Kabokoshi Ka mepuzho

◼ Mambo ka o kyanemena luonde kutanga binembelo umvwe ñambi wilubula kuba byo byo kimye kyo abena kwamba jashi janji?

Mutwe wa jashi ubena kwambiwapo ne kumona kana jashi jibena kukebewa kutanga kila vesi mu Kyambo kya kwa Lesa, nangwa ne, byo bishinka bipima bwingi bwa binembelo ñambi byo akonsha kubula luonde kutanga.

Kyanema bingi kulabijila kuba’mba nkebelo ya kutangila binembelo bimo ke ya kukeba kuyuka kuba’mba kibena kwambiwapo kyanembwa mu Baibolo. (Byu. 17:11) Nkebelo ikwabo ke ya kumona ne kuyuka bishinka bya kine bya mu Byanembwa bibena kutundaika kibena kwambiwapo kuba’mba lwitabilo lwa bonse lukoseshiwe. Kwimwena Baibolo kyo ibena kwambapo kimye kibena kutangwa kinembelo muji bishinka, kulengela kumvwisha bishinka. Kununga pa kutanga binembelo, kunemba bishinka ne kutwajijila kumvwa byo bibena kulumbululwa mu jashi kukwasha bingi.

Nangwa kya kuba autulaini ya Sosaiti yakonsha kwikala na Binembelo byavula bibena kulondolola kishinka kimo, bino binembelo byakokozhewelwa kukwasha ñambi pa kunengezha jashi janji. Kimye kimo bimupa bishinka bya ene mambo a jashi nangwa kumukwasha kumvwisha bishinka bikatampe bya mu Binembelo. Ñambi wafwainwa kumona binembelo byo akonsha kutanga pa kwamba jashi, ne kubula luonde kumulondela byo abena kwibitanga ne kwibilumbulula. Binembelo bikwabo biji na bishinka byakonsha kutongolwatu nangwa kwambiwapotu na ñambi, bino javula luonde kechi lwafwainwa kutanga bino binembelo ne.

Pa kutanga binembelo byo asalululamo, ñambi wafwainwa kutanga mu Baibolo, kechi wafwainwa kutanga pa bipepala po a pulinta byo byo binembelo na kompyuta ne. Ñambi umvwe wabula luonde kumulondela byo abena kutanga kinembelo, wafwainwa kutongola bulongo buku wa mu Baibolo, kyapitala ne mavesi asa kutangwa. Wafwainwa kutulumanako, ne kwipuzha jipuzho nangwa kwamba mawi acheche pa ene mambo o abena kutangila kyo kyo kinembelo pa kuba’mba luonde lwikale na kimye kya kutana kinembelo. Kubwezhapo kutongola kinembelo, kyapitala ne vesi kwakonsha kukwasha luonde kuvuluka kinembelo. Nangwa byonkabyo, kechi kyawama kutongola peja paji kyo kyo kinembelo ne. Kutanga binembelo umvwe luonde lwabulwa kukwasha bingi kumwenamo mu Kyambo kya kwa Lesa kibena kulondololwa mu jashi.—Hebe. 4:12.