Byambo Bitanshi

UNO BUKU BYO MWAFWAINWA KUMWINGIJISHA

Yehoba Lesa wakambizha bantu banji ‘kukebakeba’ maana ne milangwe byonka bantu byo bakebakeba bya “buneme byafyamika.” (Maana 2:1-5) Ko kuba’mba twafwainwa kwibikangako kukebakeba mikumbu ya mepuzho o twipuzha pa Mambo a Lesa ne kuyuka Baibolo byo akonsha kwitukwasha mu bwikalo bwetu. Uno Buku wa Kukwasha Bakamonyi ba kwa Yehoba Kukebakeba Bishinka, bamunembela kukwasha bantu kukeba bishinka.

Uno kechi buku muji byambo biji mu mabuku etu onsetu ne. Bino muji mitwe imo imo ne mabuku a katataka mo mwafwainwa kukeba byambo byanema, kikatakata mabuku atuntululwa mu Kikaonde kutatula mu mwaka wa 2000.

BYA KUKEBAKEBA BISHINKA

Monai Mitwe Ijimo pa jipa jalondelapo ne kukebapo mutwe mo mwakonsha kutana byambo byo mubena kukeba. Mwafwainwa kukebakeba byambo pa mitwe yavulako pa kuba’mba mwibitane. Tumitwe tuji pa mutwe umo umo twafwainwa kwimukwasha kutana bukiji byo mubena kukeba.

Zhikulai pa jipa jatongolwa, apa bino mukebepo mutwe ne kamutwe ko mwasala. Pano paji tumitwe ne bitango. Salululaipo yo mubena kukeba kutanga. Umvwe muji na mabuku ku nzubo, pa kompyuta nangwa ku Nzubo ya Bufumu, kebaimo mutwe nangwa kitango kyo batongola. Nangwa kya kuba’mba mitwe imo kechi yakunza byambo biji pa mutwe ye mwasala ne, mwakonsha kutanapo byambo bimo.

Inge mubena kukeba kuyuka mwatala kinembelo, yai mu lubaji lwa kuba’mba “Binembelo byo Balumbulula.” Mu luno lubaji mujitu Binembelo byo baambapo mu mabuku etu kwapwa.

Vulukai’mba mubena kukebakeba bya “buneme byafyamika.” Pa kuba’mba mwibitane mwafwainwa kwibikako, mambo inge mubena kukeba mukumbu nangwa mukambizho umo kechi mwafwainwa kumutanatu mu kakimye kacheche ne. Umvwe saka mwingijisha uno Buku wa Kukebakeba Bishinka kimye kyonse, kikemupelelanga bingi kutana byo mubena kukeba kabiji mukekala na mujojo wa kukeba kwingijisha uno buku. Yehoba ukemupesha ne kwimukwasha kwikala na maana ne milangwe.—Maana 2:6; 4:5.

TUYUKILO:

❐ = Mitwe yafuma mu Kyamba kimo

§ = Kamutwe, kipungu, nangwa lubaji

¶ = Mafuka

kita. = Kitango

ji. nangwa ma. = jipa nangwa mapa

Na. = Nambala

12/2004 = Ñondo/Mwaka

2/1/2010 = Ñondo/Juba/Mwaka

Ano mabuku aji na nteeta yawo:

Mwenaimo mu Sukulu wa Lufunjisho lwa Mwingilo wa Lesa

Bakwatankana Kuba Kyaswa Muchima wa Yehoba

‘Monai Kyalo Kyawama’