga pa bino bintu, anweba Nkambo Mfumu Yehoba, mwaamba ne pa bikamwekela nzubo yami kulutwe amiwa kalume wenu; kabiji uno ye mukambizho* wa bantu bonse, anweba Nkambo Mfumu Yehoba. 20 Nanchi ñanyi bintu bikwabo byo nakonsha kwamba kwi anweba, amiwa Davida, kalume wenu ye mwayuka bulongo+ anweba Nkambo Mfumu Yehoba? 21 Na mambo a byambo byenu ne monka mwayila kyaswa muchima wenu, mwauba bino bintu byonse bikatampe ne kwibisolola kwi amiwa kalume wenu.+ 22 O ene mambo o mwatumbalela,+ anweba Nkambo Mfumu Yehoba. Kafwako waesakana ne anweba ne,+ kabiji kafwako Lesa mukwabo ne, kanatu anweba yenka;+ bintu byonse byo twaumvwa na matwi etu bimwesha’mba kino kya kine. 23 Kabiji ñanyi kisaka kikwabo pano pa ntanda kyaesakana na bantu benu bena Isalela?+ Anweba Lesa mwayile na kwibakuula kabiji baikele ke bantu benu,+ kabiji mwatumbalele+ byo mwibobijile bintu bikatampe bilengesha moyo.+ Mwapangile bisaka bya bantu ne balesa babo na mambo a bantu benu, bo mwakuujile mu Ijipita. 24 Mwalengejile bena Isalela kwikala bantu benu myaka ne myaka;+ kabiji anweba Yehoba mwaikala ke Lesa wabo.+

25 “Pano anweba Yehoba Lesa, mukafikizhe mulaye ye mwandaya amiwa kalume wenu ne ba mu nzubo yami myaka yonse, kabiji mukoobe byonka byo mwalaya.+ 26 Jizhina jenu jitumbijikwe myaka ne myaka,+ ne bantu bakambe’mba, ‘Yehoba wa mabumba ye Lesa wa bena Isalela,’ kabiji mwikajike nzubo yami amiwa kalume wenu Davida.+ 27 Mambo anweba Yehoba wa mabumba Lesa wa Isalela, mwasolola kwi amiwa kalume wenu byo mwaamba’mba, ‘Nkakushimikila nzubo.’*+ O ene mambo kalume wenu o achinchikila* ne kulomba luno lulombelo kwi anweba. 28 Anweba Nkambo Mfumu Yehoba, yenu Lesa wa kine, kabiji byambo byenu bo bukine,+ kabiji mwandaya amiwa kalume wenu bino bintu byawama. 29 Onkao mambo, kimutokele ku muchima kupesha nzubo yami amiwa kalume wenu, kabiji ikalenga byonkabye kwi anweba myaka ne myaka;+ mambo anweba Nkambo Mfumu Yehoba, mwalaya kabiji na mambo a mapesho enu nzubo yami amiwa kalume wenu mwiipesha myaka ne myaka.”+

8 Byo papichile moba, Davida washinjile bena Filishitiya+ ne kwibakookesha,+ kabiji waangachile Metegama mu maboko a bena Filishitiya.

2 Washinjile bena Moabu+ ne kwibalaajika panshi kabiji wibapimine na ntambo. Bo apimine na ntambo ibiji wibepayile, ne bo apimine na lutambo umo kechi wibepayile ne.+ Kepo bena Moabu baikele ke bakalume ba kwa Davida kabiji bamuletelanga milambo.+

3 Davida washinjile Hadadeza mwana wa kwa Lehoba mfumu wa Zoba,+ byo ayilenga na kubwezha bukalama bwanji ku Mukola wa Ufelata.+ 4 Davida wakwachile banabalume benda pa bambili 1,700 ne bashilikale benda panshi 20,000. Kepo Davida achibile mishipeshipe ya ku maulu a bambili bonse, bino washilepo bambili ba ku makalaki 100.+

5 Bena Silya ba ku Damasakasa+ byo baishile na kukwasha Hadadeza Mfumu wa Zoba, Davida watapile bena Silya 22,000.+ 6 Kepo Davida abikileko bashilikale ku Silya mu Damasakasa, ne bena Silya baikele ke bakalume ba kwa Davida kabiji bamuletelanga milambo. Yehoba walengelanga Davida kushinda* konse ko ayanga.+ 7 Kabiji Davida waangachile makebo a nzhingwile a ngolode a bakalume ba kwa Hadadeza ne kwialeta ku Yelusalema.+ 8 Kabiji Davida wasendele mukuba wavula kufuma mu muzhi wa Betane ne wa Belota, mizhi ya kwa Hadadeza.

9 Kabiji Toi Mfumu wa ku Hamata+ waumvwine’mba Davida washinda nzhita yonse ya kwa Hadadeza.+ 10 Ponkapo Toi watumine mwananji Yolamu kwi Davida Mfumu na kumwimuna ne kumusanchila mambo walwile na Hadadeza ne kumushinda (mambo Hadadeza walwanga ne Toi javula), kabiji waletele bipe bya siliva ne bya ngolode ne bya mukuba. 11 Mfumu Davida wapaine bino bintu kwi Yehoba, pamo na siliva ne ngolode yo azhijikile yafumine ku bisaka byonse bya bantu byo ashinjile:+ 12 kufuma ku bena Silya ne bena Moabu,+ kufuma ku bena Amonyi, bena Filishitiya,+ bena Amaleki,+ ne bipukulwa byo aangachile Hadadeza+ mwana wa kwa Lehoba mfumu wa Zoba. 13 Kabiji Davida walengejile jizhina janji mwine kutumbalala byo abwelele kufuma ko ayile na kwipaya bena Edomu 18,000 mu Musanza wa Mukele.+ 14 Wabikilemo bashilikale mu Edomu. Mu Edomu monse wabikilemo bashilikale, kabiji bena Edomu bonse baikele ke bakalume ba kwa Davida.+ Yehoba walengelanga Davida kushinda* konse ko ayanga.+

15 Davida walaminenga bena Isalela bonse,+ kabiji Davida wachibilanga bantu banji+ bonse mambo monka mo aolokela.+ 16 Yoaba+ mwana wa kwa Zeluya ye wajinga mukulumpe wa nzhita, kabiji Yehoshafwata+ mwana wa kwa Ahiluda wajinga munembeshi wa mambo. 17 Zadoka+ mwana wa kwa Ahituba ne Ahimeleki mwana wa kwa Abiata bajinga bañanga, ne Selaya wajinga munembeshi. 18 Benaya+ mwana wa kwa Yehoyada watangijilanga bena Keleta ne bena Peleta.+ Kabiji baana ba kwa Davida baikele babinemanga.*

9 Kepo Davida ashikishe’mba: “Nanchi kwashalapo muntu mu ba mu nzubo ya kwa Saulo ye nakonsha kumwesha butemwe bubula kwaluka na mambo a kwa Yonafwanyi nyi?”+ 2 Kwajinga kalume wa mu nzubo ya kwa Saulo wa jizhina ja Ziba.+ Kepo bamwichile’mba eye kwi Davida, ne mfumu wamwipwizhe’mba: “Nanchi yobe Ziba nyi?” Ne aye wamukumbwile’mba: “Yami iye kalume wenu.” 3 Mfumu watwajijile kwipuzha’mba: “Nanchi kwashalapo muntu mu ba mu nzubo ya kwa Saulo, ye nakonsha kumwesha butemwe bwa Lesa bubula kwaluka nyi?” Ziba wamukumbwile mfumu amba: “Ko aji mwana wa kwa Yonafwanyi; walemana* maulu onse abiji.”+ 4 Mfumu waipwizhe’mba: “Uji kwepi?” Ziba wakumbwile mfumu amba: “Uji mu nzubo ya kwa Makila+ mwana wa kwa Amiela ku Lo-deba.”

5 Ponkapo Mfumu Davida watumine ba kuya na kumuleta kufuma ku nzubo ya kwa Makila mwana wa kwa Amiela ku Lo-deba. 6 Munkana wa kwa Saulo aye Mefibosheta mwana wa kwa Yonafwanyi byo aishile kwi Davida, wafikenejiletu kupona kinkuvumene ne kumulambila. Kepo Davida amwichile’mba: “Mefibosheta!” ne aye wakumbwile’mba: “Amiwa bano kalume wenu.” 7 Davida wamwambijile’mba: “Kuchina ne, mambo kine nkakumwesha butemwe bubula kwaluka+ na mambo a bashobe ba Yonafwanyi, kabiji nkakubwezhezha mpunzha yonse ya ba nkambo yobe ba Saulo, kabiji kimye kyonse ukajanga* ku tebulu wami.”+

8 Ponkapo walaajile panshi kinkuvumene ne kwamba’mba: “Yami ñanyi amiwa kalume wenu, kya kuba’mba munte muchima byo njitu nobe kabwa wafwa?”+ 9 Kepo mfumu aichile Ziba, wa mwingilo wa kwa Saulo ne kumwambila’mba: “Bintu byonse byajinga bya kwa Saulo ne byajinga bya bonse ba mu nzubo yanji nebipana ku munkana wa nkambo yobe.+ 10 Ukamujiminenga bujimi, obewa, baana bobe, ne bakalume bobe, kabiji ukabungizhenga kajo ka mu bujimi, ne ako kakekala kajo ka kuja ba mu kisemi kya munkana wa nkambo yobe. Pakuba Mefibosheta munkana wa nkambo yobe, ukajanga kimye kyonse ku tebulu wami.”+

Ziba wajinga na baana 15 ne bakalume 20.+ 11 Kepo Ziba aambijile mfumu amba: “Amiwa kalume wenu nkooba byonse byo mwankambizha kubila kalume wenu anweba nkambo mfumu.” Byonkabyo Mefibosheta wajiilenga ku tebulu wa kwa Davida nobe mwana mfumu. 12 Mefibosheta wajinga na mwana wa mulume mwanyike wa jizhina ja Mika;+ kabiji bonse baikalanga mu nzubo ya kwa Ziba baikele ke bakalume ba kwa Mefibosheta. 13 Mefibosheta waikelenga mu Yelusalema, mambo kimye kyonse wajanga ku tebulu wa mfumu;+ kabiji aye walemene maulu onse abiji.+

10 Byo papichile moba, mfumu wa bena Amonyi+ wafwile, kabiji mwananji aye Hanuna waswaine pa bufumu.+ 2 Ponkapo Davida waambile’mba: “Hanuna mwana wa kwa Nahashi nsakumumwesha butemwe bubula kwaluka byonkatu bashanji byo bammwesheshe butemwe bubula kwaluka.” Byonkabyo, Davida watumine bakalume banji kuya na kumutekenesha na mambo a kufwisha bashanji. Bino bakalume ba kwa Davida byo bafikile mu kyalo kya bena Amonyi, 3 babinemanga ba bena Amonyi baambijile Hanuna nkambo yabo amba: “Nanchi mwalanguluka’mba Davida ubena kunemeka bashenu byo atuma ba kwimutekenesha nyi? Nanchi Davida kechi watuma bakalume banji kwi anweba kuba’mba bataletale bulongo muzhi ne kumuyuka byo aji ne kwiya na kumushinda nenyi?” 4 Onkao mambo, Hanuna wakwachile bakalume ba kwa Davida ne kwibatenda myevu+ lubaji lumo ne kuchibako bivwalo byabo pa matako, kabiji wibalekele’mba bayenga. 5 Davida byo bamubuujile, ponkapotu watumine bantu ba kwibatundaila bakalume banji, mambo bano bantu bebalengeshe bingi bumvu; kabiji mfumu wibambijile’mba: “Mwikale mu Yeliko+ kufikatu ne myevu yenu byo ikakoma jikwabo, apa bino mukeye.”

6 Bena Amonyi bayukile’mba Davida wibashikwa, onkao mambo, bena Amonyi balombele bena Silya ba ku Bete-lehoba+ ne bena Silya ba ku Zoba+ kuba’mba bebakwasheko bashilikale benda panshi 20,000; mfumu wa ku Maaka+ watumine bantu 1,000; ne ku Ishitoba* kwafumine bantu 12,000.+ 7 Davida byo aumvwine kino, watumine Yoaba ne nzhita yonse, kubikapotu ne babilobo banji.+ 8 Kabiji bena Amonyi balupukile ne kwitanchika na kulwa ku kibelo kya muzhi, kabiji bena Silya ba ku Zoba ne ba ku Lehoba pamo na bantu ba ku Ishitoba* ne ba ku Maaka, bajinga kwa bunke mungye.

9 Yoaba byo amwene’mba bashilikale babena kwiya ko aji kulutwe ne kunyuma, wasajile bashilikale ba bena Isalela bayuka kulwa ne kwibatanchika kuba’mba balwe na bena Silya.+ 10 Aba bashajilepo wibapaine* kwi Abishai mulongo wanji amba ebatangijile,+ ne kwibatanchika kuba’mba balwe na bena Amonyi.+ 11 Kepo aambile’mba: “Inge bena Silya bakose kunkila, wafwainwa kwiya na kunkwasha; bino inge bena Amonyi bakose kukukila, nsakwiya na kukukwasha. 12 Twafwainwa kukosa ne kuchinchika+ ne kulwilako bantu betu ne mizhi ya Lesa wetu, kabiji Yehoba usakuba kyo amona’mba kyawama.”+

13 Kepo Yoaba ne bantu banji bafwenyenye ku bwipi na bena Silya amba balwe, ne abo bamunyemene.+ 14 Bena Amonyi byo bamwene’mba bena Silya banyema, bamunyemene Abishai ne kukatwela mu muzhi. Kepo Yoaba afumine ku bena Amonyi ne kuya ku Yelusalema.

15 Bena Silya byo bamwene’mba bebashinda ku bena Isalela, bakonkene jibiji.+ 16 Onkao mambo, Hadadeza+ watumine jiwi ku bena Silya bajinga mu kibunji kya ku Mukola,*+ kabiji baishile ku Helama, Shobaka mukulumpe wa nzhita ya kwa Hadadeza saka ebatangijila.

17 Davida byo bamubuujile, ponkapo wakonkenye bena Isalela bonse kabiji baabukile Yodano ne kuya ku Helama. Kepo bena Silya betanchikile kuba’mba balwe ne Davida, kabiji balwile nanji.+ 18 Bino bena Silya banyemene bena Isalela; Davida waipayile benda pa makalaki 700 ne bena Silya benda pa bambili 40,000, kabiji watapile Shobaka mukulumpe wa nzhita yabo, wafwijile konkakwa.+ 19 Bamfumu bonse bamwingijilanga Hadadeza byo bamwene’mba bebashinda ku bena Isalela, ponkapo balayañene lulayañano lwa mutende na bena Isalela ne kwikala ke ba mingilo babo;+ kabiji bena Silya bachiine kukwasha jibiji bena Amonyi.

