Nkalata kwi Nowa

“KWI ba Nowa, mwane natanga byambo byaamba pe anweba mu Baibolo bimye byavula bingi, kabiji ne byo mwafiikile bwato bo mwapulukijilemo ne kisemi kyenu ku Muyulo wa mema.”

Abye byo byatendekele nkalata yanembele nsongwakazhi wa myaka ya kusemwa 15 wa jizhina ja Minnamaria, wajinga mu kwikyombesha kwa kunemba byambo kwajingako pakachi ka baana ba sukulu ba myaka ya kusemwa 14 kufika ku 21. Bipamo byanengezhezhe kuno kwikyombesha byajinga Finnish postal services, Federation for Finnish Mother Tongue Teachers (Kipamo kya Bafunjishi bafunjisha Mulaka wa Finnish) mu kwingijila pamo na ba Finnish Literature Society. Mu kuno kwikyombesha kwabo, bebabujile kunemba nkalata yaamba pa buku umo. Bonse bebabujile kunembela nkalata mwina yeo buku nangwa muntu umo washimikizhiwa mu yeo buku. Bafunjishi basajilepo makalata 1,400 anembele baana ba sukulu ne kwiapana ku bakulumpe batangijilenga kwikyombesha. Bano bakulumpe, patanshi basajilepo umo wakijile bonse ye bapele kilambu kitanshi kikatampe, babwela bapana kilambu kikwabo kikatampe kya bubiji ku bakwabo jikumi, kepo ne kikwabo kikatampe kya busatu ku bakwabo jikumi. Minnamaria watemenwe bingi pa kumona amba pa nkalata yanji watambwijilepo kilambu kikatampe kya busatu.

Mambo ka Minnamaria mwana wa sukulu wa mu jifumbi ja bwanyike, o anembejile Nowa nkalata, muntu wajingako myaka 5,000 yapitapo? Aye mwine waamba’mba: “Baibolo kyo kintu kitanshi kyaishile mu milanguluko yami. Bantu batongolwa mu Baibolo bayukanyikwa bingi kwi amiwa. Natanga javula bingi pe abo kabiji nebamonatu nobe bomi. Nasajile kunemba pe Nowa mambo bwikalo bwanji bwawamine bingi kupusana na bwami.”

Byambo byapelako mu nkalata ya kwa Minnamaria byaamba’mba: “Ne lunotu kine, mwi muntu wa kumwenako wa lwitabilo ne lukokelo. Bwikalo bwenu butundaika bingi bantu bonse batanga Baibolo kwikala na lwitabilo.”

Aye nkalata ya mwanyike utanga Baibolo yamwesha Baibolo kine byo aji ‘mumi ne kwingila wingila’ ku bantu bonse banyike ne bakulumpe.—Bahebelu 4:12.