Nafunjile’mba Bumi Bwanema Bingi
PAJINGA PA APRIL 16, 2007, LUKELO. Nafukamine mu jikonka ja ofweshi wa busatu peulu mu kishimikwa kya Norris Hall kiji na bibamba bina kuya peulu pa sukulu mukatampe utelwa’mba Virginia Polytechnic Institute and State University, nangwa’mba Virginia Tech. Navulwilwemo jikwabo byo twafwainwa kusanta pa mambo a bumi bwanema bo twikala nabo pa juba pa juba.
Najinga mu ofweshi wami saka nenengezha namba ngye pa kibamba kya bubiji na kusenda nkalata yami. Mwanamulume umo makanyika waishile na kuñambila’mba ngye na kumukwashako kulungisha kompyuta yanji. Byo twatwelele mu ofweshi wanji, twaumvwine mata saka ajila mu kibamba kya bubiji. Kwa kubula kuyuka kyaubiwenga, twanyemejile mu ofweshi wanji ne kukiya ku kinzhilo na kupembelela saka twapujikatu michima. Nafyamine mu jikonka ja ofweshi ne kulomba na muchima yense kwi Yehoba Lesa kuba’mba ankwashe ngyuke mwakubila na lukatazho luji lonse lwakonsheshe kumweka.
Byo twakipembejilenga, natendekele kulanguluka pa kinkunka kimo kyamwekele pa myaka 15 kunyuma. Naingilanga mwingilo wa bumakanyika, mu kibamba mo twalungishishanga myotoka. Kikopo mwajinga mafuta a motoka kyajinga na mukwetu mo twaingijilanga kyaambukile. Na mambo a kulukusha muchima, watayile kikopo kyajinga na mujilo ko najinga ne kumfikila pa kilungi. Napile kutama. Bantwajile na kabotolo ku kipatela kibuka bantu bapya na mujilo kabiji naikele monka pa bañondo basatu pa kubatu’mba mbukwe. Byo papichile bañondo batanu bo naikele mu kipatela na kubukwa, nafumine ne kubwela ku nzubo saka nsanta pa kwikala mumi. Bino byo napichilemo byamfunjishe kunemeka bumi bo ngikala nabo pa juba pa juba. Kabiji kino kyankoseshe bingi kwingijisha bumi bwami bonse kwingijila Mulenga aye Yehoba Lesa—byonji Kamonyi wanji.—Salamo 90:12; Isaya 43:10.
Byo nakankelwe kwingila nkito ya bumakanyika na mambo a bulema bo naji nabo, nafunjile kulungisha makompyuta kabiji natwelele ne nkito pa sukulu mukatampe wa Virginia Tech. Kino kyo kyandengejile ne kuba’mba ntanwe pa ofweshi wa Norris Hall pa jo ja juba lukelo.
Mata byo akijilemo kujila, kechi twayukilepo amba kuvizhiwa kwa bantu kwabujile kubiwapo kala mu U.S. kubena kubiwa panshi ya kibamba kyo twajingamo ne. Kujila kwa mata kwapwiletu kimye awa waipalenga bakwabo byo elozele mwine, panyuma ya kwipaya bantu 32 babula mambo. Byo papichiletu maminiti 20, twaumvwinekotu bakapokola saka bapita. Twibechile kabiji betutwajile ku mpunzha kwafyamika.
Bino bintu bya malwa byonapichilemo byamfunjishe kuyuka’mba bumi ke bwa kakimyetu kacheche. (Yakoba 4:14) Byo kyanemapo kwi atweba bonse kuketekela mwi Mpanyi wa bumi aye Yehoba Lesa, kabiji ne kumona’mba juba jonse jo twaikala bomi janema, mambo ke bupe kufuma kwi aye!—Salamo 23:4; 91:2.
[Byambo biji pa Kipikichala pa peja 26]
AP Photo/The Roanoke Times, Alan Kim