11 Ku ntendekelo ya mwaka,* kimye bamfumu kyo bayilangapo ku makondo, Davida watumine Yoaba ne bakalume banji ne nzhita yonse ya bena Isalela kuya na konauna bena Amonyi, ne abo bazhokolokele muzhi wa Laba,+ bino Davida washajile mu Yelusalema.+

2 Juba jimo kimye kya muntuwa muntuwa,* Davida wabuukile pa mwanya wanji kabiji wapitañenenga peulu ya nzubo* ya mfumu. Byo ajinga peulu ya nzubo, wamwene mwanamukazhi saka abena kowa, kabiji uno mwanamukazhi walambile bingi. 3 Davida watumine muntu kuya na kwipuzha pa uno mwanamukazhi, ne aye wabwezhezhe sawakya amba: “Nanchi uno kechi ye Batesheba+ mwana wa kwa Eliama,+ muka Uliya+ mwina Hiti nenyi?”+ 4 Kepo Davida atumine baluwe ba kuya na kumuleta.+ Ne aye waishile kwi Davida, kabiji walaajile nanji.+ (Kino kyaubiwe kimye mwanamukazhi kyo etokeshenga ku kwizhilulula* kwanji.)+ Kepo mwanamukazhi abwelele ku nzubo yanji.

5 Uno mwanamukazhi waimichile, kabiji watumine mawi kwi Davida amba: “Amiwa naimita.” 6 Ponkapotu Davida watumine mawi kwi Yoaba amba: “Ntumine Uliya mwina Hiti.” Byonkabyo, Yoaba watumine Uliya kwi Davida. 7 Uliya byo afikile, Davida wamushikishe byajinga Yoaba, byajinga nzhita ne byaendelenga nkondo. 8 Kepo Davida aambijile Uliya amba: “Yanga ku nzubo yobe ukakokoloke.”* Uliya byo afumineko ku nzubo ya mfumu, mfumu wamutumijile bupe.* 9 Nangwa byonkabyo, Uliya walaajile ku kibelo kya nzubo ya mfumu pamo na bakalume bonse ba nkambo yanji, ku nzubo yanji kechi wayileko ne. 10 Davida bamubuujile’mba: “Uliya kechi waji kuya ku nzubo yanji ne.” Ponkapo Davida washikishe Uliya amba: “Nanchi kechi popo wafikatu kufuma pa lwendo nenyi? Mambo ka o waji kubujila kuya ku nzubo yobe?” 11 Uliya wamukumbwile Davida amba: “Jikwachi+ jiji mu mimba na bena Isalela ne bena Yuda, ne nkambo yami Yoaba ne bakalume ba nkambo yami babena kulaalatu mungye. Nanchi nafwainwa kuya ku nzubo yami na kuja ne kutoma ne kulaala na mukazhami nyi?+ Byonkatu byo muji na bumi,* amiwa kechi nsakuba kino kintu ne!”

12 Kepo Davida aambijile Uliya amba: “Wikale kuno ne lelo, kesha nkakwambila ukayenga.” Onkao mambo, Uliya waikele mu Yelusalema aja juba ne juba jalondejilepo. 13 Kabiji Davida wamwichile amba eye aje ne kutomena pamo nanji, ne aye wamulengejile kupendwa. Bino mabanga, wayile na kulaala ponka pa mwanya wanji pamo na bakalume ba nkambo yanji, pakuba ku nzubo yanji kechi wayileko ne. 14 Lukelo Davida wanembejile Yoaba nkalata ne kwiipana kwi Uliya amba atwale. 15 Mu ino nkalata wanembelemo amba: “Umubike Uliya kulutwe konka kwakosela nkondo. Apa bino mubwele kunyuma yanji, kuba’mba bamutape ne kumwipaya.”+

16 Yoaba watajile tajile bulongo muzhi, kabiji wabikile Uliya ko ayukile’mba ko kwajinga babiyangala. 17 Bantu ba mu muzhi byo balupukile na kulwa ne Yoaba, bakalume ba kwa Davida bamo bebatapile, ne Uliya mwina Hiti naye wajinga pa boba bafwile.+ 18 Kabiji Yoaba watumine kwi Davida sawakya wa bintu byonse byamwekele ku nkondo. 19 Wakambizhe muluwe amba: “Inge wapwisha kubuula mfumu bintu byonse byamweka ku nkondo, 20 kabiji mfumu wazhingila ne kwamba’mba, ‘Mambo ka o mwayijile kwipi na muzhi kuba’mba mulwe? Nanchi kechi mwayukile’mba bakonsha kwimwasa kufuma peulu ya nsakwa nenyi? 21 Ñanyi waipayile Abimeleki+ mwana wa kwa Yelubesheta?+ Nanchi kechi mwanamukazhi wamwashile mpelo saka aji peulu ya nsakwa, ne kumwipaya ku Tebeza nenyi? Mambo ka o mwayijile kwipi na nsakwa?’ Kepo wambe’mba, ‘Kalume wenu Uliya mwina Hiti naye wafwa.’”

22 Byonkabyo, awa muluwe wayile ne kubuula Davida bintu byonse byamubuujile Yoaba. 23 Kepo muluwe abuujile Davida amba: “Banabalume babo betukijile bulume, kabiji balupukile ne kwitulondela mungye; bino twibapangishe ne kwibafikizha ku kibelo kya muzhi. 24 Kabiji aba bataya miketo bajinga peulu ya nsakwa saka bataya miketo pa bakalume benu, ne bakalume ba mfumu bamo bafwa; kalume wenu Uliya mwina Hiti naye wafwa.”+ 25 Ponkapo Davida waambijile yewa muluwe amba: “Umubuule Yoaba amba: ‘Kange ube bulanda na mambo a kino kintu ne, mambo mpoko ipayatu yense. Kosako kulwa na yewo muzhi usakumushinda.’+ Kabiji ukamutundaike.”

26 Muka Uliya byo aumvwine’mba mwatawanji Uliya wafwa, watendekele kumujila. 27 Moba a kujijilamo byo apwile, ponkapo Davida watumine ba kuya na kuleta uno mwanamukazhi ku nzubo yanji, ne aye waikele mukazhanji+ kabiji wasemejilemo mwana wa mulume. Bino kintu kyaubile Davida kyamufichishe* bingi Yehoba ku muchima.+

12 Onkao mambo, Yehoba watumine Natana+ kwi Davida. Waishile kwi aye+ ne kumwambila’mba: “Kwajinga bantu babiji mu muzhi umo, umo wajinga nonshi mukwabo wajinga muyanji. 2 Nonshi wajinga na mikooko ne bañombe bavula bingi;+ 3 bino muyanji kafwako kintu nangwa kimo kyo ajinga nakyo ne, wajingatu na kaana ka mukooko kamo kakazhi ko apotele.+ Wikalaminenga bulongo, kabiji waikalanga nako ne baana bako saka bakoma. Kajanga kajo kacheche ko ajinga nako ne kutoma katomanga mu kapu wanji, kabiji kalaalanga mu maboko anji. Kajinga nobe kaana kanji ka kakazhi kwi aye. 4 Mu kupita kwa kimye, nonshi watambwijile mwenyi, bino kechi wakebelenga kwipayapo mukooko wanji umo nangwa ñombe ne kutekela mwenyi wamufwakashijile ne. Bino washikwile kaana ka mukooko ka muyanji ne kwikanengezhezha mwenyi wamufwakashijile.”+

5 Ponkapo Davida wamuzhingijile bingi uno muntu ne kwambila Natana amba: “Byonkatu Yehoba byo aji na bumi,+ uno muntu wauba kino kintu wafwainwa kufwa! 6 Kabiji pa kano kaana ka mukooko wafwainwa kupainapo ina,+ mambo waubile kino kintu kwa kubula lusa.”

7 Kepo Natana aambijile Davida amba: “Uno muntu ye anweba! Abino byo byaamba Yehoba Lesa wa Isalela amba: ‘Nakushingile manyi kuba’mba wikale mfumu wa bena Isalela,+ kabiji nakupokolwele mu kuboko kwa kwa Saulo.+ 8 Nakebelenga kukupa nzubo ya nkambo yobe+ ne kulama bakazhi ba nkambo yobe,+ kabiji nakupele bena Isalela ne bena Yuda.+ Kabiji nakebelenga ne kukubila bintu bikwabo byavula.+ 9 Mambo ka o walengulwijile byaambile Yehoba ne kuba bintu byatama ku meso anji? Waipayile Uliya mwina Hiti na mpoko!+ Wabwela waangata ne mukazhanji kuba’mba ekale mukazhobe+ byo wamwipayile na mpoko ya bena Amonyi.+ 10 Pano mpoko kechi ikafuma mu nzubo yobe ne,+ mambo wandengulwile kupichila mukwangata muka Uliya mwina Hiti kuba’mba ekale mukazhobe.’ 11 Yehoba waamba’mba: ‘Nkakuletela bya malwa bikafuma monka mu nzubo yobe;+ kabiji nkakwangata bakazhi bobe ne kwibapana ku mwanamulume mukwabo saka umonako,+ ne aye ukalaala na bakazhi bobe mute wansanana.*+ 12 Nangwa kya kuba obewa waubile kino mu bufyamfya,+ amiwa nkoba kino pa meso a bena Isalela bonse, mute wansanana.’”*

13 Kepo Davida aambijile Natana amba: “Nalenga mambo kwi Yehoba.”+ Natana wamwambijile Davida amba: “Yehoba wimulekelako mambo* enu.+ Kechi musakufwa ne.+ 14 Pano bino, na mambo a kuba kechi mwamunemeka Yehoba byo mwauba kino ne, mwanenu ye mwasema kine ukafwa.”

15 Kepo Natana abwelele ku nzubo yanji.

Kabiji Yehoba wapumine mwana wasemene muka Uliya kwi Davida, ne uno mwana wakolelwe. 16 Davida wamusashijile Lesa wa kine na mambo a yewa mwana. Davida wazhikilwanga na nzala kabiji watwelanga mu kibamba kyanji ne kulaala panshi bufuku bonse.+ 17 Onkao mambo, bakulumpe ba mu nzubo yanji baimene ko ajinga ne kweseka kumubuushapo panshi, bino wakaine kabiji kechi wajiilenga nabo ne. 18 Pa juba ja butanu na bubiji mwana wafwile, bino bakalume ba kwa Davida bachiine kumubuula’mba mwana wafwa. Baambile’mba: “Mwana byo akijinga mumi twisambile nabo bino kechi betumvwijile ne. Pano twakonsha kwibabuula byepi amba, mwana wafwa? Kwendapo bauba kintu kyatama bingi.”

19 Davida byo amwene’mba bakalume banji babena kwinongotwela, wayukile’mba mwana wafwa. Davida washikishe bakalume banji amba: “Mwana wafwa nyi?” Ne abo bamukumbwile’mba: “Ee mwane, wafwa.” 20 Onkao mambo, Davida wabuukilepo panshi. Waowele ne kwishinga manyi,+ ne kuvwala bivwalo bingi kabiji wayile ku nzubo+ ya Yehoba ne kulaala panshi kinkuvumene. Byo apwishishe kuba bino, wayile ku nzubo* yanji ne kwamba’mba bamuletele kajo, ne kuja wajiile. 21 Bakalume banji bamushikishe’mba: “Mambo ka o mwaubila bibye? Mwana byo akijinga mumi, mwazhikilwanga na nzala kabiji mwajijilengatu; bino aku mwana ufwatu, mwabuuka ne kuja kajo.” 22 Aye wibakumbwile’mba: “Mwana byo akijinga mumi, nazhikilwanga na nzala+ ne kujila, mambo nalangulukilenga namba, ‘Ñanyi wayuka inge Yehoba wakonsha kungubila lusa ne kuleka mwana kwikala na bumi nangwa ne?’+ 23 Pano byo afwa, mambo ka o nafwainwa kuzhikilwa na nzala? Nanchi nakonsha kumubwezha nyi?+ Nkafwa ne kuya ko aji,+ bino aye kechi ukabwela ko nji ne.”+

24 Kepo Davida atekeneshe mukazhanji Batesheba.+ Watwelele mo ajinga ne kulaala nanji. Mu kuya kwa moba wasemene mwana wa mulume, kabiji Davida wamutumbile’mba Solomone.*+ Yehoba wamutemenwe,+ 25 kabiji watumine mawi kwi Natana+ ngauzhi amba bamutumbe’mba Yedidiya,* na mambo a Yehoba.

26 Yoaba watwajijile kulwisha muzhi wa Laba+ wa bena Amonyi,+ kabiji washinjile muzhi wa mfumu.*+ 27 Kepo Yoaba atumine baluwe kwi Davida na kumubuula’mba: “Nalwa na muzhi wa Laba,+ kabiji naangata muzhi wa mema.* 28 Pano konkanyai pamo bashilikale bonse ne kulukuka muzhi ne kumushinda. Mambo inge ne, yami nsakumushinda uno muzhi, kabiji bantu bakañambilanga’mba yami namushinda.”*

29 Onkao mambo, Davida wakonkenye bashilikale bonse ne kuya ku Laba ne kulwa nanji kabiji wamushinjile. 30 Kepo aangachile munchinya wajinga ku mutwe wa kwa Malakama. Kinemenezhi kyanji kyaesakene na talenta* wa ngolode, pamo na mabwe a buneme, kabiji uno munchinya bamuvwikile ku mutwe wa kwa Davida. Kabiji wasendele ne bipukulwa byavula+ byajinga mu muzhi.+ 31 Wasendele bantu bajinga mu muzhi ne kwibapa mwingilo wa kwingila na baso ba mabwe, wa kwingila na byela bya kapotwe byatwa ne wa kwingila na tupasa twa kyela kya kapotwe, ne wa kufyatula matafwali. Abino byo byo aubile ku mizhi yonse ya bena Amonyi. Kepo Davida ne bashilikale bonse babwelele ku Yelusalema.

