Kabokoshi Ka Mepuzho

◼ Twafwainwa kwiengijisha byepi ma Baibolo a milaka ikwabo abula kunembwa na Sosaiti?

Ma Baibolo a mu milaka ikwabo abula kunembwa na Sosaiti nao ke bipe biikajila ao akonsha kuodewatu na basapwishi kechi na bantutu ne. Kabiji kechi twafwainwa kwiapanatu kipane-pane mu busapwishi bwa ku nzubo ne nzubo ne. Ke bipe biikajila bijitu nobe ma Baibolo anekena nkupo, Insight on the Scriptures, Reference Bible, mabaundi volyumu, matepu, mavidyo kaseti ne bipe bikwabotu. Kipwilo kyafwainwa kuodatu bino bipe biikajila inge paji bantu babena kwibikeba.

Na mambo a kino, Sosaiti ibena kunengezha lunengezho lwa kupota ma Baibolo mu milaka ikwabo pa mutengo wa K13,000 imo. Basapwishi bakatambulanga ano ma Baibolo pa lunengezho lwa bupe. Kabiji afwainwa kupanyiwa ne ku bantu babena kufunda Baibolo babena kununguluka batanga kabiji batanwa ku kipwilo. Kechi a kupanatu kipane-pane mu mwingilo wa mu bujimi ne.

Umvwe twatambula ma Baibolo a milaka ikwabo twafwainwa kupana ne bukwasho bwaesakana. Kya kine, kafwako uketubula kulipila nangwa kupana mali pakaunta potutambwila mabuku ne, pano bino atweba bonse twafwainwa kupana bupe pa byo twatambula. Babena kupana bupe bafwainwa kubika mu tubokoshi panembwa’mba “Bupe bwa Kukwasha Mwingilo wa Sosaiti wa Ntanda Yonse.—Mateo 24:14.” Inge ubena kufunda Baibolo wakankalwa kupana bupe, musapwishi ukekala na mwingilo wabaya wa kupana ne kunemeka Yehoba na bintu byanji.—Mana. 3:9.

Kyanema bingi kwingijisha bulongo luno lunengezho pa kuba’mba bantu babulenga kulanguluka’mba tupana ma Baibolo otubula kunemba kwakubula kulipilisha. Onkao mambo, balongo batala pa mabuku bafwainwa kujimuka ne kumona kuba’mba babena kutambula mabuku kechi babena kusenda avula ne, pamotu ne boba batambwilepo kala ma Baibolo a milaka ikwabo. Mwafwainwa kutako bingi muchima, kechi kupana ano ma Baibolo ku bantutu kikulu amba babena kwiakeba ne. Bantu bayewo mutundu babulai kuba’mba bakonsha kupota ano ma Baibolo a milaka yabo mu mashitolo.