BUKU MUTANSHI WA BYAMBO BYA MOBA

5 Baana ba kwa Yafeta bajinga Goma, Magogi, Madai, Yavwanyi, Tubala,+ Mesheke+ ne Tilasa.+

6 Baana ba kwa Goma bajinga Ashakenazi, Lefwata ne Togama.+

7 Baana ba kwa Yavwanyi bajinga Elisha, Tashishi, Kitimu ne Lodanyi.

8 Baana ba kwa Hama bajinga Kushi,+ Mizilamu, Puta ne Kenana.+

9 Baana ba kwa Kushi bajinga Seba,+ Havila, Sabata, Lama+ ne Sabateka.

Baana ba kwa Lama bajinga Sheba ne Dedanyi.+

10 Kushi wasemene Nimalode.+ Nimalode ye wajinga kikakashi mutanshi pano pa ntanda.

11 Mizilamu wasemene Luda,+ Anamu, Lehabamu ne Nafutuha,+ 12 Patalushi,+ Kasaluha (kwafumine bena Filishitiya),+ ne Kafutole.+

13 Kenana wasemene Shidona,+ mubeji ne Heta,+ 14 ne bena Yebusi,+ bena Amoli,+ bena Giligashi,+ 15 bena Hivi,+ bena Alaki, bena Shini, 16 bena Alavwadi,+ bena Zemali, ne bena Hamata.

18 Apakashada wasemene Shela,+ Shela wasemene Ebelu.

19 Ebelu wasemene baana babiji. Umo wajinga Pelega,*+ mambo mu moba a bumi bwanji ntanda* yaabene. Jizhina ja nkasanji wajinga Yokotana.

20 Yokotana wasemene Alamodada, Shelefwa, Hazamabeta, Yela,+ 21 Hadolamu, Uzala, Dikila, 22 Obala, Abimaela, Sheba, 23 Ofila,+ Havila+ ne Yobaba; bano bonse bajinga baana ba kwa Yokotana.

28 Baana ba kwa Abalahama bajinga Izaka+ ne Ishimela.+

29 Bino byo bisemi byabo: mubeji wa kwa Ishimela wajinga Nebayota,+ palondela Keda,+ Adebela, Mibasama,+ 30 Mishima, Duma, Masa, Hadada, Tema, 31 Yetula, Nafishi ne Kedema. Bano bo bajinga baana ba kwa Ishimela.

32 Baana basemene Ketula+ ntombo wa kwa Abalahama bajinga Zimalanyi, Yokoshanyi, Medanyi, Mijanyi,+ Ishibaka ne Shua.+

Baana ba kwa Yokoshanyi bajinga ba Sheba ne Dedanyi.+

33 Baana ba kwa Mijanyi bajinga Efwa,+ Efela, Hanoki, Abida ne Elida.

Bano bonse bo bajinga baana ba kwa Ketula.

34 Abalahama wasemene Izaka.+ Baana ba kwa Izaka bajinga Isao+ ne Isalela.+

35 Baana ba kwa Isao bajinga Elifwaza, Lewela, Yeusha, Yalama ne Kola.+

36 Baana ba kwa Elifwaza bajinga Temanyi,+ Omala, Zefo, Gatama, Kenaza, Timina ne Amaleki.+

37 Baana ba kwa Lewela bajinga Nahata, Zela, Shama ne Miza.+

38 Baana ba kwa Seila+ bajinga Lotana, Shobala, Zibeona, Ana, Dishona, Eza ne Dishana.+

39 Baana ba kwa Lotana bajinga Holi ne Homama. Nyenga ya kwa Lotana wajinga Timina.+

40 Baana ba kwa Shobala bajinga Alibana, Manahata, Ebala, Shefo ne Onamu.

Baana ba kwa Zibeona bajinga Aya ne Ana.+

41 Mwana* wa kwa Ana wajinga Dishona.

Baana ba kwa Dishona bajinga Hemadana, Eshibana, Italana ne Kelana.+

42 Baana ba kwa Eza+ bajinga Bilihana, Zabana ne Akana.

Baana ba kwa Dishana bajinga Uze ne Alana.+

43 Bano bo bamfumu balaminenga mu kyalo kya Edomu+ bena Isalela* saka bakyangye kwikalapo na mfumu:+ Bela mwana wa mulume wa kwa Beola; jizhina ja muzhi wanji jajinga Dinaba. 44 Bela byo afwile, Yobaba mwana wa mulume wa kwa Zela wa ku Bozula+ ye waswaine pa bufumu. 45 Yobaba byo afwile, Hushama wa ku kyalo kya bena Temanyi ye waswaine pa bufumu. 46 Hushama byo afwile, Hadada mwana wa mulume wa kwa Bedada, yenka washinjile bena Mijanyi mu nyaunda* ya Moabu, ye waswaine pa bufumu. Jizhina ja muzhi wanji jajinga Avita. 47 Hadada byo afwile, Samala wa ku Masaleka ye waswaine pa bufumu. 48 Samala byo afwile, Shaulo wa ku Lehobota kwipi na Mukola ye waswaine pa bufumu. 49 Shaulo byo afwile, Baela-hanana mwana wa kwa Akabola ye waswaine pa bufumu. 50 Baela-hanana byo afwile, Hadada ye waswaine pa bufumu. Jizhina ja muzhi wanji jajinga Pau, ne mukazhanji wajinga Mehetabela mwana wa kwa Mataleda, Mataleda mwana wa mukazhi wa kwa Mezahabu. 51 Kabiji Hadada wafwile.

Bamfumu* ba Edomu bajinga, Mfumu Timina, Mfumu Alivwa, Mfumu Yeteta,+ 52 Mfumu Oholibama, Mfumu Ela, Mfumu Pinona, 53 Mfumu Kenaza, Mfumu Temanyi, Mfumu Mibiza, 54 Mfumu Magajela ne Mfumu Ilamu. Bano bo bajinga bamfumu ba Edomu.

2 Bano bo bajinga baana ba kwa Isalela:+ Lubenyi,+ Shimeona,+ Levi,+ Yuda,+ Isakala,+ Zebuluna,+ 2 Danyi,+ Yosefwa,+ Benjamina,+ Nafitali,+ Gadi+ ne Ashela.+

3 Baana ba kwa Yuda bajinga Ela, Onanyi ne Shela. Bano basatu wibasemejile mu mwana wa kwa Shuwa mwina Kenana.+ Bino Ela mubeji wa kwa Yuda wafichishe Yehoba ku muchima, onkao mambo wamwipayile.+ 4 Mwi Tamala,+ mulokazhi wa kwa Yuda, wasemejilemo Peleze+ ne Zela. Yuda wajinga na baana batanu.

5 Baana ba kwa Peleze bajinga Hezelona ne Hamula.+

6 Baana ba kwa Zela bajinga Zimuli, Etana, Hemanyi, Kalakola ne Dala. Bonse pamo bajinga batanu.

7 Mwana* wa kwa Kami wajinga Akala,* yenka waletele bya malwa* pa bena Isalela,+ wabujile kwikala wa kishinka ku bintu byafwainwe konaunwa.+

8 Mwana* wa kwa Etana wajinga Azaliya.

9 Baana basemene Hezelona bajinga Yelamela,+ Lama+ ne Kelubai.*

10 Lama wasemene Aminadaba.+ Aminadaba wasemene Nashona+ kinemanga wa ba mu kisemi kya kwa Yuda. 11 Nashona wasemene Salama.+ Salama wasemene Boaza.+ 12 Boaza wasemene Obeda. Obeda wasemene Yese.+ 13 Yese wasemene Eliaba mubeji wanji, Abinadaba+ ye wajinga wa bubiji, Shimea ye wajinga wa busatu,+ 14 Netanela ye wajinga wa buna, Ladai ye wajinga wa butanu, 15 Ozema ye wajinga wa butanu na bumo ne Davida+ ye wajinga wa butanu na bubiji. 16 Banyenga yabo bajinga Zeluya ne Abigaila.+ Baana ba kwa Zeluya bajinga Abishai,+ Yoaba+ ne Asahela,+ bonse bajinga basatu. 17 Abigaila wasemene Amasa,+ kabiji shanji Amasa wajinga Yetela mwina Ishimela.

18 Kaleba* mwana wa kwa Hezelona wasemene baana mwi Azuba mukazhanji ne mwi Yeliota; kabiji bano bo bajinga baana banji: Yeshela, Shobaba ne Alidona. 19 Azuba byo afwile, Kaleba wasongwele Efulata,+ kabiji wasemejilemo Hula.+ 20 Hula wasemene Uli. Uli wasemene Bezalela.+

21 Kabiji Hezelona walaajile na mwana wa mukazhi wa kwa Makila+ shanji Gileada.+ Wamusongwele byo ajinga na myaka ya kusemwa 60, kabiji wasemejilemo Seguba. 22 Seguba wasemene Yaila,+ yenka wajinga na mizhi 23 mu kyalo kya Gileada.+ 23 Mu kuya kwa moba bena Geshula+ ne bena Silya+ baangachile Havota-yaila+ ku bano bantu, pamo na Kenata+ ne mande anji,* mizhi 60. Bano bonse bajinga ba mu kisemi kya kwa Makila shanji Gileada.

24 Hezelona+ byo afwile mu Kaleba-efulata, Abiya muka Hezelona wamusemejile Ashahula+ shanji Tekoa.+

25 Baana ba kwa Yelamela mubeji wa kwa Hezelona bajinga Lama mubeji wanji, Buna, Olena, Ozema ne Ahiya. 26 Yelamela wajinga na mukazhi mukwabo, jizhina janji wajinga Atala. Ye wajinga inanji Onamu. 27 Baana ba kwa Lama mubeji wa kwa Yelamela bajinga Maaza, Yamina ne Ekela. 28 Baana ba kwa Onamu bajinga Shamai ne Yada. Baana ba kwa Shamai bajinga Nadaba ne Abishula. 29 Muka Abishula wajinga Abihaila mo asemejile Abana ne Molida. 30 Baana ba kwa Nadaba bajinga Seleda ne Apaima. Bino Seleda wafwile kwa kubula kusemapo baana. 31 Mwana* wa kwa Apaima wajinga Ishi. Kabiji mwana* wa kwa Ishi wajinga Sheshana, ne mwana* wa kwa Sheshana wajinga Alai. 32 Baana ba kwa Yada nkasa ne kolo na Shamai bajinga Yetela ne Yonafwanyi. Bino Yetela wafwile kwa kubula kusemapo baana. 33 Baana ba kwa Yonafwanyi bajinga Pelete ne Zaza. Abano bo bajinga ba mu kisemi kya kwa Yelamela.

34 Sheshana kechi wajinga na baana ba balume ne, wajingatu na baana ba bakazhi. Kabiji Sheshana wajinga na kalume mwina Ijipita wa jizhina ja Yalaha. 35 Sheshana wasongweshe mwananji wa mukazhi kwi kalume wanji Yalaha, kabiji wasemejilemo Atai. 36 Atai wasemene Natana. Natana wasemene Zabada. 37 Zabada wasemene Efelala. Efelala wasemene Obeda. 38 Obeda wasemene Yehu. Yehu wasemene Azaliya. 39 Azaliya wasemene Heleza. Heleza wasemene Eleasa. 40 Eleasa wasemene Shishimai. Shishimai wasemene Shaluma. 41 Shaluma wasemene Yekamiya. Yekamiya wasemene Elishama.

42 Baana ba kwa Kaleba*+ nkasa ne kolo na Yelamela bajinga Mesha mubeji wanji, yenka wajinga shanji Zifu, ne baana ba kwa Malesha shanji Hebulona. 43 Baana ba kwa Hebulona bajinga Kola, Tapua, Lekema ne Shema. 44 Shema wasemene Lahama shanji Yolekema. Lekema wasemene Shamai. 45 Mwana wa kwa Shamai wajinga Maona. Maona wasemene Bete-zula.+ 46 Efwa ntombo wa kwa Kaleba wasemene Halana, Moza ne Gazeza. Halana wasemene Gazeza. 47 Baana ba kwa Yadai bajinga Legema, Yotamo, Geshana, Peleta, Efwa ne Shafu. 48 Maaka ntombo wa kwa Kaleba wasemene Shebela ne Tilahana. 49 Mu kuya kwa moba wasemene Shafu shanji Madamana,+ ne Shevwa shanji Makabena, ne Gibea.+ Mwana wa mukazhi wa kwa Kaleba+ wajinga Akisa.+ 50 Bano bo bajinga ba mu kisemi kya kwa Kaleba.

Baana ba kwa Hula+ mubeji wa kwa Efulata+ bajinga Shobala shanji Kiliata-yealimu,+ 51 Salama shanji Betelema+ ne Halefu shanji Bete-gadela. 52 Shobala shanji Kiliata-yealimu wajinga na bano baana: Haloe ne kichika kya bena Menuha. 53 Bisemi bya kwa Kiliata-yealimu byajinga, bena Itila,+ bena Puti, bena Shumati ne bena Mishalai. Mu bino mo mwafumine bena Zola+ ne bena Eshitaola.+ 54 Baana ba kwa Salama bajinga Betelema,+ bena Netofwa, Atalota-beteyoaba, ne kichika kya bena Menuha ne bena Zoli. 55 Bisemi bya banembeshi baikalanga mu Yabezi byajinga, bena Tilota, bena Shimeata ne bena Sukota. Bano bo bajinga bena Keni+ bafumine mwi Hamata shabo ba mu nzubo ya kwa Lekaba.+

3 Bano bo bajinga baana ba kwa Davida bo asemejile mu Hebulona:+ mubeji wajinga Aminona,+ inanji wajinga Ahinoamu+ wa ku Yezelela; wa bubiji wajinga Danyela, inanji wajinga Abigaila+ mwina Kamela; 2 wa busatu wajinga Abisalomo+ mwana wa kwa Maaka, Maaka mwana wa mukazhi wa kwa Talamai mfumu wa Geshula; wa buna wajinga Adoniya+ mwana wa kwa Hagita; 3 wa butanu wajinga Shefwatiya, inanji wajinga Abitali; kabiji wa butanu na umo wajinga Iteleamu, inanji wajinga Egela muka Davida. 4 Bano batanu na umo bo bo asemejile mu Hebulona; waikele pa bufumu kokwa myaka itanu na ibiji ne bañondo batanu na umo, kabiji waikele pa bufumu mu Yelusalema myaka 33.+

5 Bano bo bo asemejile mu Yelusalema:+ Shimea, Shobaba, Natana+ ne Solomone;+ inabo bonse bano bana wajinga Batesheba+ mwana wa kwa Amiela. 6 Kabiji baana bakwabo batanu na bana bajinga Ibala, Elishama, Elifeleta, 7 Noga, Nefega, Yafiya, 8 Elishama, Eliada ne Elifeleta. 9 Bano bonse bajinga baana ba kwa Davida, kunungapo ne baana basemene bantombo, kabiji Tamala+ ye wajinga nyenga yabo.

10 Solomone wasemene Lehoboma;+ Lehoboma wasemene Abiya,+ Abiya wasemene Asa,+ Asa wasemene Yehoshafwata,+ 11 Yehoshafwata+ wasemene Yeholama, Yeholama wasemene Ahaziya,+ Ahaziya wasemene Yehoashi,+ 12 Yehoashi wasemene Amaziya,+ Amaziya wasemene Azaliya,+ Azaliya wasemene Yotamo,+ 13 Yotamo wasemene Ahaza,+ Ahaza wasemene Hezekiya,+ Hezekiya wasemene Manase,+ 14 Manase wasemene Amonyi,+ Amonyi wasemene Yosiya.+ 15 Bano bo bajinga baana ba kwa Yosiya, mubeji wajinga Yohanana, wa bubiji wajinga Yehoyakimu,+ wa busatu wajinga Zedekiya+ ne wa buna wajinga Shaluma. 16 Baana ba kwa Yehoyakimu bajinga Yekoniya,+ shanji Zedekiya. 17 Baana ba kwa Yekoniya kaili bajinga ba Shalachele, 18 Malikilama, Pedaya, Shenaza, Yekamiya, Hoshama ne Nedabiya. 19 Baana ba kwa Pedaya bajinga Zelubabele+ ne Shimei; kabiji baana ba kwa Zelubabele bajinga Meshulama ne Hananiya (ne nyenga yabo wajinga Shelomita); 20 baana bakwabo batanu bajinga Hashuba, Ohela, Belekiya, Hasiya ne Yushabaheseda. 21 Kabiji baana ba kwa Hananiya bajinga Pelatiya ne Yeshaya; mwana* wa kwa Yeshaya wajinga Lefwaya; mwana* wa kwa Lefwaya wajinga Alinana; mwana* wa kwa Alinana wajinga Obadiya; mwana* wa kwa Obadiya wajinga Shekaniya; 22 ne baana ba kwa Shekaniya bajinga Shemaya, kabiji baana ba kwa Shemaya bajinga: Hatushi, Igala, Baliya, Nealiya ne Shafwata, bonse pamo bajinga batanu na umo. 23 Kabiji baana ba kwa Nealiya bajinga Eliwenai, Hizikiya ne Azilikama, bonse bajinga basatu. 24 Ne baana ba kwa Eliwenai bajinga Hodaviya, Eliashiba, Pelaya, Akuba, Yohanana, Delaya ne Ananyi, bonse bajinga batanu na babiji.

4 Baana ba kwa Yuda bajinga Peleze,+ Hezelona,+ Kami, Hula+ ne Shobala.+ 2 Leaya mwana wa kwa Shobala wasemene Yahata; Yahata wasemene Ahumai ne Lahada. Abino byo byajinga bisemi bya bena Zola.+ 3 Abano bo bajinga baana ba kwa shanji Etama:+ Yezelela, Ishima ne Idabashi (kabiji nyenga yabo wajinga Hezeleleponyi), 4 Penwela wajinga shanji Gedola ne Eza wajinga shanji Husha. Bano bo bajinga baana ba kwa Hula,+ mubeji wa kwa Efulata kabiji shanji Betelema.+ 5 Ashahula+ shanji Tekoa+ wasongwele banabakazhi babiji, Hela ne Naala. 6 Naala wamusemejile Ahuzama, Hefela, Temenyi ne Hahashitali. Bano bo bajinga baana ba kwa Naala. 7 Kabiji baana ba kwa Hela bajinga Zeleta, Izahala ne Etinana. 8 Kozi wasemene Anuba, Zobeba, ne bisemi bya kwa Ahalahela mwana wa kwa Haluma.

9 Yabezi bamunemekele bingi kukila bo asemekelwe nabo; kabiji inanji wamutumbile’mba Yabezi,* ne kwamba’mba: “Namusemejile mu misongo.” 10 Yabezi walombele kwi Lesa wa Isalela amba: “Mukampeshe ne kubayisha nyaunda yami kabiji kuboko kwenu kukekalenga ne amiwa ne kunzhikijila ku bya malwa, pa kuba’mba bikabule kunkozha!” Onkao mambo, Lesa wamubijile bintu byo alombele.

11 Keluba mulongo wa kwa Shuha wasemene Mehila, yenka wajinga shanji Eshitona. 12 Eshitona wasemene Betelafwa, Pasea ne Tehina, shanji Ilinahashi. Bano bo bajinga bena Leka. 13 Kabiji baana ba kwa Kenaza bajinga ba Otoniela+ ne Selaya, kabiji mwana* wa kwa Otoniela wajinga Hatata. 14 Meonotai wasemene Ofula. Selaya wasemene Yoaba shabo bena Geleshama,* bebatumbile bino mambo bajinga basendwe.

15 Baana ba kwa Kaleba+ mwana wa kwa Yefune bajinga Ilu, Ela ne Naama; kabiji mwana* wa kwa Ela wajinga Kenaza. 16 Baana ba kwa Yahalelela bajinga Zifu, Zifwa, Tilia ne Asalela. 17 Baana ba kwa Ezela bajinga Yetela, Meleda, Efela ne Yalona; mukazhanji* waimichile ne kusema Milyama, Shamai ne Ishiba shanji Eshitemoa. 18 (Kabiji mukazhanji Muyudea wasemene Yeleda shanji Gedola, Hebela shanji Soko ne Yekuchele shanji Zanoa.) Bano bo bajinga baana ba kwa Bitiya mwana wa mukazhi wa kwa Felo, yenka wasongwelwe kwi Meleda.

19 Baana basemene muka Hodiya nyenga ya kwa Nahama, bajinga bashanji Keila mwina Gami ne Eshitemoa mwina Maakata. 20 Kabiji baana ba kwa Shimona bajinga Aminona, Lina, Benehanana ne Tiloni. Ne baana ba kwa Ishi bajinga Zoheta ne Bene-zoheta.

21 Baana ba kwa Shela+ mwana wa kwa Yuda bajinga Ela shanji Leka, Laada shanji Malesha, ne bisemi bya bapikula bisapi byawama ba mu nzubo ya kwa Ashibeya, 22 ne Yokimu, bena Kozeba, Yoashi ne Salafu, bonka basongwele banabakazhi bena Moabu ne Yashubi-lehema. Abino byanembwa bya kala.* 23 Bajinga bambumbi baikalanga mu Netaimu ne mu Gedelaya. Baikalanga monkamwa ne kwingijila mfumu.

