Mukivuluka Nyi?

Nanchi mwamwenamo mu kutanga magazini a Kyamba kya Usopa akatataka nyi? Monai inge mwakonsha kukumbula ano mepuzho:

Nanchi nsuki yo yapanga Samisonyi bulume nyi?

Nsuki kechi yo yapanga Samisonyi bulume ne. Yaimenangako bulunda bwanji ne Lesa, mambo Samisonyi wajinga Munazili. Buno bulunda bwatamine kimye kyo bamutendele nsuki kwi Delila.—4/15, jipa 9.

Kwesakana na biji muchima mwine, ñanyi bintu bisatu byakonsha kulengela muchima wetu wa kifwanyikizho kuwama?

(1) Kajo. Byonkatu muchima mwine byo akebewa kajo kawama, ne atweba tukebewa kajo kawama ka ku mupashi. (2) Kukosesha mubiji. Kwingila mwingilo wa kusapwila na mukoyo kwakonsha kulengela muchima wetu wa kifwanyikizho kuwama. (3) Mpunzha. Twakonsha kukepeshako bijikila kupichila mu kupwanañana na bakwetu ba mu lwitabilo betuta muchima.—4/15, jipa 16.

Twakonsha kuchinuzhuka byepi kwipapika na bandemona?

Chinuzhukainga byonse byakunza ku kupopwela mipashi. (Byu. 19:19, 20) Ibikaingako kuba’mba “mufwenye kwipi ne Lesa” kabiji ne kuketekela’mba ukemukwasha kukasuluka ku bandemona. (Yako. 4:7, 8)—7/1, jipa 12

Mambo ka ñambi ubena kwamba jashi ja kijilo o afwainwa kubujila kwingijisha Salamo 116:15 ku muntu wafwa?

Kino kinembelo kyaamba’mba: “Lufu lwa bazhijikwa banji lo lwa buneme ku meso a Yehoba.” Kino kibena kulumbulula’mba Lesa kechi uswisha bantu banji bakishinka bonse kufwa ne, mambo banema bingi kwi aye. Kabiji kechi ukaswisha jibumba ja bakalume banji bakishinka kwibazhiisha pano pa ntanda ne.—5/15, jipa 22.

Bakoputala bajinga bañanyi?

Mwaka wa 1931 saka akyangye kufika, kyambo kya “koputala” bekingijishanga ku batelwa luno amba painiya.—5/15, jipa 31.

Bañanyi baji mu “buno bufumu bonse” bo baambapo mu Danyela 2:44?

Buno bungauzhi bwaamba pa bufumu nangwa makafulumende emenwako na mbaji yapusana pusana ya lukipashañano wa kyela walumbulwile Danyela.—6/15, jipa 17.

Ñanyi kimye Bufumu bwa Ntanda Yonse bwa Anglo-America kyo bwaikele bufumu bwa ntanda yonse bwa butanu na bubiji bwa mu bungauzhi bwa mu Baibolo?

Buno bufumu bwa ntanda yonse bwaikeleko kimye byalo bya Britain ne America kyo byakwatankene mu kulwisha balwanyi babo mu Nkondo Itanshi ya Ntanda Yonse.—6/15, jipa 19.

Ñanyi mafunde amo akonsha kwimukwasha kusala bwikalo bwawama bwa kulutwe?

Langulukainga pa Bikafuma mu byo Mufuukula. (Mana 22:3) Ifuukwilainga Anweba Bene (Mana 21:5). Ubainga byo Mwafuukula. (Yoa. 17:3)—7/1, mapa 18-19.

Ñanyi mafunde amo a mu Baibolo akonsha kwimukwasha kubula kulukusha muchima umvwe mwakajilwa mali?

Kubajila jimo. (Luka 14:28) Pimpulaiko bwikalo bwenu. (Mana 22:3) Swainga kwingila nkito yapusana pusana.. (Mana 29:25) Sekelai na byo muji nabyo. (Fili. 4:11, 12)—7/1, mapa 20-21.