Atweba Bonse Tukeba Kutakaikwa

JUBA jimo kyamuwamijile bingi kashimbi. Nangwa kyakuba javula bamukajipilanga namambo akuzhikwa, pajino juba watekenye bingi. Pano bufuku bainanji byobamulajikile pamwanya, bamumvwinetu kajile. Byobamwipwizhe kyoajijilenga, wibambijile aku saajila’mba: “Nanchi lelo kechi najikutekanya nenyi?”

Aje jipuzho jaletejile bingi bainanji milanguluko. Mambo kimye kyonse bamukajipilanga bingi kashimbi. Nangwa kyakuba pajino juba bainanji bemwenejile abo bene uno kashimbi byoebikileko kutekanya kwakubula kulubankanya, kechi baambilepotu nangwa kyambo kimo kyakumutakaikane.

Bakashimbi kechi bobonkatu bakeba kwibatakaika nekwibakoseshane. Bonse tukeba kwitutakaika byonkatu byotukeba kwitufunda nekwitololako.

Tumvwa byepi umvwe betutakaika? Nanchi kechi kitusangajika nekwituletela lumwengemwenge nenyi? Tumvwa kuba’mba nanchi netuwa betuvulukapo kabiji betuta muchima. Kitulengela kushiinwa kuba’mba nanchi kintu kyonauba kyawama, kabiji kitutundaika kwingila bingi bulongo nangovu kimye kikwabo. Kine lutakaiko lwakine javula lwitulengela kukebesha kwikala kipi-kipi nayewo muntu waambapo byambo byakwitutakaika.—Byambo bya Mana 15:23.

Yesu Kilishitu wayukile bingi bulongo buwame buji mukutakaika bantu. Mukishimpi kyamatalenta, nkambo wabo (kulumbulula Yesu mwine) watakaikile bakalume banji babiji bakishinka bonse umo umo’mba: “Kyawama obewa kalume wawama ne wa kishinka.” Byokibasangajikilepo! Nangwa kyakuba’mba bapusene mubulume nebintu byobamwenejilemo, batakaikilwetu bonse pamo.—Mateo 25:19-23.

Onkao mambo tuvulukenga inanji yewa kashimbi. Kechi twafwainwa kupembelelatu’mba kana bakwetu balakashe mipolo bino twibatakaikene. Twafwainwa kumonapo bimye byakwibatakaikilamo. Kine, tuji nabishinka byakine bitulengela kutakaika bakwetu pakimye kyafwainwa.