24 Baana ba kwa Shimeona+ bajinga Nemwela, Yamina, Yaliba, Zela, ne Shaulo.+ 25 Shaulo wasemene Shaluma, Shaluma wasemene Mibasama, ne Mibasama wasemene Mishima. 26 Kabiji baana ba kwa Mishima bajinga Hamwela, Hamwela wasemene Zakula, Zakula wasemene Shimei. 27 Shimei wajinga na baana ba balume 16 ne ba bakazhi batanu na umo; bino balongo banji kechi bajingapo na baana ba balume bavula ne, kabiji kafwako bisemi byabo byavujile nobe bya bena Yuda ne.+ 28 Baikalanga mu Belesheba,+ Molada,+ Hazala-shuala,+ 29 Biliha, Ezema,+ Tolada, 30 Betwela,+ Holama,+ Zikilagi,+ 31 Bete-malakabota, Hazalasushimu,+ Bete-bili ne Shalaimu. Ino yo yajinga mizhi yabo kufikatu ne kimye Davida kyo aikele pa bufumu.

32 Mizhi yabo yajinga Etama, Aina, Limonyi, Tokenyi ne Ashana,+ mizhi ikatampe itanu, 33 pamo na mizhi yabo icheche yazhokolokele ino mizhi ikatampe kufika ne ku Baela. Bino byo byanembelwe bisemi byabo ne mapunzha mo baikalanga. 34 Meshobaba, Yameleka ne Yosha mwana wa kwa Amaziya, 35 Yoela, Yehu mwana wa kwa Yoshibiya, Yoshibiya mwana wa kwa Selaya, Selaya mwana wa kwa Asiela, 36 Eliwenai, Yekoba, Yeshohaya, Asaya, Ajela, Yeshimiela, Benaya, 37 ne Ziza mwana wa kwa Shifi, Shifi mwana wa kwa Alone, Alone mwana wa kwa Yedaya, Yedaya mwana wa kwa Shimuli, Shimuli mwana wa kwa Shemaya; 38 bano batongolwa pa mazhina, bo bajinga babinemanga ba bisemi byabo, kabiji ba mu mazubo a bashakulu babo bavujile. 39 Kabiji bayile kwa kutwelela ku Gedola, ku musela wa kimpachiko na kukeba munyemvu wa matanga abo. 40 Kepo bataaine munyemvu wawama bingi, kabiji mpunzha yajinga yabaya yazhindama kabiji ya mutende. Mo mwaikalanga kala bena Hama.+ 41 Bano batongolwa pa mazhina baishile mu kimye kya kwa Hezekiya+ Mfumu wa Yuda ne kutapa ba mu matente a bena Hama ne bena Meuni bajinga kokwa. Bebavizhizhe kufikatu ne lelo jino; ne abo baikele mu mpunzha yabo mambo mwajinga munyemvu wa kujisha matanga abo.

42 Bena Shimeona bamo, banabalume 500, bayile ku Mutumba wa Seila+ pamo na Pelatiya, Nealiya, Lefwaya ne Uziela, baana ba kwa Ishi yenka wibatangijilenga. 43 Kabiji batapile bena Amaleki+ bashajilepo bonka banyemene, ne abo bekala konkakwa kufika ne lelo jino.

5 Bano bo baana ba kwa Lubenyi+ mubeji wa kwa Isalela. Ye wajinga mubeji, bino na mambo a kuba wazhilulwile mwanya wa bashanji,+ luusa lwanji lwa bubeji belupaine ku baana ba kwa Yosefwa+ mwana wa kwa Isalela, onkao mambo, kechi banembele kisemi kyanji monka mwayijile luusa lwa bubeji ne. 2 Nangwa kya kuba Yuda+ wakijile balongo banji bonse kabiji mwi aye mo mwafumine ntangi,+ bino luusa lwa bubeji belupaine kwi Yosefwa. 3 Baana ba kwa Lubenyi mubeji wa kwa Isalela bajinga Hanoki, Palu, Hezelona ne Kami.+ 4 Baana ba kwa Yoela bajinga Shemaya, Shemaya wasemene Gogi, Gogi wasemene Shimei, 5 Shimei wasemene Mika, Mika wasemene Leaya, Leaya wasemene Baela, 6 ne Baela wasemene Bela, yenka Tigilata-pilinesa+ Mfumu wa Asilya ye atwajile mu buzha; ye wajinga kinemanga wa bena Lubenyi. 7 Balongo banji monka mwayijile bisemi byabo ne kunembwa kwa baana babo bajinga Yeyela mukulumpe, Zekaliya, 8 ne Bela mwana wa kwa Azaza, Azaza mwana wa kwa Shema, Shema mwana wa kwa Yoela, waikalanga mu Aloa+ kukafika ne ku Nebo ne ku Baela-meona.+ 9 Kabiji waikajile ku musela kukafika ne kwatendekela kiselebwa kya ku Mukola wa Ufelata,+ mambo bilelwa byabo byavujile bingi mu kyalo kya Gileada.+ 10 Mu moba a kwa Saulo, balwile nkondo na bena Haguli, kabiji bebashinjile, onkao mambo, abo baikele mu matente abo mu nyaunda yonse ya ku musela wa Gileada.

11 Ba mu kisemi kya kwa Gadi baikelenga kipi kipi nabo mu kyalo kya Bashana kukafika ne ku Saleka.+ 12 Yoela ye wajinga mukulumpe, Shafwama ye wajinga wa bubiji, kabiji Yanai ne Shafwata bajinga bantangi mu Bashana. 13 Kabiji balongo babo ba mu bikota byabo bajinga Mikela, Meshulama, Sheba, Yolai, Yakana, Zia ne Ebelu, bonse pamo batanu na babiji. 14 Bano bo bajinga baana ba kwa Abihaila mwana wa kwa Huli, Huli mwana wa kwa Yalowa, Yalowa mwana wa kwa Gileada, Gileada mwana wa kwa Mikela, Mikela mwana wa kwa Yeshishai, Yeshishai mwana wa kwa Yado, Yado mwana wa kwa Buza. 15 Ahi mwana wa kwa Abidiela, Abidiela mwana wa kwa Guni, ye wajinga mukulumpe wa kikota kyabo. 16 Baikalanga mu Gileada,+ mu Bashana+ ne mu mande anji,* ne mu mapunzha onse a munyemvu a ku Shalona ne ko akapelejile. 17 Bonse bebanembele monka mwayijile bisemi byabo mu moba a kwa Yotamo+ Mfumu wa Yuda ne mu moba a kwa Yeloboma*+ Mfumu wa Isalela.

18 Bena Lubenyi, bena Gadi ne kichika kya mukoka wa bena Manase bajinga na nzhita mwajinga ba bilobo 44,760 basendanga makebo ne mapoko ne mata a mukanda* kabiji bebafunjishe kulwa nkondo. 19 Balwile nkondo na bena Haguli,+ bena Yetula, bena Nafishi+ ne bena Nodaba. 20 Kabiji bebakwashisheko kwibalwisha, kya kuba bena Haguli ne bonse bo bajinga nabo bebapaine mu kuboko kwabo, mambo bamulombele Lesa amba ebakwashe mu nkondo, ne aye waumvwine misashijilo yabo mambo bamuketekejile.+ 21 Bebangachile bilelwa byabo—bangamela 50,000, mikooko 250,000, ne bambongolo 2,000—basendele ne bantu* 100,000. 22 Bavula bafwile, mambo Lesa wa kine ye walwile nkondo.+ Ne abo baikele mu mpunzha yabo kufikatu ne kimye kya kuya mu buzha.+

23 Ba mu kichika kya mukoka wa bena Manase+ baikalanga mu kyalo kyatendekejile ku Bashana kukafika ne ku Baela-helemone ne ku Senila ne ku Mutumba wa Helemone.+ Bavujile bingi. 24 Bano bo bajinga bakulumpe ba bikota byabo: Efela, Ishi, Eliela, Azalyela, Yelemiya, Hodaviya ne Yadiele; bajinga ba bilobo, banabalume baya nkuwa, kabiji bakulumpe ba bikota byabo. 25 Bino kechi bajinga ba kishinka kwi Lesa wa bashakulu babo ne, kabiji baubilenga bupite na balesa ba mitundu ya bantu ba mu kyalo,+ bonka Lesa bo avizhizhe ku meso abo. 26 Onkao mambo, Lesa wa Isalela wakolomwene muchima wa kwa Pula Mfumu wa Asilya+ (ko kuba’mba Tigilata-pilinesa+ Mfumu wa Asilya) kya kuba watwajile mu buzha bena Lubenyi, bena Gadi ne kichika kya mukoka wa bena Manase ne kwibaleta ku Hala, Habola, Haala ne ku mukola wa Gozani,+ konka ko baji kufika ne lelo.

6 Baana ba kwa Levi+ bajinga Geleshona, Kohati+ ne Melali.+ 2 Baana ba kwa Kohati bajinga Amulamu, Izahala,+ Hebulona ne Uziela.+ 3 Baana* ba kwa Amulamu+ bajinga Alona,+ Mosesa+ ne Milyama.+ Kabiji baana ba kwa Alona bajinga Nadaba, Abihu,+ Eleaza+ ne Itamala.+ 4 Eleaza wasemene Finease;+ Finease wasemene Abishua. 5 Abishua wasemene Buki; Buki wasemene Uzi. 6 Uzi wasemene Zelahiya; Zelahiya wasemene Melayota. 7 Melayota wasemene Amaliya; Amaliya wasemene Ahituba.+ 8 Ahituba wasemene Zadoka;+ Zadoka wasemene Ahimaza.+ 9 Ahimaza wasemene Azaliya; Azaliya wasemene Yohanana. 10 Yohanana wasemene Azaliya. Ye waingilanga mwingilo wa buñanga mu nzubo yashimikile Solomone mu Yelusalema.

11 Azaliya wasemene Amaliya; Amaliya wasemene Ahituba. 12 Ahituba wasemene Zadoka;+ Zadoka wasemene Shaluma. 13 Shaluma wasemene Hilikiya;+ Hilikiya wasemene Azaliya. 14 Azaliya wasemene Selaya;+ Selaya wasemene Yehozadaka.+ 15 Kabiji Yehozadaka bamutwajile mu buzha kimye Yehoba kyo atwajile bena Yuda ne ba mu Yelusalema mu buzha na kuboko kwa kwa Nebukaneza.

16 Baana ba kwa Levi bajinga Geleshoma,* Kohati ne Melali. 17 Ano o mazhina a baana ba kwa Geleshoma: Libinyi ne Shimei.+ 18 Baana ba kwa Kohati bajinga Amulamu, Izahala, Hebulona ne Uziela.+ 19 Baana ba kwa Melali bajinga Mali ne Mushi.

Bino byo byajinga bisemi bya bena Levi monka mwayijile bashakulu babo:+ 20 Geleshoma+ wasemene Libinyi, Libinyi wasemene Yahata, Yahata wasemene Zima, 21 Zima wasemene Yoa, Yoa wasemene Ido, Ido wasemene Zela, Zela wasemene Yeatela. 22 Baana* ba kwa Kohati bo bano: Aye wasemene Aminadaba, Aminadaba wasemene Kola,+ Kola wasemene Asila, 23 Asila wasemene Elekana, Elekana wasemene Ebiasafwa,+ Ebiasafwa wasemene Asila, 24 Asila wasemene Tahati, Tahati wasemene Uliele, Uliele wasemene Uzaya, ne Uzaya wasemene Shaulo. 25 Baana ba kwa Elekana bajinga Amasai ne Ahimota. 26 Kabiji Elekana wasemene Zofwai, Zofwai wasemene Nahata, 27 Nahata wasemene Eliaba, Eliaba wasemene Yelohama, Yelohama wasemene Elekana.+ 28 Bano bo baana ba kwa Samwela,+ mubeji wajinga Yoela, Abiya wajinga wa bubiji.+ 29 Baana* ba kwa Melali bo bano: Aye wasemene Mali, Mali+ wasemene Libinyi, Libinyi wasemene Shimei, Shimei wasemene Uza, 30 Uza wasemene Shimea, Shimea wasemene Hagia, ne Hagia wasemene Asaya.

31 Bano bo bo batongwele kwi Davida kutangijila banyimbi ba ku nzubo ya Yehoba Jikwachi byo jafikile mwa kukokolokela.+ 32 Bo bajinga na mwingilo wa kwimba ku tente wa lusambakeno kufikatu ne kimye Solomone kyo ashimikile nzubo ya Yehoba mu Yelusalema,+ kabiji baingilanga mingilo yo bebatongwejile.+ 33 Bano bo banabalume baingijilanga pamo na baana babo: Mu bena Kohati, mwafumine Hemanyi+ nyimbi, mwana wa kwa Yoela,+ Yoela mwana wa kwa Samwela, 34 Samwela mwana wa kwa Elekana,+ Elekana mwana wa kwa Yelohama, Yelohama mwana wa kwa Eliela, Eliela mwana wa kwa Toa, 35 Toa mwana wa kwa Zufi, Zufi mwana wa kwa Elekana, Elekana mwana wa kwa Mahata, Mahata mwana wa kwa Amasai, 36 Amasai mwana wa kwa Elekana, Elekana mwana wa kwa Yoela, Yoela mwana wa kwa Azaliya, Azaliya mwana wa kwa Zefwaniya, 37 Zefwaniya mwana wa kwa Tahati, Tahati mwana wa kwa Asila, Asila mwana wa kwa Ebiasafwa, Ebiasafwa mwana wa kwa Kola, 38 Kola mwana wa kwa Izahala, Izahala mwana wa kwa Kohati, Kohati mwana wa kwa Levi, Levi mwana wa kwa Isalela.

39 Mulongo wanji aye Asafwa+ waingijilanga ku kilujo kyanji; Asafwa wajinga mwana wa kwa Belekiya, Belekiya mwana wa kwa Shimea, 40 Shimea mwana wa kwa Mikela, Mikela mwana wa kwa Baaseya, Baaseya mwana wa kwa Malakiya, 41 Malakiya mwana wa kwa Etini, Etini mwana wa kwa Zela, Zela mwana wa kwa Adaya, 42 Adaya mwana wa kwa Etana, Etana mwana wa kwa Zima, Zima mwana wa kwa Shimei, 43 Shimei mwana wa kwa Yahata, Yahata mwana wa kwa Geleshoma, Geleshoma mwana wa kwa Levi.

44 Balongo babo ba mu kisemi kya kwa Melali+ baingijilanga ku kipiko; kwajinga Etana+ mwana wa kwa Kishi, Kishi mwana wa kwa Abidi, Abidi mwana wa kwa Maluka, 45 Maluka mwana wa kwa Hashabiya, Hashabiya mwana wa kwa Amaziya, Amaziya mwana wa kwa Hilikiya, 46 Hilikiya mwana wa kwa Amizi, Amizi mwana wa kwa Bani, Bani mwana wa kwa Shemela, 47 Shemela mwana wa kwa Mali, Mali mwana wa kwa Mushi, Mushi mwana wa kwa Melali, Melali mwana wa kwa Levi.

48 Balongo babo abo bena Levi bebatongwele* kwingila mingilo yonse ya ku tente wa lusambakeno, ko kuba’mba nzubo ya Lesa wa kine.+ 49 Alona ne baana banji+ basokelenga bitapisho pa kya kusokelapo bitapisho kya mulambo wa kusoka+ ne kya kusokelapo bitapisho bya kufutumuna,+ kabiji baingijilenga mingilo ya bintu byazhijisha, kufuchilako mambo bena Isalela+ monka mwayijile bintu byonse bibakambizhe Mosesa kalume wa Lesa wa kine. 50 Bano bo bajinga ba mu kisemi kya kwa Alona:+ Aye wasemene Eleaza,+ Eleaza wasemene Finease, Finease wasemene Abishua, 51 Abishua wasemene Buki, Buki wasemene Uzi, Uzi wasemene Zelahiya, 52 Zelahiya wasemene Melayota, Melayota wasemene Amaliya, Amaliya wasemene Ahituba,+ 53 Ahituba wasemene Zadoka,+ ne Zadoka wasemene Ahimaza.

54 Ano o ajinga mande abo monka mwayijile makampu abo mu nyaunda yabo: baana ba kwa Alona ba mu kisemi kya bena Kohati, na mambo a kuba bubale butanshi bwibaponejile, 55 bebapele Hebulona+ mu kyalo kya Yuda, ne mapunzha azhokolokako a kujishishamo banyama. 56 Bino mpunzha ya mu muzhi ne mande ayo bebipaine kwi Kaleba+ mwana wa kwa Yefune. 57 Kabiji ba mu kisemi kya kwa Alona bebapele mizhi* ya kufyamamo,+ Hebulona+ ne Libina+ ne mapunzha anji a kujishishamo banyama, Yatila+ ne Eshitemoa ne mapunzha anji a kujishishamo banyama,+ 58 Hilena ne mapunzha anji a kujishishamo banyama, Debila+ ne mapunzha anji a kujishishamo banyama, 59 Ashana+ ne mapunzha anji a kujishishamo banyama, ne Bete-shemeshi+ ne mapunzha anji a kujishishamo banyama; 60 mu mukoka wa bena Benjamina, bebapelemo Geba+ ne mapunzha anji a kujishishamo banyama, Alemeta ne mapunzha anji a kujishishamo banyama, ne Anatota+ ne mapunzha anji a kujishishamo banyama. Mizhi ya bisemi byabo yonse pamo yajinga 13.+

61 Bena Kohati bashajilepo, bebapele* mizhi jikumi, kufuma mu kisemi kya mukoka, mu kichika kya mukoka, ne mu kichika kya mukoka wa bena Manase.+

62 Bena Geleshoma bebapele mizhi 13 monka mwayijile bisemi byabo kufuma mu mukoka wa bena Isakala, mu mukoka wa bena Ashela, mu mukoka wa bena Nafitali ne mu mukoka wa bena Manase mu Bashana.+

63 Bena Melali bebapele mizhi 12 monka mwayijile bisemi byabo kufuma mu mukoka wa bena Lubenyi, mu mukoka wa bena Gadi ne mu mukoka wa bena Zebuluna.+

64 Byonkabyo, bena Isalela bapele bena Levi ino mizhi ne mapunzha ayo a kujishishamo banyama.+ 65 Kabiji ino mizhi yo batongola mazhina abo beyabenye kupichila mu kuta bubale kufuma mu mukoka wa bena Yuda, mu mukoka wa bena Shimeona ne mu mukoka wa bena Benjamina.

66 Bisemi bimo bya bena Kohati byajinga na mizhi yafumine mu mukoka wa bena Efelaimu kwikala ke nyaunda yabo.+ 67 Bebapele mizhi* ya kufyamamo, Shekema+ ne mapunzha anji a kujishishamo banyama mu kibunji kya mitumba kya Efelaimu, Gezela+ ne mapunzha anji a kujishishamo banyama, 68 Yokemeama ne mapunzha anji a kujishishamo banyama, Bete-holona+ ne mapunzha anji a kujishishamo banyama, 69 Ayalona+ ne mapunzha anji a kujishishamo banyama, ne Gata-limona+ ne mapunzha anji a kujishishamo banyama; 70 kabiji mu kichika kya mukoka wa bena Manase mwafumine Anela ne mapunzha anji a kujishishamo banyama, ne Bileama ne mapunzha anji a kujishishamo banyama, ne kwibipana ku bisemi byashajilepo bya bena Kohati.

71 Bena Geleshoma bebapele kufuma mu kichika kya mukoka wa bena Manase, Golanyi+ wa mu Bashana ne mapunzha anji a kujishishamo banyama, ne Ashatalota ne mapunzha anji a kujishishamo banyama;+ 72 kabiji mu mukoka wa bena Isakala bebapelemo Kedeshi ne mapunzha anji a kujishishamo banyama, Dabelata+ ne mapunzha anji a kujishishamo banyama,+ 73 Lamota ne mapunzha anji a kujishishamo banyama, ne Anema ne mapunzha anji a kujishishamo banyama; 74 kabiji mu mukoka wa bena Ashela bebapelemo Mashala ne mapunzha anji a kujishishamo banyama, Abidona ne mapunzha anji a kujishishamo banyama,+ 75 Hukoka ne mapunzha anji a kujishishamo banyama, ne Lehoba+ ne mapunzha anji a kujishishamo banyama; 76 kabiji mu mukoka wa bena Nafitali bebapelemo Kedeshi+ wa mu Ngalilea+ ne mapunzha anji a kujishishamo banyama, Hamona ne mapunzha anji a kujishishamo banyama, ne Kiliataimu ne mapunzha anji a kujishishamo banyama.

77 Bena Melali bashajilepo bebapele kufuma mu mukoka wa bena Zebuluna,+ Limono ne mapunzha anji a kujishishamo banyama, Tabola ne mapunzha anji a kujishishamo banyama; 78 kabiji mu kibunji kya Yodano ku Yeliko ku musela wa Yodano, mu mukoka wa bena Lubenyi, bebapelemo Bezela mu kiselebwa ne mapunzha anji a kujishishamo banyama, Yahaza+ ne mapunzha anji a kujishishamo banyama, 79 Kedemota+ ne mapunzha anji a kujishishamo banyama, ne Mefwata ne mapunzha anji a kujishishamo banyama; 80 kabiji mu mukoka wa bena Gadi bebapelemo Lamota wa mu Gileada ne mapunzha anji a kujishishamo banyama, Mahanaimu+ ne mapunzha anji a kujishishamo banyama, 81 Heshibonyi+ ne mapunzha anji a kujishishamo banyama, ne Yazela+ ne mapunzha anji a kujishishamo banyama.

