Lutekenesho ku Boba Bakeba Bukwasho

BAIBOLO kechi buku iyuka biji butuntulu bwa milanguluko ya bantu ne. Bino, ayo itutekeneshatu ne kwitukwasha kwiyowa bumi nangwa kyakuba tubena kupita mu makatazho. Binembelo byaamba’mba: “Muntu usemwa ku mwanamukazhi ye wa moba acheche ne ao nao onka a malwa.” (Yoba 14:1) Bumbulwakoloka bwetu bwitulengela kupita mu meseko amo. Pano nanchi ñanyi mwine ulengela bantu kumanama?

Baibolo yamulumbulula uno kuba’mba ke muntu wa bumupashi wabipa utelwa’mba Satana Diabola. Ye “mujimbijimbi wa panopantanda ponse” kabiji ye uleta makatazho avula apitamo bantu. Kabiji Baibolo itubula ne kuba’mba washalatu na kakimye kanji kacheche. (Lumwekesho 12:9, 12) Katatakatu Lesa akafumyepo malwa onse aleta Satana ku bangikazhi ba panopantanda. Kwesakana na byaamba Baibolo, mu ntanda ipya ya bololoke yoalaya kuleta Lesa, ukafumyamo makatazho onse.—2 Petelo 3:13.

Byo kitutekeneshapo kuyuka’mba kumanama kubena kupitamo bantu kwa kimyetu kicheche! Mu bukalama bwa Bufumu bwa Lesa bwa mwiulu buji mu maboko akwa Yesu Kilishitu, nshiji ne lumanamo bikapwa. Binembelo byaambapo pe Mfumu wa Lesa watongolwa’mba: “Aye ukamupokolola wakajilwa pa kujila, ne aye mulanda wabulwa ne wa kumukwasha. Ukebobila lusa bayanji ne bakajilwa, ne myeo ya bakajilwa ukeipulusha. Ukebakula myeo yabo ku kunyantwa ne ku bukapondo; ne mashi abo akekala ke anema ku meso anji.”—Masalamo 72:12-14.

Kufikizhiwa kwa bino byambo bya bungauzhi kujitu pepi. Tukeyowa bumi bwawama bulongo bwa myaka ne myaka mu paladisa panopantanda. (Luka 23:43; Yoano 17:3) Kuyuka bino binembelo bya lutekenesho kupana luketekelo ne lutekenesho ku boba bakeba bukwasho.

[Byambo biji pa Kipikichala pa peja 32]

Kashimbi uji na binyenge: Kipikichala kya ILO/J. Maillard