Daniel Wavwala Baji Yanji Ya Pa Kupwila Kwa Nkambi

YESU wakajipijile bantangi ba bupopweshi bemonanga’mba baoloka kukila bakwabo, bazhingijile kimye kyo bamwene banyike saka batota Lesa patoka. Yesu wibepwizhe mu jishinda jafwainwa’mba: “Nanchi mukyangye kutanganyi, amba, Mu tunwa twa twanyike ne twana twa lukeke mo mwanengezhezhe kutota?”—Mateo 21:15, 16.

Daniel uji na myaka ya kusemwa itanu na umo, upwila mu kipwilo kyo bamba mulaka wa kina Russia mu Germany, ubena kumwesha’mba ne ano moba etu kukiji bakyanyike babena kutota Yehoba. Watainwe ku kupwila kwa nkambi kwa Bakamonyi ba kwa Yehoba mu Duisburg na bainanji ne nyenga yanji. Kyo kyajinga kimye kyanji kitanshi kutanwa ku kuno kupwila kukatampe. Bintu byonse byajinga byenyi kwi aye: hotela, luonde lukatampe, kupwila pa moba asatu, lubatizhilo, kabiji ne kifwanyikizho. Nga byubilo bya kwa Daniel byajinga byepi? Byawamine bingi.

Pa kimo, panyuma ya kupwisha kupwila kwa nkambi, kabiji saka babwela kala ku nzubo, Daniel wabukile lukelokelo kuya ku sukulu wa banyike. Pano kintu ka kyo akivwajile pa kakibaki kanji? Baji yamuyukanyikishenga’mba watainweko ku kupwila kwa nkambi! Bainanji bamulumbulwijile’mba “kupwila kwa nkambi kwapwa. Lelo kechi wafwainwa kuvwala baji ne.” Bino Daniel wakumbwile’mba: “Mbena kukeba bakwetu bonse bayuke konaile kabiji ne kwibabula byo nakafunjile.” Onkao mambo, wavwajile baji wanji juba jonse ku sukulu. Mufunjishi wanji byo amwipwizhe pa mambo a ino baji, wamulumbulwijile byajinga kupwila kwa nkambi.

Kupichila mu kuba bino, Daniel walondejilenga kya kumwenako kya bansongwalume ne bansongwakazhi bavula batota Yehoba patoka pa myaka yonse ye yavula yapitapo.