7 Baana ba kwa Isakala bajinga Tola, Puwa, Yashuba ne Shimilona,+ bonse pamo bajinga bana. 2 Baana ba kwa Tola bajinga Uzi, Lefwaya, Yeliela, Yamai, Ibisama ne Shemwela, bo bajinga bakulumpe ba bikota byabo. Mwi Tola mwafumine babilobo, kabiji mu moba a kwa Davida bajinga 22,600. 3 Kabiji ba mu kisemi* kya kwa Uzi bajinga Izahalaya ne baana ba kwa Izahalaya: Mikela, Obadiya, Yoela ne Ishiya, bonse bano batanu bajinga babinemanga.* 4 Kabiji pamo na baana babo monka mwayijile bikota byabo, bajinga na nzhita mwajinga bashilikale 36,000 bepanzhile kulwa nkondo, mambo bajinga na bakazhi bavula ne baana. 5 Ne balongo babo ba mu bisemi byonse bya kwa Isakala bajinga babilobo, bajinga 87,000 bo banembele monka mwayijile bisemi byabo.+

6 Baana ba kwa Benjamina+ bajinga Bela,+ Bekele+ ne Yejaela,+ bonse pamo bajinga basatu. 7 Baana ba kwa Bela bajinga Ezabona, Uzi, Uziela, Yelimota ne Ili, bonse bajinga batanu, bakulumpe ba bikota byabo, babilobo, kabiji bo banembele monka mwayijile bisemi byabo bajinga 22,034.+ 8 Kabiji baana ba kwa Bekele bajinga Zemila, Yoashi, Elieza, Eliwenai, Omuli, Yelemota, Abiya, Anatota ne Alemeta, bano bonse bajinga baana ba kwa Bekele. 9 Bebanembele monka mwayijile bisemi byabo ko kuba’mba bakulumpe ba bikota byabo bajinga babilobo 20,200. 10 Baana ba kwa Yejaela+ bajinga Bilihana, ne baana ba kwa Bilihana bajinga: Yeusha, Benjamina, Ehuda, Kenaana, Zetana, Tashishi ne Ahishala. 11 Bano bonse bajinga baana ba kwa Yejaela, monka mwayijile bakulumpe ba bikota bya bashakulu babo, babilobo 17,200 benengezhezhe kuya na kulwa nkondo.

12 Shupima ne Hupima bajinga baana ba kwa Ili;+ bena Hushi bajinga baana ba kwa Ahela.

13 Baana ba kwa Nafitali+ bajinga Yaziela, Guni, Yezela ne Shaluma, ba mu kisemi* kya kwa Biliha.+

14 Bano bo baana ba kwa Manase:+ Ashiliela, ye asemejile mwi ntombo wanji mwina Silya. (Wasemene Makila+ shanji Gileada. 15 Makila wakebejile Hupima ne Shupima bakazhi, kabiji nyenga yanji wajinga Maaka.) Wa bubiji wajinga Zelofehada,+ bino Zelofehada wajingatu na baana ba bakazhi.+ 16 Maaka muka Makila wasemene mwana wa mulume, kabiji wamutumbile’mba Peleshi; kabiji nkasanji wajinga Sheleshi; ne baana banji bajinga Ulama ne Lekema. 17 Kabiji mwana* wa kwa Ulama wajinga Bedana. Bano bo bajinga baana ba kwa Gileada, Gileada mwana wa kwa Makila, Makila mwana wa kwa Manase. 18 Kabiji nyenga yanji wajinga Hamoleketa. Hamoleketa wasemene Ishijoda, Abieza ne Mala. 19 Baana ba kwa Shemida bajinga Ahiana, Shekema, Likihi ne Aniamu.

20 Bano bo baana ba kwa Efelaimu:+ Aye wasemene Shutela,+ Shutela wasemene Beleda, Beleda wasemene Tahati, Tahati wasemene Eleada, Eleada wasemene Tahati, 21 Tahati wasemene Zabada, Zabada wasemene Shutela, Eza, ne Eleada. Bebepayile ku bena Gata+ basemekejilwe mu kyonkakya kyalo mambo bayile na kusenda bilelwa byabo. 22 Kabiji Efelaimu shabo wibajijile moba avula, ne balongo banji baishilenga na kumutekenesha. 23 Kepo alaajile na mukazhanji, ne aye waimichile ne kusema mwana wa mulume. Wamutumbile’mba Beliya,* mambo wamusemene kimye bya malwa kyo byaishile mu nzubo yanji. 24 Kabiji mwananji wa mukazhi wajinga Sheela, yenka washimikile Bete-holona Wakunama+ ne Watuntuka+ ne Uzenasheela. 25 Kabiji wasemene Lefwa, Leshefu, Leshefu wasemene Tela, Tela wasemene Tahana, 26 Tahana wasemene Ladana, Ladana wasemene Amihuda, Amihuda wasemene Elishama, 27 Elishama wasemene Nuni, ne Nuni wasemene Yoshua.*+

28 Mapunzha abo ne mizhi yabo icheche yajinga Betele+ ne mande anji,* kabiji ku musela kwajinga Naalana, ne ku muzhika kwajinga Gezela ne mande anji, ne Shekema ne mande anji kukafika ne ku Aya* ne mande anji; 29 kabiji kwipi na ba mu kisemi kya kwa Manase, kwajinga Bete-sheana+ ne mande anji, Taanaka+ ne mande anji, Megido+ ne mande anji, ne Dola+ ne mande anji. Muno mo mwaikalanga bisemi bya kwa Yosefwa mwana wa kwa Isalela.

30 Baana ba kwa Ashela bajinga Imina, Ishivwa, Ishivi, Beliya+ ne nyenga yabo wajinga Sela.+ 31 Baana ba kwa Beliya bajinga Hebela ne Malakyela ye wajinga shanji Bilizaita. 32 Hebela wasemene Yafeleta, Shomela, Hotama ne Shuwa nyenga yabo. 33 Baana ba kwa Yafeleta bajinga Pasaka, Bimihala ne Ashavwata. Bano bo bajinga baana ba kwa Yafeleta. 34 Baana ba kwa Shemela* bajinga Ahi, Loga, Yehuba ne Alamu. 35 Baana ba kwa Helema* mulongo wanji bajinga Zofwa, Imina, Sheleshi ne Amala. 36 Baana ba kwa Zofwa bajinga Sua, Halanefela, Shuwala, Beli, Imila, 37 Bezela, Hoda, Shama, Shilisha, Italana ne Beela. 38 Baana ba kwa Yetela bajinga Yefune, Pisipa ne Ala. 39 Baana ba kwa Ula bajinga Alaha, Haniela ne Lizia. 40 Bano bonse bajinga baana ba kwa Ashela, bakulumpe ba bikota byabo, bo basajile, babilobo, bakulumpe ba babinemanga; bonse pamo monka mwayijile bisemi byabo byo banembele+ bajinga banabalume 26,000+ bepanzhile kulwa nkondo.

8 Benjamina+ wasemene Bela+ mubeji wanji, Ashibela+ ye wajinga wa bubiji, Ahala ye wajinga wa busatu, 2 Noha ye wajinga wa buna ne Lafwa ye wajinga wa butanu. 3 Baana ba kwa Bela bajinga Adala, Gela,+ Abihuda, 4 Abishua, Nemani, Ahoa, 5 Gela, Shefufwana ne Hulama. 6 Bano bo bajinga baana ba kwa Ehuda, bakulumpe ba bikota bya bangikazhi ba mu Geba,+ bo batwajile mu buzha ku Manahata: 7 Nemani, Ahiya ne Gela yenka wibatwajile mu buzha kabiji wasemene Uza ne Ayihuda. 8 Shahalaimu wasemejile baana mu nyaunda* ya bena Moabu kimye kyo bebapangile. Hushima ne Bala bo bajinga bakazhi* banji. 9 Mwi Hodesha mukazhanji wasemejilemo Yobaba, Zibia, Mesha, Malakama, 10 Yeuza, Sakia ne Milima. Bano bo bajinga baana banji bakulumpe ba bikota.

11 Mwi Hushima wasemejilemo Abituba ne Elapaala. 12 Ne baana ba kwa Elapaala bajinga Ebelu, Mishama, Shemeda (yenka washimikile Ono+ ne Loda+ ne mande anji*), 13 Beliya ne Shema. Bano bo bajinga bakulumpe ba bikota bya bangikazhi ba mu Ayalona.+ Bano bapangilemo bangikazhi ba mu Gata. 14 Kabiji kwajinga Ahio, Shashaka, Yelemota, 15 Zebadiya, Alada, Edela, 16 Mikela, Ishipa ne Yoha baana ba kwa Beliya; 17 ne Zebadiya, Meshulama, Hiziki, Hebela, 18 Ishimelai, Iziliya ne Yobaba baana ba kwa Elapaala; 19 Yakima, Zikili, Zabadi, 20 Elienai, Ziletai, Eliela, 21 Adaya, Belaya ne Shimilata baana ba kwa Shimei; 22 Ishipana, Ebelu, Eliela, 23 Abidona, Zikili, Hanana, 24 Hananiya, Elama, Anatotiya, 25 Ifideya ne Penwela baana ba kwa Shashaka; 26 Shamushela, Shehaliya, Ataliya, 27 Yaaleshiya, Elaija ne Zikili baana ba kwa Yelohama. 28 Bano bo bajinga bakulumpe ba bikota monka mwayijile bisemi byabo. Bano bena mizhi baikalanga mu Yelusalema.

29 Yeyela shanji Gibeona, waikalanga mu Gibeona.+ Mukazhanji wajinga Maaka.+ 30 Mubeji wanji wajinga Abidona, palondela ne Zula, Kisha, Baela, Nadaba, 31 Gedola, Ahio ne Zekela. 32 Mikilota wasemene Shimeya. Kabiji bonse baikalanga kwipi na balongo babo mu Yelusalema, pamo na balongo babo bakwabo.

33 Nela+ wasemene Kisha; Kisha wasemene Saulo;+ Saulo wasemene Yonafwanyi,+ Malikishua,+ Abinadaba+ ne Eshibaela.*+ 34 Kabiji mwana wa kwa Yonafwanyi wajinga Meliba-baela.*+ Meliba-baela wasemene Mika.+ 35 Baana ba kwa Mika bajinga Pitona, Meleki, Talea ne Ahaza. 36 Ahaza wasemene Yehoada; Yehoada wasemene Alemeta, Azamabeta ne Zimuli. Zimuli wasemene Moza, 37 Moza wasemene Binea, Binea wasemene Lafwaya, Lafwaya wasemene Eleasa, Eleasa wasemene Azela. 38 Azela wajinga na baana batanu na umo, kabiji mazhina abo bajinga, Azilikama, Bokelu, Ishimela, Shealiya, Obadiya ne Hanana. Bano bonse bajinga baana ba kwa Azela. 39 Ne baana mulongo wanji aye Esheki bajinga Ulama mubeji wanji, Yeusha ye wajinga wa bubiji ne Elifeleta ye wajinga wa busatu. 40 Kabiji baana ba kwa Ulama bajinga babilobo bayukile bya kwingijisha* buta bwa mukanda, kabiji bajinga na baana ne bankana bavula, bonse pamo bajinga 150. Abano bonse bajinga ba mu kisemi kya kwa Benjamina.

9 Bena Isalela bonse bebanembele monka mwayijile bisemi byabo, kabiji bebanemba mu Buku wa Bamfumu ba mu Isalela. Kabiji bena Yuda bebatwajile mu buzha ku Babilona na mambo a kubula bukishinka.+ 2 Bangikazhi batanshi kubwela mu mapunzha abo monka mu mizhi yabo bajinga bena Isalela bamo, bañanga, bena Levi ne bakalume* baingijilanga ku nzubo ya Lesa.+ 3 Kabiji bamo ba mu kisemi kya kwa Yuda,+ ne kya kwa Benjamina,+ ne kya kwa Efelaimu ne kya kwa Manase baikele mu Yelusalema: 4 Utai mwana wa kwa Amihuda, Amihuda mwana wa kwa Omuli, Omuli mwana wa kwa Imuli, Imuli mwana wa kwa Bani, ba mu kisemi kya kwa Peleze+ mwana wa kwa Yuda. 5 Kabiji mu bena Shilo, Asaya ye wajinga mubeji ne baana banji. 6 Ne mu baana ba kwa Zela,+ Yewela ne balongo banji 690.

7 Ne ba mu kisemi kya kwa Benjamina, Salu mwana wa kwa Meshulama, Meshulama mwana wa kwa Hodaviya, Hodaviya mwana wa kwa Hasenua, 8 Ibineya mwana wa kwa Yelohama, Ela mwana wa kwa Uzi, Uzi mwana wa kwa Mikili, ne Meshulama mwana wa kwa Shefwatiya, Shefwatiya mwana wa kwa Lewela, Lewela mwana wa kwa Ibiniya. 9 Kabiji balongo babo monka mwayijile bisemi byabo bajinga 956. Bano bonse banabalume bajinga bakulumpe ba mu bikota byabo.*

10 Mu bañanga, mwajinga Yedaya, Yehoyaliba, Yakina,+ 11 Azaliya mwana wa kwa Hilikiya, Hilikiya mwana wa kwa Meshulama, Meshulama mwana wa kwa Zadoka, Zadoka mwana wa kwa Melayota, Melayota mwana wa kwa Ahituba, ntangi wa ku nzubo ya Lesa wa kine, 12 Adaya mwana wa kwa Yelohama, Yelohama mwana wa kwa Pashula, Pashula mwana wa kwa Malakiya, Maasai mwana wa kwa Ajela, Ajela mwana wa kwa Yazela, Yazela mwana wa kwa Meshulama, Meshulama mwana wa kwa Meshilemita, Meshilemita mwana wa kwa Imela, 13 ne balongo babo, ko kuba’mba bakulumpe ba mu bikota byabo, babilobo 1,760, banabalume bafikilamo kwingila mwingilo wa ku nzubo ya Lesa wa kine.

14 Kabiji mu bena Levi, mwajinga Shemaya+ mwana wa kwa Hashuba, Hashuba mwana wa kwa Azilikama, Azilikama mwana wa kwa Hashabiya wa mu kisemi kya kwa Melali; 15 ne Bakabaka, Heleshi, Galala, Mataniya mwana wa kwa Mika, Mika mwana wa kwa Zikili, Zikili mwana wa kwa Asafwa, 16 Obadiya mwana wa kwa Shemaya, Shemaya mwana wa kwa Galala, Galala mwana wa kwa Yedutuna, ne Belekiya mwana wa kwa Asa, Asa mwana wa kwa Elekana, yenka waikalanga mu mizhi ya bena Netofwa.+

17 Bakalama ba bibelo+ bajinga ba Shaluma, Akuba, Talamona, Ahimanyi, ne mulongo wabo Shaluma ye wajinga mukulumpe, 18 kabiji kufikatu ne kyokya kimye aye waingijilanga ku kibelo kya mfumu kya ku musela.+ Abano bo bajinga bakalama ba bibelo bya ku makampu a bena Levi. 19 Ne Shaluma mwana wa kwa Kole, Kole mwana wa kwa Ebiasafwa, Ebiasafwa mwana wa kwa Kola ne balongo banji ba mu kikota kyanji, bena Kola, bo batangijilanga mwingilo, bakasopa ba pa bibelo bya ku tente, kabiji bashakulu babo bo batangijilanga kampu wa Yehoba saka balama kwa kutwelela. 20 Finease+ mwana wa kwa Eleaza+ ye wajinga ntangi wabo kala; kabiji Yehoba wajinga nanji. 21 Zekaliya+ mwana wa kwa Meshelemiya wajinga kasopa wa pa kibelo kya tente wa lusambakeno.

22 Bonse bo batongwele kwikala bakasopa ba pa bibelo ponka pa kutwelela bajinga 212. Baikajilenga mu mizhi yabo monka mwanembejilwe bisemi byabo.+ Davida ne Samwela wamonanga bimwesho+ batongwele bano kwingila mwingilo wabo wa bukishinka. 23 Abo ne baana babo bo balaminenga bibelo bya ku nzubo ya Yehoba,+ ko kuba’mba nzubo ya tente. 24 Bakasopa ba pa bibelo bajinga mu mapunzha ana, ku musela, ku muzhika, ku kabeta ka ku buyeke ne ku kabeta ka ku bulenge.+ 25 Pa kimye pa kimye, balongo babo baiyanga kufuma mu mizhi yabo pa moba atanu na abiji ne kwingijila nabo pamo. 26 Kwajinga babinemanga* bana baingijilanga pa bibelo mu bukishinka. Bajinga bena Levi, kabiji bo batalanga pa bibamba* ne pa bya buneme bya ku nzubo ya Lesa wa kine.+ 27 Baikalanga bufuku bonse mu mapunzha mo baingijilanga kuzhokoloka nzubo yonse ya Lesa wa kine, mambo bo bajinga na mwingilo wa kusopa kabiji bo balamanga makii kabiji bashinkulanga binzhilo bya ku nzubo pa juba pa juba lukelo.

28 Bamo batalanga pa bipe bya kwingijisha+ mu mwingilo; bebibalanga pa kwibitwezha ne pa kwibilupula. 29 Bamo bebatongwele kutala pa bipe byonse, bipe byonse byazhila,+ ne pa bunga bwalamba,+ pa binyu,+ pa manyi,+ pa binunka bulongo,+ ne pa manyi a balasama.+ 30 Baana ba bañanga bamo bavwangakanyanga manyi a balasama. 31 Kabiji Matitiya wa mu bena Levi yenka wajinga mubeji wa kwa Shaluma mwina Kola, waingilanga mwingilo mu bukishinka wa kutala pa bintu byo bakanganga pa kikango.+ 32 Balongo babo bamo ba mu bena Kohati batalanga pa mwingilo wa kosha bashinkwa+ bo batentakanya,* kwibanengezha moba onse a sabado.+

33 Bano bo bajinga banyimbi, bakulumpe ba bikota bya bena Levi ba mu bibamba,* bo babulanga kupa mingilo ikwabo; mambo mwingilo wabo wajinga wa mute ne bufuku. 34 Bano bo bajinga bakulumpe ba mu bikota bya bena Levi monka mwayijile bisemi byabo, bena mizhi. Bano baikalanga mu Yelusalema.

35 Yeyela shanji Gibeona, waikalanga mu Gibeona.+ Mukazhanji wajinga Maaka. 36 Mubeji wanji wajinga Abidona, palondela ne Zula, Kisha, Baela, Nela, Nadaba, 37 Gedola, Ahio, Zekaliya ne Mikilota. 38 Mikilota wasemene Shimeama. Kabiji bonse baikalanga kwipi na balongo babo mu Yelusalema, pamo na balongo babo bakwabo. 39 Nela+ wasemene Kisha, Kisha wasemene Saulo;+ Saulo wasemene Yonafwanyi,+ Malikishua,+ Abinadaba+ ne Eshibaela. 40 Kabiji mwana wa kwa Yonafwanyi wajinga Meliba-baela.+ Meliba-baela wasemene Mika.+ 41 Baana ba kwa Mika bajinga Pitona, Meleki, Talea ne Ahaza. 42 Ahaza wasemene Yala; Yala wasemene Alemeta, Azamabeta ne Zimuli. Zimuli wasemene Moza. 43 Moza wasemene Binea, Binea wasemene Lefwaya, Lefwaya wasemene Eleasa, Eleasa wasemene Azela. 44 Azela wajinga na baana batanu na umo, kabiji mazhina abo bajinga, Azilikama, Bokelu, Ishimela, Shealiya, Obadiya ne Hanana. Bano bo bajinga baana ba kwa Azela.

10 Bena Filishitiya balwilenga na bena Isalela. Kabiji banabalume bena Isalela banyemene bena Filishitiya, kabiji bavula bebepayijile pa Mutumba wa Giliboa.+ 2 Bena Filishitiya bamunankamine Saulo ne baana banji ba balume, kabiji bena Filishitiya batapile baana ba kwa Saulo abo ba Yonafwanyi, Abinadaba ne Malikishua.+ 3 Nkondo yamukosejile bingi Saulo, ne bataya miketo bamutaaine, kabiji bataya miketo bamukozhezhe bingi.+ 4 Kepo Saulo aambijile wamusendelanga bilwilo amba: “Somona mpoko yobe ungase, kuchina’mba bano bantu babula kuya ku mukanda bakeya na kunguba kintu kyatama*+ bingi.” Bino awa wamusendelanga bilwilo kechi wakebele kuba kino ne, mambo waumvwine bingi moyo. Onkao mambo, Saulo washikwile mpoko ne kuponenako.+ 5 Awa wamusendelanga bilwilo byo amwene’mba Saulo wafwa, naye waponejile ku mpoko yanji ne kufwa wafwile. 6 Byonkabyo, Saulo ne baana banji basatu bafwile, ne bonse ba mu nzubo yanji bafwijile pamo.+ 7 Bena Isalela bonse baikalanga mu kimpachiko* byo bamwene’mba bantu bonse banyema ne kuba’mba Saulo ne baana banji bafwa, batendekele kufumamo mu mizhi yabo ne kunyema; kepo bena Filishitiya baishile ne kwikalamo.

