MALAKAI

1 Mbila:

Byambo bya Yehoba byo aambile ku bena Isalela kupichila mwi Malakai:*

2 Yehoba waamba’mba, “Nemumwesha butemwe anweba bantu.”+

Bino anweba mwamba’mba: “Mwitumwesha byepi butemwe?”

“Nanchi Isao kechi wajinga kolojanji Yakoba nenyi?”+ byo byaamba Yehoba. “Nangwa byonkabyo, natemenweko Yakoba, 3 bino Isao namushikilwe;+ kabiji nalengejile mitumba yanji kushala ke yatu+ ne buswanyi bwanji nebupaine ku balubwala ba mu kiselebwa.”+

4 “Nangwa kya kuba bena Edomu baamba’mba, ‘Betusansakanya, bino tukabwela ne kushimukulula byakundaukile,’ abino byo byaamba Yehoba wa mabumba’mba, ‘Bakashimika, bino amiwa nkebikundula, kabiji bakatelwanga’mba “nyaunda ya bubi” kabiji “bantu Yehoba bo azhachisha kikupu.”+ 5 Meso enu akamona kino kintu, kabiji mukamba’mba: “Yehoba atumbijikwe mu nyaunda ya bena Isalela.”’”

6 “‘Mwana unemeka bashanji,+ ne kalume unemeka nkambo yanji. Onkao mambo, inge amiwa yami shanji mwana,+ munema wamfwainwa uji pi?+ Kabiji inge yami nkambo,* moyo* wamfwainwa wa kungakamwa uji pi?’ byo byo naamba amiwa Yehoba wa mabumba kwi anweba bañanga babena kulengulula jizhina jami.+

“‘Bino mwamba’mba: “Twijilengulula byepi jizhina jenu?”’

7 “‘Mambo mupana kajo* kazhilululwa pa kya kusokelapo bitapisho kyami.’

“‘Kabiji mwamba’mba: “Twimuzhilulula byepi?”’

“‘Kupichila mu kwamba’mba: “Tebulu wa Yehoba+ kyo kintu kyafwainwa kulengululwa.” 8 Kabiji byo mutapisha nyama wasabika meso mwamba’mba: “Kechi kyatama ne.” Kabiji byo mulambula nyama walemana nangwa wakolwa mwamba’mba: “Kechi kyatama ne.”’”+

Yehoba wa mabumba waamba’mba, “Mukeseke kwibapana ku kinemanga wenu. Abya ukemutemwa nangwa kwimutambwila bulongo nyi?”

9 Yehoba wa mabumba waamba’mba, “Pano musashijilai Lesa, kuba’mba etubile lusa. Byo muji na yoyo milambo mu maboko enu, nanchi ukemutambwila bulongo nyi?”

10 “Kabiji ñanyi mwi anweba wipana kushinka binzhilo?*+ Mambo kechi mwakonsha ne kubanza mujilo pa kya kusokelapo bitapisho kyami kwa kubula kwimufweta ne.+ Kechi mmwenamo lusekelo mwi anweba ne,” byo byaamba Yehoba wa mabumba, “kabiji kechi nsekelamo mu milambo ifuma kwi anweba ne.”+

11 Yehoba wa mabumba waamba’mba, “Mambo kufuma ku kuselela juba kufika ne ko jizhikila,* jizhina jami jikatumbalala mu bisaka bya bantu.+ Mu mapunzha onse bakasokelamo bitapisho, ne kulambula milambo ya jizhina jami, kwikala bupe bwawama; mambo jizhina jami jikatumbalala mu bisaka bya bantu.”+

12 “Bino mubena kwijipelula*+ pa kwamba’mba, ‘Tebulu wa Yehoba wazhilululwa, ne bipangwa byanji, ko kuba’mba kajo kanji, kafwainwa kulengululwa.’+ 13 Kabiji mwamba’mba, ‘Talai! Twakooka!’ kabiji muchamuna na mukeyu ku tebulu,” byo byaamba Yehoba wa mabumba. “Kabiji muleta banyama ba kwiba, balemana ne bakolwa. Kine, bino bintu byo byo muleta kwikala bupe! Nanchi nafwainwa kwibitambula ku maboko enu nyi?”+ byo byaamba Yehoba.

