“Kalombwana wa Myaka Itanu na Ina ye Walengejile amba Nteleke ku Mambo Awama”

UMVWE Bakamonyi ba kwa Yehoba baiya pa nzubo ya ba Wiesława baikalanga ku kabeta ka ku bulenge bwa Poland, patanshi basantanga na mushingi apa bino bebabula’mba kechi bakeba kwisamba nabo ne. Juba jimo, Samuel uji na myaka itanu na ina waile ku ba Wiesława na bainanji. Ba Wiesława bafukwile kumvwako ano mambo asapwila Bakamonyi ne kutambulako magazini waambilenga amba ino ntanda ikekala paladisa.

Mambo a kuba’mba Kivuluko kya lufu lwa kwa Kilishitu kyajinga pepi, Samuel wabujile ba Wiesława kuba’mba bakeye kutanwako ku jino juba janema. Kabiji uno mwanyike ne bainanji baileko jibiji, batwajile kapepala ka lwito. Ba Wiesława byo bamwene’mba mwanyike wavwala bulongo, nabo bakyambile’mba naiya nkikavwale bulongo. Byo babwelele baumvwine byaambile Samuel kabiji batambwile kapepala ka lwito ne kwipuzha’mba: “Nanchi nakonsha kwiyatu bunke bwami nyi, inyi na bamwata wami?” Kepo banungilepo’mba: “Inge bamwata wami babula kwiya, amiwa nsa kukeya. Nkeya na mambotu a obewa Samuel.” Bayile mambo kechi bakebelenga kufichisha Samuel ku muchima ne.

Mu kimye kya jashi ja kivuluko, Samuel waikajile pamo na ba Wiesława kabiji wibamwesheshenga binembelo byaambiwengapo. Kino kibasangajikile bingi. Baumvwine bingi bulongo pa kutanwa ku Kivuluko kabiji baambile amba jashi jaji kuwama bingi. Kabiji basangalele bingi pa kumona byo bebatambwijile bulongo ne butemwe bo bebamwesheshe ku kipwilo. Kufumatu ponkapa ba Wiesława batwajijila kuta muchima pa bintu bya ku mupashi kabiji kimye kyonse bapwila pamo na Bakamonyi ba kwa Yehoba. Baambile’mba: “Ñumvwa bingi kutama ku muchima pa kuba’mba nakananga kumvwako mambo o musapwila inge mwaiya pa nzubo yami. Kabiji kwambatu kine Samuel yewandengejile amba nteleke ku mambo awama.

Nobe byonka byaubile Samuel wikala mu Poland, Bakamonyi ba kwa Yehoba bakyanyike batota Lesa kupichila mu kwisamba na bakwabo ne byo bamwesha byubilo byabo byawama. Umvwe mwi banyike, ne anweba mwakonsha kukwashako bantu bakishinka kumvwa mafunde a ku mupashi.