8 Juba jalondejilepo, bena Filishitiya byo baishile na kuvuula bo baipayile, bataaine Saulo ne baana banji saka balaala pa Mutumba wa Giliboa.+ 9 Onkao mambo, bamuvuujile ne kumuchibako mutwe ne kumuvuula bivwalo byanji bya nkondo, ne kutuma jiwi mu kyalo kyonse kya bena Filishitiya ne kutaya mbila ku bankishi babo+ ne ku bantu. 10 Kepo babikile bivwalo byanji bya nkondo mu nzubo ya lesa wabo ne kupopela mutwe wanji mu nzubo ya kwa Dagona.+

11 Bena Yabeshi+ bonse mu Gileada byo baumvwine bintu byonse byaubile bena Filishitiya kwi Saulo,+ 12 bashilikale bonse baimene ne kuya na kusenda mubiji wa kwa Saulo ne mibiji ya baana banji. Beiletele ku Yabeshi ne kuzhiika bikupa byabo munshi ya kichi kikatampe mu Yabeshi,+ kabiji bazhikilwe na nzala moba atanu na abiji.

13 Byonkabyo, Saulo wafwile na mambo a kubula bukishinka kwi Yehoba, mambo kechi wakookejile jiwi ja Yehoba ne,+ ne na mambo a kwipuzha muntu wisamba na mipashi,+ 14 kwa kubula kwipuzha Yehoba. Onkao mambo, wamwipayile ne kupana bufumu kwi Davida mwana wa kwa Yese.+

11 Mu kuya kwa moba, bena Isalela bonse bakonkene kwi Davida ku Hebulona+ ne kumwambila’mba: “Umvwai! Atweba twi bikupa byenu kabiji twi mubiji* wenu.+ 2 Kala Saulo byo akijinga mfumu, anweba yenu mwatangijilanga bena Isalela ku makondo.*+ Kabiji Yehoba Lesa wenu wimwambijile’mba: ‘Yobe ukafunganga bantu bami bena Isalela, kabiji ukekala ntangi wa bantu bami bena Isalela.’ ”+ 3 Byonkabyo, bakulumpe bonse ba bena Isalela baishile ku mfumu ku Hebulona, kabiji Davida walayañene nabo lulayañano mu Hebulona ku meso a Yehoba. Kepo bamushingile manyi Davida kuba’mba ekale mfumu wa bena Isalela,+ monka mwayijile byambo bya Yehoba byo aambile kupichila mwi Samwela.+

4 Kepo Davida ne bena Isalela bonse baimene ne kuya ku Yelusalema, ko kuba’mba Yebusi,+ konka ku kyalo kwaikalanga bena Yebusi.+ 5 Bangikazhi ba mu Yebusi bamwendelekelenga Davida amba: “Kechi ukatwelamo muno ne!”+ Nangwa byonkabyo, Davida washinjile muzhi wa Ziona wajinga na nsakwa yakosa,+ luno ke Muzhi wa Davida.+ 6 Onkao mambo, Davida waambile’mba: “Yense ukekala mutanshi kushinda bena Yebusi ukekala mukulumpe* kabiji ukekala kinemanga.” Kabiji Yoaba+ mwana wa kwa Zeluya ye wajinga mutanshi kuyako, kabiji waikele ke kinemanga. 7 Kepo Davida aikele mu muzhi wa nsakwa yakosa. O ene mambo o bamutumbijile’mba Muzhi wa Davida. 8 Watatwile kushimika muzhi, kufuma ku Kituntaulo* kufika ne ku mapunzha azhokolokeleko, kabiji Yoaba washimukulwile mpunzha yashajileko ya muzhi. 9 Byonkabyo, Davida wayilengatu na kutumbalala,+ kabiji Yehoba wa mabumba wajinga nanji.

10 Bano bo bakulumpe ba bilobo bya kwa Davida, bonka bamukwashishenga mu bufumu bwanji, pamo na bena Isalela bonse, kuba’mba bamubike pa bufumu monka mwayijile byambo Yehoba byo aambijile bena Isalela.+ 11 Uno ye mutanchi wa bilobo bya kwa Davida: Yashobeama+ mwana wa kwa Hakimona, mukulumpe wa basatu.+ Ye walwile na bantu 300 ne kwibepaya na jifumo pa kimye kimo.+ 12 Walondejile pe aye wajinga Eleaza+ mwana wa kwa Dodo mwina Ahoa.+ Wajinga pa bilobo bisatu. 13 Ye wajinga ne Davida ku Pasa-damimu,+ bena Filishitiya ko bakonkene ku nkondo. Kabiji kwajinga bujimi bwa mbaale, ne bantu banyemene na mambo a bena Filishitiya. 14 Bino aye waimene pakachi ka bujimi ne kwibuzhikijila kabiji watwajijile kutapa bena Filishitiya, kya kuba Yehoba wibalengejile kwibashinda.*+

15 Mu bena mizhi 30 mwafumine bena mizhi basatu bayile ku jibwe, kwi Davida ku jiyengo jajinga ku Adulama,+ kimye nzhita ya bena Filishitiya kyo yatebelejile mu Kimpachiko* kya Lefwaimu.+ 16 Pa kyokya kimye Davida wajinga mu nkonkoso; kabiji bashilikale ba bena Filishitiya bajinga mu Betelema. 17 Kepo Davida atendekele kutonga’mba: “Nanchi inge natomapo mema mu mushima* uji kwipi na kibelo kya Betelema!”+ 18 Ponkapo aba basatu batwelele na lupata mu kampu wa bena Filishitiya ne kutapula mema mu mushima* wajinga kwipi na kibelo kya Betelema ne kumuletelao Davida; bino Davida wakaine kwiatoma kabiji wiechijile panshi kwi Yehoba. 19 Waambile’mba: “Kwesakana na mumwena Lesa wami, kechi kyayilamo kuba’mba amiwa ngube kino kintu ne! Nanchi nafwainwa kutoma mashi a bano banabalume baji kubika bumi* bwabo mu kizumba nyi?+ Mambo baji kubika bumi* bwabo mu kizumba pa kwialeta.” Onkao mambo, wakaine kwiatoma. Bino byo bintu byaubile bilobo byanji bisatu.

20 Abishai+ mulongo wa kwa Yoaba+ wajinga mukulumpe wa bakwabo basatu; ye walwile na bantu 300 ne kwibepaya na jifumo, kabiji wayile nkuwa nobe aba basatu.+ 21 Pe abo basatu, aye ye wakijilemo kunema kukila bakwabo babiji, kabiji ye wajinga mukulumpe wabo; pano bino, kechi waesakene pamo na boba basatu batanshi ne.

22 Benaya+ mwana wa kwa Yehoyada wajinga muntu* wachinchikile bingi waubile bintu byavula mu Kabizele.+ Watapile baana babiji ba kwa Aliela mwina Moabu, kabiji watwelele mu kimbotela pa juba janokele mabebe ne kwipaya bokwe.+ 23 Kabiji watapile mwina Ijipita wazamine bingi, walepele makyubichi* atanu.+ Nangwa kya kuba mwina Ijipita wajinga na jifumo mu kuboko kwanji jajinga nobe kakonkobele ko bapikwilapo bisapi,+ aye wayile kwi aye na kichi ne kwangata jifumo mu kuboko kwa mwina Ijipita ne kumwipaya na jonka jifumo janji.+ 24 Bino byo bintu byaubile Benaya mwana wa kwa Yehoyada, kabiji naye wayile nkuwa nobe byobya bilobo bisatu. 25 Nangwa kya kuba bamunemekele bingi kukila bakwabo makumi asatu, kechi waesakene pamo na boba basatu ne.+ Nangwa byonkabyo, Davida wamutongwele kwikala mukulumpe wa nzhita yanji yamulamanga.

26 Bilobo bya mu nzhita byajinga Asahela+ nkasa ne kolo ne Yoaba, Elanane mwana wa kwa Dodo wa ku Betelema,+ 27 Shamota mwina Haloda, Heleza mwina Pelona, 28 Ila+ mwana wa kwa Ikeshi mwina Tekoa, Abieza+ mwina Anatota, 29 Sibekai+ mwina Husha, Ilai mwina Ahoa, 30 Mahalai+ mwina Netofwa, Heleda+ mwana wa kwa Beana mwina Netofwa, 31 Itai mwana wa kwa Libai wa ku Gibea mwina Benjamina,+ Benaya mwina Pilatona, 32 Hulai wa ku kimpachiko kya Gaasha,+ Abiela mwina Alaba, 33 Azamabeta mwina Bahulimu, Eliyaba mwina Shalabonyi, 34 baana ba kwa Hashema mwina Gizona, Yonafwanyi mwana wa kwa Shage mwina Halala, 35 Ahiama mwana wa kwa Sakala mwina Halala, Elifwala mwana wa kwa Ula, 36 Hefela mwina Mekelata, Ahiya mwina Pelona, 37 Hezelo mwina Kamela, Naalai mwana wa kwa Ezabai, 38 Yoela nkasa ne kolo ne Natana, Mibihala mwana wa kwa Haguli, 39 Zeleka mwina Amonyi, Nahalai mwina Beelota yenka wasendanga bilwilo bya kwa Yoaba mwana wa kwa Zeluya; 40 Ila mwina Itila, Galeba mwina Itila, 41 Uliya+ mwina Hiti, Zabada mwana wa kwa Alai, 42 Adina mwana wa kwa Shiza mwina Lubenyi, mukulumpe wa bena Lubenyi, ne bantu 30 bo ajinga nabo; 43 Hanana mwana wa kwa Maaka, Yoshafwata mwina Mitina, 44 Uziya mwina Ashatalota, Shama ne Yeyela, baana ba kwa Hotama mwina Aloa; 45 Yejaela mwana wa kwa Shimuli, ne Yoha mulongo wanji mwina Tiza; 46 Eliela mwina Mahaba, Yelibai ne Yoshaviya baana ba kwa Elenaama, ne Itama mwina Moabu; 47 Eliela, Obeda ne Yasiela mwina Mezoba.

12 Bano bo banabalume baishile kwi Davida ku Zikilagi+ byo abujile kukasuluka kwenda na mambo a kwa Saulo+ mwana wa kwa Kisha, kabiji bajinga pa babilobo bamukwashishenga mu nkondo.+ 2 Bajinga na mata a mukanda, kabiji baingijishanga kuboko kwa kilujo ne kwa kipiko+ pa kutaya mabwe na kinzhipunzhipu+ nangwa pa kutaya miketo na buta bwa mukanda. Bajinga balongo ba kwa Saulo, bena Benjamina.+ 3 Mukulumpe wabo wajinga Ahiyeza, bino palondela Yoashi, bonse bajinga baana ba kwa Shemaa mwina Gibea;+ Yeziyela ne Peleta baana ba kwa Azamabeta,+ Belaka, Yehu mwina Anatota, 4 Ishimaya mwina Gibeona,+ kilobo wa mu ba makumi asatu kabiji mukulumpe wa pa makumi asatu;+ ne Yelemiya, Yahaziela, Yohanana, Yozabada mwina Gedela, 5 Eluzai, Yelimota, Bealiya, Shemaliya, Shefwatiya mwina Halifwa, 6 Elekana, Ishiya, Azalela, Yoezela ne Yashobeama, mwina Kola;+ 7 ne Yoila ne Zebadiya baana ba kwa Yelohama wa ku Gedola.

8 Bena Gadi bamo bayile kwi Davida mu nkonkoso mu kiselebwa;+ bajinga babilobo, bashilikale bo bafunjishe kulwa nkondo, benengezhezhe na makebo akatampe ne mafumo, bajinga na bilungi nobe mabokwe kabiji banyemanga bingi nobe balupaala baji pa mitumba. 9 Eza ye wajinga mukulumpe, Obadiya ye wajinga wa bubiji, Eliaba ye wajinga wa busatu, 10 Mishimana ye wajinga wa buna, Yelemiya ye wajinga wa butanu, 11 Atai ye wajinga wa butanu na bumo, Eliela ye wajinga wa butanu na bubiji, 12 Yohanana ye wajinga wa butanu na busatu, Elezabada ye wajinga wa butanu na buna, 13 Yelemiya ye wajinga wa bujikumi, Machibanai ye wajinga wa bujikumi na bumo. 14 Bano bo bajinga ba mu bena Gadi,+ bakulumpe ba nzhita. Wajinga na bulume bucheche wakonsheshe kulwa na bantu 100, ne wibakila bulume bonse wakonsheshe kulwa na bantu 1,000.+ 15 Bano bo banabalume baabukile Yodano mu ñondo mutanshi kimye kyo ayujile kufika ne ku bitulu, kabiji bapangile bonse baikalanga mu misanza, ku musela ne ku muzhika.

16 Banabalume bamo bena Benjamina ne bena Yuda baishile kwi Davida ku nkonkoso.+ 17 Kepo Davida ebatundaijile ne kwibambila’mba: “Inge mwaiya kwi amiwa mu mutende na kunkwasha, muchima wami usakukwatankana ne anweba. Bino inge mwaiya na kunsolola ku balwanyi bami maboko ami saka abula kubapo kintu kyatama, Lesa wa bashakulu betu amone kino ne kuchiba mambo.”+ 18 Ponkapo mupashi waishile pe* Amasai+ mukulumpe wa makumi asatu, kabiji waambile’mba:

“Atweba twi bantu benu, anweba ba Davida, kabiji tuji nenu, anweba mwana wa kwa Yese.+

Onkao mambo, Davida wibatambwijile ne kwibatongola kwikala bakulumpe ba nzhita.

19 Bamo bafumine mu bena Manase bayile kwi Davida kimye kyo aishile na bena Filishitiya na kulwa ne Saulo; bino kechi wakwashishe bena Filishitiya ne, mambo bamfumu ba bena Filishitiya+ byo besambile, bamupangile ne kwamba’mba: “Wakonsha kubwela kwi nkambo yanji Saulo, kabiji bumi bwetu bwakonsha kwikala mu kizumba.”+ 20 Byo ayile ku Zikilagi,+ bano bo baishile kwi aye bafumine mu bena Manase: Adina ne Yozabada, Yejaela, Mikela, Yozabada, Elihu ne Ziletai, bakulumpe ba pa biumbi bya bena Manase.+ 21 Bakwashishe Davida kulwisha nzhita yamulukukile, mambo bonse bajinga babilobo, banabalume bachinchika+ kabiji baikele ke bakulumpe ba nzhita. 22 Pa juba pa juba bantu baiyanga na kukwasha Davida+ kufikatu ne kampu byo abayile nobe kampu wa Lesa.+

23 Bano bo bakulumpe ba bashilikale bajinga na bilwilo bya nkondo baishile kwi Davida ku Hebulona+ na kwangata bufumu bwa kwa Saulo ne kwibupana kwi aye monka mwayijile mukambizho wa Yehoba.+ 24 Banabalume bena Yuda basendele makebo akatampe ne mafumo bajinga 6,800, bepanzhile kulwa nkondo. 25 Ba mu bena Shimeona babilobo, banabalume bachinchika ba mu nzhita bajinga 7,100.

26 Ba mu bena Levi bajinga 4,600. 27 Yehoyada+ ye wajinga ntangi wa baana ba kwa Alona,+ kabiji bo ajinga nabo bajinga 3,700, 28 ne Zadoka,+ kilobo kabiji nsongwalume wachinchika, pamo na bakulumpe 22 ba mu kikota kyanji.

29 Ba mu bena Benjamina, balongo ba kwa Saulo+ bajinga 3,000, bavula mwi abo balamanga bintu byajinga mu nzubo ya kwa Saulo. 30 Ba mu bena Efelaimu, bajinga 20,800 babilobo, banabalume bachinchika bayile nkuwa ba mu bikota byabo.

31 Ba mu kichika kya mukoka wa bena Manase, bajinga 18,000 bo batongwele pa mazhina kwiya na kuswanyika Davida pa bufumu. 32 Ba mu bena Isakala, bayukile bimye ne kuyuka byafwainwe kuba bena Isalela, bajinga 200 ba mu bena mizhi yabo, kabiji batangijilanga balongo babo bonse. 33 Ba mu bena Zebuluna, bajinga 50,000 bakonsheshe kwikala mu nzhita ne kwitanchika ku nkondo na bilwilo byabo byonse bya nkondo, bonse saka benunga kwi Davida mu bukishinka.* 34 Ba mu bena Nafitali, bajinga babinemanga 1,000, kabiji bajinga na bantu 37,000 bajinga na makebo akatampe ne mafumo. 35 Ba mu bena Danyi, betanchikanga ku nkondo, bajinga 28,600. 36 Kabiji ba mu bena Ashela, aba bakonsheshe kwikala mu nzhita ne kwitanchika ku nkondo bajinga 40,000.

37 Ba ku bushiya bwa Yodano,+ bena Lubenyi ne bena Gadi ne kichika kya mukoka wa bena Manase, bajinga bashilikale 120,000 bajinga na mitundu yonse ya bilwilo bya nkondo. 38 Abano bonse bajinga banabalume ba nkondo, bakonkene pamo ku nkondo; baishile na muchima umo ku Hebulona na kuswanyika Davida kwikala mfumu wa bena Isalela bonse, kabiji bena Isalela bonse bashala bakwatankene* kuba’mba baswanyike Davida pa bufumu.+ 39 Kabiji baikele konkakwa ne Davida pa moba asatu, saka baja ne kutoma, mambo balongo babo bebanengezhezhe bintu. 40 Ne boba bajinga kwipi nabo, nangwatu boba bajinga ku Isakala, ne ku Zebuluna ne ku Nafitali, baletelenga kajo pa bambongolo, pa bangamela, pa bamyule ne na bañombe, baletele bunga, bashinkwa bo balengele na makuyu ne mañanzañanza, binyu, manyi ne bañombe ne mikooko, byavujile bingi, kabiji mwajinga kusangalala mu Isalela.

13 Davida waipwizhe bakulumpe ba biumbi ne ba bitota ne bantangi bonse.+ 2 Kepo Davida aambijile kipwilo kyonse kya bena Isalela amba: “Umvwe mwamona’mba kyawama kabiji kyo kyaitabilwa kwi Yehoba Lesa wetu, twayai tutume jiwi ku balongo betu bashala mu bibunji byonse bya Isalela ne ku bañanga ne ku bena Levi baji mu mizhi yabo+ iji na mapunzha mwa kujiila banyama, beye ko tuji. 3 Kabiji twayai tukalete Jikwachi+ ja Lesa wetu.” Mambo kechi bejitele muchima mu moba a kwa Saulo ne.+ 4 Kipwilo kyonse kyaswile kuba bino, mambo bantu bonse bamwene’mba kijitu bulongo. 5 Onkao mambo, Davida wakonkenye pamo bena Isalela bonse, kufuma ku mukola* wa ku Ijipita kukafika ne ku Lebo-hamata,*+ kuba’mba baye na kuleta Jikwachi ja Lesa wa kine kufuma ku Kiliata-yealimu.+

6 Davida ne bena Isalela bonse bayile ku Baelaya,+ ku Kiliata-yealimu wa mu Yuda na kusenda Jikwachi ja Lesa wa kine, Yehoba, yenka waikala peulu* ya bakelubi+ po bamwichila pa jizhina janji. 7 Nangwa byonkabyo, babikile Jikwachi ja Lesa wa kine mu kikochikala kya katataka+ ne kwijifumya mu nzubo ya kwa Abinadaba, kabiji Uza ne Ahio bo batangijilenga kikochikala.+ 8 Davida ne bena Isalela bonse basangalelenga ku meso a Lesa wa kine na bulume bwabo bonse saka bemba nyimbo, minsakayi, bijimba bikwabo bya mizhinge, mikakashi,+ nsonsolo+ ne matolompita.+ 9 Bino byo bafikile ku kipujilo kya kwa Kidona, Uza watanyikile kuboko kwanji ne kukwata ku Jikwachi, mambo bañombe bakebele kwijiponesha. 10 Ponkapo Yehoba wabukijile Uza bukaji, kabiji wamukambwile mambo watanyikile kuboko kwanji ne kukwata Jikwachi,+ kabiji wafwijile konkakwa ku meso a Lesa.+ 11 Bino Davida wazhingijile mambo bukaji bwa Yehoba bwaishile pe Uza; kabiji aya mpunzha beitela’mba Pelezuza* kufikatu ne lelo jino.

12 Onkao mambo, Davida wamuchiine Lesa wa kine aja juba ne kwamba’mba: “Nanchi Jikwachi ja Lesa wa kine jikeya byepi kwi amiwa?”+ 13 Davida kechi waletele Jikwachi mu Muzhi wa Davida mo aikalanga ne, bino wijitwajile ku nzubo ya kwa Obeda-edomu mwina Gata. 14 Jikwachi ja Lesa wa kine jaikele na ba mu nzubo ya kwa Obeda-edomu, jaikelemo mu nzubo yanji bañondo basatu, kabiji Yehoba wapesheshenga ba mu nzubo ya kwa Obeda-edomu ne bintu byonse byo ajinga nabyo.+

14 Hilama Mfumu+ wa Tila watumine baluwe kwi Davida, pamo na bichi bya sida, basendwe* ba mabwe ne ba bichi na kumushimikila nzubo.*+ 2 Kabiji Davida wayukile’mba Yehoba wakoseshe bufumu bwa bena Isalela,+ kabiji bufumu bwanji bwatumbalele bingi na mambo a bantu banji bena Isalela.+

3 Davida wasongwele banabakazhi bakwabo+ mu Yelusalema, kabiji Davida wasemene baana bakwabo ba balume ne ba bakazhi.+ 4 Bano bo baana bo asemejile mu Yelusalema:+ Shamuwa, Shobaba, Natana,+ Solomone,+ 5 Ibala, Elishuwa, Elepeleta, 6 Noga, Nefega, Yafiya, 7 Elishama, Beeliada ne Elifeleta.