13 Abisalomo mwana wa kwa Davida wajinga na nyenga yanji walambile, jizhina janji wajinga Tamala,+ kabiji Aminona+ mwana wa kwa Davida wamufwalamine bingi. 2 Aminona wajinga bingi na binyenge kya kuba wakolelwe ne kukolwa na mambo a nyenga yanji Tamala, mambo wajinga kisungu kabiji Aminona kyamukatezhe bingi kumuba kintu Tamala. 3 Aminona wajinga na mulunda nanji aye Yonadaba+ mwana wa kwa Shimeya,+ mulongo wa kwa Davida; kabiji Yonadaba wajimukile bingi. 4 Aye waipwizhe Aminona amba: “Obewa mwana mfumu, mambo ka o wikela na bulanda kimye kyonse? Mbuule.” Aminona wamukumbwile’mba: “Namufwalama bingi Tamala nyenga+ ya nkasami Abisalomo.” 5 Yonadaba wamwambijile’mba: “Laala pa mwanya obe ne kubepa kukolwa. Inge bashobe beye na kukumona wibambile’mba, ‘Mwane ambilai nyenga yami Tamala eye ampepo kajo. Inge anengezhe kajo ko banengezhezha muntu wakolwa* saka mmonako, ne amiwa nsakuja inge anjishe.’”

6 Onkao mambo, Aminona walaajile ne kubepa kukolwa, kabiji mfumu waishile na kumumona. Kepo Aminona aambijile mfumu amba: “Mwane ambilai nyenga yami Tamala eye angoshelepo bashinkwa babiji saka mmonako kuba’mba nje inge anjishe.” 7 Ponkapo Davida watumine mawi kwi Tamala ku nzubo amba: “Yanga ku nzubo ya kolojobe Aminona ukamunengezhezhe kajo.”* 8 Byonkabyo, Tamala wayile ku nzubo ya kolojanji Aminona, konka ko alaajile. Washikwile muvuba ne kulenga bashinkwa saka atalako, kabiji wiboshele. 9 Kepo ashikwile kikango ne kumupa kajo. Bino Aminona wakaine kuja ne kwamba’mba: “Bambile bonse balupukemo!” Kabiji bonse balupukilemo.

10 Kepo Aminona aambijile Tamala amba: “Leta kajo kukachi, kuba’mba unjiishe.” Byonkabyo, Tamala washikwile bashinkwa bo aoshele ne kwibaleta kukachi kwi Aminona kolojanji. 11 Byo amuletejile bashinkwa kuba’mba aje, wamukwachile ne kumwambila’mba: “Laala ne amiwa, obewa nyenga yami.” 12 Pakuba aye wamwambijile’mba: “Ine yaya! Kange mundengeshe bumvu ne, mambo kintu kya uno mutundu kechi kyubiwa mu bena Isalela ne.+ Kange mube kino kintu kya bunya ne.+ 13 Nakonsha kulubako byepi ku buno bumvu? Ne anweba bakemumonanga ku bantu nobe muntu wakosama mu bena Isalela. Pano isambai na bamfumu, mambo abo kechi basakukana kumpana kwi anweba ne.” 14 Bino aye wakaine kumumvwina, kabiji wamukijile bulume ne kumulengesha bumvu kupichila mu kulaala nanji kya kumukanjikizha. 15 Kufumatu po po Aminona wamushikilwe bingi, kya kuba kumushikwa ko amushikilwe kwakijile kumufwalama ko amufwalamine patanshi. Aminona wamwambijile’mba: “Imana; yanga!” 16 Ponkapo Tamala wamwambijile’mba: “Ine yaya, mambo kumpanga kwatama bingi kukila ne kintu kyo mwauba kwi amiwa!” Bino aye wakaine kumumvwina.

17 Kepo aichile wa mwingilo wanji nsongwalume ne kumwambila’mba: “Mufumye muno uno mwanamukazhi, kabiji ukiyeko ne ku kinzhilo.” 18 (Aye wavwajile munkukumba wawama,* mambo bino byo bivwalo byavwalanga baana ba bakazhi ba mfumu babisungu.) Byonkabyo, wa mwingilo wanji wamulupwijile pangye, kabiji wakiyileko ne ku kinzhilo. 19 Kepo Tamala epukuchile buto ku mutwe,+ kabiji watabwile mukangyo wanji wawama ye avwajile; kabiji wakwachile maboko ku mutwe ne kuya, wayilenga saka ajila.

20 Ponkapo Abisalomo kolojanji wamwipwizhe’mba:+ “Nanchi Aminona kolojobe ye wakuba kino kintu nyi? Pano zhindamapo nyenga yami. Aye ye kolojobe.+ Kino kintu kange wikibike ku muchima ne.” Kepo Tamala aikelenga kwa bunke ku nzubo ya kwa Abisalomo kolojanji. 21 Mfumu Davida byo aumvwine bino bintu byonse, wazhingijile bingi.+ Bino kechi wamuzhingijishanga Aminona mwananji ne, wamutemenwe bingi, mambo ye wajinga mubeji wanji. 22 Kabiji Abisalomo kafwako kintu nangwa kimo kyo aambijile Aminona, kyatama nangwa kyawama ne; mambo Abisalomo wamushikilwe+ Aminona na mambo a kuba walengeshe bumvu nyenga yanji aye Tamala.+

23 Byo papichile myaka ibiji ituntulu, batendelenga mikooko ya kwa Abisalomo bajinga ku Baela-hazola kwipi na Efelaimu,+ kabiji Abisalomo waichile baana ba mfumu bonse ba balume.+ 24 Kabiji Abisalomo waishile kwi mfumu ne kumwambila’mba: “Amiwa kalume wenu nji na bantu babena kutenda mikooko. Mwane anweba mfumu ne bakalume benu twayai tuye bonse.” 25 Bino mfumu waambijile Abisalomo amba: “Ine mwanami. Mambo inge atweba bonse tuye, tusakukubika mu lukatazho.” Nangwa kya kuba wamukosejile, wakaine kuya, bino wamupesheshe. 26 Kepo Abisalomo aambile’mba: “Inge anweba mubule kuya, swishai kolojami Aminona tuye nanji.”+ Mfumu wamwipwizhe’mba: “Mambo ka o asakuyila ne obewa?” 27 Bino Abisalomo wamukosejile, ne aye watumine Aminona ne baana ba mfumu bonse ba balume kuya nanji.

28 Kepo Abisalomo akambizhe ba mwingilo banji amba: “Muteko muchima, inge Aminona asangalale na mambo a binyu, nsakwimwambila namba, ‘Mutapai Aminona!’ Ponkapo mwafwainwa kumwipaya. Kange muchine ne, mambo yami nemukambizha. Kosai ne kuchinchika.” 29 Byonkabyo, ba mwingilo ba kwa Abisalomo bamubile Aminona byonkatu Abisalomo byo ebakambizhe; kepo baana ba mfumu bonse ba balume baimene, ne kukanjila pa bamyule babo ne kunyema. 30 Byo bakijinga mu jishinda, Davida bamubuujile’mba: “Abisalomo waipaya baana ba mfumu bonse ba balume, kabiji kafwapo nangwatu umo wapulukapo ne.” 31 Ponkapotu mfumu waimene ne kutabula bivwalo byanji ne kulaala panshi, kabiji bakalume banji bonse baimene kwipi ne aye saka batabaula bivwalo byabo.

32 Pano bino, Yonadaba+ mwana wa kwa Shimeya,+ mulongo wa kwa Davida waambile’mba: “Anweba nkambo, kange mulanguluke’mba baipaya bansongwalume bonse baana ba mfumu ne, mambo Aminona ye yenkatu wafwa.+ Abisalomo ye waji kukambizha amba bamwipaye, mambo wafuukwile kuba kino+ kufumatu joja juba Aminona jo alengeshe bumvu nyenga+ yanji aye Tamala.+ 33 Pano nkambo kange mute muchima ku* sawakya wa kuba’mba, ‘Baana ba mfumu bonse ba balume bafwa’ ne; Aminona ye yenkatu wafwa.”

34 Bino Abisalomo wanyemene.+ Pa kupitapo kimye kasopa byo ainukile, wamwene bantu bavula saka beya mu jishinda jajinga kunyuma yanji kwipi na mutumba. 35 Ponkapo Yonadaba+ waambijile mfumu amba: “Talai! Baana ba mfumu babwela. Byonkatu byo naji kwamba amiwa kalume wenu.” 36 Byo apwishishetu kwamba, baana ba mfumu batwelele saka bajila mabingo; kabiji mfumu naye ne bakalume banji bonse bajijile bingi. 37 Pakuba Abisalomo wanyemene ne kuya kwi Talamai+ mwana wa kwa Amihuda mfumu wa ku Geshula. Davida wajijile mwananji pa moba avula. 38 Abisalomo wanyemejile ku Geshula,+ kabiji wakekajileko myaka isatu.

39 Kabiji Mfumu Davida wakebeshe bingi kuya kwi Abisalomo, mambo bamutekeneshe* na mambo a lufu lwa kwa Aminona.

14 Yoaba mwana wa kwa Zeluya+ wayukile’mba mfumu ubena kutonga bingi Abisalomo.+ 2 Onkao mambo, Yoaba watumine mawi ku Tekoa+ ne kwita mwanamukazhi wajimukile bingi ne kumubuula’mba: “Wibepekezhe nobe uji na kijilo, ne kwinyinga kisapi kya majila, kabiji kange wishinge manyi ne.+ Wikale nobe mwanamukazhi wajila muntu wafwa moba avula. 3 Kabiji utwele ne kubuula mfumu kino.” Kepo Yoaba abuujile mwanamukazhi bya kwamba.

4 Uno mwanamukazhi mwina Tekoa watwelele mwajinga mfumu ne kukunyika kilungi kyanji ne kuponena panshi kinkuvumene ne kwamba’mba: “Mwane nkwashaiko, anweba mfumu!” 5 Mfumu wamushikishe mwanamukazhi amba: “Ñanyi lukatazho lo uji nalo?” Aye wamukumbwile’mba: “Amiwa ne kituzhi; bamwatawami bafwa. 6 Kabiji amiwa wa mwingilo wenu, najinga na baana babiji, ne abo bakalwijile mungye. Kechi kwajinga wa kwibalamwina ne, kabiji umo watapile mukwabo ne kumwipaya. 7 Pano kisemi kyonse kyañimena amiwa wa mwingilo wenu, kabiji babena kwamba’mba, ‘Tupe muntu waipayile mulongo wanji, kuba’mba tumwipaye na mambo a bumi* bwa mulongo wanji ye aipayile,+ nangwa kya kuba kechi pakashala nswanyi ne!’ Basakwipaya mwanami washalapo. Ye yenkatu ye naketekela kabiji kechi pasakupuluka* muntu nangwa umo wa kwikala na jizhina ja bamwatawami pano pa ntanda ne.”

8 Kepo mfumu aambijile mwanamukazhi amba: “Yanga ku nzubo yobe, ne amiwa nsakwingijilapo pa ano mambo.” 9 Ponkapo mwanamukazhi mwina Tekoa waambijile mfumu amba: “Anweba nkambo mfumu, lekai ano mambo ekale pe amiwa ne pa ba mu nzubo ya batata, bino anweba mfumu ne jitanda jenu mwikale babula mambo.” 10 Mfumu wamwambijile’mba: “Inge muntu akwambilepo jibiji, umulete kwi amiwa, ne aye kechi usakukukatazha jibiji ne.” 11 Bino mwanamukazhi waambile’mba: “Mwane, anweba mfumu muvuluke Yehoba Lesa wenu, pa kuba’mba awa ushinkanya na mambo a mashi+ abule konauna ne kwipaya mwanami.” Mfumu waambile’mba: “Byonkatu Yehoba byo aji na bumi,+ kafwako lusuki nangwa umo wa mwanobe ukapona panshi ne.” 12 Kepo mwanamukazhi aambile’mba: “Mwane nswishai amiwa wa mwingilo wenu ñambe kyambo kimo kwi anweba nkambo mfumu.” Byonkabyo, aye wamwambijile’mba: “Amba!”

13 Uno mwanamukazhi waambile’mba: “Anweba mfumu, mambo ka o mwaubila buno bubi ku bantu ba Lesa?+ Byo mwapanga mwanenu ne kukankalwa kumubwezha, mwizhachisha anwe bene na byo mwaamba.+ 14 Kine tukafwa kabiji tukekala nobe mema o baichila panshi, o bakonsha kukankalwa kuwola. Bino Lesa kechi wakonsha konauna bumi* ne, kabiji uyuka ne ene mambo muntu ye bapanga o bafwainwa kubula kumupangila kikupu kwi aye. 15 Naji kwiya na kwamba bino kwi anweba nkambo mfumu mambo bantu bandengesha moyo. O ene mambo, amiwa wa mwingilo wenu o naji kwambila mu muchima namba, ‘Lekai ñambe na mfumu. Apo kampe mfumu wakonsha kungubila byo nsakulomba amiwa muzha wanji. 16 Mfumu wakonsha kuteleka ne kumpokolola amiwa muzha wanji ku muntu usaka kuñonauna pamo na mwanami umotu ne kwitufumya ku buswanyi bwitupele Lesa.’+ 17 Kepo amiwa wa mwingilo wenu, naji kwamba mu muchima namba, ‘Byambo bya nkambo mfumu bintekeneshe,’ mambo nkambo mfumu mujitu nobe malaika wa Lesa wa kine mu kuyuka byawama ne byatama. Yehoba Lesa wenu ekale ne anweba.”

18 Kepo mfumu aambijile mwanamukazhi amba: “Inge nkwipuzhe, kange umfye kintu nangwa kimo ne.” Mwanamukazhi waambile’mba: “Mwane bambenga anweba nkambo mfumu.” 19 Kepo mfumu amwipwizhe’mba: “Nanchi Yoaba ye waji kukubuula bino byonse nyi?”+ Mwanamukazhi wakumbwile’mba: “Byonkatu byo muji na bumi anweba nkambo mfumu, byonkatu* byo mwaamba nkambo mfumu byo ibyo, kalume wenu Yoaba ye waji kunkambizha ne kumbuula bino byambo byonse amiwa wa mwingilo wenu. 20 Kalume wenu Yoaba wauba kino kuba’mba awamishe bintu, mambo anweba nkambo muji na maana nobe malaika wa Lesa wa kine, kabiji mwayuka bintu byonse bibena kubiwa mu kyalo.”

