Abya Lwitabilo Lwafwainwa Kwitabilwatu Kwakubula Kulangulukishapo Bulongonyi?

Mukulumpe umo wapasukulu yabya bupopweshi mu United States wanembele’mba: “Bavula bingi bantu bekala kebapopweshi babula kulangulukishapo bulongo palwitabilo lwabo patanshi saka bakyangye kwilwitabila.” Wanungilepo’mba: “Betabilatu byonse kwakubula patanshi kupoya nekukonkola bishinka byalolo lwitabilo.”

KISHINKA kekyakuba’mba bantu bavula bamba’mba baji nalwitabilo kechi batako muchima nekukeba kuyuka ene mambo obaitabila mubyobyo byobaitabilamo, nangwatu kumona kana paji bishinka byalumbuluka byalolo lwitabilo lwabone. Kyomwamwena kuba’mba bavula kechi batako muchima kwamba pabya bupopweshine.

Kyabulanda, byubilo nabiji kwingijisha bipikichala byabupopweshi nekubwezhabwezhapo milombelo intu imo bilengela bantu kubula kulangulukishapo bulongo. Bino byubilo, kubikapo nekukobaikakobaika tubintu twalengwa bulongo tukebula bantu, mawindo amakalashi obapyola bulongo, kepo nenyimbo izakula muchima byobyonka byubiwa mubupopweshi buyamo bantu bavula. Nangwa kyakuba machechi amo amba kuba’mba lwitabilo lwabo lwafuma mu Baibolo, byambo byabo byobamba’mba ‘umvwe waitabila mwi Yesu kyapwa wapuluka’ bilengela bantu kubula kutako muchima kufunda Baibolo. Bakwabo balenga tubungwe twabwina Lesa twamba pabyakyalo nebumulwila ntanda. Kika kibena kufumamo mubino byonse?

Nembi wabupopweshi bumo mu North America wanembele pakino kuba’mba: “Bwina Kilishitu . . . bwaikalatu kebwatutu, [ne] bantu bajimo nabo kechi bafunda nekuyuka bulongo lwitabilo lobaitabilamone.” Nembi wabyambo waambile nekwamba’mba United States “kyalo kyabantu babula kuyuka Baibolo.” Kwambatu kishinka, byonka bino byobyo kiji nemubyalotu bikwabo muji bwina Kilishitu. Kabiji nangwatu bupopweshi bwavula bwabula bwabwina Kilishitu kechi butundaika bantu kulangulukishapo bulongone, bwibafunjishakotu kwimba, kulomba milombelo yakubwezha-bwezhapo, nemisango yakulanguluka-languluka pabyabupopweshi, mukifulo kyakulangulukishapo bulongo pabintu.

Pano bonka bantu bamo babula kutako muchima kukeba kuyuka bishinka byalwitabilo lwa bupopweshi bwabo, batako bingi muchima kubintutu bikwabo. Nanchi kechi kyakukumya pakumona muntu utaya kimye kyabaya nakulangulukishapo bulongo pamutundu wabivwalo byawama byoakeba kupota pakisankanyi abyo juba jimo byoakataya, keambe pabupopweshi’mba: ‘Abwe bupopweshi bujitu bulongo kwiamiwa mambo momwayanga nebansemi yami’?

Kine umvwe twibantu babena kukebesha kutokesha Lesa pamuchima, nanchi kuba twatako muchima amba tuyuke byotwaitabila peaye nenyi? Mutumwa Paulo watongwelepo bantu bamo babupopweshi bajingako mumoba anji’mba ‘bajinga na lupata lwa kusaka Lesa, bino kechi lwayila mu maana [alumbuluka] ne.’ (Loma 10:2) Bantu bauno mutundu bakonsha kwesakanyiwa ku muntu yebapa mwingilo wakupenta nzubo waingila bingi nangovu, pano mambo akubula kumvwina mikambizho yamwina nzubo waingijisha misombelo yapenchi ingi yobabula kumubula. Uno muntu wakonsha kutemwa bingi mwingilo yeaingila, pano nga mwine mwina nzubo usakutemwanyi?

Kika nanchi kyaitabilwa kwi Lesa pamambo abupopweshi? Baibolo yakumbula’mba: “Kino kyo kyawama ne kyaitabilwa ku meso a Lesa Mupulushi wetu; ye wasaka’mba, bantu bonse bapuluke, bakayukishe bya bukine.” (1 Timoti 2:3, 4) Bamo bakonsha kulanguluka’mba kyakatazha bingi kutana ano maana mubupopweshi bubavule bibye ano moba. Pano akilangulukai, umvwe kyaswa muchima wanji mwine Lesa kyakuba’mba bantu bayuke maana alumbuluka abukine, nanchi wakonsha kwiafya kwiabonyi? Kechi ibyone, mambo Baibolo yaamba’mba: “Umvwe obewa wamukeba [Lesa] ukamutana.”—1 Byambo bya Moba 28:9.

Lesa wiyukanyikisha byepi kuboba bamukeba mubukishinka? Mutwe walondelapo wakumbula jino jipuzho.