8 Bena Filishitiya byo baumvwine’mba Davida bamushinga manyi kwikala mfumu wa bena Isalela bonse,+ bena Filishitiya bonse baishile na kukeba Davida.+ Davida byo aumvwine kino, wayile na kulwa nabo. 9 Kepo bena Filishitiya baishile na kwibalukuka mu Kimpachiko* kya Lefwaimu.+ 10 Davida waipwizhe Lesa amba: “Nanchi ngye na kulwa na bena Filishitiya nyi? Nanchi musakwibapana mu kuboko kwami nyi?” Ponkapo Yehoba wamukumbwile’mba: “Yanga, mambo kine nsakwibapana mu kuboko kobe.”+ 11 Byonkabyo, Davida wayile ku Baela-pelazimu,+ kabiji wibatapijile konkakwa. Kepo Davida aambile’mba: “Lesa wa kine washinda balwanyi bami na kuboko kwami, byonkatu mema byo apomona mushime.” O ene mambo o batumbijile yoya mpunzha amba Baela-pelazimu.* 12 Bena Filishitiya bashile balesa babo konkakwa, kabiji Davida byo akambizhe, bebasokele mu mujilo.+

13 Pa kupitapo moba, bena Filishitiya baishile jikwabo na kwibalukuka mu kimpachiko.*+ 14 Davida waipwizhe Lesa jibiji, bino Lesa wa kine wamukumbwile’mba: “Kange wibashinkamane ne. Pano bino, wibazhoke ne kwibeshila kunyuma yabo kwipi na bipupu bya baka.+ 15 Kabiji byo usakumvwa ncholoko peulu ya bipupu bya baka, wibavundumukile, mambo Lesa wa kine usakutangilako kulutwe na kutapa nzhita ya bena Filishitiya.”+ 16 Byonkabyo, Davida waubile byonkatu byamukambizhe Lesa wa kine,+ kabiji batapile nzhita ya bena Filishitiya kufuma ku Gibeona kukafika ne ku Gezela.+ 17 Kabiji Davida wayile nkuwa mu byalo byonse, kabiji Yehoba wabikile moyo wa kumuchina mu bisaka byonse bya bantu.+

15 Kabiji watwajijile kushimika mazubo anji mwine mu Muzhi wa Davida, kabiji wanengezhezhe mpunzha mwa kubika Jikwachi ja Lesa wa kine ne kwijipopela tente.+ 2 Kyo kimye Davida kyo aambile’mba: “Kafwako muntu nangwa umo wafwainwa kusenda Jikwachi ja Lesa wa kine ne, kanatu bena Levi, mambo Yehoba wibasala kuba’mba bo basakusendanga Jikwachi ja Yehoba ne kumwingijilanga kimye kyonse.”+ 3 Kepo Davida akonkenye pamo bena Isalela bonse mu Yelusalema kuba’mba balete Jikwachi ja Yehoba ku mpunzha yo ejinengezhezhe.+

4 Davida wakonkenye bisemi bya kwa Alona+ ne bena Levi:+ 5 mu bena Kohati mwafumine kinemanga Uliele ne balongo banji 120; 6 mu bena Melali mwafumine kinemanga Asaya+ ne balongo banji 220; 7 mu bena Geleshoma mwafumine kinemanga Yoela+ ne balongo banji 130; 8 mu kisemi kya kwa Elizafwana+ mwafumine kinemanga Shemaya ne balongo banji 200; 9 mu kisemi kya kwa Hebulona mwafumine kinemanga Eliela ne balongo banji 80; 10 mu kisemi kya kwa Uziela+ mwafumine kinemanga Aminadaba ne balongo banji 112. 11 Kabiji Davida waichile bañanga abo ba Zadoka+ ne Abiata,+ ne bena Levi abo ba Uliele, Asaya, Yoela, Shemaya, Eliela ne Aminadaba, 12 ne kwibambila’mba: “Anweba mwi bakulumpe ba bikota bya bena Levi. Izhijikai anwe bene ne balongo benu, kabiji muye na kusenda Jikwachi ja Yehoba Lesa wa Isalela ne kwijileta ku mpunzha yo nejinengezhezha. 13 Na mambo a kuba kechi mwijisendele kimye kitanshi ne,+ Yehoba witubukijile bukaji,+ mambo kechi twalondejile byo akebelenga ne.”+ 14 Onkao mambo, bañanga ne bena Levi bezhijikile kuba’mba baye na kusenda Jikwachi ja Yehoba Lesa wa Isalela.

15 Kepo bena Levi basendele Jikwachi ja Lesa wa kine pa bipuzhi byabo na mibanda,+ byonkatu Mosesa byo ebakambizhe monka mwayijile byambo bya Yehoba. 16 Kabiji Davida waambijile babinemanga kutongola balongo babo bena Levi banyimbi kuba’mba bembenga na lusekelo, saka bajizha bijimba: bijimba bya mizhinge, byansa+ ne nsonsolo.+

17 Onkao mambo, bena Levi batongwele Hemanyi+ mwana wa kwa Yoela, ne mulongo wanji aye Asafwa+ mwana wa kwa Belekiya kabiji mu balongo babo bena Melali batongwelemo Etana+ mwana wa kwa Kushaya. 18 Bano bajinga ne na balongo babo ba mu kipanyi kya bubiji+ abo ba Zekaliya, Beni, Yaaziele, Shemilamota, Yehiela, Uni, Eliaba, Benaya, Maaseya, Matitiya, Elifelehu, ne Mikeneya ne Obeda-edomu ne Yeyela bakasopa ba pa bibelo. 19 Banyimbi abo ba Hemanyi,+ Asafwa+ ne Etana bo bajizhizhenga nsonsolo ya mukuba;+ 20 ne Zekaliya, Aziela, Shemilamota, Yehiela, Uni, Eliaba, Maaseya ne Benaya bo bajizhizhenga bijimba bya mizhinge monka mwayijile musango wa Alamota;*+ 21 kabiji Matitiya,+ Elifelehu, Mikeneya, Obeda-edomu, Yeyela ne Azaziya bo bajizhizhenga byansa monka mwayijile musango wa Sheminita,*+ bo batangijilanga. 22 Kenaniya+ kinemanga wa bena Levi ye watajilenga pa mwingilo wa kusenda jikwachi, mambo wajinga sendwe, 23 kabiji Belekiya ne Elekana bajinga bakasopa ba pa kibelo kya mwajinga Jikwachi. 24 Bañanga abo ba Shebaniya, Yoshafwata, Netanela, Amasai, Zekaliya, Benaya ne Elieza bavuminyenga matolompita kulutwe ya Jikwachi ja Lesa wa kine,+ kabiji Obeda-edomu ne Yehiya nabo bajinga bakasopa ba pa kibelo kya mwajinga Jikwachi.

25 Kabiji Davida ne bakulumpe ba bena Isalela ne babinemanga ba biumbi balondejilenga byo baletelenga jikwachi ja lulayañano lwa Yehoba kufuma ku nzubo ya kwa Obeda-edomu+ saka basangalala.+ 26 Lesa wa kine byo akwashishe bena Levi basendele jikwachi ja lulayañano lwa Yehoba, batapishe baana ba bañombe batanu na babiji ne mikooko ilume itanu na ibiji.+ 27 Davida wavwajile mukangyo wabula maboko wa kisapi kyawama, byonka byavwajile bena Levi basendele Jikwachi, banyimbi, ne Kenaniya kinemanga watajilenga pa mwingilo wa kusenda jikwachi ne pa banyimbi; Davida wavwajile ne kajilaya kabula maboko ka kisapi kya linenyi.+ 28 Bena Isalela bonse baletelenga jikwachi ja lulayañano lwa Yehoba saka bemba na lusekelo,+ saka bavumya lusengo, matolompita,+ nsonsolo ne kujizha bijimba bya mizhinge ne byansa.+

29 Bino jikwachi ja lulayañano lwa Yehoba byo jafikile mu Muzhi wa Davida,+ Mikala mwana wa mukazhi wa kwa Saulo+ wasumbijile mu kipenze ne kumona Mfumu Davida saka akilauka ne kusekela; kabiji wamulengulwile mu muchima wanji.+

16 Byonkabyo, baletele Jikwachi ja Lesa wa kine ne kwijibika mu tente Davida ye ejipopejile;+ kabiji balambwile milambo ya kusoka ne bitapisho bya mutende kwi Lesa wa kine.+ 2 Davida byo apwishishe kulambula milambo ya kusoka+ ne bitapisho bya mutende,+ wapesheshe bantu mu jizhina ja Yehoba. 3 Kabiji bena Isalela bonse, mwanamulume ne mwanamukazhi, wibapele au shinkwa wanzhingwile, au shinkwa wanzhingwile, bashinkwa bo balengele na bisonga ne bashinkwa bo balengele na mañanzañanza auma. 4 Kepo atongwele bena Levi bamo ba kwingijila ku Jikwachi ja Yehoba+ kuba’mba banemekenga,* basantenga ne kutota Yehoba Lesa wa Isalela. 5 Asafwa+ ye wajinga mukulumpe, ne wa kibiji kwi aye wajinga Zekaliya; ne Yeyela, Shemilamota, Yehiela, Matitiya, Eliaba, Benaya, Obeda-edomu ne Yeyela+ bajizhizhenga bijimba bya mizhinge ne byansa;+ kabiji Asafwa wajizhizhenga nsonsolo,+ 6 kabiji bañanga abo ba Benaya ne Yahaziela bajizhizhengatu matolompita kulutwe ya jikwachi ja lulayañano lwa Lesa wa kine.

7 Pa jonkaja juba, kyo kyajinga kimye kitanshi Davida kyo anembele lwimbo wa kutota Yehoba ne kwambila Asafwa+ ne balongo banji kumwimba’mba:

10 Itotelai mu jizhina janji jazhila.+

Michima ya boba bakeba Yehoba isangalale.+

11 Kebainga Yehoba+ ne bulume bwanji.

Kebainga kilungi kyanji kimye kyonse.+

14 Aye ye Yehoba Lesa wetu.+

Mizhilo yanji yakumbana ntanda yonse.+

23 Mwimbilai Yehoba, anweba bonse ba pano pa ntanda!

Bijikainga lupulukilo lwanji pa juba pa juba!+

25 Mambo Yehoba ye mukatampe kabiji wafwainwa kutotwa.

Aye ulengesha bingi moyo kukila balesa bonse.+

Mufukaminai* Yehoba mu bivwalo byawama byazhila.*+

30 Zakamai ku meso anji, anweba bonse ba pano pa ntanda!

Ntanda* yaikajikwa; kechi bakonsha kwiifumyapo* ne.+

Ne bantu bonse baambile’mba, “Amena!”* kabiji batotele Yehoba.

37 Kepo Davida ashile Asafwa+ ne balongo banji konkakwa ku jikwachi ja lulayañano lwa Yehoba kuba’mba bengijilenga ku Jikwachi kimye kyonse,+ monka mwayijile mwingilo wa pa juba pa juba.+ 38 Obeda-edomu ne balongo banji bajinga 68, ne Obeda-edomu, mwana wa kwa Yedutuna, ne Hosa bajinga bakalama ba kibelo; 39 kabiji Zadoka+ ñanga ne bañanga bakwabo, bajinga kulutwe ya tente wa lusambakeno wa Yehoba pa mpunzha yatuntama mu Gibeona+ 40 kuba’mba balambulenga milambo ya kusoka kwi Yehoba kimye kyonse pa kya kusokelapo milambo ya kusoka, lukelo ne mabanga, ne kuba bintu byonse byanembwa mu Mizhilo ya Yehoba yo akambizhe bena Isalela.+ 41 Abo bajinga ne Hemanyi ne Yedutuna+ ne bantu bonse bashala bo basajile bo batongwele mazhina kuba’mba basanchilenga Yehoba,+ mambo “butemwe bwanji bubula kwaluka bo bwa myaka ne myaka”;+ 42 kabiji bajinga ne Hemanyi+ ne Yedutuna kuba’mba bavumyenga matolompita, nsonsolo ne byombesha byo baingijishenga kutotelamo* Lesa wa kine; kabiji baana ba kwa Yedutuna+ bajinga ku kibelo. 43 Kepo bantu bonse bayile ku mazubo abo, ne Davida naye wayile na kupesha ba mu nzubo yanji.

17 Davida byo aikele mu nzubo* yanji, waambijile ngauzhi Natana+ amba: “Amiwa mbena kwikala mu nzubo ya bichi bya sida+ pakuba jikwachi ja lulayañano lwa Yehoba jaikala mu tente.”+ 2 Natana wamukumbwile Davida amba: “Ubai kyonse kyasaka kuba muchima wenu, mambo Lesa wa kine uji nenu.”

3 Bonkabwa bufuku, Lesa waambijile Natana amba: 4 “Yanga ukamubuule kalume wami Davida amba, ‘Yehoba waamba’mba: “Obewa kechi yobe ukanshimikila nzubo ya kwikalamo ne.+ 5 Mambo nkyangye kwikalapo mu nzubo kufuma juba jo naletele bena Isalela kufikatu ne lelo jino, bino nafuminenga mu tente umo kuya mu tente mukwabo ne kufuma ku mpunzha imo kuya ku mpunzha ikwabo.+ 6 Kimye kyonse kyo naendelenga na bena Isalela bonse, nanchi naambilepo kyambo nangwa kimo ku umo wa mu bamitonyi ba bena Isalela bo natongwele kulama bantu bami byonka byuba kafunga ne kwamba’mba, ‘Mambo ka o mwabujile kunshimikila nzubo ya bichi bya sida nyi?’”’

7 “Pano umubuule bino kalume wami Davida amba, ‘Yehoba wa mabumba waamba’mba: “Nakusendele kufuma ku mpunzha ya munyemvu, ne kukulekesha kufunga mikooko, kuba’mba wikale ntangi wa bantu bami bena Isalela.+ 8 Kabiji nkekala nobe konse ko ukayanga,+ kabiji nkonauna* balwanyi bobe bonse baji kulutwe yobe;+ nkatumbijika jizhina jobe nobe mazhina a bantu batumbalala pano pa ntanda.+ 9 Bantu bami bena Isalela nkebatongwela mpunzha ne kwibekazha monka, ne abo bakekala monka kabiji kafwako ukebakatazhanga ne; kechi bakebamanyikanga* jibiji ku bantu babi byonka byo baubanga kala ne,+ 10 kufumatu juba jo natongwele bamitonyi ba kulama bantu bami bena Isalela.+ Nkashinda balwanyi bobe bonse.+ Kabiji nakubuula namba, ‘Yehoba ukakushimikila nzubo.’*

11 “‘“Moba obe byo akapwa ne byo ukaya na kulaala kwalaala bashakulu bobe, nkaswanyikapo mwanobe* pe obewa, umo wa mu baana bobe,+ kabiji nkekajika bufumu bwanji.+ 12 Ye ukanshimikila nzubo,+ kabiji nkekajika jitanda janji myaka ne myaka.+ 13 Nkekala shanji, ne aye ukekala mwanami.+ Kechi nkaleka kumumwesha butemwe bwami bubula kwaluka+ byonka byo nalekele kwibumwesha ku yewa ye waswaine ne.+ 14 Nkamutongola kwikala mu nzubo yami ne pa bufumu bwami myaka ne myaka,+ kabiji jitanda janji jikekala myaka ne myaka.”’”+

15 Natana wabuujile Davida bino byambo byonse ne kino kimwesho kyonse.

16 Ponkapo Mfumu Davida watwelele ne kwikala panshi ku meso a Yehoba ne kwamba’mba: “Nanchi yami ñanyi, anweba Yehoba Lesa? Kabiji nzubo yami yo ya byepi byo mwangubila bino bintu byonse?+ 17 Kabiji kununga pa bino bintu, anweba Lesa, mwaamba ne pa bikamwekela nzubo yami kulutwe amiwa kalume wenu,+ kabiji mwammonatu nobe ne muntu wafwainwa kutumbijikwa* jikwabo, anweba Yehoba Lesa. 18 Nanchi ñanyi bintu bikwabo byo nakonsha kwamba amiwa Davida kalume wenu kwi anweba pa mambo a munema ye mwannemeka byo mwangyuka bulongo amiwa kalume wenu?+ 19 Anweba Yehoba, na mambo a amiwa kalume wenu ne monka mwayila kyaswa muchima wenu, mwauba bino bintu byonse bikatampe byo mwasolola bukata bwenu.+ 20 Anweba Yehoba, kafwako waesakana ne anweba ne,+ kabiji kafwako Lesa mukwabo ne, kanatu yenka anweba;+ bintu byonse byo twaumvwa na matwi etu bimwesha’mba kino kya kine. 21 Kabiji ñanyi kisaka kikwabo pano pa ntanda kyaesakana na bantu benu bena Isalela?+ Anweba Lesa wa kine mwayile na kwibapokolola kabiji baikele ke bantu benu.+ Mwatumbalele byo mwaubile bintu bikatampe bilengesha moyo,+ mwapangile bisaka bya bantu ku meso a bantu benu,+ bo mwapokolwele mu Ijipita. 22 Mwaalwile bantu benu bena Isalela kwikala ke bantu benu myaka ne myaka;+ kabiji anweba Yehoba mwaikele ke Lesa wabo.+ 23 Pano anweba Yehoba, mulaye ye mwandaya amiwa kalume wenu ne ba mu nzubo yami akekale wa kine myaka yonse, kabiji mukoobe byonka byo mwalaya.+ 24 Jizhina jenu jikale* ne kutumbijikwa+ myaka ne myaka, pa kuba’mba bantu bakambe’mba, ‘Yehoba wa mabumba, Lesa wa Isalela, ye Lesa wa bena Isalela,’ kabiji mwikajike nzubo yami amiwa kalume wenu Davida.+ 25 Mambo anweba Lesa wami, mwasolola kwi amiwa kalume wenu amba mukeba kunshimikila nzubo.* O ene mambo amiwa kalume wenu o naikela na luketekelo ne kulomba luno lulombelo kwi anweba. 26 Anweba Yehoba, yenu Lesa wa kine, kabiji mwandaya amiwa kalume wenu bino bintu byawama. 27 Onkao mambo, kimutokele ku muchima kupesha nzubo yami amiwa kalume wenu, kabiji ikalenga kwi anweba myaka ne myaka, mambo anweba Yehoba, mwiipesha, kabiji mwiipesha myaka ne myaka.”

18 Byo papichile moba, Davida washinjile bena Filishitiya ne kwibakookesha, ne kwangata Gata+ ne mande anji* mu maboko a bena Filishitiya.+ 2 Kabiji washinjile Moabu,+ ne bena Moabu baikele ke bakalume ba kwa Davida kabiji bamuletelanga milambo.+

3 Davida washinjile Hadadeza Mfumu+ wa Zoba+ kwipi na Hamata+ byo ayilenga na kwikajika bukalama bwanji ku Mukola wa Ufelata.+ 4 Davida wamwangachile makalaki 1,000, bantu benda pa bambili 7,000, ne bashilikale benda panshi 20,000.+ Kepo Davida achibile mishipeshipe ya ku maulu a bambili bonse, bino washilepo bambili ba ku makalaki 100.+ 5 Bena Silya ba ku Damasakasa byo baishile na kukwasha Hadadeza Mfumu wa Zoba, Davida watapile bena Silya 22,000.+ 6 Kepo Davida abikileko bashilikale ku Silya mu Damasakasa, ne bena Silya baikele ke bakalume ba kwa Davida kabiji bamuletelanga milambo. Yehoba walengelanga Davida kushinda* konse ko ayanga.+ 7 Kabiji Davida waangachile makebo a nzhingwile a ngolode a bakalume ba kwa Hadadeza ne kwialeta ku Yelusalema. 8 Davida wasendele mukuba wavula kufuma mu muzhi wa Tibihata ne wa Kuna, mizhi ya kwa Hadadeza. Uno mukuba Solomone yeye alengejile Kizhiba kya mukuba,+ mashiki, ne bipe bya mukuba.+

9 Toi Mfumu wa Hamata byo aumvwine’mba Davida washinda nzhita yonse ya kwa Hadadeza+ Mfumu wa Zoba,+ 10 ponkapo watumine mwananji wa mulume aye Hadolamu kwi Davida Mfumu na kumwimuna ne kumusanchila mambo walwile na Hadadeza ne kumushinda (mambo Hadadeza walwanga ne Toi javula), kabiji waletele bipe byonse byapusana pusana bya ngolode, bya siliva, ne bya mukuba. 11 Mfumu Davida wapaine bino bintu kwi Yehoba,+ pamo na siliva ne ngolode yo asendele kufuma ku bisaka byonse bya bantu: ku Edomu, ku Moabu, ku bena Amonyi,+ ku bena Filishitiya,+ ne ku bena Amaleki.+

12 Abishai+ mwana wa kwa Zeluya+ waipayile bena Edomu 18,000 mu Musanza wa Mukele.+ 13 Wabikilemo bashilikale mu Edomu, kabiji bena Edomu bonse baikele ke bakalume ba kwa Davida.+ Yehoba walengelanga Davida kushinda* konse ko ayanga.+ 14 Davida walaminenga bena Isalela bonse,+ kabiji bantu banji bonse wibachibilanga mambo monka mo aolokela.+ 15 Yoaba mwana wa kwa Zeluya ye wajinga mukulumpe wa nzhita,+ kabiji Yehoshafwata+ mwana wa kwa Ahiluda wajinga munembeshi wa mambo, 16 Zadoka mwana wa kwa Ahituba ne Ahimeleki mwana wa kwa Abiata bajinga bañanga, ne Shavesha wajinga munembeshi. 17 Benaya mwana wa kwa Yehoyada watangijilanga bena Keleta+ ne bena Peleta.+ Baana ba kwa Davida bajinga pa bifulo bitanshi kulondela pe mfumu.

