Bapwishishenga Sukulu Wa Gileada Wa Nambala 124
Bamishonale Bebapashañanya Ku Nzhiye
UMVWE papita bañondo batanu na umo, panyuma ya kupwisha Sukulu wa Gileada kwikala kupwila pamo kwa balongo bapwisha sukulu, kabiji ne kisemi kyonse kya Betele kya ku United States bekita na kutanwako. Pa March 8, 2008, benyi bafumine mu byalo kukila pa 30 bapwijile pamo na kisemi kya Betele na kutanwa ku juba japwishishe balongo Sukulu wa Gileada wa nambala 124. Bonse batainweko bafikile 6,411 basangalele bingi pamo na baana ba sukulu bapwishishe pa juba jabo jiikajila.
Mulongo Stephen Lett wa mu Jibumba Jitangijila wajinga cheyamani waambile jashi jitanshi jajinga na mutwe waambilenga’mba: “Endelainga Pamo na Nzhiye ya Kifwanyikizho ya Yehoba.” Lumwekesho 9:1-4 waesakanya jibumba jicheche ja bena Kilishitu bashingwa bapayankene jibiji mu mwingilo wa Yehoba mu 1919 ku nzhiye ifikenatu kulukukañana. Baana ba sukulu bebavulwilemo kuba’mba byo baji ‘mikooko ikwabo,’ benungako bene ku ino nzhiye ya kifwanyikizho.—Yoa. 10:16.
Mulongo Lon Schilling, wa mu Kometi ya Musampi wa ku United States ye walondejilepo kwamba jashi jajinga na mutwe wa kuba’mba: “Ikalai Balunda.” Jino jashi jaambilenga pa kya kumwenako kya mu Baibolo kya kwa Akwila ne Pilisila (nangwa’mba, Prisca), bamulume ne mukazhi ba bwina Kilishitu bajingako mu myaka kitota kitanshi. (Loma 16:3, 4) Mu ino kalasi ya Gileada mwajinga bisemi 28 bya besongola. Bano bonse bebavulwilemo amba pa kuba’mba bakengile bulongo bumishonale, bafwainwa kukosesha masongola abo. Baibolo kechi waambatu pe Akwila kwa kubula kwamba pa mukazhanji, Pilisila ne. O ene mambo mutumwa Paulo ne kipwilo kyo bebamwenanga amba bamulume ne mukazhi. Popamotu, ne lelo jino bamishonale besongola nabo bafwainwa kwingijilanga pamo, kupwila pamo, ne kuyuka mwa kubila bintu pamo byo bakapitangamo mu mwingilo wabo ku ntanda ingi, ne mu jino jishinda bakakonsha kwikala balunda.—Nte. 2:18.
Jashi jalondejilepo jajinga na mutwe waambilenga’mba: “Yehoba byo Emubila Byawama ne Anweba Mubenga Byawama,” jaambiwe na mulongo Guy Pierce wa mu Jibumba Jitangijila. Mulongo Pierce walondolwele’mba kwikala bawama kulumbulula byavula kechi kukanatu kuba byatama konka ne. Muntu wawama ubila bakwabo byawama. Yehoba Lesa ye wakilamo kuwama. (Zeka. 9:16, 17) Buwame ne butemwe bwa Lesa bwakonsha kwitulengela kubila bakwetu byawama. Byo atakaikilenga baana ba sukulu, Mulongo Pierce wapezhezheko kwamba’mba: “Mubaubenga bingi bulongo. Twaketekela’mba byonkatu Lesa byo emubila byawama ne anweba mukatwajijila kuba byawama mu mingilo yonse yo mukengilanga kulutwe na lwendo Yehoba Lesa yo akemupa.”
Pa kupwisha bino, mulongo Michael Burnett wajinga mishonale pano watongwelwe katatakatu kwikala mufunjishi wa Gileada, waambile jashi jajinga na mutwe wa kuba’mba: “Vwalai byo Mwafunda Nobe Tumaponda twa pa Bilungi Byenu.” Bena Isalela byo bavwalanga “tumaponda” pa bilungi byabo, bavulukanga Yehoba byo ebapokolwele mu jishinda ja kukumya mu Ijipita. (Lupu. 13:16) Baana ba sukulu bakambizhiwe kuvuluka bintu byavula byo bafunjile mu Sukulu wa Gileada uba nobe bavwala tumaponda pa bilungi byabo. Mulongo Burnett waambishe bingi pa kwikala bekepesha ne kwipelula ne kwingijisha mafunde a mu Baibolo pa kupwisha makatazho umvwe bapusenamo na bakwabo bamishonale ne na bantutu bakwabo.—Mat. 5:23, 24.
