Mepuzho Kufuma Kubatanga

Nanchi mwana wafwila munda mwainanji ukasangulwa nyi?

Aba bakyangye kusemapo mwana wafwila munda, kechi bayuka byo eumvwa ku muchima nsemi wapitapo mu kino ne. Bansemi bamo bashala na bulanda bukatampe bingi. Inetu umo wasemanga baana bafwila jimo batanu. Mu kuya kwa moba, waumvwine bingi bulongo pa kwikala na baana babiji. Pano bino wavulukanga bingi baana bafwile. Mu bwikalo bwanji bonse wafwanyikizhanga jifumbi jafwainwe kwikalapo baana banji umvwe ne kufwa ne. Nanchi bena Kilishitu baji na bishinka byakonsha kwibale­ngela kuketekela mu lusanguko lwa bano baana nyi?

Kwambatu kine, kechi twayuka ne. Mambo mu Baibolo kechi batongolapo lusanguko lwa mwana wafwila munda ne. Bino mu byambo bya Lesa muji mikambizho yaamba pa buno bwipuzho yakonsha kupana lutekenesho.

Twayai twisambe pa mepuzho abiji epashako. Butanshi ke bwa kuba’mba mu mweno ya Yehoba nanchi bumi bwa muntu butendeka ñanyi kimye, pa kwimita nyi, inyi pa kusemwa? Bwa bubiji ke bwa kuba’mba, nanchi Yehoba umona byepi mwana ukyangye kusemwa, muntu nyi, inyi ke jishitu jiji munda ya inetu? Mikambizho ya mu Baibolo yakumbula bingi bulongo ano mepuzho onse abiji.

Mizhilo yapainwe ku bena Isalela imweshatu patoka kuba’mba bumi kechi butatula pa kusemwa ne, kusemwa kupelako. Twayuka na ka? Mizhilo yaambile’mba waipaya mwana ukiji munda naye bafwainwe kumwipaya. Uno muzhilo waambile’mba: “Ukapana mweo pa mweo mukwabo.”a (Lupu. 21:22, 23) Onkao mambo mwana ukiji munda ujitu pamo na muntu wasemwa kala. Kumvwisha kino kishinka kwalengela bena Kilishitu bavula kukana kufumya memi mambo bayuka kuba’mba ke mambo akatampe kwi Lesa.

Kya kine mwana ukiji munda mumi. Nanchi Yehoba wanemeka byepi mwana ukiji munda? Muzhilo watongolwa peulu po wakambizhe kwipaya muntu walengela mwana ukiji munda kufwa. Akye kishinka kimwesha bumi bwa mwana ukiji munda byo bwanema ku meso a Lesa. Kikwabo, Binembelo byavula mu Baibolo bimwesha kuba’mba mwana ukiji munda kwi Yehoba ke muntu. Kya kumwenako, mupashi wamulengejile Mfumu Davida kwamba pe Yehoba amba: “Mwannungakenye amiwa munda mwa bamama. . . . Meso enu amwenejile jimo mubiji wami saka akyangye kulengwa, Ne byonse bya mubiji wami byanembejilwe jimo mu buku wenu, Kabiji byayilenga na kulengwa pa juba pa juba, byo byakiji bifwako.”—Sala. 139:13-16; Yoba 31:14, 15.

Kabiji Yehoba umona baana bakiji munda kuba’mba bantu bakonsha kubapo bimo kulutwe na lwendo. Mukazhanji Izaka, aye Libeka byo ajinga na jimi ja mapasa, Yehoba waawile kuba’mba baana babalume babiji balwilenga munda yanji, kino kyamwesheshe kuba’mba wamwene byubilo byabo amba bikalamata bwikalo bwa bantu bavula kulutwe na lwendo.—Nte. 25:22, 23; Loma 9:10-13.

Jishimikila ja kwa Yoano Mubatishi najo jawama bingi. Tumvwa mu mambo awama ku­ba’mba: ‘Elisabeta pa kumvwa lwimu lwa Maliya, ne mwana kafunkishe munda yanji; ne Elisabeta wayujile na mupashi wazhila.’ (Luka 1:41) Luka wajinga dokotala byo ashimikizhenga kino waingijishe kyambo kya Kingiliki kilumbulula mwana ukiji munda nangwa wasemwa kala. Kabiji waingijishe kyambo kintutu kimo byo aambilenga pe Yesu byo akijinga lukeke sa bamulajika mu kijilamo banyama.—Luka 2:12, 16; 18:15.