19 Byo papichile moba, Nahashi mfumu wa bena Amonyi wafwile, kabiji mwananji waswaine pa bufumu.+ 2 Ponkapo Davida waambile’mba: “Hanuna mwana wa kwa Nahashi nsakumumwesha butemwe bubula kwaluka,+ mambo bashanji bammwesheshe butemwe bubula kwaluka.” Byonkabyo, Davida watumine baluwe kuya na kumutekenesha mambo wafwishishe bashanji. Bino bakalume ba kwa Davida byo bafikile mu kyalo kya bena Amonyi+ na kutekenesha Hanuna, 3 babinemanga ba bena Amonyi baambijile Hanuna amba: “Nanchi mwalanguluka’mba Davida ubena kunemeka bashenu byo atuma ba kwimutekenesha nyi? Nanchi kechi watuma bakalume banji kwi anweba kuba’mba bataletale bulongo kyalo ne kwikiyuka byo kiji ne kwimufumya pa bufumu nenyi?” 4 Onkao mambo, Hanuna wakwachile bakalume ba kwa Davida ne kwibatenda+ ne kuchibako bivwalo byabo pa matako kabiji wibalekele’mba bayenga. 5 Davida byo bamubuujile bano banabalume, ponkapotu watumine ba kwibatundaila, mambo bano banabalulme bebalengeshe bingi bumvu; kabiji mfumu wibambijile’mba: “Mwikale mu Yeliko+ kufikatu ne myevu yenu byo ikakoma jikwabo, apa bino mukeye.”

6 Bena Amonyi bayukile’mba Davida wibashikwa, onkao mambo, Hanuna ne bena Amonyi batumine matalenta* a siliva 1,000 kuya na kobola makalaki ne bantu benda pa bambili ba ku Mesopotamya,* ba ku Alamu-maaka ne ba ku Zoba.+ 7 Byonkabyo, baobwele makalaki 32,000, pamo na mfumu wa Maaka ne bantu banji. Kepo baishile na kutebelela kwipi na ku Medeba.+ Bena Amonyi bakonkene pamo kufuma mu mizhi yabo kabiji baishile na kulwa.

8 Davida byo aumvwine kino, watumine Yoaba+ ne nzhita yonse, kubikapotu ne babilobo banji.+ 9 Kabiji bena Amonyi balupukile ne kwitanchika na kulwa ku kibelo kya muzhi kabiji bamfumu baishile bajinga kwa bunke mungye.

10 Yoaba byo amwene’mba bashilikale babena kwiya ko aji kulutwe ne kunyuma, wasajile bashilikale ba bena Isalela bayuka kulwa ne kwibatanchika kuba’mba balwe na bena Silya.+ 11 Aba bashajilepo wibapaine* kwi Abishai mulongo wanji+ amba ebatangijile, ne kwibatanchika kuba’mba balwe na bena Amonyi. 12 Kepo aambile’mba: “Inge bena Silya+ bakose kunkila, wafwainwa kwiya na kunkwasha; bino inge bena Amonyi bakose kukukila, nsakwiya na kukukwasha. 13 Twafwainwa kukosa ne kuchinchika+ ne kulwilako bantu betu ne mizhi ya Lesa wetu, kabiji Yehoba usakuba kyo amona’mba kyawama.”

14 Kepo Yoaba ne bantu banji bayile ku bwipi na bena Silya amba balwe, ne abo bamunyemene.+ 15 Bena Amonyi byo bamwene’mba bena Silya banyema, ne abo bamunyemene mulongo wanji aye Abishai ne kukatwela mu muzhi. Kepo Yoaba ayile ku Yelusalema.

16 Bena Silya byo bamwene’mba bebashinda ku bena Isalela, batumine baluwe kuya na kwita bena Silya bajinga mu kibunji kya ku Mukola,*+ Shofwaka mukulumpe wa nzhita ya kwa Hadadeza saka ebatangijila.+

17 Davida byo bamubuujile, ponkapo wakonkenye bena Isalela bonse kabiji baabukile Yodano ne kuya na kwitanchika kuba’mba balwe nabo. Davida waimene kuba’mba alwe na bena Silya, ne abo balwile nanji.+ 18 Bino bena Silya banyemene bena Isalela; Davida waipayile benda pa makalaki 7,000 ne bashilikale ba bena Silya benda panshi 40,000, kabiji waipayile Shofwaka mukulumpe wa nzhita. 19 Ba mwingilo ba kwa Hadadeza byo bamwene’mba bebashinda ku bena Isalela,+ ponkapo balayañene lulayañano lwa mutende ne Davida ne kwikala ke ba mingilo banji;+ kabiji bena Silya kechi bakwashishepo jibiji bena Amonyi ne.

20 Ku ntendekelo ya mwaka,* kimye bamfumu kyo bayilangapo ku makondo, Yoaba+ ye watangijile nzhita yaonawine kyalo kya bena Amonyi; wayile na kuzhokoloka muzhi wa Laba,+ Davida saka ashala mu Yelusalema.+ Yoaba walukukile muzhi wa Laba ne kumonauna.+ 2 Kepo Davida afumishe munchinya wajinga ku mutwe wa kwa Malakama, ne kutaana’mba wanemene kwesakena na talenta* umo wa ngolode, kabiji wajinga na mabwe a buneme; uno munchinya bamuvwikile ku mutwe wa kwa Davida. Kabiji wasendele ne bipukulwa byavula byajinga mu muzhi.+ 3 Wasendele bantu bajinga mu muzhi ne kwibapa mwingilo wa kwingila+ na baso ba mabwe ne wa kwingila na byela bya kapotwe byatwa ne wa kwingila na tupasa. Abino Davida byo byo aubile ku mizhi yonse ya bena Amonyi. Kepo Davida ne bashilikale bonse babwelele ku Yelusalema.

4 Kabiji nkondo yabuukile ku Gezela na bena Filishitiya. Pa kyonkakya kimye Sibekai+ mwina Husha watapile Sipai, wajinga wa mu kisemi kya kwa Lefwaimu,+ kabiji bena Filishitiya bebashinjile.

5 Kabiji kwabuukile nkondo jikwabo na bena Filishitiya, kabiji Elanane mwana wa kwa Yaila watapile Lami mulongo wa kwa Goliata+ mwina Gata, wajinga na jifumo jajinga na musako nobe kakonkobele ko bapikwilapo bisapi.+

6 Kwabuukile nkondo jikwabo ku Gata,+ konka kwajinga muntu wazamine bingi,+ wajinga na minwe itanu na umo ku maboko onse, ne mana atanu na jimo ku maulu onse, byonse pamo byajinga 24; kabiji aye naye wajinga wa mu kisemi kya kwa Lefwaimu.+ 7 Waendelekelenga+ bena Isalela. Onkao mambo, bamutapile kwi Yonafwanyi mwana wa kwa Shimea+ mulongo wa kwa Davida.

8 Bano bo bajinga ba mu kisemi kya kwa Lefwaimu+ mu Gata,+ kabiji bebatapile kwi Davida ne bakalume banji.

21 Kabiji Satana* waimenejile bena Isalela ne kutundaika Davida kubala bena Isalela.+ 2 Byonkabyo, Davida waambijile Yoaba+ ne babinemanga ba bantu amba: “Yainga mukabale bena Isalela kufuma ku Belesheba kukafika ne ku Danyi;+ kabiji mukabwezhe sawakya ko nji kuba’mba nkayuke kuvula kwabo.” 3 Bino Yoaba waambile’mba: “Yehoba avuzhe bantu banji bimye 100! Anweba nkambo mfumu, nanchi bano bonse kechi bakalume benu anweba nkambo nenyi? Mambo ka anweba nkambo o mubena kukebela kuba kino kintu? Mambo ka o mukebela kulengela bena Isalela kwikala na mambo?”

4 Pakuba byambo bya mfumu byajinga na bulume kukila bya kwa Yoaba. Onkao mambo, Yoaba wayile na kupitañana mu Isalela monse, kepo abwelele ku Yelusalema.+ 5 Kabiji Yoaba wapele Davida kibelengelo kya bantu bo banembele. Banabalume bena Isalela bonse bajinga na mapoko, bajinga 1,100,000 ne banabalume bena Yuda bajinga na mapoko, bajinga 470,000.+ 6 Pano bino, bena Levi ne bena Benjamina kechi bebanembele ne,+ mambo Yoaba wibishikilwe bingi byambo bya mfumu.+

7 Kino kintu kyamufichile bingi ku muchima Lesa wa kine, onkao mambo, wapumine bena Isalela. 8 Kepo Davida aambijile Lesa wa kine amba: “Nalenga mambo+ akatampe byo nauba kino kintu. Pano napopwela, ndekelaiko mambo+ amiwa kalume wenu, mambo nauba kintu kya kubula maana.”+ 9 Kepo Yehoba aambijile Gadi+ yenka wamwenanga Davida bimwesho amba: 10 “Yanga ukamubuule Davida amba, ‘Yehoba waamba’mba: “Nakupa bintu bisatu. Usalepo kimo kyo nafwainwa kukuba.”’” 11 Onkao mambo, Gadi wayile kwi Davida ne kumubuula’mba: “Yehoba waamba’mba, ‘Salapo kyo ukeba 12 kana myaka isatu ya kipowe kya nzala,+ nangwa bañondo basatu ba kukonauna ku balwanyi bobe saka bakupangisha na mpoko,+ nangwa moba asatu a kukonauna na mpoko ya Yehoba, ko kuba’mba mwalo mu kyalo,+ ne malaika wa Yehoba saka onauna+ bantu mu nyaunda yonse ya Isalela.’ Pano langulukishaipo bulongo pa kyo nsakuya na kubuula awa wantuma.” 13 Onkao mambo, Davida waambijile Gadi amba: “Kino kintu kyandetela bingi bulanda. Kyawama kuba’mba mponene mu kuboko kwa Yehoba, mambo lusa lwanji lo lukatampe;+ bino kange mponene mu kuboko kwa muntu ne.”+

14 Kepo Yehoba atumine mwalo+ pa bena Isalela, kya kuba bantu 70,000 bafwile mu bena Isalela.+ 15 Kabiji Lesa wa kine watumine malaika ku Yelusalema na kumonauna; bino byo ajingatu pepi kumonauna, Yehoba wamumwene ne kwilangulusha* na mambo a bya malwa,+ kabiji waambijile malaika waletele lonaiko amba: “Kyapwa!+ Pano kileke.” Malaika wa Yehoba waimenetu kwipi na kipujilo kya kwa Olananyi+ mwina Yebusi.+

16 Davida byo ainwine kilungi, wamwene malaika wa Yehoba saka aimana pakachi ka ntanda ne jiulu saka aji na mpoko+ yo asomwene mu kikwa yajinga mu kuboko kwanji ko atanyikile ku Yelusalema. Davida ne bakulumpe benyingile bisapi bya majila,+ kabiji ponkapotu baponejile panshi kinkuvumene.+ 17 Davida waambijile Lesa wa kine amba: “Nanchi kechi yami naambile namba bantu bebabale nenyi? Yami nalenga mambo,+ kabiji yami natamisha; pakuba ino mikooko, ñanyi kintu kyo yauba? Napopwela anweba Yehoba Lesa wami, kuboko kwenu kunkambule amiwa ne ba mu nzubo ya batata; bino kange mulete uno mwalo pa bantu benu ne.”+

18 Kepo malaika wa Yehoba aambijile Gadi+ kuya na kubuula Davida amba yainga mukashimike kya kusokelapo bitapisho kwi Yehoba ku kipujilo kya kwa Olananyi mwina Yebusi.+ 19 Byonkabyo, Davida wayile monka mwayijile byambo bya kwa Gadi byo aambijile mu jizhina ja Yehoba. 20 Kabiji Olananyi waalulukile ne kumona malaika, kabiji baana banji bana bo ajinga nabo bafyamine. Olananyi wapujilenga wichi. 21 Davida byo ayile kwi aye, Olananyi wakenkentele ne kumona Davida, ponkapotu wafumine ku kipujilo ne kufukamina Davida saka akinka kilungi kyanji panshi. 22 Davida waambijile Olananyi amba: “Mpoteshe* mpunzha ya kipujilo, kuba’mba nshimikepo kya kusokelapo bitapisho kwi Yehoba. Mpoteshe pa mutengo wayo, pa kuba’mba mwalo waiya pa bantu ekileke.”+ 23 Bino Olananyi waambijile Davida amba: “Isendaitu ikale yenu, kabiji anweba nkambo mfumu ubai kyonse kyo mwamona amba kyawama.* Nemupa bañombe ba milambo ya kusoka ne kichi kya kupujilako+ kuba’mba kikale ke nkunyi ne wichi kwikala mulambo wa kajo. Nebipana byonse.”

24 Nangwa byonkabyo, Mfumu Davida waambijile Olananyi amba: “Ine, nsakwiipota pa mutengo wayo, mambo kechi nsakutambula kintu kyobe ne kwikipana kwi Yehoba nangwa kutapisha bitapisho bya kusoka kwa kubula kupota ne.”+ 25 Byonkabyo, Davida wapele Olananyi ngolode yanemene mashekele* 600 ya kupota yoya mpunzha. 26 Kabiji Davida washimikijile Yehoba kya kusokelapo bitapisho+ konkakwa ne kulambwilapo bitapisho bya kusoka ne bitapisho bya mutende, kabiji walombele kwi Yehoba, ne aye wamukumbwile na mujilo+ wafumine mwiulu waishile pa kya kusokelapo bitapisho kya mulambo wa kusoka. 27 Kepo Yehoba akambizhe malaika+ kubwezha mpoko yanji mu kikwa. 28 Pa kyokya kimye, Davida byo amwene’mba Yehoba wamukumbula konka ku kipujilo kya kwa Olananyi mwina Yebusi, watwajijile kutapisha konkakwa. 29 Nangwa byonkabyo, tente wa lusambakeno wa Yehoba Mosesa ye alengele mu kiselebwa ne kya kusokelapo bitapisho kya mulambo wa kusoka byajinga pa mpunzha yatuntama mu Gibeona+ pa kyokya kimye. 30 Bino Davida kechi wakonsheshe kuyako na kwipuzha Lesa ne, mambo wachine mpoko ya malaika wa Yehoba.

22 Kepo Davida aambile’mba: “Ino yo nzubo ya Yehoba Lesa wa kine, kabiji kino kyo kya kusokelapo bitapisho bya mulambo wa kusoka wa bena Isalela.”+

2 Kabiji Davida wakambizhe’mba bakonkanye pamo bantu bafumine ku byalo bingi+ bajinga mu kyalo kya Isalela, kabiji wibapele mwingilo wa kuchiba ne kusonga mabwe a kushimikila nzubo ya Lesa wa kine.+ 3 Kabiji Davida wanengezhezhe ne kapotwe wavula wa kulengelako misomali ya ku binzhilo bya ku bibelo ne wa kulengelako makalampa, ne mukuba wavula wa kukankalwa kupima,+ 4 ne bichi bya sida+ bya kukankalwa kubala, mambo bena Shidona+ ne bena Tila+ baletele bichi bya sida byavula bingi kwi Davida. 5 Kabiji Davida waambile’mba: “Mwanami Solomone ukiji mwanyike kabiji kechi wayuka bintu byavula ne,*+ ne nzubo yo akashimikila Yehoba ikabaya bingi,+ kya kuba nkuwa yayo ne lukumo+ lwayo lukafika mu byalo byonse.+ Onkao mambo, nsakumunengezhezha bintu.” Byonkabyo, Davida wanengezhezhe bintu byavula saka akyangye kufwa.

6 Kabiji waichile mwananji aye Solomone ne kumukambizha kushimika nzubo ya Yehoba Lesa wa Isalela. 7 Davida waambijile Solomone mwananji amba: “Muchima wami wakebeshe bingi kushimika nzubo mwa kutumbijikila jizhina ja Yehoba Lesa wami.+ 8 Bino jiwi ja Yehoba jaishile kwi amiwa amba, ‘Waichila mashi avula bingi ne kulwa makondo akatampe. Kechi ukanshimikila nzubo mwa kutumbijikila jizhina jami ne,+ mambo waichila mashi avula bingi pano pa ntanda ku meso ami. 9 Pano umvwa! Ukasema mwana wa mulume+ ukekala muntu wa mutende,* kabiji nkamulengela kukokoloka ku balwanyi banji bonse bakamuzhokoloka,+ mambo Solomone*+ jo jikekala jizhina janji kabiji nkalengela bena Isalela kwikala mu mutende ne ku matwi nzoo mu moba anji.+ 10 Ye ukanshimikila nzubo mwa kutumbijikila jizhina jami.+ Ukekala mwanami, ne amiwa nkekala shanji.+ Nkekajika jitanda ja bufumu bwanji pa bena Isalela myaka ne myaka.’+

11 “Pano mwanami, Yehoba ekale nobe, kabiji umonenga byawama ne kushimika nzubo ya Yehoba Lesa wobe, byonkatu byo aambile na mambo a obewa.+ 12 Yehoba akakupe maana ne milangwe+ kimye kyo akakupa bukalama bwa pa bena Isalela, pa kuba’mba ukalondelenga mizhilo ya Yehoba Lesa wobe.+ 13 Inge ukalondelenga bulongo malamuna+ ne mizhilo Yehoba yo akambizhe Mosesa kupa bena Isalela,+ po po ukamonanga byawama. Chinchika ne kukosa. Kange ube moyo nangwa kukakilwa ne.+ 14 Amiwa namanama bingi pa kunengezha bintu bya ku nzubo ya Yehoba, matalenta* a ngolode 100,000, matalenta a siliva 1,000,000 ne mukuba wavula ne kapotwe+ bya kukankalwa kupima, kabiji nanengezha bichi ne mabwe,+ bino ne obewa ukanungapo. 15 Obewa uji na ba mingilo bavula—basonga mabwe, bashimika na mabwe,+ basendwe ba bichi ne basendwe bavula bapusana pusana.+ 16 Ngolode, siliva, mukuba ne kapotwe byavula bya kukankalwa kupima.+ Imana utendeke mwingilo, kabiji Yehoba ekale nobe.”+

17 Kepo Davida akambizhe babinemanga bonse ba bena Isalela amba bakwashe mwananji aye Solomone ne kwamba’mba: 18 “Nanchi Yehoba Lesa wenu kechi uji nenu, kabiji kechi wimulengela kukokoloka konse konse nenyi? Mambo wampele bangikazhi ba mu kino kyalo, kabiji kyalo bekishinda ku meso a Yehoba ne ku meso a bantu banji. 19 Pano fuukulaipo mu michima yenu ne myeo* yenu kukeba Yehoba Lesa wenu,+ ne kutendeka kushimika nzubo yazhila ya Yehoba Lesa wa kine,+ pa kuba’mba balete jikwachi ja lulayañano lwa Yehoba ne bipe byazhila bya Lesa wa kine+ mu nzubo yo bashimika ya kutumbijikilamo jizhina ja Yehoba.”+

23 Davida byo akotele kabiji byo ajinga pepi kufwa,* waswanyikile Solomone mwananji kwikala mfumu wa bena Isalela.+ 2 Kepo akonkenye babinemanga bonse ba bena Isalela ne bañanga+ ne bena Levi.+ 3 Bena Levi bajinga na myaka ya kusemwa 30 ne kuya peulu bebabajile;+ bebabajile pa muntu pa muntu,* kabiji bajinga 38,000. 4 Pa bano, bantu 24,000 batangijilenga mwingilo wa ku nzubo ya Yehoba, kabiji kwajinga bantangi ne bamitonyi 6,000,+ 5 kabiji kwajinga bakalama ba bibelo 4,000,+ ne bantu 4,000 batotanga+ Yehoba na bijimba byonka Davida byo aambilepo’mba, “Nebilengele’mba bikekale bya kumutotelamo.”

