Bantu Batanga Magazini Etu Bepuzha’mba . . .

Nanchi Yesu ye Mikela Malaika Mwine Mukatampe Nyi?

▪ Ee, ye iye. Mu bisho byavula kijitu bulongo muntu kumutela mazhina avula. Po pamotu ne mazhina aji mu Baibolo. Kyakumwenako, mushakulu aye Yakoba naye bamutela’mba Isalela. (Ntendekelo 35:10) Mutumwa Petelo bamutela mu mashinda atanu apusana pusana a kuba’mba, Shimeona, Shimona, Petelo, Kefasa ne Shimona Petelo. (Mateo 10:2; 16:16; Yoano 1:42; Byubilo 15:7, 14) Twakonsha kusumininwa byepi amba Mikela ke jizhina jikwabo ja kwa Yesu? Akimonai byaamba Binembelo.

Mu Baibolo, jizhina ja kilengwa kikatampe kya mupashi ja Mikela jitanwamo jitanu. Mu buku wa Danyela jitanwamo jisatu. Mu Danyela 10:13, 21, tutangamo kuba’mba malaika ye batumine kuya na kwingila, bamupokolwele kwi Mikela, utelwa’mba “umo wa mu bakulumpe ba bamalaika” kabiji “malaika wenu.” Kabiji mu Danyela 12:1, tufundamo’mba mu kimye kya kupelako, “Mikela ukemana, yenkaye mukulumpe wa bamalaika ulama balongo bobe.”

Mukwabo mo bamutongola Mikela ke mu Lumwekesho 12:7, mo bamulumbulula “Mikela ne bamalaika banji” saka babena kulwa nkondo ikatampe yalengejile kufumya Satana Diabola ne bamalaika banji batama mwiulu.

Monai’mba mu byonse byaambiwapo kala, Mikela bamulumbulula kwikala malaika wa nkondo ubena kulwa ne kupokolola bantu ba Lesa, kabiji ne kunankama mulwanyi mukatampe wa Yehoba, aye Satana.

Yuda kyepelo 9 kyatongola Mikela amba “malaika mwine mukatampe.” Mu Baibolo, byambo bya kuba’mba “malaika mwine mukatampe” bimenakotu muntu umo kechi bavula ne. Mu kyepelo kikwabo mo batongola malaika mwine mukatampe ke mu 1 Tesalonika 4:16, Paulo mo alumbulula Yesu wasangwilwe amba: “Nkambo [Yesu] mwine ukekila mwiulu na mbila, na jiwi ja malaika mwine mukatampe ne na ntolompita ya Lesa.” Onkao mambo, Yesu Kilishitu bamulumbulula pano kuba’mba malaika mwine mukatampe nangwa’mba mukulumpe mwine wa bamalaika.

Kwesakana na byo twisambapo, tusakwambapo’mba ka? Yesu Kilishitu ye Mikela malaika mwine mukatampe. Ano onse mazhina abiji, Mikela (jilumbulula’mba “Ñanyi Uji Nobe Lesa?”) kabiji Yesu (jilumbulula’mba “Yehoba ye Lupulukilo”)—onse abiji aambisha pa mwingilo wanji wa kutumbijika bumfumu bwa Lesa. Filipai 2:9 waamba’mba: “Lesa wamutumbijikisha [Yesu] bingi, wamupa ne jizhina jakila mazhina onsetu.”

Kyanema bingi kuyuka’mba Yesu byo asemenwe mu bumuntu kechi yo yajinga ntendekelo yanji ya kwikalako ne. Yesu saka akyangye kusemwa, Maliya bamufwakashijile kwi malaika wamubujile’mba ukemita mwana kupichila mu mupashi wazhila kabiji ne kuba’mba wafwainwa kumutumba’mba Yesu. (Luka 1:31) Javula mu mwingilo wanji, Yesu waambangapo bingi kuba’mba wajingako ne kala.—Yoano 3:13; 8:23, 58.

Onkao mambo, jizhina ja Mikela malaika mwine mukatampe jo jo bamutelelamo Yesu mwiulu. Byo asangwilwe ne kubwela mwiulu, Yesu watendekele kwingila mwingilo wanji wa Bumikela, mukulumpe mwine wa bamalaika, wa ‘kuletela lukumo Lesa Tata.’—Filipai 2:11.