21 Kepo mfumu aambijile Yoaba amba: “Kyawama, nsakuba kino.+ Yanga ukamulete nsongwalume Abisalomo.”+ 22 Ponkapo Yoaba wakunyikile kilungi kyanji ne kuponena panshi kinkuvumene ne kumusanchila mfumu. Yoaba waambile’mba: “Lelo amiwa kalume wenu nayuka namba mwangubila bibusa, anweba nkambo mfumu, mambo anweba mfumu mwauba kintu kyo naji kulomba amiwa kalume wenu.” 23 Kepo Yoaba aimene ne kuya ku Geshula+ kabiji waletele Abisalomo ku Yelusalema. 24 Nangwa byonkabyo, mfumu waambile’mba: “Mulekai aye ku nzubo yanji, kange amone kilungi kyami ne.” Byonkabyo Abisalomo wayile ku nzubo yanji kabiji kechi wamwene kilungi kya mfumu ne.

25 Mu bena Isalela bonse, kechi mwajingapo mwanamulume ye batakaikilenga walambile nobe Abisalomo ne. Kufumatu ku maulu anji kufika ne pa lumbwichi, kechi wajingapo na kabulema ne. 26 Byo atendanga nsuki yanji, wiitendanga ku mpelo ya mwaka mambo yamunemenanga, nsuki ya ku mutwe wanji yanemene mashekele* 200 monka mwayijile kinemenezhi* kya jibwe ja ku bufumu. 27 Abisalomo wasemene baana ba balume basatu+ ne wa mukazhi umo, jizhina janji wajinga Tamala. Wajinga mwanamukazhi walamba bingi.

28 Kabiji Abisalomo waikele mu Yelusalema myaka ibiji ituntulu, bino kechi wamwene kilungi kya mfumu ne.+ 29 Onkao mambo Abisalomo waichile Yoaba amba amutume kwi mfumu, bino Yoaba wakaine kwiya kwi aye. Wamwichile ja bubiji, napo wakaine kwiya. 30 Kepo aambijile bakalume banji amba: “Bujimi bwa kwa Yoaba buji kwipi na bwami, kabiji mu bujimi bwanji muji mbaale. Yainga mukebusoke.” Onkao mambo, bakalume ba kwa Abisalomo basokele bujimi. 31 Ponkapo Yoaba waimene ne kuya ku nzubo ya kwa Abisalomo ne kumwipuzha amba: “Mambo ka bakalume bobe o basokela bujimi bwami?” 32 Abisalomo wamukumbwile Yoaba amba: “Umvwa! Natumine ano mawi kwi obewa namba, ‘Iya nkutume ku mfumu ukebepuzhe’mba: “Mambo ka o nafumina ku Geshula?+ Kyangwamine kwikala konkakwa. Pano ndekai mmone kilungi kya mfumu kabiji inge nji na mambo, aye yenka angipaye.”’”

33 Onkao mambo, Yoaba wayile kwi mfumu na kumubuula. Kabiji mfumu waichile Abisalomo, ne aye watwelele mwajinga mfumu ne kupona panshi kinkuvumene saka akunyika kilungi kyanji kwi mfumu. Kepo mfumu afyompele Abisalomo.+

15 Bino bintu byonse byo byapwile, Abisalomo wakebele kalaki ne bambili ne banabalume 50 ba kutangilako lubilo kulutwe yanji.+ 2 Abisalomo wabuukanga lukelokelo ne kwimana kunsa ya mukwakwa ku kibelo kya muzhi.+ Inge kwaiya muntu uji na mambo ubena kukeba amba bamfumu bamuchibileo,+ Abisalomo wamwitanga ne kumushikisha’mba: “Wafuma ku ñanyi muzhi?” Aye wakumbulanga’mba: “Amiwa kalume wenu nafuma mu mukoka umo wa bena Isalela.” 3 Abisalomo wamwambilanga’mba: “Umvwa, mambo obe aoloka kabiji ajitu bulongo, bino, kafwako ye batongola bamfumu wa kumvwa mambo obe ne.” 4 Abisalomo waambanga’mba: “Nanchi inge bantongwele kwikala mutonyi mu kyalo! Muntu yense uji na mambo nangwa ukeba kumuchibila mambo inge waiyanga kwi amiwa, ne amiwa inge namuchibilanga mambo mo aolokela.”

5 Kabiji inge muntu waiya kwipi kuba’mba amufukamine, Abisalomo watanyikanga kuboko kwanji ne kumukwata ne kumufyompa.+ 6 Abisalomo waubanga bino ku bena Isalela bonse baiyanga kwi mfumu na kwibachibila mambo; byonkabyo, Abisalomo watwajijile kongola michima ya bena Isalela.+

7 Ku mpelo ya myaka ina,* Abisalomo waambijile mfumu amba: “Mwane nswishai ngye ku Hebulona+ nkafikizhe luchipo lo nachipile kwi Yehoba. 8 Mambo amiwa kalume wenu nachipile luno luchipo+ byo naikelenga mu Geshula+ ku Silya namba: ‘Inge Yehoba akambwezhe ku Yelusalema, nkalambula mulambo kwi Yehoba.’” 9 Kepo mfumu amwambijile’mba: “Wende bulongo.” Ponkapo waimene ne kuya ku Hebulona.

10 Kabiji Abisalomo watumine bantu kuya ku mikoka yonse ya bena Isalela ne kwibambila’mba: “Byo musakumvwatu kuvuma kwa lusengo, mubijike’mba, ‘Abisalomo pano ke mfumu mu Hebulona!’”+ 11 Kabiji bantu 200 bayile konkakwa ne Abisalomo kufuma ku Yelusalema; bebechile kabiji bayiletu mu bwilube, kechi bayukile kintu kyaubiwenga ne. 12 Kabiji Abisalomo byo apwishishe kutapisha bitapisho, watumine bantu kuya na kwita Ahitofela+ mwina Gilo, wafundangako Davida maana,+ kufuma mu muzhi wanji wa Gilo.+ Kuno kusatukila mfumu kwayilengatu na kukoselako, kabiji bantu batundaikilenga Abisalomo bavujijilengakotu.+

13 Mu kuya kwa kimye, kwaishile muntu kwi Davida ne kumubuula’mba: “Michima ya bena Isalela yaongolokela kwi Abisalomo.” 14 Ponkapo Davida waambijile bakalume banji bonse bo ajinga nabo mu Yelusalema amba: “Imanai, twayai tunyeme,+ mambo kafwako nangwa umo mwi atweba usakupuluka kwi Abisalomo ne! Pelawizhai, kuchina’mba waketutaana ne kwituletela bya malwa ne kutapa ba mu muzhi bonse na mpoko!”+ 15 Bakalume ba mfumu baambijile mfumu amba: “Byonse byo mwafuukula anweba nkambo mfumu, atweba bakalume benu twinengezha kwibyuba.”+ 16 Kepo mfumu ayile ne ba mu nzubo yanji bonse bamulondejile, bino mfumu washile bantombo jikumi+ ba kulama nzubo.* 17 Mfumu watwajijile kuya, ne bantu bonse bamulondejilenga, kabiji bakemene ku Beta-mahaka.

18 Bakalume banji bonse bo ayile* nabo ne bena Keleta bonse, ne bena Peleta,+ ne bena Gata+ ne bantu 600 bamulondejile kufuma ku Gata,+ bapichilenga kwipi mfumu saka ebamona.* 19 Kepo mfumu aambijile Itai+ mwina Gata amba: “Mambo ka ne obewa o ubena kuyila ne atweba? Bwelamo ukekale na mfumu wa katataka, mambo obewa wafuma ku kyalo kingi. 20 Waishile kesha, pano ubena kukeba lelo tukupishañanyengamo, ne kuya kimye kyo nsakuyilapo ku mpunzha konse ko nsakuya nyi? Bwelamo usende ne balongo bobe, kabiji Yehoba akumweshe butemwe bubula kwaluka ne bukishinka!”+ 21 Bino Itai wamukumbwile mfumu amba: “Byonkatu Yehoba byo aji na bumi ne anweba nkambo mfumu byo muji na bumi, konse ko mukekala anweba nkambo mfumu, nangwa mu lufu nangwa na bumi, ne amiwa kalume wenu ko ko nkekala!”+ 22 Ponkapo Davida wamwambijile Itai+ amba: “Yanga wabukile ku bushiya.” Byonkabyo, Itai mwina Gata waabukijile ku bushiya, pamo na bantu banji bonse ne baana.

23 Bantu bonse ba mu kyalo bajijilenga mabingo kimye bano bantu bonse kyo baabukijilenga ku bushiya, kabiji mfumu waimene kwipi na Kimpachiko kya Kedolona;+ bantu bonse baabukijilenga ku bushiya ku mukwakwa waya ku kiselebwa. 24 Zadoka+ naye wajinga konka pamo na bena Levi+ bonse saka basenda jikwachi+ ja lulayañano lwa Lesa wa kine;+ kabiji batujile panshi Jikwachi ja Lesa wa kine; Abiata+ watuntukile bantu bonse byo baabukile kufuma mu muzhi. 25 Bino mfumu waambijile Zadoka amba: “Bwezha Jikwachi ja Lesa wa kine ku muzhi.+ Inge Yehoba akangubile bibusa, aye yenka ukambwezha ne kundengela kwijimona ne kumona mpunzha yajo.+ 26 Bino inge akambe’mba, ‘Kechi wantokela ku muchima ne,’ akangube kyonse kyo akamona’mba kyawama.” 27 Mfumu waambijile Zadoka ñanga amba: “Nanchi obewa kechi wi muntu umona bimwesho nenyi?+ Bwela ku muzhi mu mutende, kabiji usende ne baana bobe babiji, Ahimaza mwanobe wa kwisemena ne Yonafwanyi+ mwana wa kwa Abiata. 28 Umvwa, amiwa nsakwikalanga ku myaba iji kwipi na kiselebwa posotu nkomvwe mawi kufuma kwi obewa.”+ 29 Onkao mambo, Zadoka ne Abiata babwezhezhe Jikwachi ja Lesa wa kine ku Yelusalema, ne abo baikele konkakwa.

30 Davida byo akanjijilenga ku Mutumba wa Maolivi,+ wayilengatu na kujila; saka evweta ku mutwe, kabiji waendelengatu maulu panshi. Ne bantu bonse bo ajinga nabo, bevwetele ku mitwe kabiji bajijilenga byo bakanjijilenga. 31 Davida bamubuujile’mba: “Ahitofela uji pa boba babena kumvwañana+ ne Abisalomo.”+ Ponkapo Davida waambile’mba: “Anweba Yehoba,+ napopwela alululai maana a kwa Ahitofela ke atutu!”+

32 Davida byo afikile peulu ya mutumba bantu po bafukaminanga Lesa, Hushai+ mwina Alaka+ waishile na kumusambakana ne mukangyo wanji saka atabauka ne maloba ku mutwe. 33 Davida wamwambijile’mba: “Inge wabuke ne amiwa ku bushiya, usakumbikatu mu lukatazho. 34 Bino inge ubwele ku muzhi ne kwambila Abisalomo amba, ‘Amiwa nekalume wenu anweba Mfumu, kala najinga kalume wa bashenu,+ pano luno nekalume wenu,’ wakonsha kumvulañenyako maana a kwa Ahitofela.+ 35 Nanchi Zadoka ne Abiata bañanga kechi baji kokwa ne obewa nenyi? Wafwainwa kwibabuula ba Zadoka ne Abiata bañanga bintu byonse byo ukomvwa ku nzubo ya mfumu.+ 36 Umvwa! Abo kokwa baji na baana babo babiji, Ahimaza+ mwana wa kwa Zadoka ne Yonafwanyi+ mwana wa kwa Abiata, bintu byonse byo ukomvwa ukebitume kwi amiwa kupichila mwi abo.” 37 Byonkabyo, Hushai mulunda wa kwa Davida+ wayile mu muzhi kimye Abisalomo kyo atwelelenga mu Yelusalema.

16 Davida byo aendelekotu pacheche kufuma peulu ya mutumba,+ Ziba+ wa mwingilo wa kwa Mefibosheta,+ wamusambakene saka aji na bambongolo babiji bo akashijilepo bya kwikalapo, kabiji pa bano bambongolo pajinga bashinkwa 200, bashinkwa 100 bebalengele na mañanzañanza auma ne bashinkwa bakwabo 100, bebalengele na bipangwa* bya kisalo, ne mulondo mukatampe wa binyu.+ 2 Kepo mfumu aipwizhe Ziba amba: “Mambo ka o waletela bino bintu?” Ziba wakumbwile’mba: “Bambongolo ba kwendapo ba mu nzubo ya ba mfumu, bashinkwa ne bipangwa bya kisalo byo bya kuja bansongwalume, ne binyu byo bya kutoma boba basakukooka mu kiselebwa.”+ 3 Kepo mfumu amwipwizhe’mba: “Mwana* wa nkambo yobe uji pi?”+ Aye Ziba wamukumbwile mfumu amba: “Bashala mu Yelusalema, mambo baji kwamba’mba, ‘Lelo jino bena Isalela basakumbwezhezha bufumu bwa batata.’”+ 4 Kepo mfumu aambijile Ziba amba: “Umvwa! Bintu byonse bya kwa Mefibosheta pano ke byobe.”+ Ziba waambile’mba: “Nafukama kwi anweba. Mungubile bibusa anweba nkambo mfumu.”+

5 Mfumu Davida byo afikile ku Bahulimu, muntu umo wa mu kisemi kya kwa Saulo wa jizhina ja Shimei,+ mwana wa kwa Gela, waishilenga saka afingañana.+ 6 Waashilenga Davida mabwe ne bakalume bonse ba Mfumu Davida, ne bantu bonse ne babilobo bajinga ku kilujo ne ku kipiko kyanji. 7 Shimei byo afingañenenga waambilenga’mba: “Fulangila, fulangila, obewa muntu uji na mambo a mashi! Obewa muntu watutu! 8 Yehoba washinkanya ne obewa na mambo a mashi a ba mu nzubo ya kwa Saulo, ye waswana pa bufumu, bino Yehoba wapana bufumu kwi Abisalomo mwanobe. Pano bya malwa byakufikila, mambo wi muntu uji na mambo a mashi!”+

9 Kepo Abishai mwana wa kwa Zeluya+ aambijile mfumu amba: “Mambo ka uno kabwa wafwa+ o abena kufingila nkambo mfumu?+ Mwane lekai ngye nkamuchibeko mutwe.”+ 10 Bino mfumu wamukumbwile’mba: “Ñanyi kintu kyo nafwainwa kuba ne anweba baana ba kwa Zeluya?+ Mulekai amfingenga,+ mambo Yehoba wamwambila’mba,+ ‘Mufinge Davida!’ Pano ñanyi wakonsha kumwambila’mba, ‘Mambo ka o ubena kubila kino?’” 11 Kepo Davida aambijile Abishai ne bakalume banji bonse amba: “Mwanami wa kwisemena ubena kukeba bumi* bwami,+ pano nga mwina Benjamina+ kisakupela pi? Mulekaitu amfingenga, mambo Yehoba ye wamwambila kuba kino! 12 Apo kampe Yehoba usakumona kumanama kwami,+ kabiji Yehoba usakupingizhapo bintu byawama pa mafingo o bamfinga lelo.”+ 13 Davida ne bantu banji batwajijile kuya mu jishinda, pakuba Shimei wapichilenga ku mutumba saka asasangizha kipikipi, saka afingañana+ ne kumwasa mabwe ne kumufukwila maloba.

