MUTWE WA PA NKUPIKO | NANCHI KUJIPO WAYUKA BIJI KULUTWE NYI?

Bintu Bimo Byamba Bantu Bifika, Bino Byavula Kechi Bifika Ne

Nanchi mwakonsha kutemwa kuyuka bikekala bwikalo bwenu bwa kulutwe nyi? Bantu bavula byo byo bakeba. Kuji bantu bavula bambila jimo bintu bikamweka kulutwe, bino kechi bayuka bikafumamo ne. Monai byalondelapo:

BASHAYUKA BA BYA SAYANSI bengijisha biñambañamba ne mali avula pa kuba’mba bayuke bikamweka kulutwe nabiji bikekala ntanda na mambo a kutamisha kwa mwela nangwa inge mvula ikanoka juba jalondelapo.
BASHAYUKA batemwa kwambila jimo pa bya busulu ne bya bumulwila ntanda. Warren Buffett muntu umo wanonka bingi pano pa ntanda wambila jimo pa bimweka mu bya busulu kya kuba’mba bamutela amba ngauzhi. Nate Silver shayuka mukwabo wingijisha bibelengelo kwambila jimo bya bumulwila ntanda mu U.S. ne kuyuka bo bakapa bilambu mu mafilimu a Hollywood.
BYANEMBWA BYA KALA bebitongola amba byanembwa bya bungauzhi. Bantu bamo bamba pa bibena kumweka pa kino kimye amba byanembelwe kala mu kitota kya myaka kya bu 16 ne aye Michel de Notredame (Nostradamus). Bintu bya malwa byamwekele pa 21 December, 2012, bamba’mba byanembejilwe jimo mu kalenda wa kina Maya.
BANTANGI BA BUPOPWESHI kimo kimye bambila jimo bikamwekela ntanda yonse kulutwe pa kuba’mba bajimuneko bantu ne kwibongola. Ngauzhi wambila jimo pa bya malwa bikamweka aye Harold Camping ne baana ba bwanga banji babijikile kuba’mba kyalo kikonaika mu mwaka wa 2011. Kufika ne lelo jino, kyalo kechi kyaonaika ne.
BAULA BYA KULUTWE bemona amba baji na bulume bwa kwaula bya kulutwe. Edgar Cayce ne Jeane Dixon bonse babiji baambijile jimo pa bikamweka mu kitota kya myaka kya bu 20. Bonse baambijile jimo bintu byabujile ne kumweka ne. Kyakumwenako, Dixon waambijile jimo amba kukekala Nkondo ya Ntanda Yonse ya Busatu mu 1958, kabiji Cayce waambijile jimo amba muzhi wa New York ukebila mu kalunga pakachi ka myaka ya mu ma 1970.

Nanchi kujipo jishinda ja ketekelwa bulongo ja kuyukilamo bya kulutwe nyi? Buno bwipuzho bwanema bingi. Inge ke mulanguluke pa bintu bikamweka kulutwe, bino byakonsha kukunza bwikalo bwenu ne byo mufuukulapo kuba kulutwe.