Mwanamulume Wapimpwile Bwikalo bwa Bantu
Panopantanda bantu basemwa ne kufwa. Bavula kafwapo nangwa kimo kyo baubapo kya kwibavulukilako ne. Nangwa byonkabyo, bantu bachechetu bo baya nkuwa na mambo a bintu byo baubapo mwapita bwikalo bwa bantu.
MWABUKA lukelokelo, mwatendeka kwinengezha kuya ku nkito. Mwabwela mwaambula ne malaichi kimye kyo mubena kwinengezha. Mwatola buku nangwa magazini a kutangila mu sakya. Kabiji mwabwela mwavuluka kutoma muchi kuba’mba mukose. Lukelokelotu mwamwenamo kala mu bintu byauba bantu bamo baya nkuwa.
Michael Faraday Wasemekelwe mu 1791. Uno shayuka ye wajinga mutanshi kusomba minkinyi ibiji, wingila na malaichi nangwa manyi ne ulenga malaichi. Bino bintu byo aubile byakwashako bantu kwikala na malaichi.
Ts’ai Lun Uno kiloolo wa mu bufumu bwa bena China ye watendekele mwingilo wa kulenga bipepala nobe mu 105 C.E. Kino kyalengejile mwingilo wa kulenga bipepala kubaya.
Johannes Gutenberg Nobe mu mwaka wa 1450, uno mwina German wasombele munkinyi mutanshi wa kulenga mabuku. Uno munkinyi wapezhezheko nembelo ne ndengelo ya mabuku. Kino kyalengela masawakya pa mitwe yapusanapusana kuyukanyikwa ku bantu bavula.
Alexander Fleming Mu 1928, uno shayuka mwina Scottland wataine muchi ushinda twishi tuleta bikola mu mubiji utelwa’mba penicillin. Uno muchi lelo jino ubena kukwasha bingi mu kushinda bikola.
Kyamwekeshatu patoka amba bantu bachechetu bo basomba bintu byalengela bantu bavula kumwenamo ne kwikala na butuntulu bwa mubiji bwawama.
Bino mwanamulume umo wibakila bano bonse. Kechi wayukanyikilwa mu bya sayansi nangwa mu bya michi ne. Uno mwanamulume wasemekejilwe mu kisemi kyabula kinonshi, wafwile myaka pepi na 2,000 yapitapo waambilepo byambo bimo bya lutekenesho kabiji bilengela bantu kwikala na luketekelo. Inge twauba’mba tumone byambo byanji byo byafika bantu pa michima, bavula bafwainwa kwitabila amba kine uno mwanamulume wapimpwile bwikalo bwa bantu.
Auno mwanamulume wajinga Yesu Kilishitu. Ñanyi byambo byo asapwijile? Kabiji byakonsha kwimukwasha byepi mu bwikalo bwenu?