14 Yehoba wa mabumba waamba’mba, “Afingwe muntu wa bujimbijimbi, uji na nyama mulume wawama mu jitanga janji, bino uchipa luchipo ne kutapisha kwi Yehoba nyama walemana. Mambo amiwa yami Mfumu mukatampe,+ kabiji jizhina jami jikalengeshanga moyo bisaka bya bantu.”+

2 “Pano anweba bañanga, uno ye mukambizho wenu.+ 2 Inge mukane kumvwa ne kubula kutako muchima kutumbijika jizhina jami, nkemufinga,+ kabiji nkalula mapesho enu ke mafingo.+ Kine, naalula mapesho ke mafingo, mambo kechi mubena kutako muchima ku kino ne,” byo byaamba Yehoba wa mabumba.

3 “Umvwai! Nkonauna* nkunwa yenu yo mwabyala na mambo a byo muba,+ kabiji nkemushinga busobe ku meso, busobe bwa banyama bo mutapisha pa bijiilo byenu; kabiji bakemutaya konka ko bataya busobe.* 4 Po po mukayuka’mba nemupa uno mukambizho kuba’mba lulayañano lo nalayañene ne Levi lutwajijile,”+ byo byaamba Yehoba wa mabumba.

5 “Lulayañano lwami lo nalayañene nanji lwajinga lwa bumi ne lwa mutende, namupelebyo namba ekale na moyo.* Wangakaminwe, kine, waakaminwenga jizhina jami. 6 Mizhilo* ya bukine yajinga mu kanwa kanji,+ kabiji kechi waambilengapo byatama ne. Waendelenga ne amiwa mu mutende ne mu bololoke,+ kabiji waalulwile bavula kufuma ku bubi. 7 Mambo kanwa ka ñanga kafwainwa kufunjishanga maana a kuyuka Lesa, kabiji bantu bafwainwa kukeba mizhilo* mu kanwa kanji,+ mambo aye ye muluwe wa Yehoba wa mabumba.

8 Yehoba wa mabumba waamba’mba, “Pakuba anweba mwasendukamo mu jishinda. Mwalengela bavula kwituntula na mambo a mizhilo.*+ Mwazhilulula lulayañano lwa kwa Levi.+ 9 Onkao mambo, nkalengela bantu bonse kwimulengulula ne kwimumona babula kunema, mambo kechi mwaendelenga mu mashinda ami ne, bino mwaubilenga misalululo pa kulondela mizhilo.”+

10 “Nanchi atweba bonse kechi tuji na shetu umo nenyi?+ Nanchi Lesa umo kechi ye witulengele nenyi? Mambo ka o twifutukilamo,+ ne kuzhilulula lulayañano lwa bashakulu betu? 11 Yuda wauba bukamfutumfutu, kabiji kintu kya bunya kyaubiwa mu Isalela ne mu Yelusalema; mambo Yuda wazhilulula buzhile* bwa Yehoba,+ bo atemwa, kabiji wasongola mwana wa mukazhi wa lesa ungi.+ 12 Yehoba ukamuchibako ku matente a kwa Yakoba yense uba kino, nangwa akekale muntu wa mutundu ka,* nangwa kya kuba upana mulambo kwi Yehoba wa mabumba.”+