6 Kabiji Davida wibabenye mu bipanyi+ monka mwayijile baana ba kwa Levi: Geleshona, Kohati ne Melali.+ 7 Mu bena Geleshona mwafumine Ladana ne Shimei. 8 Baana ba kwa Ladana bajinga Yehiela mwina muzhi, Zetama ne Yoela,+ bonse pamo bajinga basatu. 9 Baana ba kwa Shimei bajinga Shelomoto, Haziela ne Halana, bonse pamo bajinga basatu. Bano bo bajinga bakulumpe ba bikota bya kwa Ladana. 10 Kabiji baana ba kwa Shimei bajinga Yahata, Zina, Yeusha ne Beliya. Bano bana bo bajinga baana ba kwa Shimei. 11 Yahata ye wajinga mukulumpe ne Zizaa, wajinga wa bubiji. Bino na mambo a kuba Yeusha ne Beliya kechi bajinga na baana ba balume bavula ne, bebabajile kwikala kikota kimo kabiji bebapele mwingilo umo.

12 Baana ba kwa Kohati bajinga Amulamu, Izahala,+ Hebulona ne Uziela,+ bonse pamo bajinga bana. 13 Baana ba kwa Amulamu bajinga Alona+ ne Mosesa.+ Bino Alona bamusajile kikupu+ kuba’mba azhijikenga Mwazhijisha, aye ne baana banji, kuba’mba batapishenga bitapisho kwi Yehoba, ne kumwingijila, ne kupeshanga bantu mu jizhina janji.+ 14 Bino baana ba kwa Mosesa muntu wa Lesa wa kine, bebabajijile ku mukoka wa bena Levi. 15 Baana ba kwa Mosesa bajinga Geleshoma+ ne Elieza.+ 16 Mu baana ba kwa Geleshoma, Shebwela+ ye wajinga mukulumpe. 17 Mu kisemi* kya kwa Elieza, Lehabiya+ ye wajinga mukulumpe; Elieza kechi wajingapo na baana ba balume bakwabo ne, bino baana ba kwa Lehabiya bavujile bingi. 18 Mu baana ba kwa Izahala,+ Shelomita+ ye wajinga mwina muzhi. 19 Baana ba kwa Hebulona bajinga, Yeliya ye wajinga mukulumpe, Amaliya ye wajinga wa bubiji, Yahaziela ye wajinga wa busatu, ne Yekameama+ ye wajinga wa buna. 20 Baana ba kwa Uziela+ bajinga Mika wajinga mukulumpe ne Ishiya wajinga wa bubiji.

21 Baana ba kwa Melali bajinga Mali ne Mushi.+ Baana ba kwa mali bajinga Eleaza ne Kisha. 22 Eleaza wafwile, bino kechi wasemenepo baana ba balume ne, wasemenetu ba bakazhi. Onkao mambo, bebasongwele ku balongo babo, baana ba kwa Kisha. 23 Baana ba kwa Mushi bajinga Mali, Edela ne Yelemota, bonse pamo bajinga basatu.

24 Bano bo bajinga baana ba kwa Levi monka mwayijile bikota byabo, bakulumpe ba bikota, aba bo banembele ne kwibabala ne kwibatanchika monka mwayijile mazhina abo kabiji bonka baingijilenga mwingilo wa ku nzubo ya Yehoba, kutendekela pa baji na myaka 20 kuya peulu. 25 Mambo Davida waambile’mba: “Yehoba, Lesa wa Isalela walengela bantu banji kukokoloka,+ kabiji ukekalanga mu Yelusalema kikupu.+ 26 Kabiji bena Levi kechi bakasendanga tente wa lusambakeno nangwa bipe bya kwingijisha ku mwingilo wanji ne.”+ 27 Mambo monka mwayijile mikambizho ya kwa Davida yapeleleko, bena Levi kutendekela pa baji na myaka 20 kuya peulu bebabajile. 28 Mwingilo wabo wajinga wa kukwasha baana ba kwa Alona+ mu mwingilo wa ku nzubo ya Yehoba, kutalanga pa bipango,+ bibamba mwa kujiila ne kutokesha bintu byonse byazhila, ne mwingilo yense wa ku nzubo ya Lesa wa kine. 29 Bebakwashangako mwingilo wa kulenga bashinkwa+ bo batentakanya,* bunga bwalamba bwa mulambo wa kajo, bibebulwa bya shinkwa wabula mbizho,+ bashinkwa ba pa kikango, muvuba ye bakanda,+ ne mitundu yonse ya bipimo. 30 Baimananga lukelo pa juba pa juba+ na kusanchila ne kutota Yehoba ne mabanga byonkabyo.+ 31 Bakwashañananga kimye kya kutapisha bitapisho bya kusoka kwi Yehoba pa moba a Sabado,+ pa kutentama kwa ñondo,+ ne pa bijiilo,+ monka mwayijile kuvula kwabo kwesakana na mizhilo yo bebapele, baubanga bino kimye kyonse ku meso a Yehoba. 32 Baingilanga ne mingilo yabo ya ku tente wa lusambakeno, ne mingilo ya mu mpunzha yazhila ne kwingijila balongo babo baana ba kwa Alona mu mwingilo wa ku nzubo ya Yehoba.

24 Bino byo byajinga bipanyi bya kisemi kya kwa Alona: Baana ba kwa Alona bajinga Nadaba, Abihu,+ Eleaza ne Itamala.+ 2 Nangwa byonkabyo, Nadaba ne Abihu bafwile shabo saka akiji na bumi,+ kabiji kechi basemenepo baana ba balume ne; bino Eleaza+ ne Itamala batwajijile kwikala bañanga. 3 Davida pamo ne Zadoka+ wa mu baana ba kwa Eleaza ne Ahimeleki wa mu baana ba kwa Itamala, bebabenye mu bipanyi bya kwingijilamo mwingilo wabo. 4 Na mambo a kuba baana ba kwa Eleaza bajinga na bena mizhi bavula kukila baana ba kwa Itamala, bebabenye kwesakana na byo bajinga: Baana ba kwa Eleaza bajinga na bakulumpe 16 ba bikota byabo, ne baana ba kwa Itamala bajinga na bakulumpe batanu na basatu ba bikota byabo.

5 Kabiji bebabenye kupichila mu kuta bubale,+ jibumba jimo pamo na jibumba jikwabo, mambo kwajinga babinemanga ba mu mpunzha yazhila ne babinemanga ba Lesa wa kine ba mu baana ba kwa Eleaza ne ba mu baana ba kwa Itamala. 6 Kepo Shemaya mwana wa kwa Netanela munembeshi wa bena Levi anembele mazhina abo mfumu saka atalako, ne a babinemanga, ne a kwa Zadoka+ ñanga, ne a kwa Ahimeleki+ mwana wa kwa Abiata,+ ne a bakulumpe ba bikota bya bañanga ne bena Levi, basajile kikota kimo kya kwa Eleaza ne kikota kikwabo kya kwa Itamala.

7 Bubale butanshi bwakwachile Yehoyaliba; bwa bubiji bwakwachile Yedaya, 8 bwa busatu bwakwachile Halima, bwa buna bwakwachile Seolimu, 9 bwa butanu bwakwachile Malakiya, bwa butanu na bumo bwakwachile Miyamina, 10 bwa butanu na bubiji bwakwachile Hakoza, bwa butanu na busatu bwakwachile Abiya,+ 11 bwa butanu na buna bwakwachile Yeshua, bwa bujikumi bwakwachile Shekaniya, 12 bwa bu 11 bwakwachile Eliashiba, bwa bu 12 bwakwachile Yakima, 13 bwa bu 13 bwakwachile Hupa, bwa bu 14 bwakwachile Yeshebeaba, 14 bwa bu 15 bwakwachile Biliga, bwa bu 16 bwakwachile Imela, 15 bwa bu 17 bwakwachile Hezila, bwa bu 18 bwakwachile Hapizeza, 16 bwa bu 19 bwakwachile Petahiya, bwa bu 20 bwakwachile Yehezekela, 17 bwa bu 21 bwakwachile Yakina, bwa bu 22 bwakwachile Gamule, 18 bwa bu 23 bwakwachile Delaya, ne bwa bu 24 bwakwachile Maaziya.

19 Ino yo yajinga mingilo yabo+ inge baiya mu nzubo ya Yehoba monka mwayijile mutanchi walengele Alona mushakulu wabo, byonkatu Yehoba Lesa wa Isalela byo amukambizhe.

20 Kabiji mu bena Levi bashajilepo: mu baana ba kwa Amulamu,+ mwafumine Shubaela; mu baana ba kwa Shubaela+ mwafumine Yehedeya; 21 mwi Lehabiya:+ mu baana ba kwa Lehabiya mwafumine Ishiya wajinga mukulumpe; 22 mu bena Izahala mwafumine Shelomoto;+ mu baana ba kwa Shelomoto mwafumine Yahata; 23 ne mu baana ba kwa Hebulona, Yeliya+ ye wajinga mukulumpe, Amaliya ye wajinga wa bubiji, Yahaziela ye wajinga wa busatu ne Yekameama ye wajinga wa buna; 24 mu baana ba kwa Uziela mwafumine, Mika; mu baana ba kwa Mika mwafumine Shamila. 25 Mulongo wa kwa Mika wajinga Ishiya; mu baana ba kwa Ishiya mwafumine Zekaliya.

26 Baana ba kwa Melali+ bajinga Mali ne Mushi; mu baana ba kwa Yaaziya mwafumine Beno. 27 Baana ba kwa Melali: ba mu baana ba kwa Yaaziya, Beno, Shohama, Zakula ne Ibuli; 28 mu baana ba kwa Mali mwafumine Eleaza, yenka wabujile kusemapo baana ba balume;+ 29 baana ba kwa Kisha: mu baana ba kwa Kisha mwafumine Yelamela; 30 kabiji baana ba kwa Mushi bajinga Mali, Edela ne Yelimota.

Bano bo bajinga baana ba kwa Levi monka mwayijile bikota byabo. 31 Kabiji abo nabo batele bubale+ byonkatu byaubile balongo babo baana ba kwa Alona kwi Mfumu Davida, kwi Zadoka, kwi Ahimeleki ne ku meso a bakulumpe ba bikota bya bañanga ne bena Levi. Mu bikota, mukulumpe wajingatu pamo na nkasanji.

25 Kabiji Davida ne bakulumpe ba mabumba a mwingilo bapaatwilepo baana bamo ba kwa Asafwa ne ba kwa Hemanyi ne ba kwa Yedutuna+ kuba’mba baulenga na byansa, bijimba bya mizhinge+ ne nsonsolo.+ Mutanchi wa banabalume bo bapele mwingilo ye uno, 2 mu baana ba kwa Asafwa: mwafumine Zakula, Yosefwa, Netaniya ne Ashalela, baana ba kwa Asafwa bebatangijilenga kwi Asafwa, yenka waawilenga monka mwayijile mukambizho wa mfumu. 3 Mwi Yedutuna,+ baana ba kwa Yedutuna bajinga: Gedaliya, Zeli, Yeshaya, Shimei, Hashabiya ne Matitiya,+ bonse pamo bajinga batanu na umo, bebatangijilenga kwi Yedutuna shabo, yenka waawilenga na kyansa, kumusanchila Yehoba+ ne kumutota. 4 Mwi Hemanyi,+ baana ba kwa Hemanyi bajinga: Bukiya, Mataniya, Uziela, Shebwela, Yelimota, Hananiya, Hanani, Eliata, Gidalati, Lomamati-ezela, Yoshibekasha, Maloti, Hotila ne Mahaziota. 5 Bano bonse bajinga baana ba kwa Hemanyi, yenka wamwenanga mfumu bimwesho ne kwamba byambo bya Lesa wa kine bya kumuletela lukumo;* onkao mambo, Lesa wa kine wapele Hemanyi baana ba balume 14 ne baana ba bakazhi basatu. 6 Bano bonse bebatangijilenga kwi shabo mu mwingilo wa kwimba ku nzubo ya Yehoba, na nsonsolo, bijimba bya mizhinge ne byansa+ ye wajinga mwingilo wabo ku nzubo ya Lesa wa kine.

Asafwa, Yedutuna ne Hemanyi bebatangijilanga ku mfumu.

7 Bonse pamo na balongo babo bo bafunjishe kwimbila Yehoba bulongo, bajinga 288. 8 Onkao mambo, batele bubale+ bwa mingilo yabo, banyike ne bakulumpe, basendwe pamo ne boba bakifunjilenga.

9 Bubale butanshi bwakwachile Yosefwa mwana wa kwa Asafwa,+ bwa bubiji bwakwachile Gedaliya+ (aye ne balongo banji ne baana banji bajinga 12); 10 bwa busatu bwakwachile Zakula+ ne baana banji ne balongo banji, bonse pamo 12; 11 bwa buna bwakwachile Izili ne baana banji ne balongo banji, bonse pamo bajinga 12; 12 bwa butanu bwakwachile Netaniya+ ne baana banji ne balongo banji, bonse pamo bajinga 12; 13 bwa butanu na bumo bwakwachile Bukiya ne baana banji ne balongo banji, bonse pamo bajinga 12; 14 bwa butanu na bubiji bwakwachile Yeshalela ne baana banji ne balongo banji, bonse pamo bajinga 12; 15 bwa butanu na busatu bwakwachile Yeshaya ne baana banji ne balongo banji, bonse pamo bajinga 12; 16 bwa butanu na buna bwakwachile Mataniya ne baana banji ne balongo banji, bonse pamo bajinga 12; 17 bwa bujikumi bwakwachile Shimei ne baana banji ne balongo banji, bonse pamo bajinga 12; 18 bwa bu 11 bwakwachile Azalela ne baana banji ne balongo banji, bonse pamo bajinga 12; 19 bwa bu 12 bwakwachile Hashabiya ne baana banji ne balongo banji, bonse pamo bajinga 12; 20 bwa bu 13 bwakwachile Shubaela+ ne baana banji ne balongo banji, bonse pamo bajinga 12; 21 bwa bu 14 bwakwachile Matitiya ne baana banji ne balongo banji, bonse pamo bajinga 12; 22 bwa bu 15 bwakwachile Yelemota ne baana banji ne balongo banji, bonse pamo bajinga 12; 23 bwa bu 16 bwakwachile Hananiya ne baana banji ne balongo banji, bonse pamo bajinga 12; 24 bwa bu 17 bwakwachile Yoshibekasha ne baana banji ne balongo banji, bonse pamo bajinga 12; 25 bwa bu 18 bwakwachile Hanani ne baana banji ne balongo banji, bonse pamo bajinga 12; 26 bwa bu 19 bwakwachile Maloti ne baana banji ne balongo banji, bonse pamo bajinga 12; 27 bwa bu 20 bwakwachile Eliata ne baana banji ne balongo banji, bonse pamo bajinga 12; 28 bwa bu 21 bwakwachile Hotila ne baana banji ne balongo banji, bonse pamo bajinga 12; 29 bwa bu 22 bwakwachile Gidalati+ ne baana banji ne balongo banji, bonse pamo bajinga 12; 30 bwa bu 23 bwakwachile Mahaziota+ ne baana banji ne balongo banji, bonse pamo bajinga 12; 31 bwa bu 24 bwakwachile Lomamati-ezela+ ne baana banji ne balongo banji, bonse pamo bajinga 12.

26 Bipanyi bya bakasopa ba pa bibelo+ byajinga bino: Mu bena Kola mwafumine Meshelemiya+ mwana wa kwa Kole wa mu baana ba kwa Asafwa. 2 Kabiji Meshelemiya wajinga na baana: Zekaliya ye wajinga mubeji, Yejaela ye wajinga wa bubiji, Zebadiya ye wajinga wa busatu, Yatanyela ye wajinga wa buna, 3 Elama ye wajinga wa butanu, Yehohanana ye wajinga wa butanu na bumo ne Eliwenai ye wajinga wa butanu na bubiji. 4 Obeda-edomu wajinga na baana: Shemaya ye wajinga mubeji, Yehozabada ye wajinga wa bubiji, Yoa ye wajinga wa busatu, Sakala ye wajinga wa buna, Netanela ye wajinga wa butanu, 5 Amiela ye wajinga wa butanu na bumo, Isakala ye wajinga wa butanu na bubiji ne Peuletai ye wajinga wa butanu na busatu; mambo Lesa wapesheshe Obeda-edomu.

6 Kabiji mwananji aye Shemaya, wasemene baana bonka bajinga bantangi ba bikota byabo, mambo bajinga babilobo banabalume bafikilamo. 7 Baana ba kwa Shemaya bajinga: Otonyi, Lefwaela, Obeda ne Elezabada; kabiji balongo banji abo ba Elihu ne Semakiya nabo bajinga banabalume bafikilamo. 8 Bano bonse bo bajinga baana ba kwa Obeda-edomu; abo ne baana babo ne balongo babo bajinga banabalume bafikilamo kabiji bakonsha kwingila mwingilo, bonse pamo ba kwa Obeda-edomu bajinga 62. 9 Kabiji Meshelemiya+ wajinga na baana ne balongo banji, banabalume 18 bafikilamo. 10 Kabiji Hosa wa mu baana ba kwa Melali wajinga na baana. Shimuli ye wajinga mukulumpe, nangwa kya kuba kechi wajinga mubeji ne, shanji wamutongwele kwikala mukulumpe, 11 Hilikiya ye wajinga wa bubiji, Tebaliya ye wajinga wa busatu ne Zekaliya ye wajinga wa buna. Baana ba kwa Hosa bonse ne balongo banji bajinga 13.

12 Mu bino bipanyi bya bakasopa ba pa bibelo, bena mizhi bajinga na mingilo imotu yonka yajingapo na balongo babo, ya kwingijila ku nzubo ya Yehoba. 13 Onkao mambo, batele bubale,+ bisemi bicheche pamotu na bisemi bikatampe monka mwayijile bikota byabo, bwa ku bibelo byapusana pusana. 14 Kepo bubale bwa ku musela bwakwachile Shelemiya. Mwananji aye Zekaliya wajinga wajimuka wafundañananga maana, bamutelejile bubale, kabiji bubale bwanji bwaponejile ku kabeta ka ku buyeke. 15 Bubale bwa kwa Obeda-edomu bwaponejile ku kabeta ka ku bulenge, kabiji baana banji+ bebapele mwingilo wa ku matala. 16 Bubale bwa kwa Shupima ne Hosa+ bwaponejile ku muzhika, kwipi na Kibelo kya Shaleketa kyajinga ku mukwakwa watuntuka kwajinga jibumba ja bakasopa jatalañena na jibumba ja bakasopa bakwabo; 17 ku musela kwaikalanga bena Levi batanu na umo; ku kabeta ka ku buyeke, kwaikalanga bana pa juba pa juba ne ku kabeta ka ku bulenge kwaikalanga bana pa juba pa juba; ne ku matala+ kwaikalanga babiji babiji; 18 ku kazubo ka ku kibelo kya ku muzhika, kwaikalanga bana ku mukwakwa+ ne babiji ku kazubo ka ku kibelo. 19 Abino byo byajinga bipanyi bya bakalama ba mu bena Kola ne ba mu bena Melali.

20 Mu bena Levi, Ahiya ye watalanga pa bya buneme bya ku nzubo ya Lesa wa kine ne pa bya buneme byo bazhijikile.*+ 21 Baana ba kwa Ladana: baana ba mwina Geleshona ba kwa Ladana, bakulumpe ba bikota byabo ba kwa Ladana mwina Geleshona, Yehiela+ 22 ne baana ba kwa Yehiela, Zetama ne mulongo wanji aye Yoela. Batalanga pa bya buneme bya ku nzubo ya Yehoba.+ 23 Mu bena Amulamu, mu bena Izahala, mu bena Hebulona ne mu bena Uziela,+ 24 Shebwela mwana wa kwa Geleshoma, Geleshoma mwana wa kwa Mosesa, ye watalanga pa matala. 25 Balongo banji, ba mu kisemi kya kwa Elieza,+ bajinga Lehabiya,+ Yeshaya, Yolamu, Zikili ne Shelomoto. 26 Uno Shelomoto ne balongo banji bo batalanga pa bya buneme byonse byo bazhijikile,+ byonka Mfumu Davida+ ne bakulumpe ba bikota,+ ne bakulumpe ba biumbi ne ba bitota ne bakulumpe ba bashilikale byo bazhijikile. 27 Pa bipukulwa+ byo baangachile mu nkondo,+ bazhijikilepo bimo bya kuwamishisha nzubo ya Yehoba; 28 ne bintu byonse byo bazhijikile kwi Samwela wamonanga bimwesho,+ ne Saulo mwana wa kwa Kisha, ne Abina+ mwana wa kwa Nela ne Yoaba+ mwana wa kwa Zeluya.+ Kintu kyonse muntu kyo azhijikile bekipaine kwi Shelomita ne balongo banji kuba’mba bekilamenga.

29 Mu bena Izahala,+ Kenaniya ne baana banji bebapele mingilo ya kutangijila ne kwikala bamitonyi+ ba bena Isalela, yabujile ya ku nzubo ya Lesa.

30 Mu bena Hebulona,+ Hashabiya ne balongo banji, banabalume bafikilamo 1,700, bo batangijilenga kibunji kya ku muzhika wa Yodano kya bena Isalela ne mingilo yonse ya Yehoba ne ya mfumu. 31 Mu bena Hebulona, Yeliya+ ye wajinga mukulumpe wa bena Hebulona monka mwayijile bikota byabo. Mu mwaka wa bu 40 wa bufumu bwa kwa Davida,+ basajile banabalume bafikilamo, babilobo kabiji bebataaine mu Yazela+ wa mu Gileada. 32 Kabiji balongo banji bajinga 2,700 banabalume bafikilamo, bakulumpe ba bikota. Onkao mambo, Mfumu Davida wibatongwele kutangijila bena Lubenyi, bena Gadi ne kichika kya bena Manase, mu bintu byonse bya Lesa wa kine ne bya mfumu.

