Kabokoshi Ka Mepuzho

◼ Byo tukeba kwingijisha mabuku etu bulongo, ikika kyo twafwainwa kuba pa kutambika mabuku mu busapwishi bwa mu mukwakwa?

Pa kwingila busapwishi bwa mu mukwakwa, kyawama kuya ku bantu satuji na magazini ne mabuku mu maboko, mambo kikonkwanyi kyetu ke kya kukeba kwisamba na bantu. Mu jino jishinda twafwainwa kuyuka umvwe muntu ye tubena kwisamba naji ukeba kufunda kabiji waswa kutanga magazini etu. Umvwe kyakonsheka twafwainwa kwisambako nanji pacheche mu kibaba kimo kiji mu magazini, kyafwainwa bulongo. Kabiji kyawama kumulumbulwila’mba mwingilo wetu wingijiwa na bamwingilo bepana kabiji kechi wa busulu ne, bino ke mwingilo wa ntanda yonse ukwashiwa na bampanyi ba kwitemenwa. Kampe musapwishi wakonsha kwendela pamo na yeo muntu, sabaya benda besamba biji mu magazini ne byo akonsha kufundamo.

Bino, twafwainwa kujimuka ne kulangulukilako yewo muntu. Bamo botusambakana mu mukwakwa bendesha bingi kya kuba tukankalwa ne kuyuka inge bakeba kufunda bukine nangwa ne. Umvwe kyaikala byo byo, twakonsha kwibapatu talakiti yakonsha kwibaletela mujojo wa kukeba kutanga mabuku etu akwabo pa kuba’mba kimye kyo tukasambakana nabo jibiji bakemane ne kuteleka ku mwisambo ye twibemikila.

Inge satukelwa mu busapwishi bwa mu mukwakwa pa mapunzha amo kabiji pa kimye kimo, bantu baketuyuka kabiji bakatemwa kwisamba ne atweba inge baikala na kimye. Kabiji kino kiketupa kimye kyawama kya kwibayuka umvwe bakeba kufunda bukine.

Tukeba kwingijisha mabuku etu bulongo. Onkao mambo, twafwainwa kusalululapo kimye kyawama kya kwiatambikilamo. Kuba byo byo kuketulengela kutanchika bulongo kimye kya kwisamba na bakeba kufunda kabiji ne kwibalumbulwila mwingilo wetu byo aji.