Kino kyo Kimye Kyenu kya Kushimika Nzubo ya Bufumu

¹ Kala kene, mwayila bungauzhi, Yehoba kupichila mwi Isaya waambijile jibumba janji ji ji nobe wamukazhi kuba’mba: “Bayisha tente wobe... . kuzhinauka ne; kabiji unungeko ku mfungwa yanji ne kukosesha mpopo yanji.” (Isa. 54:2) Kyamwekele mu kufikizhiwa kwa bo bo bungauzhi pa kino kimye kibena kumwekela mu kununguluka kukatampe kwa jibumba ko tubena kumona pa kino kimye. Onkao mambo, mpunzha ikatampe ibena kukebewa.

² Hagai ngauzhi wa kwa Yehoba waambijile jimo kuba’mba ‘bya buneme byabo bakebileta mu ino nzubo.’ (Hagai 2:7) Mu kushiinwa tubena kumona kufunjisha kwa bulesa byo kupa mabumba ne mabumba ngovu ya kufunda bukine ne kwaluka ke bapopweshi ba kwa Yehoba. Byo kibena kusangajipo pa kumvwa masawakya a bantu bavula babatizhilwe kuzhokoloka ntanda yonse kimye kya mwaka wa mwingilo wa 1999! Muno mu Zambia bunketu, balongo ne banyenga bevwangile ku jitanga ja kwa Yehoba bakijile pa mpendwa ya 7,600. Pa kuba’mba tutwajijile kukwasha bapya bonse be, twafwainwa ‘kulanguluka pa bitumwekela’ ne kusumininwa kuba’mba tubena kutundaika mwingilo wa kwa Lesa ku kipimo kikatampe.—Hagai 1:5.

³ Lubaji lumo lwanema lwa kutundaikilamo mwingilo wa kwa Lesa ke lwa kushimika mazubo a kupopwelamo anengela mwakufunjila lufunjisho lwa teokalatiki. Mabumba a bapya a batota Yehoba byo abena kwinunga ko tuji, Mazubo a Bufumu apya avula kabiji akatampe abena kukebewa pano pa ntanda ponse. Lusako lwa Jibumba Jitangijila ke lwa kuba’mba Mazubo a Bufumu ashimikwe.

⁴ Kukajilwa Kwetu Kukatampe. Pa kino kimye, muno mu kyalo kya Zambia, mubena kukebwa kushimikwa Mazubo a Bufumu avula anengela a kupopwelamo Lesa wa kine. Kila-mwaka, Mazubo apya a Bufumu 35 kufikatu ne ku 40 abena kukebwa kushimikwa na mambo a bapopweshi babena kuvujilako. Umvwe twanungapo bipwilo byavula bibena kwingijisha bimpampa, bikulwa bya kusonkela, ne bikulwa byabula kuwama, nanchi tumonapo ka? Tumona kukajilwa kwa kuba’mba bifulo byavula byawama bya kupopwelamo ne kufunjishishamo byashimikiwa mu kupelawizha. Ishikishai anwe bene kuba’mba: Umvwe kafwako kisakubiwapo bukumo, nanchi atweba bonse kuvwangako ne bonse be bapya tukamwenamo byepi mu mikambizho byo tupwila mu mpendwa ikatampe ya kipwilo?

⁵ Pa nyuma ya kupitulukamo mu kuno kukajilwa kwetu na bantomesha batuminwe muno mu Zambia na Jibumba Jitangijila, kyamwenwe kuba’mba muno mu kyalo kya Zambia mubena kukebwa kushimikwa Mazubo a Bufumu apya nangwa mba kupwisha kushimika ano mazubo mu myaka 5 ibena kwiya. Umvwe kino kyo kyaswa muchima wa kwa Yehoba, kikonkwanyi kya kushimika ne kupwisha Mazubo a Bufumu 180 kila-mwaka mu myaka itanu ibena kwiya kyaimikwa. Nanchi kino kyakonsha kwingijiwa byepi?

⁶ Atweba bonse twayuka kuba’mba muno mu Zambia lukatazho lwa mali lwalengela bipwilo byavula kukankalwa kushimika Mazubo abo a Bufumu anengela. Bipwilo byavula kechi byakonsha kwipotela bintu bya kushimikila bikebewa pa kushimika ne kupwisha Nzubo yabo ya Bufumu mu kimye kimotu ne. Onkao mambo, na mambo a kubula mali uno mwingilo wa kushimika waingijiwa pa kimye kyalepa bingi, ku bamo uno mwingilo wibataila bula bwa myaka 20, bino bikulwa byo bashimika kechi byashimikwa bulongo ne. Ku nyuma bipwilo bimo byatambwile loni ku Sosaiti byakankelwe kubwezha mali.

