“Nataine Byonse byo Nakebelenga”

KIPAMO kitala pa bumi bwa bantu kya World Health Organization kyaambile sawakya wakuba’mba bantu kukila pa 120 milyonyi mwaya ntanda baji na binyenge. Pa mwaka pa mwaka, bantu 1 milyonyi beipaya abo bene kabiji bantu pakachi ka 10 ne 20 milyonyi besulwa kwiipaya. Bukwasho ka bujiko bwa kukwasha aba bonse baji na binyenge? Kubukwa na muchi kwakonsha kukepeshako binyenge, ne lutekenesho nalo lukebewa bingi. Kabiji bamo baji na binyenge batana ne bukwasho bukwabo mu mabuku alumbulula Baibolo a Bakamonyi bakwa Yehoba, byonka byaamba ino nkalata yafumine ku France.

“Moba achechetu apitapo, kechi namwenepotu nekine kintu kyakutwajijila kwikala mumi ne. Nalombele kwi Lesa namba andeketu mfwe. Kyajingatu nobe nafwa nekala mukachi. Nalombele kwi Yehoba na mukoyo namba ankwashe. Kabiji nafuukwile kutanga 2002 Yearbook of Jehovah’s Witnesses ne kwiipwisha kwiitanga mu mobatu asatu. Nafwainwa kwamba namba yankwashishe bingi kabiji yakoseshe lwitabilo lwami.”

“Napesele-pesele mu magazini a Kyamba kya Usopa ne Loleni! kabiji nakuminye bingi! Mambo pano pabapite ne myaka 15 yonakelwa na kutanga ano magazini kimye kyonse, bino kechi nayukile byoakoseshañana ne buwame bwaone. Aamba pa butemwe bonka bonkatu—kyubilo kibula kubiwa ubiwa ano moba. Ee kine, natana byonse byonakebelenga.”

Baibolo yaamba’mba: “Yehoba uji kwipi na bonse balajika michima, kabiji wibapulusha bonse ba mipashi yalapila.” (Masalamo 34:18) Kwakubula ne kuzhinaukatu ne, bonse “balajika michima” nangwa “ba mipashi yalapila” bakonsha kutana lutundaiko mu Baibolo ne kuketekela bikeya kulutwe. Bakamonyi bakwa Yehoba basampanya mabuku alumbulula Baibolo kukwasha bantu bakeba bukwasho mu byambo byanembeshiwa na Lesa, aye nsulo ya lutekenesho.