14 Byo papichile kimye, mfumu ne bantu bonse bo ajinga nabo bafikile ko bayilenga saka bakookatu zubulu, ne kukokoloka bakokolokele.

15 Kabiji Abisalomo ne banabalume bonse bena Isalela bafikile mu Yelusalema, ne Ahitofela+ wajinga nanji. 16 Hushai+ mwina Alaka,+ mulunda wa kwa Davida, byo aishile kwi Abisalomo, waambijile Abisalomo amba: “Mfumu ekale myaka yavula!+ Mfumu ekale myaka yavula!” 17 Ponkapo Abisalomo waipwizhe Hushai amba: “Nanchi buno bo butemwe bubula kwaluka bo waubila mulunda nobe nyi? Mambo ka o wabujila kuya na mulunda nobe?” 18 Hushai wamukumbwile Abisalomo amba: “Ine, amiwa nji ku lubaji lwa yewa ye basala kwi Yehoba, ne ku bano bantu, ne ku banabalume bonse bena Isalela. Aye ye ye nkekalanga nanji. 19 Kabiji naamba ne jikwabo namba, Ñanyi ye nafwainwa kwingijila? Nanchi kechi mwananji nenyi? Byonkatu byo naingijilenga bashenu, byo byo nkemwingijilanga ne anweba.”+

20 Kepo Abisalomo aambijile Ahitofela amba: “Mbuuleko maana.+ Tusakuba byepi?” 21 Ponkapo Ahitofela waambijile Abisalomo amba: “Laala na bantombo ba bashobe,+ bonka bo basha na kulama nzubo.*+ Bena Isalela byo basakumvwa’mba wauba kino kintu ne kutuka bashobe, bonse babena kukutundaika basakuchinchika.” 22 Onkao mambo, Abisalomo bamupopejile tente pa musemi,+ ne aye walaajile na bantombo ba bashanji+ ne bena Isalela bonse saka bamona.+

23 Mu oa moba, maana a kwa Ahitofela+ o abuulanga bantu beamonangatu nobe* byambo bya Lesa wa kine. Maana onse a kwa Ahitofela byo byo beanemekele kwi Davida ne Abisalomo.

17 Kabiji Ahitofela waambijile Abisalomo amba: “Mwane nswishai nsale banabalume 12,000 ne kuya na kupupila Davida bufuku buno. 2 Nsakumutaana saka akookatu zubulu,*+ kabiji nsakumulengela kukakilwa; ne bantu bonse bo aji nabo basakumunyema, kabiji nsakutapakotu mfumu yenka kwapwa.+ 3 Kepo nsakubwezha bantu bonse kwi anweba. Kubwela kwa bantu bonse kwaimena pa kintu kisakumwekela muntu ye mubena kukeba. Kabiji bantu bonse po po bakekala mutende.” 4 Abino byambo byamutokejile bingi ku muchima Abisalomo ne bakulumpe bonse ba bena Isalela.

5 Nangwa byonkabyo, Abisalomo waambile’mba: “Mwitai ne Hushai+ mwina Alaka tumvwe naye byo asakwamba.” 6 Byonkabyo, Hushai waishile kwi Abisalomo. Kepo Abisalomo amwambijile’mba: “Abino byo byaji kwamba Ahitofela. Nanchi tubile monka mo aji kwambila nyi? Inge ne, yenka anweba mwitubuule bya kuba.” 7 Ponkapo Hushai wamwambijile Abisalomo amba: “Byambo byaamba Ahitofela kechi byakonsha kukwasha mu kino kintu ne!”+

8 Hushai watwajijile kwamba’mba: “Mwayukishatu bulongo amba bashenu ne bantu babo bo babilobo,+ kabiji baji na kijikila* nobe mbeyala waela baana banji mungye.+ Kabiji bashenu ke muntu wayukisha kulwa nkondo,+ kabiji kechi basakulaala pamo na bantu bo baji nabo ne. 9 Pa kino kimye, bafyama mu jiyengo* nangwa mu mpunzhatu ikwabo;+ kabiji inge abo batendekelepo kulukuka, aba basakumvwa kino, basakwamba’mba, ‘Bantu balondejilenga Abisalomo bebashinda!’ 10 Nangwatu muntu wachinchika uji na muchima nobe wa bokwe+ usakuzakama na moyo, mambo bena Isalela bonse bayuka’mba bashenu bo ba kilobo,+ kabiji bantu bo baji nabo bo bantu bachinchika. 11 Nalanguluka bino: Muleke bena Isalela bonse bakonkane kwi anweba, kufuma ku Danyi kukafika ne ku Belesheba,+ bavule nobe busenga bwa ku kitulu kya kalunga ka mema,+ kabiji mwibatangijile ku nkondo. 12 Kabiji tukebalukuka konse ko tukebataana, ne kwibatula bulemo byonka kime byo kinokela panshi; kabiji kafwako nangwa umo mwi abo ukapuluka ne, nangwatu abo ne bantu bo baji nabo. 13 Inge bakanyemene mu muzhi, bena Isalela bonse bakatwala mizhinge mu yewo muzhi, ne kumukokela mu kimpachiko kufikatu ne byo mukabula kushala jibwe nangwa jimo.”

14 Kepo Abisalomo ne banabalume bonse bena Isalela baambile’mba: “Byambo byaamba Hushai mwina Alaka byawama+ kukila bya kwa Ahitofela!” Mambo Yehoba wafuukwijile* jimo kuvulañanya maana a kwa Ahitofela,+ pa kuba’mba Yehoba alete bya malwa pe Abisalomo.+

15 Kabiji Hushai waambijile ba Zadoka ne Abiata+ bañanga amba: “Abino Ahitofela byo byo aji kubuula Abisalomo ne bakulumpe ba bena Isalela, ne amiwa naji kwibabuula bino. 16 Pano pelawizhai kutuma mawi kwi Davida ne kumujimunako amba: ‘Kange mwikale ku myaba* iji kwipi na kiselebwa bufuku buno ne, bino pelawizhai kwabukila ku bushiya kuchina’mba anweba mfumu ne bantu bonse bo muji nabo mwakeya kuvila.’”+

17 Yonafwanyi+ ne Ahimaza+ baikajilenga ku Ene-logela;+ onkao mambo wa mwingilo wa mukazhi wayile na kwibabuula ne abo bayile na kubuula Mfumu Davida, mambo bachiine kutwela mu muzhi amba bakebamona. 18 Nangwa byonkabyo, nsongwalume umo wibamwene kabiji wayile na kubuula Abisalomo. Onkao mambo, bonse babiji baendeshe ne kuya ku nzubo ya muntu umo waikalanga mu Bahulimu+ wajinga na mushima mu kipango kyanji. Ne abo baikijile monka, 19 kabiji mukazhanji wazhikilepo pa mushima ne kwanyikapo kajo ka bisanse; kafwako nangwa umo wayukile kino ne. 20 Bakalume ba kwa Abisalomo baishile ku mwanamukazhi saka aji ku nzubo yanji ne kumushikisha’mba: “Ahimaza ne Yonafwanyi baji pi?” Uno mwanamukazhi wakumbwile’mba: “Baji kupichila ja ku mema.”+ Kabiji banabalume baishile na kwibakeba kechi bebamwene ne, onkao mambo, babwelelemo ku Yelusalema.

21 Bano banabalume byo bayile, aba bajinga mu mushima batuntukilemo ne kuya na kubuula Mfumu Davida. Bamwambijile’mba: “Imanai mupelawizhe kwabuka mukola, mambo Ahitofela waamba’mba bemulukuke.”+ 22 Ponkapo Davida ne bantu bonse bo ajinga nabo baimene ne kwabuka Yodano. Byo bwakile lukelo, kafwako nangwa umo wabujile kwabuka Yodano ne.

23 Ahitofela byo amwene’mba maana anji kechi beengijisha ne, wabikile kya kwikalapo pa mbongolo ne kuya ku nzubo yanji ku muzhi ko aikalanga.+ Byo apwishishe kukambizha ba mu nzubo yanji,+ wikujikile.+ Byonkabyo, wafwile kabiji bamuzhiikile ku mpunzha ya bashakulu banji.

24 Davida wayile ku Mahanaimu,+ Abisalomo naye waabukile Yodano pamo na banabalume bonse bena Isalela. 25 Abisalomo watongwele Amasa+ kwikala mukulumpe wa nzhita wa kupinga pe Yoaba;+ Amasa wajinga mwana wa kwa Itula mwina Isalela, yenka walaajile ne Abigaila+ mwana wa mukazhi wa kwa Nahashi, nyenga ya kwa Zeluya inanji Yoaba. 26 Bena Isalela ne Abisalomo batebelejile mu kyalo kya Gileada.+

27 Davida byo afikiletu ku Mahanaimu, Shobi mwana wa kwa Nahashi wa ku muzhi wa Laba+ wa bena Amonyi, ne Makila+ mwana wa kwa Amiela wa ku Lo-deba, ne Bazilai+ mwina Gileada wa ku Logelimu 28 baletele myanya, masanyi akatampe, mapuki, wichi, mbaale, fulaulo, kajo ka kukanga, nkunde, nkunde ya lwanda, kajo kauma, 29 buki, bbata, mikooko ne mukaka wachimba.* Baletele bino byonse kwi Davida ne bantu bo ajinga nabo kuba’mba baje,+ mambo baambile’mba: “Bantu bafwa nzala kabiji bakooka ne kufwa kilaka mu kiselebwa.”+

18 Kepo Davida abajile bantu bo ajinga nabo ne kwibatongwela bakulumpe ba pa biumbi ne ba pa bitota.+ 2 Kabiji Davida watumine kipanyi kimo kuya ne Yoaba,+ ne kipanyi kya bubiji kuya ne Abishai+ mwana wa kwa Zeluya,+ mulongo wa kwa Yoaba, ne kipanyi kya busatu kuya ne Itai+ mwina Gata. Kepo mfumu aambijile bano banabalume amba: “Ne amiwa nsakuya nenu.” 3 Bino abo baambile’mba: “Ine kange muye ne,+ mambo inge tukanyeme, kechi bakatako muchima kwi* atweba ne; kabiji inge kichika kimo mwi atweba kyafwa, kechi baketuta muchima ne, mambo anweba mwaesakana na bantu 10,000 kunema.+ Onkao mambo, kyakonsha kuwama bingi inge mwitutumina bukwasho kufuma kuno ku muzhi.” 4 Mfumu wibambijile’mba: “Nsakwimubila kyonse kyo mwamona’mba kyawama.” Byonkabyo, mfumu waimene ku kibelo kya muzhi, ne banabalume bonse balupukile mu bipanyi bya bitota ne bya biumbi. 5 Kepo mfumu akambizhe Yoaba ne Abishai ne Itai amba: “Kange mukamukatazhe nsongwalume Abisalomo na mambo a amiwa ne.”+ Bantu bonse baumvwine, mfumu byo akambizhe bakulumpe bonse na mambo a kwa Abisalomo.

6 Kepo banabalume bayile mungye na kusambakana bena Isalela, ne nkondo yaikejile mu jisaka ja Efelaimu.+ 7 Konkakwa bena Isalela+ bebashinjile ku bakalume ba kwa Davida,+ ne bantu bavula bafwile pa joja juba, bantu 20,000. 8 Nkondo yakumbene kibunji kyonse. Kabiji bafwijile mu jisaka bavujile kukila bafwile ku mpoko aja juba.

9 Kabiji Abisalomo bamusambakene ku bakalume ba kwa Davida. Abisalomo waendelenga pa myule, kabiji myule wapichile munshi ya kichi kikatampe kyajinga na misampi yavula, ne mutwe wanji wakobamine mu kichi kikatampe, kya kuba washajile na kupepela* kabiji myule ye aendelengapo wayile. 10 Muntu umo wamumwene ne kwambila Yoaba amba:+ “Umvwai! Namona Abisalomo saka akobama ku kichi kikatampe.” 11 Yoaba waambijile awa muntu wamubuujile amba: “Inge waji kumumona, mambo ka o waji kubujila kumutapa ponkapotu kuba’mba aponene panshi? Inge naji kukupa mashekele a siliva jikumi ne mushipi.” 12 Bino uno muntu waambijile Yoaba amba: “Nangwa kya kuba bampa* mashekele a siliva 1,000, kechi nakonsha kutanyika kuboko kwami pa mwana mfumu ne kumuba kyatama ne, mambo twaumvwine mfumu byo emukambizhe anweba ne Abishai ne Itai amba, ‘Muntu yense kechi wafwainwa kumuba kyatama nsongwalume Abisalomo ne.’+ 13 Inge naji kubula kukookela ne kumwipaya,* inge kyasoloka ku ba mfumu, kabiji anweba inge kechi mwaji kunzhikijila ne.” 14 Kepo Yoaba aambile’mba: “Kechi nsakutaya kimye ne obewa ne!” Onkao mambo, wasendele byela byatwa* bisatu mu kuboko kwanji ne kwibikulukusa pa muchima wa kwa Abisalomo saka akipema pakachi ka misampi ya kichi kikatampe. 15 Kepo ba mwingilo ba kwa Yoaba basendele bilwilo byanji baishile ne kutapa Abisalomo kufikatu ne byo afwile.+ 16 Ponkapo Yoaba wavuminye lusengo, ne bantu bapupijilenga bena Isalela babwelelemo; Yoaba wibambijile’mba baleke kulwa. 17 Bashikwile Abisalomo ne kumutaya mu kimbo kikatampe kyajinga mu jisaka, kabiji bamulumbikile mulumba mukatampe wa mabwe.+ Kabiji bena Isalela bonse banyemejile ku mazubo abo.

