Nanchi Musakubanga Kyaswa Muchima wa Yehoba Nyi?

Tubena kwimusanchila bingi pa kutanga uno buloshuwa wimulengela kuyuka bulongo Bakamonyi ba kwa Yehoba byo baji, kuyuka bulongo mingilo yetu ne bingila jibumba jetu. Twaketekela wimulengela kushiinwa kuba’mba yetu tubena kuba kyaswa muchima wa Yehoba lelo jino. Tubena kwimutundaika kutwajijila kufunda pe Lesa ne kubulako ba mu kisemi kyenu ne balunda nenu byo mubena kufunda. Kabiji tubena kwimutundaika ne kutanwa ku kupwila kwetu kwa bwina Kilishitu.—Bahebelu 10:23-25.

Byo mukafunda pe Yehoba bikemulengela kumona Yehoba byo emutemwa kya kine. Bikemulengela kwibikako kuba bintu bimwesha’mba naye mwamutemwa bingi. (1 Yoano 4:8-10, 19) Mwakonsha kumwesha byepi byo mwatemwa Lesa mu bwikalo bwenu? Mambo ka kumvwina mikambizho yanji o kwanemena kwi anweba? Ki ka kikemukwasha kuba kyaswa muchima wa Lesa pamo ne atweba? Bemufunjisha Baibolo bakatemwa bingi kwimulumbulwila mikumbu pa kuba’mba anweba ne kisemi kyenu mutwajijile kwikala mu “butemwe bwa Lesa, byo mubena kutengela . . . bumi bwa myaka ne myaka.”—Yuda 21.

Tubena kwimutundaika kutwajijila kufunda bukine mu uno buku wa kuba’mba ‘Ikalai mu Butemwe bwa Lesa.’