‘Mukyeya Kyenu mo mo Tumwena Kyeya Atweba’

JAVULA kyeya kyokintu kyotubula kutako maana nekulanguluka buneme bwakyo, kanatu twaikala mumfishi bino potwalanguluka’mba nanchi kyeya kyawama. Kyalusekelo, “nsulo yetu yamwiulu kufuma kyeya”—juba kechi jizhimane. Kabiji kyeya kifuma kujuba, kitukwasha kumona, kuja, kupema, nekwikala bomi.

Kyeya byokyanema mubwikalo bwetu, kechi twakonsha kukumya pakutanga mu Ntendekelo amba kyeya kyamwekele pajuba jitanshi jakulengwa kwabintune. “Lesa waambile’mba: Kwikale kyeya, ne kyeya kyamwekele.” (Ntendekelo 1:3) Bantu bamushingi nabiji byajinga Mfumu Davida bayukishetu kuba’mba Yehoba yensulo yabumi nekyeya. ‘Komuji anweba ko ko iji ne nsulo ya bumi: Mukyeya kyenu mo mo tumwena kyeya atweba.’—Masalamo 36:9.

Byambo byakwa Davida bingila byonka byobiji, kepo nemubukifwanyikizho. Buku wa Encyclopaedia Britannica wamba’mba: “Kyeya kyokilengela kuba’mba tumonenga.” Kabiji wanungapo amba: “Meso abuula bongo bwabantu mabulañano avula kukila bibese byonse byamubiji bitambuzhanya mabulañano.” Bintu byonse byotufunda byobyakinka manungo mukyabupe kyameso akebewa kyeya pakuba’mba engile bulongo, Binembelo bingijisha nekyeya mubukifwanyikizho.

Yesu kyokyo abujile baana banji babwanga’mba: “Amiwa ne kyeya kya panopantanda: awa undondela amiwa kechi ukenda mumfishi ne, ukekala na kyeya kya bumi.” (Yoano 8:12) Kyeya kyakifwanyikizho kyoatongwele Yesu kyajinga mambo abukine oasapwijilenga, akonshesha kusamina mumilangwe nemichima yabantu bamutelekelenga. Panyuma yakupitapo myaka yavula mumfishi yakumupashi, baana babwanga bakwa Yesu popobaumvwishishe Lesa kyoalengejile bantu neluketelelo lwa Bufumu. Ee kine, kyajinga “kyeya kya bumi,” mambo kwikiyuka kutangijila kubumi bwamyaka nemyaka. Mululombelo lwanji kwi Shanji wamwiulu, Yesu walombele’mba: “Buno bo bumi bwa myaka, namba bemuyuke anweba, Lesa yenka wakine, ne Yesu Kilishitu ye mwatumine.” (Yoano 17:3) Onkao mambo, kange tusule kino kyeya kyakumupashine!