⁷ Byonka byo kyabijikilwe pa Kupwila kwa Nkambi kwa “Icebo ca Kusesema ica kwa Lesa,” Jibumba Jitangijila jaitabizha lunengezho lwa kuba’mba bipwilo bikeba Nzubo ya Bufumu bipewe mali a kwiishimikila. Bukwasho kobuji bwa bikebewa byapusana-pusana kuvwangakotu ne kushimikwa kwa Mazubo a Bufumu. Mu jo jo jishinda, mawi a kwa mutumwa Paulo ku bena Kolinda lelo jino akonsha kwingijishiwa pakachi ka byalo kupichila mu kwingijisha bulongo bipe bya kwa Nkambo. Paulo waambile mba “Kechi naamba kino namba bakwenu bapelelwe ne anweba munemenwe ne; poso namba mwesakane’mba, byenu byavula bya mu ano moba bikale ke byabo mukukajilwa kwenu, namba mwesakane.” (2 Ko.8:13,14) Ee, mali a kushimikila Mazubo etu a Bufumu amweka kupichila mu bupe bwa butemwe bufuma ku balongo betu baji mu byalo bingi.

⁸ Nanchi lunengezho lwa katataka lo luka? Maloni akapanwa monka mwayila kukajilwa. Nkongole ya maloni ikabwezhiwa pa mutengo bipwilo ye bikakonsha kulipila. Kino kikalengela bipwilo byayanda kushimika Mazubo a Bufumu umvwe bibena kukeba. Bino bipwilo bimo bikakonsha kubwezha nkongole bukiji kukila bipwilo bikwabo. Kila kipwilo kikapewa loni monka mwayila byo kyakeba.

⁹ Bino kimye kyonse twafwainwa kumona kuba’mba uno mwingilo ubena kwingijiwa pano pa ntanda ponse. Byo kyakebewa kuba’mba Mazubo a Bufumu avula ashimikwe, twafwainwa kwingila lubaji lwetu mu kwibikishakotu. (1) Twafwainwa kukepeshako mitengo kupichila mu kwingijisha jifunde jaikajikwa na Sosaiti. (2) Mazubo a Bufumu aji mu mapunzha muji bantu bavujisha afwainwa kwingijishiwa na bipwilo bisatu nangwa bina. (3) Bipwilo byafwainwa kwibikako kuba’mba bibwezhe nkongole bukiji-bukiji kwesakana na byonka byo byakonsha kuba. Kupichila mu kubwezha ino nkongole, Mazubo avula a Bufumu akonsha kushimikwa pano pa ntanda ponse na ano mali. Mu jo jo jishinda, bipwilo byetu bikakonsha kushimika bifulo byawama mwa kupwila.

¹⁰ Nanchi bikebewa byo bika, kabiji kipwilo kyenu kyakonsha kukwasha mu ñanyi jishinda? Yonse mpunzha ya kushimikapo Mazubo a Bufumu yafwainwa kuswishiwa na muzhilo. Luno lo lukatazho lwetu lukatampe. Mwayila muzhilo kipwilo kechi kyafwainwa kushimikwa pa mpunzha kwakubula nsambu ne. Ku kya kumwenako, umvwe Mfumu wimupa mpunzha, mwafwainwa kwikala na nkalata yafuma ku yewo Mfumu ibena kwamba kuba’mba ayo mpuzha yapanyiwa ku kipwilo. Kepo mwayila muzhilo mpunzha yaikala ke yenu. Kya kumwenako kikwabo: Umvwe Kije kya Kanso kya mu Nkambi yo mwikalamo kimupa mpunzha, mwafwainwa kumona kuba’mba mwapewa Nkalata Yakupainapo mushiji yafuma ku Ministry of Lands (Kipamo kitala pa Mushiji.) Na mambo a nkebelo ya muzhilo, mpunzha yafwainwa kunembwa mu kabungwe katelwa mba “Zambia Association of Jehovah’s Witnesses Registered Trustees,” kano kabungwe kaikajikwa muno mu Zambia kuba’mba mwikale na mpunzha. Pa nyuma ya byo byo, mwafika pa kunembesha ma Taito Didi ku Kipamo kitala pa Mushiji. Bino kepo mpuzha yaikala ke yenu. BIPWILO BYONSE byafwainwa kwingijilapo bukiji-bukiji ne kumona kuba’mba mapunzha o bibena kwingijisha aswishiwa na muzhilo.

¹¹ Umvwe kipwilo kyenu kiji na mpunzha yaswishiwa na muzhilo, bukwasho bwa ba kukwasha kushimika ne mali akushimikisha Nzubo yenu ya Bufumu bikanengezhewa. Mwatundaikwa kwipuzha ku Desiki ya Sosaiti itala pa bya Buntungi bwa Mazubo a Bufumu inge mukeba mabulañano anungwako. Mukakambizhiwa kuswa ne kulondela Mutanchi wa Buntungi bwa Mazubo a Bufumu wa Sosaiti ne kusunga Nzubo yenu ya Bufumu ne mpunzha yayo bulongo. Kabiji mwafwainwa kumvwañana pa mali o mwakonsha kupanako pa ñondo pa ñondo. Bakulumpe mu bipwilo babena kutundaikwa kuba bino mu kupelawizha kabiji nenuwatu mwakonsha kutolamo lubaji mu uno mutanchi mupya.