Mulongo Mark Noumair, mufunjishi wa Gileada waingila myaka yavula waambile jashi jajinga na mutwe wa kuba’mba: “Lwimbo ka Wafwainwa Kwimbiwa pa Mambo a Anweba?” Kala kyajinga kisho kya kusekelela na lwimbo umvwe bashinda nkondo. Lwimbo umo waamba pa bisaka bya bena Lubenyi, Danyi, ne Ashela amba kechi byaingilanga na ngovu ne, pakuba kisaka kya kwa Zebuluna kyatakaikwa na mambo a muchima wa kwipana. (Mito. 5:16-18) Byonkatu biyukanyikwa byambo bya lwimbo, ne byubilo bya mwina Kilishitu yense biyukanyikwa ku bakwabo. Mukoyo uji na muntu mu kwingila mingilo ya Lesa ne kuchinchika mu bukishinka mu jibumba ja Yehoba bilengela Yehoba kumuvuluka ne kwikala wa kumwenako wawama bingi ku balongo banji. Umvwe bakwetu mu kipwilo ke bateleke ku lwimbo wa kifwanyikizho wanembwa na byubilo byetu, balondela kino kya kumwenako kyawama.
Mwingilo wa kusapwila byo aikala lubaji lwa lufunjisho lwa Gileada, kalasi wa nambala 124 waingijile maawala 3,000 mu uno mwingilo. Jashi jajinga na mutwe wa kuba’mba: “Kulondela Bitutangijila Mupashi Wazhila” byo jaambiwenga, baana ba sukulu baambile bya kumwenako bya mu mwingilo wa mu bujimi ku mulongo Sam Roberson uji mu Dipatimenti ya Sukulu wa Lesa ne kumweshapo bya kumwenako bimo byo bajinga nabyo. Byo bapwishishe kushimikizha bya kumwenako, mulongo Patrick LaFranca wa mu Kometi ya Musampi wa ku United States, waipwizhenga boba bapichile kala mu Sukulu wa Gileada pano luno babena kwingijila mu byalo bingi. Baana ba sukulu basanchile bingi pa byambo bya lutundaiko byaambile bano balongo.
Mulongo Anthony Morris wa mu Jibumba Jitangijila waambile jashi japeleleko jajinga na mutwe waambilenga’mba: “Vulukai Kuba’mba Bintu Bimweka ke bya Kakimyetu Kacheche.” Binembelo bitujimuna’mba twafwainwa kuta muchima pa mfweto ya kulutwe kufuma kwi Yehoba, kukila kuta muchima ku malwa o twakonsha kupitamo luno. (2 Ko. 4:16-18) Buyanji, nshiji, lumanamo, kubela, ne lufu ke bintu byo tubena kumona bonse lelo jino. Bamishonale bakonsha kupitamo mu bino bintu byakatazha. Bino umvwe twavuluka’mba bino bintu bya kakimyetu kacheche, kitukwasha kwikala bakosa ku mupashi ne kwikala na luketekelo.
Pa kupwisha kupwila aba bonse bapwishishenga sukulu baikele pa pulatifomu na kuteleka byambo bya kupezhako byaambilenga Mulongo Lett. Wibatundaikile kubula kulefulwa ne kwamba’mba: “Twakonsha kuchinchika ne kulama bulumbuluke bwetu umvwe Yehoba ubena kwitutundaika.” Watundaikile bamishonale bakatataka kwikala nobe nzhiye, kutwajijila kwikala bakosa mu mwingilo wa Yehoba ne kwikala babambakana, bakishinka, kabiji balukokelo myaka ne myaka.
[Kitenguluzha pa peja 30]
BIBELENGELO BYA BAJINGA MU SUKULU
Bafumine mu byalo: 7
Bebatumine mu byalo: 16
Baana ba sukulu bonse pamo bajinga: 56
Myaka ya kusemwa umvwe twiyabanya pa muntu pa muntu ke: 33.8
Myaka yo baikala mu bukine umvwe twiyabanya pa muntu pa muntu ke: 18.2
Myaka yo baingila mu mwingilo wa kimye kyonse umvwe twiyabanya pa muntu pa muntu ke: 13:8
[Caption on page 31]
Bapwishishenga Sukulu wa Gileada wa Nambala 124
Ndonda ya mazhina alondelapo ibena kubalwa kufuma panshi kuya peulu, ne mazhina nao alondankana kutatwila ku kipiko kuya ku kilujo mu munongo umo umo.
[Caption on page 31]
(1) Nicholson, T.; Main, H.; Senge, Y.; Snape, L.; Vanegas, C.; Pou, L. (2) Santana, S.; Oh, K.; Lemaitre, C.; Williams, N.; Alexander, L. (3) Woods, B.; Stainton, L.; Huntley, E.; Alvarez, G.; Cruz, J.; Bennett, J. (4) Williamson, A.; González, N.; Zuroski, J.; Degandt, I.; May, J.; Diemmi, C.; Tavener, L. (5) Lemaitre, W.; Harris, A.; Wells, C.; Rodgers, S.; Durrant, M.; Senge, J. (6) Huntley, T.; Vanegas, A.; Pou, A.; Santana, M.; Bennett, V.; Tavener, D.; Oh, M. (7) Zuroski, M.; Rodgers, G.; Diemmi, D.; Nicholson, L.; Alvarez, C.; Snape, J. (8) Harris, M.; González, P.; Main, S.; Woods, S.; Stainton, B.; Williamson, D.; Durrant, J. (9) Cruz, P.; Degandt, B.; Williams, D.; Wells, S.; Alexander, D.; May, M.
[Kipikichala pa peja 32]
Sukulu wa Gileada waikela ku Watchtower Educational Center