13 “Kuji ne kintu kikwabo* kyo muba, kilengela kya kusokelapo bitapisho kya Yehoba kwikivweta na mipolo ne kujila ne kubinza, kya kuba waleka ne kutako muchima ku milambo yenu nangwa kuleka kwibitala bulongo bintu byonse bifuma ku maboko enu.+ 14 Kabiji mwamba’mba, ‘Mambo ka?’ Ke na mambo a kuba Yehoba waikala kamonyi wenu na bakazhi benu ba ku bunsongwalume bwenu, bo mwaalukamo, nangwa kya kuba abo bo bakwenu kabiji bakazhi benu ba lulayañano.*+ 15 Nangwa byonkabyo, kuji umo wabujile kwikyuba, mambo washajileko na mupashi wa Lesa. Ñanyi kintu kyakebelenga uno muntu? Baana* ba Lesa. Onkao mambo, lamawizhai muchima wenu, kabiji kange mufutukemo bakazhi benu ba ku bunsongwalume bwenu ne. 16 Mambo nashikwa* kwikana,”+ byo byaamba Yehoba Lesa wa Isalela, “ne yewa wavwala bukapondo,”* byo byaamba Yehoba wa mabumba. “Kabiji lamawizhai muchima wenu, kabiji kechi mwafwainwa kwikala bakamfutumfutu ne.+

17 “Yehoba wimukimwa na mambo a byambo byenu.+ Bino mwamba’mba, ‘Ñanyi mambo o twalenga pa kuba’mba etukimwe?’ Mambo mwamba’mba, ‘Yense uba byatama Yehoba umumona bulongo, kabiji umwena lusekelo mwi aye,’+ nangwa byo mwamba’mba, ‘Lesa wa bunchibamambo bwaoloka uji pi?’”

3 Yehoba wa mabumba waamba’mba, “Umvwai! Mbena kutuma muluwe wami, kabiji aye ukangwamishisha* jishinda.+ Kabiji ponkapotu Nkambo wa kine, ye mubena kukeba, ukeya ku nzubo yanji;+ kabiji muluwe wa lulayañano ukeya, yenka ye musangalelamo. Umvwai! Aye kine ukeya.”

2 “Bino ñanyi ukachinchika juba jo akeya, kabiji inge akamweke ñanyi ukakonsha kwimana? Mambo aye ukekala nobe mujilo wa usungulula byela kabiji nobe mulola*+ wa bantu batokesha bisapi. 3 Kabiji ukekala panshi nobe muntu usungulula byela kabiji nobe muntu utubula siliva+ kabiji ukatokesha baana ba kwa Levi; kabiji ukebawamisha* nobe ngolode ne siliva, kabiji kwi Yehoba bakekala ke bantu balambula mulambo mu bololoke. 4 Kabiji mulambo wa bena Yuda ne wa bantu ba mu Yelusalema ukatokesha Yehoba ku muchima, byonka byo kyajinga mu moba a kala ne mu myaka ya kala kene.+

5 Yehoba wa mabumba waamba’mba, “Amiwa nkeya kwipi ne anweba ne kwimuchibila mambo, kabiji nkekala kamonyi wa kwibashinawina bukiji bapanda manga,+ bankende, bachipa bubela,+ bebila boba bo batwezha mingilo,+ banabakazhi bafwilwa, ne baana babula bashabo,*+ ne boba bakana kukwasha* bafuma ku kyalo kingi.+ Bano kechi bangakamwa ne.”

6 “Mambo amiwa yami Yehoba; kechi ngaluka ne.+ Anweba mwi baana ba kwa Yakoba; kechi mwavila ne.” 7 Yehoba wa mabumba waamba’mba, “Kufumatu mu moba a bashakulu benu mwalengulula malamuna ami kabiji kechi mwialama ne.+ Bwelai kwi amiwa ne amiwa nkabwela kwi anweba.”+

Bino mwamba’mba: “Twakonsha kubwela byepi?”

8 “Nanchi muntu wakonsha kwibila Lesa nyi? Bino anweba mubena kungibila.”

Kabiji mwamba’mba: “Twimwibila byepi?”

