Nanchi Bubi Bwakankalwa Kushindwa Nyi?
Mwanyike watemwa twakukaisha kaisha watolele bomba awo waishile kulozeka ne kumusaba meso ne kumulemeka mu bwikalo bwanji bonse. Mwanamukazhi umo watayile kaana kanji kalukeke pa biswaswa byajinga kunsa ya mukwakwa. Wa mingilo ye bapangile nkito, wabwelakenye jibiji na buta pa kampanyi po aingilanga ne kutendeka kuloza yense ye ataine, kyapeleleko wabwelele wiloza aye mwine ne kwiipaya wiipaya. Muntu ye banemekatu bulongo wakunyine banyike.
KYA bulanda bingi kuba’mba masawakya atama a uno mutundu asampukila ne pakatele mu ano moba etu. Bulanda bukwabo ke bwa kuba’mba, bino bintu byubiwa na mambo a misalululo ya mishobo ne bumbanzhi. Pepala wa byambo wanembelwe mu 1995 waambile’mba: “Mu kitota kya myaka kya bu 20, Satana waangele bingi. Mwapita bwikalo bwa bantu kikyangye kumwekanapo kya uno mutundu kya kwipaya bantu bavula na mambotu a mushobo ne bupopweshi.”
Kabiji bantu babena kutamisha bingi mwela, konauna ntanda, bilengwa, ne kuzhiishatu banyama ba misango ne misango. Nanchi bantu bakonsha kupwisha buno bubi ne kulengela ino ntanda kwikala yawama kwikalapo nyi? Inyi bakankalwa kwiiwamisha? Shayuka umo awo wanemba byambo byavula bingi byaamba pa bubi waambile’mba: “Nakebeshe bingi kuwamisha ntanda. Pano bino ino ntanda kechi yawamapotu nangwa pacheche ne.” Apo kampe ne anweba mulanguluka kuba byonkabye.
Ntanda ko ibena kuya twakonsha kwiifwanyikizha ku bwato bubena kuya pa kalunga ka mema paji bingi manyaki kabiji pakatazha kupita. Nangwa kya kuba bantu baji mu bwato babena kwesekesha na ngovu kusendula bwato kuba’mba bupichile pawama, bapulwilamotu mabula. Bwato bwanankamatu pene pa kalunga paji manyaki a mama nafwa.
Byubilo bibena kuya na kutaminako mu ino ntanda byaiyako na mambo a bumbulwakoloka. (Loma 3:23) Nangwa byonkabyo, bintu byatama bibena kubiwa kechi byakonshatu kwambiwa’mba bantu bunke bwabo bo babena kwibyuba ne. Abya kujipo kilengwa kyatama kya mupashi kibena kutundaika bantu kuba’mba bobenga byubilo byatama nyi? Umvwe ibyo, ñanyi kino kyonka kilengwa, kabiji twakonsha kwizhikijila byepi? Mutwe walondelapo wakumbula ano mepuzho.
[Byambo biji pa Kipikichala pa peja 3]
© Heldur Netocny/Panos Pictures