Tunemeke Yehoba mu Bwikalo Bwetu—Lubaji 4
1 Kuji bisho byavula bingi byabula bya bwina Lesa byalamata ku bijilo. Luno ke lubaji lumo motwakonsha kujimuka kuchina kuchapankanya kupopwela Yehoba na byubilo bya buntunshi. Kwesakanatu na byo tuba, kimo kimye twakonsha kuchinuzhuka nangwa kwitumpa mu byubilo byabula bya bwina Lesa.
2 Kyawama bingi kuzhika bukiji. Kino kyakonsha kukwashako, kuchina bakilongo babula kwitabila kabakishe pa byoto. Nanchi kukisha pa byoto kyo kika? Kino kyo kimye bantu kyo bakisha na kusopa mubiji wa mufu. Pano bino kafwapo ne ene mambo akonkamina bantu pangye na kwimba, kuwowota nangwa kutoma ne. Pa kuchinuzhuka byubilo bya uno mutundu, kyawama kuzhika bukiji, bakilongo babula kwitabila bakeba kulondela bino byubilo byabula bya bwina Kilishitu saka bakyangye kufika. Balongo bamo bamba’mba ku mpunzha kobekala kyakatazha bingi kukana kukisha pa kijilo. Nangwatu kimye kifwakasha bapaina bengijila bijiiji, bamo ne kupwila kechi bapwila ne, mambo akukebatu kukisha pa bijilo. Pano twakonsha kukwasha byepi botwaikala nabo kinkalankulo kuyuka bukine umvwe saka twichapakanya mu mizhilo yabo yabula ya bwina Kilishitu?—2 Timo. 1:7.
3 Kubula kukisha pa kijilo kechi kilumbulula’mba tufwabo bulanda ne. Baibolo kechi ikanya kujila nangwa kulakasha mipolo ne. Bino kyapusanako na majila amwesha bya kisho, nabiji kuvwala bya kuvwala bya ndochi, nsuki yazakalala, kusha mubiji patoka, kujila mabingo’mba betumvwe, kwitayaika panshi ne kwimba nyimbo aku na kujila. (Esakanyai na Mpitulukilo ya mu mizhilo 14:1, 2.) Luketekelo lwa lusanguko lwafwainwa kukepeshako binyenge byetu. Twakonsha kwikala na bulanda, bino kechi kukizhamo ne. (1 Tesa. 4:13) Kwikala na bulanda bukatampe kwakonsha kwitulengela kusula bya ku mupashi, ne kulanguluka’mba kechi twafwainwa kuya na kupwila nangwa kusapwila ne.—Luka 22:45; Mako 14:50; Monai Awake! December 8, 1974, mapeja 24-28.
4 Bya kuvwala kechi byo bimwesha bulanda ne. Nangwa kya kuba’mba bena Kilishitu bakonsha kuvwala bya kuvwala bifiita, binembelo bikanya kuvwala bino bivwalo kimye kikatampe kabiji bikanya ne kwingijisha biyukilo bimwesha bulanda pa lufu. Nangwa kya kuba Yesu wajijile mipolo pa lufu lwa kwa Lazalasa, kafwapo kiyukilo kimwesha’mba wikunjikilenga byaubanga Bayudea ne. (Yoa. 11) Nangwa byonkabyo, bena Kilishitu kechi bafwainwa kuzhingijisha bantu na mambo a kukizhamo mu mvwajilo ne.—Yoela 2:12, 13.
5 Bamo bakizhamo bya kupotwela-potwela ne bya kuvwika-vwika mufu pa ku muzhika. Bena Ijipita bashinganga mufu manyi abula kubozha mubiji ne kumuvwika bya kuvwala bya mutengo, kabiji babikangamo ne bipe byavula mu kilende amba bya kwingijisha mufu pa lwendo lwanji. Kino kisela kya kubika bipe mu bilende kyaimana pa lwitabilo lwa kuba’mba mweo kechi ufwa ne. Nangwa kya kuba bamo bakonsha kusalapo kovwa mubiji, kechi bafwainwa kukizhamo bya kupotwela-potwela ne bya kuvwika-vwika ne.
6 Mu mapunzha amo, bantu bavula kibakatazha bingi kuzhika mubiji ku mpunzha ingi, javula bakebatu’mba kana konka kwalaala bashakulu banji. Mu kifulo kya kuba byo byo, kyawama kuzhika kwipi na ku mpunzha yafwilako yewo muntu kukila kwenda misinso yalepa.
7 Umvwe yenu mubena kutala pa kijilo, chinai kuchapankanya lwitabilo lwenu, ko kuba’mba kechi kyawama kuswisha bañambi ba bupopweshi bwa kine ne bwa bubela kwambila pamo majashi, nabiji ku bilende ne. Umvwe betulomba amba twambe jashi, kechi twafwainwa kuwowankena pamo na bañambi bakwabo babena kwamba mafunjisho abula a bwina Kilishitu nangwa mafunjisho a Babilona ne. Kechi twafwainwa kwitabizha kisela kya kujimba maluba nangwa kutaya maloba mu kilende ne. Kabiji kipwilo kechi kyafwainwa kwikala na lunengezho lwa kusunganga “mali a kwingijisha pa majila” ne. Bukwasho bwa ponkapotu kufuma ku balongo bo bwafwainwa.
8 Kimye kimo bakilongo babula kwitabila bakonsha kukosako na bisho bimo bya kishakulu pa kijilo ne pa kuzhika. Mwina Kilishitu mwine mwina nzubo nangwa ubena kutala pa kijilo, wafwainwa kwibalumbulwila bulongo mizhilo yanji ya mu Baibolo. Bantu babena kukeba mizhilo yabula ya bwina Kilishitu bafwainwa kwibapanga kuba’mba bakebyubile kungi. Umvwe mwina Kilishitu wakankalwa kumvwañana na bakilongo babula kwitabila, wafwainwa kufumapo pa kuba’mba abule kubako bintu byazhijika Yehoba.—Mat. 10:21, 35, 36.
9 Kuwamisha Bilende: Mu mapunzha amo bantu batemwa bingi kuwamisha bilende. Baji na moba o baya ku bilende na kuwamisha pa mulala ne kukinjika mufu. Bashakulu bakala nabo baubilengapo bimo pa bilende. (Nte. 35:20) Nangwa kyaikalanga byonkabyo, muntu mwine bunke ye wafwainwa kwifuukwila kuya ku kilende ne kulanguluka ye bazhikile. Nanchi mwina Kilishitu wafwainwa kwikala na moba a kubilamo kino nyi? Bintu bya uno mutundu byakonsha kubiwa juba jiji jonse. Kutemwa Yehoba kwafwainwa kwitukwasha kuba byaoloka. Kimo kimye bakonsha kwitukatazha mambo a kuba byubilo byakishinka kwi Yehoba, bino twakonsha kutana lutekenesho mu byambo biji pa 1 Petelo 2:19, 20. Bukine bo tuji nabo bwafwainwa kwitwabanya na mizhilo yabula ya bwina Kilishitu pa kuba’mba twikale baitabizhiwa kwi Lesa.—Loma 1:25; 2 Ko. 6:17.
10 Umvwe twachinuzhuka mizhilo yabula ya bwina Lesa pa mambo a bijilo, tukamwesha patoka amba kechi twitumpa mu bupopweshi bwa bubela ne byubilo bya bademona ne, mu jo jo jishinda tukatwajijila kwikala na bulunda bwawama ne Yehoba.