Patanshi Bebatupenye, ko Kyakayanga Bino Bebatambwila

MYAKA icheche yapitapo, Santiago ne mukazhanji Lourdes bavilukijile mu muzhi wawama bingi wa Huillcapata, ku Peru, na kusapwila mambo a mu Baibolo apana luketekelo ku bangikazhi ba mu uno muzhi. Pano bino, kechi papichile ne kimye ne, ntangi wa ba Katolika waishile mu yewa muzhi kufuma ku Cuzco ne kupwizha pamo bangikazhi ba mu yewa muzhi. Uno ntangi wibajimwine’mba abe Bakamonyi ba kwa Yehoba baiya mu uno muzhi basakuleta mwalo watama bingi ne mvula wa sino ukepaya banyama babo ne konauna bijimwa byabo.

Bantu bavula baumvwijile bino “byambo,” kabiji kimye kyapichilepo kukila pa kichika kya mwaka, kafwako nangwa umo mu yewa muzhi waswile kumufunjisha Baibolo ne. Kineme wa mu yewa muzhi wa jizhina ja Miguel watendekele kwibatupanya ba Santiago ne Lourdes na mabwe amba bafumemo. Bino abo batwajijilepotu na kumwesha mushingi monka mwayila bwina Kilishitu.

Mu kuya kwa kimye, bantu bamo ba mu yewa muzhi batendekele kufunda Baibolo. Ne Miguel naye wapimpwile byubilo byanji. Byo batendekele kumufunjisha Baibolo kwi Santiago, waikele ke muntu wawama bingi kabiji walekele kutomesha malwa. Kyapeleleko, Miguel, mukazhanji, ne baana babo babakazhi babiji bafunjile bukine bwa mu Baibolo.

Lelo jino, mu uno muzhi muji kipwilo kibena kuba bingi bulongo kya Bakamonyi ba kwa Yehoba. Miguel umvwa bingi bulongo mambo aa mabwe o aashilenga ba Santiago ne Lourdes, kafwako nangwa jimo jibafikijile ne. Kabiji wibasanchila bingi bano ba mulume ne mukazhi pa kwikala na muchima wawama.

[Bipikichala pa peja 32]

Muchima wawama wajinga na ba Santiago ne Lourdes (baji peulu) walengejile Miguel (uji ku kilujo) naye kwikala na muchima wawama