18 Abisalomo byo akijinga mumi, washikwile jishiki ne kwijimika mu Kimpachiko* kya Mfumu,+ mambo waambile’mba: “Kechi nasemapo mwana wa mulume wa kulama jizhina jami amba bakejivulukenga ne.”+ Byonkabyo, watumbile aja jishiki jizhina janji, kabiji jitelwa’mba Jishiki ja kwa Abisalomo kufika ne lelo jino.

19 Ahimaza+ mwana wa kwa Zadoka waambile’mba: “Mwane nswishai ngye na kubuula bamfumu kino kyamweka, mambo Yehoba wibapokolola ku balwanyi babo.”+ 20 Bino Yoaba wamwambijile’mba: “Obewa kechi usakutwala ino mbila lelo ne. Ukeitwale juba jikwabo, pakuba lelo kechi usakutwala ino mbila ne, mambo mwana bamfumu wafwa.”+ 21 Kepo Yoaba aambijile mwina Kushi amba:+ “Yanga ukabuule ba mfumu kyo wamona.” Ponkapo mwina Kushi wafukamine kwi Yoaba kepo ayile lubilo. 22 Ahimaza mwana wa kwa Zadoka waambijile Yoaba jibiji amba: “Kechi na mambo a kisakumweka ne, mwane nswishai ndondele panyuma ya mwina Kushi.” Nangwa byonkabyo, Yoaba waambile’mba: “Mwanami, mambo ka o wafwainwa kuyila lubilo, byo pabula mbila ya kuba’mba uye na kwamba?” 23 Waambile jikwabo amba: “Kechi na mambo a kisakumweka ne, nswishai ngye lubilo.” Kepo Yoaba amwambijile’mba: “Yanga lubilo!” Ponkapo Ahimaza wanyemene kupita mu jishinda japita mu nkambi ya Yodano, kabiji washilemo mwina Kushi.

24 Kabiji Davida waikele pakachi ka bibelo bibiji bya muzhi,+ ne kasopa+ wakanjijile pa musemi wa ku kibelo kwipi na nsakwa. Byo akenkentele wamwene muntu saka eya lubilo bunke bwanji. 25 Onkao mambo, kasopa wabijikile ne kubuula mfumu. Mfumu waambile’mba: “Inge uji bunke ko kuba’mba uji na mbila ya kwamba.” Byo afikilenga kwipi, 26 kasopa wamwene muntu mukwabo saka eya lubilo. Kepo kasopa abijikile ku ulama kibelo amba: “Umvwa! Kubena kwiya muntu mukwabo lubilo ujitu bunke!” Mfumu waambile’mba: “Uno naye waleta mbila.” 27 Kasopa waambile’mba: “Muntu mutanshi ubena kunyema nobe Ahimaza+ mwana wa kwa Zadoka.” Ponkapo mfumu waambile’mba: “Aye ke muntu wawama, kabiji uleta mbila yawama.” 28 Kepo Ahimaza abijikile kwi mfumu amba: “Bintu byonse bijitu bulongo!” Ponkapo wafukamine kwi mfumu saka akunyika kilungi panshi. Kepo aambile’mba: “Atotwe Yehoba Lesa wenu yenka wimupa bantu bemusatukijile* anweba nkambo mfumu!”+

29 Nangwa byonkabyo, mfumu washikishe’mba: “Nanchi nsongwalume Abisalomo ujitu bulongo nyi?” Ponkapo Ahimaza wakumbwile’mba: “Naji kumvwa kiwowo kikatampe Yoaba byo aji kutuma kalume wa mfumu ne amiwa kalume wenu, bino kechi naji kuyuka kyaji kubiwanga ne.”+ 30 Kepo mfumu aambile’mba: “Iya wimane papo.” Ponkapo wayile ne kwimana po bamubuujile.

31 Kepo mwina Kushi afikile,+ kabiji mwina Kushi waambile’mba: “Mwane anweba mfumu, muswe ino mbila: Lelo Yehoba wimupokolola mu maboko a bonse bemusatukijile.”+ 32 Bino mfumu washikishe mwina Kushi amba: “Nanchi nsongwalume Abisalomo ujitu bulongo nyi?” Ponkapo mwina Kushi waambile’mba: “Balwanyi benu bonse anweba nkambo mfumu ne bonse bemusatukijile kuba’mba bemube kintu kyatama, bekale nobe uno nsongwalume!”+

33 Kino kintu kyamukatezhe mfumu ku muchima, kabiji wakanjijile kuya mu kibamba kya peulu ya kibelo ne kujila, byo ayilenga wajijilenga amba: “Mwanami Abisalomo, mwanami, mwanami Abisalomo! Nanchi inge yami naji kufwa kukila obewa, Abisalomo mwanami, mwanami!”+

19 Yoaba bamubuujile’mba: “Bamfumu babena kujila Abisalomo.”+ 2 Kabiji kushinda ko bashinjile* pa joja juba kwaalukile ke mabingo ku bantu, mambo bonse baumvwine’mba mfumu wauba bulanda na mambo a mwananji. 3 Bantu babwelele kishinshi ku muzhi+ pa jo ja juba nobe bantu baumvwa bumvu mambo banyemene ku nkondo. 4 Mfumu wivwetele ku meso kabiji wajijilenga jibingo amba: “Mwanami Abisalomo! Abisalomo mwanami, mwanami!”+

5 Kepo Yoaba ayile ku nzubo ya mfumu ne kumwambila’mba: “Lelo jino mwalengesha bumvu bakalume benu bonse, bonka baji kupulusha bumi* bwenu lelo, ne bumi* bwa baana benu ba balume+ ne ba bakazhi,+ bakazhi benu, ne bantombo benu.+ 6 Mwatemwa boba bemushikwa ne kushikwa boba bemutemwa, mambo lelo mwamweshatu patoka amba babinemanga benu ne bakalume benu kafwako byo baji kwi anweba ne, mambo nayukishatu’mba inge Abisalomo wajinga mumi lelo, ne atweba bonse twafwa, inge kyajingatu bulongo kwi anweba. 7 Pano imanai muye na kutekenesha* bakalume benu, mambo amiwa nachipa mu jizhina ja Yehoba namba, inge mubule kuya, kafwako muntu nangwa umo usakushala ne anweba buno bufuku bwa lelo ne. Kabiji kino kisakwimutamina bingi kukila bya malwa byonse bimumwekela kufuma ku bwanyike bwenu kufika ne lelo jino.” 8 Onkao mambo, mfumu waimene ne kuya na kwikala ku kibelo kya muzhi, kabiji bantu bonse bebabuujile’mba: “Bamfumu baikala ku kibelo kya muzhi.” Kepo bantu bonse baishile kwi mfumu.

Bino bena Isalela banyemene, au ku nzubo yanji, au ku nzubo yanji.+ 9 Bantu bonse ba mu mikoka ya bena Isalela batobokelenga amba: “Bamfumu betupulwishe ku balwanyi betu,+ kabiji betupokolwele ku bena Filishitiya; pano luno banyemamo mu kyalo na mambo a kwa Abisalomo.+ 10 Kabiji Abisalomo ye twashingile manyi amba ekale mfumu wetu,+ wafwa mu nkondo.+ Pano mambo ka o mwabujila kubwezha ba mfumu?”

11 Mfumu Davida watumine ano mawi kwi Zadoka+ ne Abiata+ bañanga a kuba’mba: “Buulai bakulumpe ba bena Yuda+ amba: ‘Mambo ka o mwafwainwa kwikela bapelako mu kubwezha mfumu ku jilapa janji, byambo byaamba bena Isalela saka byafika kwi mfumu ku nzubo yanji? 12 Anweba mwi balongo bami; mwi bikupa byami kabiji mwi mubiji wami.* Mambo ka o mwafwainwa kwikela bapelako mu kubwezha mfumu?’ 13 Kabiji mwafwainwa kumubuula Amasa+ amba, ‘Nanchi obewa kechi wi bikupa byami ne mubiji wami nenyi? Lesa akankambule inge obewa ukabule kwikala mukulumpe wa nzhita yami kufuma ja lelo ne kupingakena pe Yoaba.’”+

14 Byonkabyo, banabalume bonse bena Yuda wibafupwile* michima ne kwikala nobe muntu umo, kabiji batumine mawi kwi mfumu amba: “Bwelai, anweba ne bakalume benu bonse.”

15 Mfumu watendekeleko kubwela kabiji wafikile ku Yodano, ne bena Yuda baishile ku Giligala+ na kumutundaila mfumu ne kumushinjikinya kuba’mba bamwabushe Yodano. 16 Kepo Shimei+ mwana wa kwa Gela, mwina Benjamina wa ku Bahulimu, aishile bukiji pamo na banabalume bena Yuda na kutundaila Mfumu Davida, 17 kabiji banabalume 1,000 bafumine ku Benjamina bajinga ne aye. Ziba+ wa mwingilo wa ku nzubo ya kwa Saulo, naye wafikile bukiji ku Yodano na baana banji 15 ne bakalume 20 mfumu saka akyangye kufika. 18 Aye* waabukile pa mwaba ne kwabusha bonse ba mu nzubo ya mfumu ne kumubila byonse byo akebelenga. Bino Shimei mwana wa kwa Gela wafukamine panshi kwi mfumu byo ajingatu pepi kwabuka Yodano. 19 Waambijile mfumu amba: “Mwane anweba nkambo yami kange munzhachishe ne, kabiji kange muvuluke kintu kyatama amiwa kalume wenu kyo naubile+ pa joja juba anweba nkambo yami mfumu jo mwafuminenga mu Yelusalema ne. Anweba mfumu kange mulame kino ku muchima ne, 20 mambo amiwa kalume wenu nayukishatu namba nalenga mambo; onkao mambo, lelo jino yami muntu mutanshi pa bonse ba mu nzubo ya kwa Yosefwa waiya na kwimutundaila anweba nkambo mfumu.”

21 Ponkapo Abishai+ mwana wa kwa Zeluya+ waambile’mba: “Nanchi Shimei kechi wafwainwa kufwa byo afingile mushingwa wa Yehoba nenyi?”+ 22 Bino Davida waambile’mba: “Nanchi kino kintu kimukola byepi ku muchima anweba baana ba kwa Zeluya+ kya kuba’mba muñimene lelo? Nanchi muntu wafwainwa kufwa lelo mu bena Isalela nyi? Nanchi kechi nayuka namba lelo jino yami mfumu wa bena Isalela nenyi?” 23 Kepo mfumu amwambijile Shimei amba: “Kechi usakufwa ne.” Kabiji mfumu wachipile kwi aye.+

24 Mefibosheta,+ munkana wa kwa Saulo, naye waishile na kutundaila mfumu. Kechi waowelenga ku maulu ne, kabiji kechi watendele myevu* nangwa kuchapa bivwalo byanji ne, kufumatu juba mfumu jo ayile kufikatu ne juba jo abwelele mu mutende. 25 Byo aishile* ku Yelusalema na kutundaila mfumu, mfumu wamushikishe’mba: “Mefibosheta, mambo ka o wabujile kuya ne amiwa?” 26 Aye wakumbwile’mba: “Nkambo yami mfumu, kalume wami+ wambepele. Amiwa kalume wenu naambile namba, ‘Lekai nkase kya kwikalapo pa mbongolo kuba’mba ñendelepo ne kuya ne ba mfumu,’ mambo amiwa kalume wenu nalemana.+ 27 Bino aye wambepejile amiwa kalume wenu kwi anweba nkambo mfumu.+ Nangwa byonkabyo, anweba nkambo mfumu muji nobe malaika wa Lesa wa kine, onkao mambo, ubai kyonse kyo mwamona’mba kyawama kwi anweba. 28 Bonse ba mu nzubo ya batata inge mwibepaya anweba nkambo mfumu, pano bino, mwambikile amiwa kalume wenu pa boba baja ku tebulu wenu.+ Pano ñanyi luusa lo nji nalo lwa kulombelapo bikwabo kwi anweba mfumu?”

29 Nangwa byonkabyo, mfumu wamwambijile’mba: “Mambo ka o ukitwajijila kwamba bino? Nafuukula namba obewa ne Ziba mwafwainwa kwabana bujimi.”+ 30 Ponkapo Mefibosheta waambijile mfumu amba: “Ebutambuletu bonse, mambo anweba nkambo mfumu mwabwela ku jilapa jenu mu mutende.”

31 Kepo Bazilai+ mwina Gileada afumine ku Logelimu ne kwiya ku Yodano kuba’mba amushijikinyeko mfumu ku Yodano. 32 Bazilai wakotele bingi, wajinga na myaka ya kusemwa 80, kabiji watwalanga bya kuja kwi mfumu kimye kyo aikalanga mu Mahanaimu,+ mambo aye wajinga na bunonshi bwavula bingi. 33 Kabiji mfumu waambijile Bazilai amba: “Twayai twabuke bonse, kabiji nkemupanga kajo mu Yelusalema.”+ 34 Bino Bazilai waambijile mfumu amba: “Moba* anga a bumi bwami o nashala nao, kya kuba’mba ngye ne anweba mfumu ku Yelusalema? 35 Amiwa lelo jino nji na myaka 80.+ Nanchi nakonsha kuyuka kyawama ne kyatama nyi? Nanchi amiwa kalume wenu nakonsha kutompa kajo ko nja ne bya kutoma nyi? Nanchi ne luno nakonsha kuteleka ku mawi a banabalume ne banabakazhi banyimbi nyi?+ Pano mambo ka amiwa kalume wenu o nafwainwa kunungilapo kisendwa kwi anweba nkambo mfumu? 36 Kijitu bulongo amiwa kalume wenu byo nemushinjikinyako anweba mfumu ku Yodano. Mambo ka anweba bamfumu o mwafwainwa kumpela kino kilambu? 37 Mwane nswishai amiwa kalume wenu mbwele, nkafwile mu muzhi, kwipi na mpunzha ya kuzhiikamo ya batata ne bamama.+ Pakuba kalume wenu Kimuhamu awe.+ Muswishai abuke ne anweba nkambo mfumu, kabiji mwakonsha kumubila kyonse kyo mwamona’mba kyawama.”