27 Bena Isalela bonse pamo, ko kuba’mba bakulumpe ba bikota, bakulumpe ba biumbi ne ba bitota,+ ne bantangi babo baingijilanga mfumu+ mu bintu byonse mu bipanyi bikombolanga pa ñondo pa ñondo mwaka yense; mu kipanyi kimo mwajinga bantu 24,000.

2 Yashobeama+ mwana wa kwa Zabajela ye wajinga mukulumpe wa kipanyi kitanshi mu ñondo mutanshi, bantu 24,000 bo bajinga mu kipanyi kyanji. 3 Umo wa mu baana ba kwa Peleze,+ ye wajinga mukulumpe wa bakulumpe bonse ba mabumba o bapele mwingilo wa mu ñondo mutanshi. 4 Dodai+ mwina Ahoa+ ye wajinga mukulumpe wa kipanyi kya mu ñondo wa bubiji pamo na kipanyi kyanji, ne Mikilota ye wajinga ntangi, bantu 24,000 bo bajinga mu kipanyi kyanji. 5 Mukulumpe wa jibumba jo batongwele kwingila mu ñondo wa busatu wajinga Benaya+ mwana wa kwa Yehoyada+ ñanga mukatampe, bantu 24,000 bo bajinga mu kipanyi kyanji. 6 Uno Benaya wajinga umo wa mu babilobo makumi asatu kabiji ye wajinga mukulumpe pa makumi asatu, kabiji mwananji aye Amizabada ye wajinga mukulumpe wa kipanyi kyanji. 7 Asahela+ mulongo wa kwa Yoaba+ ye wajinga wa buna mu ñondo wa buna, ne mwananji aye Zebadiya ye walondejile pe aye, bantu 24,000 bo bajinga mu kipanyi kyanji. 8 Shamahuta mwina Izahala ye wajinga mukulumpe wa butanu mu ñondo wa butanu, bantu 24,000 bo bajinga mu kipanyi kyanji. 9 Ila+ mwana wa kwa Ikeshi mwina Tekoa+ ye wajinga wa butanu na bumo mu ñondo wa butanu na bumo, bantu 24,000 bo bajinga mu kipanyi kyanji. 10 Heleza+ mwina Pelona wa mu bena Efelaimu ye wajinga wa butanu na bubiji mu ñondo wa butanu na bubiji, bantu 24,000 bo bajinga mu kipanyi kyanji. 11 Sibekai+ mwina Husha wa mu bena Zela+ ye wajinga wa butanu na busatu mu ñondo wa butanu na busatu, bantu 24,000 bo bajinga mu kipanyi kyanji. 12 Abieza+ mwina Anatota+ wa mu bena Benjamina ye wajinga wa butanu na buna mu ñondo wa butanu na buna, bantu 24,000 bo bajinga mu kipanyi kyanji. 13 Mahalai+ mwina Netofwa wa mu bena Zela+ ye wajinga wa bujikumi mu ñondo wa bujikumi, bantu 24,000 bo bajinga mu kipanyi kyanji. 14 Benaya+ mwina Pilatona wa mu baana ba kwa Efelaimu ye wajinga wa bu 11 mu ñondo wa bu 11, bantu 24,000 bo bajinga mu kipanyi kyanji. 15 Heledai mwina Netofwa wa mu baana ba kwa Otoniela ye wajinga wa bu 12 mu ñondo wa bu 12, kabiji mu kipanyi kyanji mwajinga bantu 24,000.

16 Bano bo bajinga bantangi ba mikoka ya bena Isalela: Ntangi wa bena Lubenyi wajinga Elieza mwana wa kwa Zikili; ntangi wa bena Shimeona wajinga Shefwatiya mwana wa kwa Maaka; 17 ntangi wa bena Levi wajinga Hashabiya mwana wa kwa Kemwela; ntangi wa baana ba kwa Alona wajinga Zadoka; 18 ntangi wa bena Yuda wajinga Elihu+ mulongo wa kwa Davida; ntangi wa bena Isakala wajinga Omuli mwana wa kwa Mikela; 19 ntangi wa bena Zebuluna wajinga Ishimaya mwana wa kwa Obadiya; ntangi wa bena Nafitali wajinga Yelimota mwana wa kwa Azalyela; 20 ntangi wa bena Efelaimu wajinga Hosheya mwana wa kwa Azaziya; ntangi wa kichika kya mukoka wa bena Manase wajinga Yoela mwana wa kwa Pedaya; 21 ntangi wa kichika kya mukoka wa bena Manase bajinga mu Gileada wajinga Ido mwana wa kwa Zekaliya; ntangi wa bena Benjamina wajinga Yasiela mwana wa kwa Abina;+ 22 ntangi wa bena Danyi wajinga Azalela mwana wa kwa Yelohama. Bano bo bajinga babinemanga ba mikoka ya bena Isalela.

23 Davida kechi wabajile boba bajinga na myaka ya kusemwa 20 ne kubwela panshi ne, mambo Yehoba walayile kuvuzha bena Isalela nobe tubangabanga twa mwiulu.+ 24 Yoaba mwana wa kwa Zeluya watendekele kubala, bino kechi wapwishishe ne; kabiji Lesa wibabuukijile bukaji bena Isalela,*+ kabiji bonse kechi bebanembele mu buku wa bintu byapichilemo Mfumu Davida ne.

25 Azamabeta mwana wa kwa Ajela ye watalanga pa bya buneme bya mfumu.+ Yonafwanyi mwana wa kwa Uzaya ye watalanga pa matala* a mu majimi, a mu mizhi ikatampe, a mu mizhi icheche ne a mu byamba. 26 Ezuli mwana wa kwa Keluba ye watalanga pa bantu bajimanga majimi. 27 Shimei mwina Lama ye watalanga pa majimi a miñanzañanza; Zabadi mwina Shifumi ye watalanga mo bafumyanga binyu. 28 Baela-hanana mwina Gedela ye watalanga pa bichi+ bya maolivi ne bichi bya mikuyu byajinga mu Shefela;+ Yoashi ye watalanga pa manyi. 29 Shitulai mwina Shalona+ ye watalanga pa bañombe bajanga munyemvu mu Shalona, kabiji Shafwata mwana wa kwa Adelai ye watalanga pa bañombe mu kimpachiko.* 30 Obile mwina Ishimela ye watalanga pa bangamela; Yehedeya mwina Melonata ye watalanga pa bambongolo.* 31 Yazizi mwina Haguli ye watalanga pa matanga. Bano bonse bo bajinga bakulumpe batalanga pa bipe bya Mfumu Davida.

32 Yonafwanyi+ mwipwa wa kwa Davida ye wafundañananga maana, kabiji wajinga muntu wa milangwe kabiji munembeshi, ne Yehiela mwana wa kwa Hakimona ye walamanga baana ba mfumu.+ 33 Ahitofela+ ye wabuulangako mfumu maana, kabiji Hushai+ mwina Alaka wajinga mulunda wa mfumu. 34 Pe Ahitofela palondejile Yehoyada mwana wa kwa Benaya+ ne Abiata;+ kabiji Yoaba+ ye wajinga mukulumpe wa nzhita ya mfumu.

28 Kabiji Davida wakonkenye pamo babinemanga ba bena Isalela mu Yelusalema: babinemanga ba mikoka, bakulumpe ba bipanyi+ byaingijilanga mfumu, bakulumpe ba biumbi ne ba bitota,+ bakulumpe balamanga bipe byonse bya mfumu+ ne bilelwa byanji ne bya baana banji,+ pamo ne mukulumpe wa bakapaso ne babilobo ne banabalume bafikilamo.+ 2 Kepo Mfumu Davida aimene ne kwamba’mba:

“Ñumvwai, anweba balongo bami ne bantu bami. Muchima wami wakebeshe bingi kushimika nzubo mwa kwikala jikwachi ja lulayañano lwa Yehoba ne kwikala ke kya kunyantapo Lesa wetu,+ kabiji nanengezhezhe bintu kuba’mba nshimike.+ 3 Bino Lesa wa kine wañambijile’mba, ‘Kechi ukanshimikila nzubo ya kutumbijikilamo jizhina jami ne,+ mambo wi muntu wa makondo kabiji waichila mashi + avula.’ 4 Nangwa byonkabyo, Yehoba Lesa wa Isalela wansajile pa bonse ba mu nzubo ya batata kuba’mba ngikale mfumu wa bena Isalela kikupu,+ mambo wasajile Yuda amba ekale ntangi+ kabiji mu ba mu nzubo ya kwa Yuda, wasajilemo nzubo ya batata,+ kabiji mu baana ba batata, yami ye atongwele kuba’mba ngikale mfumu wa bena Isalela bonse.+ 5 Yehoba wampa baana bavula, kabiji mu bano baana bami bonse,+ wasalamo Solomone mwanami+ kuba’mba ekale pa jitanda ja bufumu bwa Yehoba bwa pa bena Isalela.+

6 “Wañambijile’mba, ‘Mwanobe Solomone ye ukanshimikila nzubo ne bipango byami, mambo namusala kwikala mwanami ne amiwa nkekala shanji.+ 7 Nkekajika bufumu bwanji kikupu+ inge akatesheko muchima kulondela mikambizho yami ne mizhilo yami,+ byonka byo abena kuba luno.’ 8 Onkao mambo, mbena kwamba ku bena Isalela bonse, ko kuba’mba kipwilo kya Yehoba ne Lesa wetu ubena kumvwa namba: Mutesheko muchima kulondela ne kukeba mikambizho yonse ya Yehoba Lesa wetu, pa kuba’mba mukekalenga mu kyalo kyawama+ ne kwikipana ku baana benu bakalondelapo kwikala buswanyi bwabo bwa myaka.

9 “Kabiji obewa mwanami Solomone, umuyuke Lesa wami amiwa shobe ne kumwingijila* na muchima yense+ ne na lusekelo, mambo Yehoba ukebakeba mu michima yonse,+ kabiji umona milanguluko yonse.+ Inge wamukeba, aye ukesolola kwi obewa,+ bino inge wamusha, aye ukakukana kikupu.+ 10 Tala, Yehoba wakusala kuba’mba ushimike nzubo yanji yazhila. Uchinchike kabiji uye na kwingila.”

11 Kepo Davida apele mwananji Solomone mutanchi+ wamwesheshenga bikekala kibamba kya ku kibelo+ ne wa bibamba bya nzubo, bibamba mwa kulamina bintu, bibamba byayo bya peulu, bibamba byayo bya mukachi ne nzubo mwa kubika kizhiko kya kufuchilapo* mambo.+ 12 Wamupele mutanchi wa bintu byonse byo bamumwesheshe ku mupashi wa Lesa pa mambo a bipango+ bya nzubo ya Yehoba, bibamba byonse bya kujiilamo biizhokolokele, mwa kulamina bya buneme bya mu nzubo ya Lesa wa kine, ne mwa kulamina bya buneme byo bazhijikile;*+ 13 wamupele ne mikambizho ya bipanyi bya bañanga+ ne bena Levi, ne mingilo yonse ya ku nzubo ya Yehoba, ne bipe byonse bya kwingijilamo mwingilo wa ku nzubo ya Yehoba; 14 wamutongwejile ne kinemenezhi kya ngolode, ngolode ya bipe byonse bya kwingijilamo mingilo yapusana pusana, ne kinemenezhi kya bipe byonse bya siliva, ne bipe byonse bya kwingijilamo mingilo yapusana pusana; 15 ne kinemenezhi kya bya kutulapo malampi+ bya ngolode ne malampi abyo a ngolode, kinemenezhi kya bya kutulapo malampi byapusana pusana ne malampi abyo, ne kinemenezhi kya bya kutulapo malampi bya siliva, kya kutulapo malampi kimo kimo ne malampi akyo monka mwayijile mwingilo wakyo; 16 ne kinemenezhi kya ngolode ya kulengelako matebulu a kubikapo bashinkwa+ batentakana,* monka mwayijile matebulu onse, ne siliva wa kulengelako matebulu a siliva, 17 ne ngolode yawamisha ya mafoloko, masanyi afukumana, milondo, ne kinemenezhi kya masanyi afukumana acheache a ngolode,+ monka mwayijile nsanyi yafukumana icheche imo imo ne kinemenezhi kya masanyi afukumana acheache a siliva, monka mwayijile nsanyi yafukumana icheche imo imo. 18 Kabiji wamubuujile ne kinemenezhi kya ngolode yo batubwile bulongo ya kya kusokelapo bya kufutumuna+ ne ya kifwanyikizho kya kalaki,+ ko kuba’mba, bakelubi+ ba ngolode batanyikile byapi byabo ne kuzhika jikwachi ja lulayañano lwa Yehoba. 19 Kabiji Davida waambile’mba: “Kuboko kwa Yehoba kwajinga pe amiwa, kabiji wampele maana kuba’mba nembe+ bintu byonse bya pa mutanchi.”+

20 Kepo Davida aambijile Solomone mwananji amba: “Chinchika ne kukosa kabiji uye na kwingila. Kange ube moyo nangwa kukakilwa ne, mambo Yehoba Lesa, Lesa wami uji ne obewa.+ Aye kechi ukakusha nangwa kukutaya ne,+ bino ukekala ne obewa kufikatu ne mingilo yonse ya ku nzubo ya Yehoba byo ikapwa. 21 Obewa uji na bipanyi bya bañanga+ ne bena Levi+ ba kwingila mingilo yonse ya ku nzubo ya Lesa wa kine. Obewa uji na basendwe bepana kwingila mingilo yapusana pusana,+ ne babinemanga+ ne bantu bonse bakalondelanga mikambizho yobe yonse.”

29 Mfumu Davida waambijile kipwilo kyonse amba: “Mwanami Solomone Lesa ye asala,+ ukiji mwanyike kabiji kechi wayuka byavula ne,*+ kabiji mwingilo wabaya, mambo kechi nzubo* ya muntu ne, bino ke ya Yehoba Lesa.+ 2 Kabiji naingila na bulume bonse kunengezha bya ku nzubo ya Lesa wami, nanengezha ngolode ya kulengela bintu bya ngolode, siliva ya kulengela bintu bya siliva, mukuba wa kulengela bintu bya mukuba, kapotwe wa kulengela bintu bya kapotwe,+ bichi bya kulengela bintu bya bichi,+ mabwe a onika, ne mabwe a kushimika na mulobwe, mabwe a misombelo yapusana pusana, mitundu yonse ya mabwe a buneme ne mabwe a alabasita avula bingi. 3 Kabiji na mambo a kuba natemwa nzubo ya Lesa wami,+ kuji ne bintu byami bya buneme+ bya ngolode ne siliva byo mbena kupana ku nzubo ya Lesa wami, kununga pa bintu byonse byo nanengezha bya ku nzubo yazhila, 4 kubikapo ne matalenta* a ngolode ya ku Ofila+ 3,000 ne matalenta a siliva ye batubula bulongo 7,000, ya kushinga ku bibumbulu bya mazubo, 5 ngolode ya kulengela bintu bya ngolode ne siliva ya kulengela bintu bya siliva, ne ya mingilo yonse ikengila basendwe. Ñanyi wipana lelo jino kupa Yehoba bupe?”+

6 Ponkapo babinemanga ba bikota, babinemanga ba mikoka ya bena Isalela, bakulumpe ba biumbi ne ba bitota,+ ne bakulumpe ba mingilo ya mfumu+ bepaine. 7 Kabiji bapaine bintu bya mwingilo wa nzubo ya Lesa wa kine: matalenta a ngolode 5,000, madalika* 10,000, matalenta a siliva 10,000, matalenta a mukuba 18,000 ne matalenta a kapotwe 100,000. 8 Muntu yense wajinga na mabwe a buneme wiapaine amba ekale mo balaminenga bya buneme bya mu nzubo ya Yehoba, Yehiela+ mwina Geleshona+ ye wibilamanga. 9 Bantu basangalele bingi pa kupana ino milambo ya kwifuukwila, mambo bapainenga milambo ya kwifuukwila kwi Yehoba na muchima yense,+ kabiji Davida mfumu naye wasangalele bingi.

10 Kepo Davida atotele Yehoba ku meso a kipwilo kyonse. Davida waambile’mba: “Mutotwe, anweba Yehoba, Lesa wa Isalela shetu, myaka ne myaka. 11 Anweba Yehoba, bukata+ ne bulume+ ne buwame ne lukumo ne buneme byo byenu,+ mambo bintu byonse biji mwiulu ne pano pa ntanda byo byenu.+ Bufumu bo bwenu, anweba Yehoba.+ Anweba mwitumbijika kwikala mwine wakila pa bonse. 12 Bunonshi ne lukumo bifuma kwi anweba,+ kabiji anweba mulama bintu byonse,+ kabiji mu kuboko kwenu muji bulume+ ne ngovu,+ kabiji kuboko kwenu kwakonsha kutumbijika muntu+ ne kupana ngovu ku bonse.+ 13 Anweba Lesa wetu, twimusanchila ne kutota jizhina jenu ja buya.

14 “Amiwa yami ñanyi, ne bantu bami bo bañanyi, kuba’mba tupane milambo ya kwifuukwila iji nobe ino? Mambo bintu byonse bifuma kwi anweba, kabiji twimupa bintu bifuma mu kuboko kwenu. 15 Mambo atweba twi benyi kwi anweba kabiji twi bakañenda, byonkatu byajinga bashakulu betu bonse.+ Mambo moba etu pano pa ntanda ajitu nobe kimvule,+ kwa kubula luketekelo. 16 Anweba Yehoba Lesa wetu, bino bya buneme byonse byo twanengezha bya kushimikila nzubo mwa kutumbijikila jizhina jenu jazhila, byafuma mu kuboko kwenu, kabiji byonse byo byenu. 17 Anweba Lesa wami, nayukishatu namba yenu mupimapima michima+ kabiji mumwena lusekelo mu bulumbuluke.*+ Kabiji mu koloka* kwa muchima wami, nefuukwila kupana bino bintu byonse, kabiji nasangalala bingi pa kumona bantu benu baji pano saka bapana milambo ya kwifuukwila kwi anweba. 18 Anweba Yehoba, Lesa wa kwa Abalahama, Izaka ne Isalela, bashakulu betu, mwikazhe ino milanguluko mu michima ya bantu benu kikupu, kabiji mwalulwile michima yabo kwi anweba.+ 19 Kabiji mwanami Solomone mumupe muchima wawama,*+ pa kuba’mba alamenga mikambizho yenu,+ bya kuvululako byenu ne malamuna enu ne kuba bino bintu byonse ne kushimika nzubo* yenu yo nanengezhezha bino bintu.”+

20 Kepo Davida aambijile kipwilo kyonse amba: “Mutotai Yehoba Lesa wenu.” Kabiji kipwilo kyonse kyamutotele Yehoba, Lesa wa bashakulu babo ne kufukama ne kulambila Yehoba ne mfumu. 21 Kabiji batwajijile kutapisha bitapisho kwi Yehoba ne kulambula milambo ya kusoka+ kwi Yehoba pa juba jalondejilepo, baana ba bañombe balume 1,000, mikooko ilume 1,000, baana ba mikooko balume 1,000, ne milambo yabo ya binyu;+ batapishe bitapisho byavula bingi bya bena Isalela bonse.+ 22 Kabiji bajiilenga ne kutoma ku meso a Yehoba aja juba na lusekelo lukatampe,+ kabiji babwezhezhepo jibiji kuswanyika Solomone mwana wa kwa Davida pa bufumu ne kumushinga manyi ku meso a Yehoba kwikala ntangi,+ ne Zadoka kwikala ñanga.+ 23 Kabiji Solomone waikele pa jitanda ja Yehoba+ ne kuswana pa bufumu bwa kwa Davida shanji, kabiji wamwenenga byawama, ne bena Isalela bonse bamukookelanga. 24 Babinemanga bonse,+ babilobo,+ ne baana bonse ba Mfumu Davida+ bamukookelanga mfumu Solomone. 25 Kabiji Yehoba watumbijikile bingi Solomone ku meso a bena Isalela bonse ne kumupa buneme bwa bufumu bwa kuba kafwako mfumu wa Isalela wajingapo nabo kala ne.+

26 Byonkabyo, Davida mwana wa kwa Yese walaminenga bena Isalela bonse. 27 Kabiji myaka yo alamine bena Isalela yajinga 40. Mu Hebulona walaminemo myaka itanu na ibiji,+ kabiji mu Yelusalema walaminemo myaka 33.+ 28 Kabiji wafwile saka akota,+ saka aikala myaka* yavula, na bunonshi ne lukumo; kabiji mwananji aye Solomone wamuswaine pa bufumu.+ 29 Bintu byapichilemo Mfumu Davida kufumatu po byatendekejile kufika ne po byapelejile, byanembwa mu byambo bya kwa Samwela wamonanga bimwesho, ne bya kwa ngauzhi Natana,+ ne bya kwa Gadi+ wamonanga bimwesho, 30 pamo na bufumu bwanji, mingilo yanji ikatampe, ne bintu byamwekelenga mu moba anji ne a bena Isalela ne bufumu bonse bwamuzhokolokele.