“Mu bya bujikumi ne mu bya bupe. 9 Kine mwafingwa,* mambo mubena kungibila, kine kisaka kyonse kibena kuba kino. 10 Letai bya bujikumi byonse mu butala,+ kuba’mba mu nzubo yami mwikale kajo;+ ngesekai mu kino, mumone inge kechi nakonsha kwimushinkwila bipenze bya mwiulu+ ne kwimwitulwila* mapesho avula kya kuba kechi mukakajilwa kintu nangwa kimo ne,” byo byaamba Yehoba wa mabumba.+

11 Yehoba wa mabumba waamba’mba, “Amiwa nkakajipila bintu byonauna* na mambo a anweba, ne abyo kechi bikonauna kajo ka mu kyalo kyenu ne, nangwa miñanzañanza ya mu majimi enu kechi ikabula kupanga ne.”+

12 Yehoba wa mabumba waamba’mba, “Bisaka bya bantu byonse bikemutela’mba mwi ba lusekelo,+ mambo mukekala ke kyalo kya lusekelo.”

13 Yehoba waamba’mba, “Byambo byo muñambila byatama bingi.”

Kabiji mwamba’mba: “Twamba byepi mulwetu bintu byatama pe anweba?”+

14 “Mwamba’mba, ‘Kyo kyatu kwingijila Lesa.+ Twamwenamo ka mu kulama mizhilo yanji ne kwenda na bulanda kwi Yehoba wa mabumba? 15 Kabiji tumona betota byo bekala na lusekelo. Ne boba byatama byo bamona byawama.+ Beseka Lesa kabiji kafwako kyatama kibamwekela ne.’”

16 Bino aba baakaminwenga Yehoba besambilenga bene na bene, muntu yense na mulunda nanji, kabiji Yehoba watelekelenga ne kumvwa. Ne buku wa kwibavulukilako aba baakaminwenga Yehoba ne boba balangulukilenga pa* jizhina janji+ wanembelwe saka amonako.+

17 Yehoba wa mabumba waamba’mba, “Kabiji bakekala bami+ mu juba jo nkebalengela kwikala kya bunonshi kyami.*+ Nkebobila lusa, byonka muntu byo obila lusa mwananji umwingijila.+ 18 Kabiji mukamona jibiji lupusano luji pa muntu waoloka ne muntu mubi,+ ne pa muntu wingijila Lesa ne ubula kumwingijila.”

4 Yehoba wa mabumba waamba’mba, “Umvwai! juba jibena kwiya, jiteema nobe kisha kya mujilo,+ belundumika bonse ne bonse boba byatama jo bakekala nobe biswaswa. Juba jibena kwiya, kine jikebonauna kabiji kechi jikebashilapo muzhazhi nangwa musampi ne. 2 Bino anweba munemeka* jizhina jami, juba ja bololoke jikemusamina saka jimubuka na mintetenga* yajo; kabiji mukakilauka nobe baana banuna ba bañombe.”

3 Yehoba wa mabumba waamba’mba, “Kabiji babi mukebanyantaula, mambo bakekalatu nobe lukungu munshi ya maulu enu pa juba jo nkekyuba.”

4 “Vulukai Mizhilo ya Mosesa kalume wami, ko kuba’mba malamuna ne bunchibamambo byo nakambizhe ku Holeba kuba’mba bena Isalela bonse bebilamenga.+

5 “Umvwai! Mbena kwimutumina ngauzhi Elaija+ juba jikatampe ja Yehoba jilengesha moyo saka jikyangye kufika.+ 6 Kabiji aye ukalulwila michima ya bashabo ku baana,+ ne michima ya baana ku bashabo; pa kuba’mba nkabule kwiya na kupuma ntanda ne kwiyonauna.”

(Pano po papwila ntuntulwilo ya Binembelo bya Kihebelu ne Kialamaiki, kabiji palondela Binembelo bya Kingiliki bya Bwina Kilishitu)