38 Onkao mambo, mfumu waambile’mba: “Nsakwabuka ne Kimuhamu, kabiji nkamubila kyo wamona’mba kyawama; kyonse kyo usakundomba nkakubilakyo.” 39 Bantu bonse batendekele kwabuka Yodano, kabiji mfumu byo aabukile, wafyompele Bazilai+ ne kumupesha; kabiji Bazilai wabwelelemo ku nzubo. 40 Mfumu byo aabukijile ku Giligala,+ ne Kimuhamu waabukijile nanji pamo. Bena Yuda bonse ne kichika kya bena Isalela bamwabwishe mfumu.+

41 Kepo banabalume bonse bena Isalela bayile kwi mfumu ne kumwambila’mba: “Mambo ka balongo betu bena Yuda o bemubombwejile anweba mfumu ne ba mu nzubo yenu ne kwimwabushisha ku bushiya bwa Yodano, pamo na banabalume benu bonse anweba ba Davida?”+ 42 Banabalume bonse bena Yuda bakumbwile banabalume bena Isalela amba: “Mambo mfumu mulongo wetu.+ Mambo ka o mwazhingijila? Nanchi twajapo kintu kya mfumu, nangwa betupapo bupe nyi?”

43 Nangwa byonkabyo, banabalume bena Isalela bakumbwile banabalume bena Yuda amba: “Atweba tuji na myanzo jikumi mu bufumu, onkao mambo, atweba tuji na luusa lukatampe pe Davida kukila lo muji nalo. Pano mambo ka o mwitulengulwila? Nanchi kechi yetu twafwainwe kwikala batanshi kubwezha mfumu wetu nenyi?” Nangwa byonkabyo, byambo bya banabalume bena Yuda byajinga na bulume kukila bya banabalume bena Isalela.

20 Kwajinga muntu waletanga makatazho wa jizhina ja Sheba,+ mwana wa kwa Bikili mwina Benjamina. Wavuminye lusengo+ ne kwamba’mba: “Kechi tujimo na mwanzo mwi Davida ne, kabiji kechi tujimo na buswanyi mu mwana wa kwa Yese ne.+ Anweba bena Isalela, muntu yense abwele ku balesa* banji!”+ 2 Ponkapo banabalume bonse bena Isalela balekele kulondela Davida, kabiji balondejile Sheba mwana wa kwa Bikili;+ bino banabalume bena Yuda bakakachijile ku mfumu wabo, kufuma ku Yodano kukafikatu ne ku Yelusalema.+

3 Davida byo abwelele ku nzubo* yanji mu Yelusalema,+ mfumu wasendele bantombo jikumi bo ashile na kulama nzubo,+ ne kwibabika mu nzubo kuba’mba bebasopenga. Wibapelenga kajo, bino kechi walaajilenga nabo ne.+ Baikelenga monkamwa mwa bunke kufika ne juba ja lufu lwabo, uba nobe banabakazhi bafwilwa, nangwa kya kuba bajinga na mwatawabo mumi.

4 Mfumu waambijile Amasa amba:+ “Wite banabalume bena Yuda bakonkane pamo kwi amiwa mu moba asatu, ne obewa wafwainwa kwiya kuno.” 5 Byonkabyo Amasa wayile na kwita bena Yuda amba bakonkane, bino wakelelwe kwiya pa kimye kyo bamutongwejile. 6 Kepo Davida aambijile Abishai amba:+ “Sheba+ mwana wa kwa Bikili wakonsha kwituba kintu kyatama kukila ne kyaubile Abisalomo.+ Senda bakalume ba nkambo yobe umupupile, pa kuba’mba abule kutaana mizhi iji na nsakwa yakosa ne kwitunyema.” 7 Onkao mambo, banabalume ba kwa Yoaba,+ ne bena Keleta ne bena Peleta+ ne babilobo bonse bamulondejile; bafumine mu Yelusalema ne kuya na kupupila Sheba mwana wa kwa Bikili. 8 Byo bafikile kwipi na jibwe jikatampe mu Gibeona,+ Amasa+ waishile na kwibatundaila. Yoaba wavwajile bivwalo byanji bya nkondo, kabiji wajinga ne na mpoko mu kikwa kyo akashile mu musana. Byo aendeleko pacheche, mpoko yaponene mu kikwa.

9 Yoaba waambijile Amasa amba: “Muji byepi yaya?” Kepo Yoaba akwachile Amasa ku myevu na kuboko kwanji kwa kilujo nobe ubena kukeba kumufyompa. 10 Amasa kechi wateleko maana ku mpoko yajinga mu kuboko kwa kwa Yoaba ne, kabiji Yoaba wamwashileyo mu jivumo+ ne mila yasepukijile panshi. Kechi wamwashile jibiji ne; wamwashiletu jimo ne kufwa wafwile. Kepo Yoaba ne Abishai mulongo wanji bamupupijile Sheba mwana wa kwa Bikili.

11 Nsongwalume umo wa kwa Yoaba waimene kwipi ne aye ne kwamba’mba: “Yense uji ku lubaji lwa kwa Yoaba ne yense wa kwa Davida, alondele Yoaba!” 12 Kabiji Amasa waalañenenga pa mashi anji mu mukwakwa. Awa muntu byo amwene’mba bantu bonse babena kwimana, wamufumishemo mu mukwakwa Amasa ne kumutula ku kiswa. Kepo amuvwetele kisapi, mambo wamwene’mba bantu bonse babena kwimana inge bafika po ajinga. 13 Byo amufumishemo mu mukwakwa, bantu bonse balondejile Yoaba na kupupila Sheba+ mwana wa kwa Bikili.

14 Sheba wapichile mu mikoka yonse ya bena Isalela kukafika ne ku muzhi wa Abela wa mu Bete-maaka.+ Bena Bikili bakonkene pamo ne kutwela nanji mu muzhi.

15 Yoaba ne banabalume* bo ajinga nabo baishile ne kumushinkila Sheba mu muzhi wa Abela wa mu Bete-maaka, kabiji balengele mushime kwipi na mushime wazhokolokele muzhi. Kabiji banabalume bonse bajinga ne Yoaba bapoyilenga nsakwa kuba’mba beipumune. 16 Mwanamukazhi umo wa maana wabijikile kufuma mu muzhi amba: “Umvwai anweba banabalume, umvwai! Napopwela mwibambile ba Yoaba amba, beye kuno kwipi nesambe nabo.” 17 Byonkabyo, wayile kwipi kwi aye, ne uno mwanamukazhi wamushikishe’mba: “Nanchi yenu ba Yoaba nyi?” Aye wakumbwile’mba: “Yami iye.” Ponkapo uno mwanamukazhi wamwambijile’mba: “Muteleke ku byo nsakwimubuula amiwa wa mwingilo wenu.” Ne aye waambile’mba: “Mbena kuteleka.” 18 Uno mwanamukazhi waambile’mba: “Kala baambanga’mba, ‘Balekai baye na kwipuzha mu muzhi wa Abela, ne makatazho abo akapwa.’ 19 Amiwa ñimenako bena Isalela ba mutende kabiji ba kishinka. Anweba mubena kukeba konauna muzhi uji nobe nsemi wa mukazhi mu Isalela. Mambo ka o mubena kukebela konauna* buswanyi bwa Yehoba?”+ 20 Yoaba wakumbwile’mba: “Kechi kyailamo amiwa konauna nangwa kuzhimañanya uno muzhi ne. 21 Kino kechi kyo kyo twaishila ne. Pano bino, muntu wa jizhina ja Sheba+ mwana wa kwa Bikili, wafuma mu kibunji kya mitumba kya Efelaimu+ wasatukila* Mfumu Davida. Inge umpe uno muntu nsakufumako ku uno muzhi.” Kepo mwanamukazhi aambijile Yoaba amba: “Umvwai! Basakwimutayila mutwe wanji peulu ya nsakwa!”

22 Ponkapo uno mwanamukazhi wa maana wayile na kubuula bantu bonse, ne abo bachibile mutwe wa kwa Sheba mwana wa kwa Bikili ne kumutayilaye Yoaba. Kepo avuminye lusengo ne abo bafumineko ku muzhi ne kubwela au kwanji au kwanji;+ kabiji Yoaba wabwelele ku Yelusalema ku mfumu.

23 Kabiji Yoaba ye wajinga mukulumpe wa nzhita yonse ya bena Isalela;+ Benaya+ mwana wa kwa Yehoyada+ ye wajinga mukulumpe pa bena Keleta ne pa bena Peleta.+ 24 Adolama+ ye watangijilanga aba bo bakambizhe kwingijila mfumu; Yehoshafwata+ mwana wa kwa Ahiluda wajinga munembeshi wa mambo. 25 Shevwa wajinga munembeshi; Zadoka+ ne Abiata+ bajinga bañanga. 26 Ila mwina Yaila naye waikele ke kinemanga* wa kwa Davida.

21 Kwaponene kipowe kya nzala+ mu moba a mfumu Davida pa myaka isatu yalondankana, onkao mambo, Davida waipwizhe Yehoba, ne Yehoba wamukumbwile’mba: “Paji mambo a mashi pe Saulo ne pa ba mu nzubo yanji, mambo aye waipayile bena Gibeona.”+ 2 Byonkabyo, mfumu waichile bena Gibeona+ ne kwisamba nabo. (Nangwa byonkabyo, bena Gibeona kechi bajinga bena Isalela ne, bino bajinga bena Amoli+ bashajilepo, kabiji bena Isalela bachipile’mba kechi bakebepaya ne,+ bino Saulo wakebelenga kwibepaya na mambo a kubilako kichima bena Isalela ne bena Yuda.) 3 Davida waipwizhe bena Gibeona amba: “Ñanyi kintu kyo mukeba’mba nemubile, kabiji nakonsha kufuta byepi mambo pa kuba’mba mupeshe buswanyi bwa Yehoba?” 4 Bena Gibeona bamukumbwile’mba: “Atweba kechi tubena kukeba siliva nangwa ngolode+ na mambo a kwa Saulo ne ba mu nzubo yanji ne; kabiji kechi twakonsha kwipaya muntu nangwa umo mu bena Isalela ne.” Ponkapo aye wibambijile’mba: “Kyonse kyo musakwamba, nsakwimubilakyo.” 5 Abo baambijile mfumu amba: “Muntu witonawine, kabiji wakebelenga kwituvizha kuba’mba tubule kwikala monse mu nyaunda ya bena Isalela,+ 6 mwitupe baana banji ba balume batanu na babiji. Tusakukobeka mibiji yabo yafwa*+ ku meso a Yehoba monka mu Gibea+ wa kwa Saulo, yenka wasalwa wa Yehoba.”+ Kepo mfumu aambile’mba: “Nsakwibapana kwi anweba.”

7 Nangwa byonkabyo, mfumu waubijile lusa Mefibosheta,+ mwana wa kwa Yonafwanyi, Yonafwanyi mwana wa kwa Saulo, na mambo a luchipo lo bachipile mu jizhina ja Yehoba, pakachi ka kwa Davida ne Yonafwanyi+ mwana wa kwa Saulo. 8 Onkao mambo, mfumu wasendele Alamone ne Mefibosheta, baana babiji ba kwa Lizipa+ mwana wa mukazhi wa kwa Aya ye asemene kwi Saulo, ne baana batanu ba kwa Mikala*+ mwana wa mukazhi wa kwa Saulo bo asemene kwi Aduliela+ mwana wa kwa Bazilai mwina Mehola. 9 Kepo ebapaine ku bena Gibeona, ne abo bakobekele mibiji yabo yafwa pa mutumba ku meso a Yehoba.+ Bonse batanu na babiji bafwijile pamo; bebepayile mu moba atanshi a kunowa, ku ntendekelo ya kunowa mbaale. 10 Kabiji Lizipa+ mwana wa mukazhi wa kwa Aya wasendele kisapi kya majila ne kwikyanshika pa jibwe kufumatu ku ntendekelo ya kimye kya kunowa kufikatu ne mvula byo anokejile pa mibiji; kechi walekele bañonyi kwiya pa ino mibiji yabo mute ne, nangwa kuleka banyama bakaji kwiya kwipi na ino mibiji bufuku ne.

11 Davida bamubuujile kintu kyaubile Lizipa mwana wa kwa Aya wajinga ntombo wa kwa Saulo. 12 Ponkapo Davida wayile na kusenda bikupa bya kwa Saulo ne bya mwananji aye Yonafwanyi kufuma ku bantangi* ba ku Yabeshi-gileada,+ bonka bebibile mu lubanza wa mu Bete-shana, ponka bena Filishitiya po beikobekele pa juba bena Filishitiya jo batapile Saulo mu Giliboa.+ 13 Wibifumishe kokwa bikupa bya kwa Saulo ne bya mwananji aye Yonafwanyi, kabiji babungizhe ne bikupa bya banabalume bonse bo banyongele.*+ 14 Kepo bazhiikile bikupa bya kwa Saulo ne bya mwananji aye Yonafwanyi mu kyalo kya bena Benjamina mu Zela+ mu kilende kya shanji aye Kisha.+ Byo bapwishishe kuba bintu byonse byakambizhe mfumu, Lesa waumvwine misashijilo yabo pa mambo a kyalo kyabo.+

15 Kabiji nkondo yabuukile jikwabo pakachi ka bena Filishitiya ne bena Isalela.+ Onkao mambo, Davida ne bakalume banji bayile na kulwa na bena Filishitiya, bino Davida wakookele bingi. 16 Wa mu kisemi kya kwa Lefwaimu+ wa jizhina ja Ishibi-benobo, yenka wajinga na jifumo ja mukuba janemene mashekele 300*+ kabiji wajinga na mpoko ya katataka, wakebelenga kutapa Davida. 17 Ponkapo Abishai+ mwana wa kwa Zeluya waishile na kumukwasha+ ne kutapa uno mwina Filishitiya ne kumwipaya. Pa kyonkakya kimye banabalume ba kwa Davida bachipile luchipo kwi aye amba: “Kechi mwafwainwa kuya ne atweba jibiji ku nkondo ne!+ Kuchina’mba mwakeya kuzhimya lampi wa bena Isalela!”+

18 Kabiji nkondo yabuukile jikwabo ku Goba na bena Filishitiya.+ Pa kyonkakya kimye, Sibekai+ mwina Husha watapile Safu, wajinga wa mu kisemi kya kwa Lefwaimu.+

19 Kabiji kwabuukile nkondo jikwabo na bena Filishitiya+ ku Goba, ne Elanane mwana wa kwa Yaale-olegimu mwina Betelema watapile Goliata mwina Gata, wajinga na jifumo jajinga na musako nobe kakonkobele ko bapikwilapo bisapi.+

20 Kwabuukile nkondo jikwabo ku Gata, konka kwajinga muntu wazamine bingi, wajinga na minwe itanu na umo konse ku maboko, ne mana atanu na jimo ku maulu onse, byonse pamo byajinga 24; kabiji aye naye wajinga wa mu kisemi kya kwa Lefwaimu.+ 21 Waendelekelenga bena Isalela.+ Onkao mambo, bamutapile kwi Yonafwanyi mwana wa kwa Shimei,+ mulongo wa kwa Davida.