Kwesakana na byo twisambapo, nanchi Baibolo upusanya mwana ukiji munda ku wasemwa kala nyi? Ine, kechi byo aamba ne. Baibolo waamba pa kyatana ne bashayuka ba bya sayansi ba mu ano moba. Kya kumwenako, bashayuka ba bya kupesapesa batana kuba’mba mwana uyuka biji pangye kabiji bimulengela kumvwa bulongo nangwa ne. Onkao mambo kya kine ku­ba’mba inetu wanema pa muchima umvwañana bingi na mwananji ukiji munda.

Moba asemenwapo baana aenda kupusana. Akilangulukai pa kino kya kumwenako: Nsemi umo wasemene mwana mubishi, bino panyuma ya moba acheche mwana wafwile. Nsemi mukwabo naye wajinga na jimi ja bañondo bafikilamotu bulongo, bino mwana wafwile saka kwashalatu kimye kicheche kuba’mba apape. Nanchi nsemi mutanshi ye ujitu na luketekelo kuba’mba mwananji ukasangulwa mambo bubishi bo bwalengejile mwana kufwa, pa kuba nsemi mukwabo aye ufwalo luketekelo kuba’mba mwananji ukasangulwa nyi?

Kishinka ke kya kuba’mba Baibolo ufunjisha’mba bumi butendeka pa kwimita ne Yehoba wibumona bumi bwa mwana ukyangye kusemwa byonka biji bumi bwa muntu wasemwa kala kabiji wibunemeka bingi. Na mambo a Binembelo byaamba pa ano mambo, bamo bakonsha kumona amba lusanguko lwa baana bakyangye kusemwa kechi lwafwainwa kuzhinaukwa ne. Bakonsha kumona amba kino kishinka kyakonsha kuleta mepuzho pa kyo tukaina kufumya memi, mambo kyaimena pa Binembelo bintutu bimo.

Mu moba a kunyuma, mu Kyamba kya Usopa kimo mwajinga mepuzho amwekele nobe apwisha luzhinauko lwa lusanguko lwa baana bafwa sa baji munda. Kya kumwenako, nanchi Lesa mu paladisa ukabwezha munda jimi nangwatu ja moba acheche jaonaikile nyi? Nangwa byonkabyo, kutanga, kulanguluka langulukapo ne kulomba kwalengela Jibumba Jitangijila kwamba’mba milanguluko ya uno mutundu kechi yanemeshatu mu luketekelo lwa lusanguko ne. Yesu waambile’mba: “Bintu byonse byakonsheka kubiwa na Lesa.” (Mako 10:27) Bwikalo bwanji Yesu bwamwesheshe bukine bwa bino byambo mambo bumi bwanji bebutuntulwile kufuma mwiulu kwibutwala munda ya kamwale wabujile kusambakanapo na mwanamulume ne. Kya kine kino kintu kyaji kya kukumya mambo bantu kechi bakonsha kwikyuba ne.

Nanchi bino byonse bimwesha’mba Baibolo ufunjisha’mba baana bafwa sa bakiji munda bakasangulwa nyi? Kishinka ke kya kuba’mba Baibolo kechi washinkamika pa kukumbula buno bwipuzho ne. Onkao mambo kafwako bishinka byakonsha kwitulengela kusumininwa kuba’mba bakasangulwa ne. Awe mutwe uleta bingi mepuzho avula. Pano bino kyanema bingi kubula kuvuzha milanguluko. Kyo twayuka ke kino: Aye mwine Yehoba Lesa ye wayuka bya kuba, monka mwayila kifyele ne lusa lwanji. (Sala. 86:15) Kechi kya kuzhinauka nangwa pachechetu ne, aye wasakisha kufumyapo lufu ne kusangula bafwa. (Yoba 14:14, 15) Twayai tusumininwe kuba’mba aye kyonse kimye uba kyawama. Aye ukapwisha misongo yonse yo tupitamo mu ino ntanda ibi, na mambo a butemwe bwanji, ukambila Mwananji kuba’mba “onaune mingilo ya Diabola.”—1 Yoa. 3:8.

[Tubyambo twa mushi]

[Kipikichala pa peja 13]

Yehoba ukapwisha misongo yonse yo tupitamo