Mambo ka Bakamonyi ba kwa Yehoba kyo Bemufwakashisha Kimye Kyonse pa Mazubo Enu?

MONSE mwaya ntanda, mwingilo wa Bakamonyi ba kwa Yehoba ye bengila kimye kyonse na mukoyo wa kusapwila ku nzubo ne nzubo wayukanyikwa bingi. Bantu bamo bezhinausha bingi pa kumona Bakamonyi sabeyatu, kikatakata umvwe kya kuba panyuma kechi bajinga ne na lusekelo lwa ntaka lwa kuteleka ku byambo byabo ne. Makalata abiji kufuma ku Russia alumbulula kilengela kino.

Masha, nsongwakazhi wa myaka ya kusemwa 19 wikala ku Khabarovsk waitaba kino amba: “Kwambatu kine, kunyuma kwe kechi nebakebangatu nangwa pacheche Bakamonyi ba kwa Yehoba ne.” Pano byoaubile watangapo magazini amo anembwa na Bakamonyi, wapimpwile milanguluko yanji. Masha wanembele’mba: “Byonse byo natangile mu magazini byawama bingi kabiji bipana maana, bino kyakijishapo kunema ke kya kuba’mba byambo bijimo bilengela muntu kumona bya mu ntanda mu jishinda japusanako. Natendekele pachepache kuyuka bantu kyo baikelako.”

Svetlana wikala mu muzhi mukatampe wa Ussuriysk waikela ku buyeke bwa Vladivostok palepa makilomita 80 wanembele’mba: “Natendekatu katataka kutanga Kyamba kya Usopa ne Loleni! Ano magazini akebewa bingi mu bwikalo bwetu. Ntemwa bingi byonse byambo bikalamo. Byawama bingi, bifunjisha kabiji ne kupana maana. Nasanta mwane! Kabiji mbena kusanta bingi pa kuba mwaikala mu ino ntanda ne kwingila mwingilo wawama kabiji wanema bingi ku bantu.”

Bakamonyi ba kwa Yehoba mwaya ntanda yonse balondela bingi mulanguluko waipwizhizhemo Paulo amba: “Bakomvwa byepi kwa kubula musapwishi?” (Loma 10:14) Nga mambo ka ne kuba mwipako ka kimye kacheche kuteleka Bakamonyi kimye kikwabo kyo bakemufwakashisha? Nenuwa mwakonsha kumvwa byambo bya lutekenesho biji mu Byambo bya Lesa, Baibolo.