22 Bano bonse bana bajinga ba mu kisemi kya kwa Lefwaimu mu Gata, kabiji bebatapile kwi Davida ne bakalume banji.+

22 Kabiji Davida waambijile Yehoba byambo biji mu uno lwimbo+ mu jonkaja juba Yehoba jo amupokolwele mu maboko a balwanyi banji+ bonse ne mu kuboko kwa kwa Saulo.+ 2 Waambile’mba:

“Yehoba jo jibwe jami jikatampe, yo nsakwa yami yakosa+ kabiji ye umpokolola.+

11 Waendelenga pa kelubi+ ne kwiya saka atumbuka.

Kabiji wamwekele saka aji pa byapi bya kilengwa kya mupashi.*+

13 Na mambo a kyeya kyanji, makala anyekwile.

Aye ye jikebo ja bonse bafyama mwi aye.+

32 Nanchi kujipo Lesa mukwabo waesakana ne Yehoba nyi?+

Kabiji ñanyi jibwe wakila Lesa wetu?+

44 Mukampokolola mu milukuchi ya bantu bami.+

47 Yehoba mumi! Atotwe aye Jibwe jami!+

Lesa jibwe ja lupulukilo lwami, atumbijikwe.+

23 Abino byo byambo byapeleleko bya kwa Davida:+

 5 Nanchi bino kechi byo biji nzubo yami kwi Lesa nenyi?

8 Ano o mazhina a bilobo bya kwa Davida:+ Yoshebe-bashebete mwina Takemona wajinga mukulumpe wa basatu.+ Ye walwile na bantu 800 ne kwibepaya na jifumo pa kimye kimo. 9 Walondejile pe aye, wajinga Eleaza+ mwana wa kwa Dodo,+ mwana wa kwa Ahoa yenka wajinga pa bilobo bisatu byajinga ne Davida kimye kyo banunushishenga bena Filishitiya. Bakonkene konkakwa amba balwe, kabiji banabalume bena Isalela byo banyemene, 10 aye waimenetu ne kutwajijila na kutapa bena Filishitiya kufikatu ne mukoko wanji byo akookele, kabiji kuboko kwanji kwakakachijile mpoko.+ Onkao mambo, Yehoba wibashinjile* bingi aja juba;+ kabiji bantu baalulukile ne kumulondela kuba’mba basende bipukulwa bya boba bo batapile.

11 Walondejile pe aye wajinga Shama mwana wa kwa Age mwina Halala. Bena Filishitiya bakonkene pamo ku Lehi, kwajinga bujimi bwa nkunde ichila; kabiji bantu banyemene na mambo a bena Filishitiya. 12 Bino aye waimenetu pakachi ka bujimi ne kwibuzhikijila kabiji watwajijile kutapa bena Filishitiya, kya kuba Yehoba wibalengejile kwibashinda.*+

13 Mu bena mizhi 30 mwafumine bena mizhi basatu, bayile kwi Davida ku jiyengo ja ku Adulama+ mu kimye kya kunowa, kabiji kipanyi* kya bena Filishitiya kyatebelejile mu Kimpachiko* kya Lefwaimu.+ 14 Pa kyokya kimye Davida wajinga mu nkonkoso,+ kabiji bashilikale ba bena Filishitiya bajinga mu Betelema. 15 Kepo Davida atendekele kutonga’mba: “Nanchi inge natomapo mema a mu mushima* uji kwipi na kibelo kya Betelema!” 16 Ponkapo abya bilobo bisatu byatwelele na lupata mu kampu wa bena Filishitiya ne kutapula mema mu mushima* wajinga kwipi na kibelo kya Betelema ne kumuletelao Davida; bino aye wakaine kwiatoma kabiji wiechijile panshi kwi Yehoba.+ 17 Waambile’mba: “Anweba Yehoba, kechi kyayilamo amiwa kuba’mba ngube kino kintu ne! Nanchi nafwainwa kutoma mashi+ a bano banabalume baji kubika bumi* bwabo mu kizumba nyi?” Onkao mambo, wakaine kwiatoma. Bino byo bintu byaubile bilobo byanji bisatu.

18 Abishai+ mulongo wa kwa Yoaba mwana wa kwa Zeluya+ ye wajinga mukulumpe wa bakwabo basatu; ye walwile na bantu 300 ne kwibepaya na jifumo, kabiji wayile nkuwa nobe aba basatu.+ 19 Aye bamunemekele bingi kukila bakwabo basatu kabiji wajinga mukulumpe wabo, pano bino kechi waesakene pamo na boba basatu batanshi ne.

20 Benaya+ mwana wa kwa Yehoyada wajinga muntu wachinchikile* bingi waubile bintu byavula mu Kabizele.+ Watapile baana babiji ba kwa Aliela mwina Moabu, kabiji watwelele mu kimbotela pa juba janokele mabebe ne kwipaya bokwe.+ 21 Kabiji watapile mwina Ijipita wazamine bingi. Nangwa kya kuba mwina Ijipita wajinga na jifumo mu kuboko kwanji, aye wayileko na kichi ne kwangata jifumo mu kuboko kwa mwina Ijipita ne kumwipaya na jonka jifumo janji. 22 Bino byo bintu byaubile Benaya mwana wa kwa Yehoyada, kabiji naye wayile nkuwa nobe byobya bilobo bisatu. 23 Nangwa kya kuba bamunemekele bingi kukila bakwabo makumi asatu, kechi waesakene pamo na boba basatu ne. Nangwa byonkabyo, Davida wamutongwele kwikala mukulumpe wa nzhita yanji yamulamanga.

24 Asahela+ nkasa ne kolo ne Yoaba wajinga umo wa mu boba makumi asatu: Elanane mwana wa kwa Dodo mwina Betelema,+ 25 Shama mwina Haloda, Elika mwina Haloda, 26 Heleza+ mwina Paleta, Ila+ mwana wa kwa Ikeshi mwina Tekoa, 27 Abieza+ mwina Anatota,+ Mebunai mwina Hushata, 28 Zalimonyi mwina Ahoa, Mahalai+ mwina Netofwa, 29 Heleba mwana wa kwa Beana mwina Netofwa, Itai mwana wa kwa Libai mwina Gibea wa mu bena Benjamina, 30 Benaya+ mwina Pilatona, Hidai wa ku kimpachiko kya Gaasha,+ 31 Abi-alabona mwina Alabata, Azamabeta mwina Bahulimu, 32 Eliyaba mwina Shalabonyi, baana ba kwa Yashenyi, Yonafwanyi, 33 Shama mwina Halala, Ahiama mwana wa kwa Shalala mwina Halala, 34 Elifeleta mwana wa kwa Ahashibai mwana wa mwina Maakata, Eliama mwana wa kwa Ahitofela+ mwina Gilo, 35 Hezelo mwina Kamela, Palai mwina Alaba, 36 Igala mwana wa kwa Natana wa ku Zoba, Bani mwina Gadi, 37 Zeleka mwina Amonyi, Nahalai mwina Beelota yenka wasendanga bilwilo bya kwa Yoaba mwana wa kwa Zeluya, 38 Ila mwina Itila, Galeba mwina Itila,+ 39 ne Uliya+ mwina Hiti, kabiji bonse pamo bajinga 37.

24 Yehoba wabuukijile jibiji bukaji bena Isalela+ kimye umo kyo atundaikile Davida kwibalukilamo ne kumwambila’mba: “Yanga ubale+ bena Isalela ne bena Yuda.”+ 2 Byonkabyo, mfumu waambijile Yoaba+ mukulumpe wa nzhita ye ajinga nanji amba: “Yanga mu mikoka yonse ya bena Isalela, kutendekela ku Danyi kukafika ne ku Belesheba,+ kabiji unembe bantu, pa kuba’mba ngyuke kuvula kwa bantu.” 3 Bino Yoaba waambijile mfumu amba: “Yehoba Lesa wenu avuzhe bantu bimye 100, kabiji meso enu anweba nkambo mfumu amone kino kintu, pano mambo ka anweba nkambo mfumu o mubena kukebela kuba kino kintu?”

4 Pakuba byambo bya mfumu byajinga na bulume kukila bya kwa Yoaba ne bya bakulumpe ba nzhita. Onkao mambo, Yoaba ne bakulumpe ba nzhita bafumineko kwi mfumu ne kuya na kunemba bena Isalela.+ 5 Baabukile Yodano ne kukatebelela ku Aloa,+ ku kilujo* kya muzhi wajinga pakachi ka kimpachiko* kyatalañana na nyaunda ya bena Gadi ne kuya ku Yazela.+ 6 Kepo bayile ku Gileada+ ne ku kyalo kya Tatimu-hojisi ne kukafika ku Danyiyana kabiji bakazhokejile ku Shidona.+ 7 Kabiji bayile ku nsakwa yakosa ya ku Tila+ ne mu mizhi yonse ya bena Hivi+ ne ya bena Kenana, kabiji bakapelejile ku Negeba+ wa mu Yuda ku Belesheba.+ 8 Byonkabyo, bapitañene mu kyalo kyonse kabiji babwelele mu Yelusalema ku mpelo ya bañondo batanu na bana ne moba 20. 9 Kabiji Yoaba wapele mfumu kibelengelo kya bantu bo banembele. Bashilikale ba bena Isalela bafikijilemo kulwa na mapoko bajinga 800,000, kabiji banabalume bena Yuda bajinga 500,000.+

10 Bino muchima* wamukatezhenga+ Davida byo abajile bantu. Kepo Davida aambijile Yehoba amba: “Nalenga mambo+ akatampe byo nauba kino kintu. Pano napopwela anweba Yehoba, ndekelaiko mambo amiwa kalume wenu,+ mambo nauba kintu kya kubula maana.”+ 11 Davida byo abuukile lukelo, byambo bya Yehoba byaishile kwi Gadi+ ngauzhi, yenka wamwenanga Davida bimwesho amba: 12 “Yanga ukamubuule Davida amba, ‘Yehoba waamba’mba: “Nakupa bintu bisatu. Usalepo kimo kyo nafwainwa kukuba.”’”+ 13 Onkao mambo, Gadi wayile kwi Davida ne kumushikisha’mba: “Nanchi mukeba’mba mu kyalo kyenu mwikale myaka itanu na ibiji ya kipowe kya nzala nyi?+ Nangwa abya mukeba’mba bakemupangishenga ku balwanyi benu bañondo basatu nyi?+ Inyi mukeba mu kyalo kyenu mukekale mwalo moba asatu?+ Pano langulukishaipo bulongo pa kyo nsakuya na kubuula awa wantuma.” 14 Onkao mambo, Davida wamukumbwile Gadi amba: “Kino kintu kyandetela bingi bulanda. Kyawama kuba’mba tuponene mu kuboko kwa Yehoba,+ mambo lusa lwanji lo lukatampe;+ bino kange mponene mu kuboko kwa muntu ne.”+

15 Kepo Yehoba atumine mwalo+ pa bena Isalela kufuma lukelo kufikatu ne kimye kyatongwelwe, kya kuba bantu 70,000 bafwile kutendekelatu ku Danyi kukafika ne ku Belesheba.+ 16 Malaika byo atanyikile kuboko kwanji ku Yelusalema kuba’mba amonaune, Yehoba wilangulwishe* na mambo a bya malwa,+ kabiji waambijile malaika waletele lonaiko pa bantu amba: “Kyapwa! Pano kileke.” Malaika wa Yehoba wajinga kwipi na kipujilo kya kwa Alauna+ mwina Yebusi.+

17 Davida byo amwene malaika watapilenga bantu, waambijile Yehoba amba: “Yami nalenga mambo, kabiji yami natamisha; pakuba ino mikooko,+ ñanyi kintu kyo yauba? Napopwela, kuboko kwenu kunkambule amiwa ne ba mu nzubo ya batata.”+

18 Kepo Gadi aishile kwi Davida pa jonkaja juba ne kumwambila’mba: “Yainga mukashimike kya kusokelapo bitapisho kwi Yehoba pa kipujilo kya kwa Alauna mwina Yebusi.”+ 19 Byonkabyo, Davida wayile monka mwaambijile Gadi, byonkatu Yehoba byo akambizhe. 20 Alauna byo akenkentele ne kumona mfumu ne bakalume banji saka beya kwi aye, ponkapotu Alauna wamutundaijile ne kumufukamina mfumu saka akunyika kilungi kyanji panshi. 21 Alauna washikishe’mba: “Mambo ka anweba nkambo mfumu o mwaishila kwi amiwa kalume wenu?” Davida wamukumbwile’mba: “Naiya na kupota kwi obewa kipujilo kuba’mba nshimikepo kya kusokelapo bitapisho kwi Yehoba, pa kuba’mba mwalo waiya pa bantu ekileke.”+ 22 Bino Alauna waambijile Davida amba: “Kisendaitu anweba nkambo mfumu ne kulambwilapo kyonse kyo mwamona’mba kyawama.* Nemupa bañombe ba mulambo wa kusoka ne kichi kya kupujilako ne kikonkoji kuba’mba bikale ke nkunyi. 23 Abino byonse, anweba mfumu, amiwa Alauna nebipana kwi anweba mfumu.” Kepo Alauna aambijile mfumu amba: “Yehoba Lesa wenu emubile bibusa.”

24 Nangwa byonkabyo, mfumu waambijile Alauna amba: “Ine, nsakwiipota pa mutengo wayo. Kechi nsakutapisha kwi Yehoba Lesa wami bitapisho bya kusoka bya kubula kupota ne.” Byonkabyo, Davida wapotele kipujilo ne bañombe pa mutengo wa mashekele* a siliva 50.+ 25 Kabiji Davida washimikijile Yehoba kya kusokelapo bitapisho+ konkakwa ne kulambwilapo bitapisho bya kusoka ne bitapisho bya mutende. Kepo Yehoba aumvwine misashijilo yabo pa mambo a kyalo kyabo,+ ne mwalo waishile pa bena Isalela wapwile.