¹² Bipanyi bya Bantungi. Pa kuba’mba kushimika Mazubo a Bufumu kukonshe kwingijiwa, Jibumba Jitangijila jaitabizha kulenga Bipanyi bya Bantungi ba Mazubo a Bufumu. Bino bipanyi bikavwangamo ba mwingilo bafuma mu byalo bingi, bantungi ba muno mwetu, ne bakwitemenwa, bano bonse bakasalwa na Kometi ya Musampi. Kila kipanyi kikekala na wa kutangijila bantungi ne nkwasho wanji. Bino bipanyi bikakwasha bipwilo mu mingilo ya kuntunga. Bipanyi bikatanchika bya kwingila kabiji bikengijilanga pamo na kipwilo poso Nzubo ya Bufumu yapwa kushimikwa kya kuba’mba keipembeletu juba ja nzhijikisho. Kipanyi kimo kya uno mutundu kifuma pa Betele ne kuya kiya na kwingila. Kipanyi kipya kikwabo kibena kulengwa mu kibunji kya ku Mikochi. Mukachi ka mwaka ubena kwiya, bipanyi bikalengwa mu kibunji kya Luapula, mu kibunji kya ku Musela ne mu kibunji kya kabeta ka Buyeke. Bino bipanyi bya bantungi bikengijila pamo na ma Regional Building Commetties (Makometi a Bantungi ba Mpuzha) abiji alengwa kala nangwa bikengijila pamo na Makometi a Bantungi a Mpunzha aji mu mapunzha mo abena kubula kwingila na ngovu. Makometi a Bantungi akaketekela pa bukwasho bwa ba mwingilo wa kwitemenwa; kino kikatakata kikekala mu mpunzha mubena kushimikwa Nzubo ya Bufumu.

¹³ Bantungi ba Kwitemenwa bakekala ba pa ka kimye kachechetu, bakengijilanga pamo na kipayi kibena kutunga Nzubo ya Bufumu yabula yabo pa kimye kya milungu ibiji kufika ne bañondo basatu. Byonka byo kikelwa kwikala kimye kyonse, kwa kulala ne kajo bikanengezhewa na Sosaiti kupichila mu kipwilo kibena kushimika. Bavula bakekalamo na lubaji mu uno mutanchi bakekala Bantungi ba Kwitemenwa. Nanchi mubena kukeba kutanwako ku buntungi pa kuba’mba mukwashe mu uno mukwekele wa Kutunga Mazubo a Bufumu nyi? Umvwe mubena kukeba kwingilako uno mwingilo, mwatundaikwa kwipuzha kwingijisha Fomu ya “Application for Kingdom Hall construction volunteer program.” Ano mafomu a kwipuzhizhapo buntungi bwa kwitemenwa bukumo akatumwe ku bipwilo.

¹⁴ Bantungi ba Mazubo a Bufumu. Baingilapo kala buntungi bwa kwitemenwa pa kimye kyaesakana kya bañondo babiji bafikapo bafwainwa kwipuzha kwikala Bantungi ba Mazubo a Bufumu. Ino fomu ya kwipuzhizhapo ikatumwa ku Sosaiti kupichila mu Kometi ya Mwingilo ya Kipwilo. Bukwasho bwanengezhewelwa bakasalwa kwikala mu uno mwingilo wa kimye kyonse wiikajila bukekalatu nabiji bobwa bupanwa ku binungwa bya pa Betele. Kwa kulala ne kajo bikakokozhewa na Sosaiti.

¹⁵ Umvwe twatala mu bujimi bwa pano pa ntanda ponse, kitutekenesha bingi pa kumona jibumba ja kwa Yehoba ja pano pa ntanda byo jibena kubailako. Kibena kusangajika pa kuyuka kuba’mba Mazubo a Bufumu avula akabilwa. Balongo ne banyenga bavula baji bingi na kizaku kya kukwasha jibumba ja kwa Yehoba kupichila mu kupana kimye ne bukwasho bwabo ku Buntungi bwa Mazubo a Bufumu mu kwitemenwa.

¹⁶ Luno lunengezho lonse lwa kushimika Mazubo a Bufumu lwingijiwa kupichila mu mupashi wa Bwina Kilishitu wa kupana ne kwipana. Shenu paji lupusano lukatampe na mupashi wa lwiso ne wa kubula bupanyi waseekamo pano pa ntanda mu ano moba! Ke kintu kyawama bingi kumona bantu ba kwa Lesa saka batwajijila kwitemwa bene na bene, butemwe bubula kusalulula mutundu ne mapunzha kufuma bantu. (Mat. 24:12) Mu kupasha Shetu wa mwiulu ne kupichila mu kutundaikwa na butemwe, mu jishinda jimo ne jikwabo twayai tutundaike uno mutanchi wa buntungi bwa Mazubo a Bufumu. Umvwe twauba bino mapesho a kwa Yehoba akatampe ne lutakaiko bikeya. (Mala. 3:10) Tusekela pa kumona Mazubo a Bufumu saka ashimikwa pano pa ntanda ponse kuvwangakotu ne mu kyalo kyetu kya Zambia, Yehoba utumbijikilwa mu byonse bino.—Hagai. 1:7-8.