Imbai Nyimbo ya Kumutota Yehoba
1 Nyimbo bo bupe bumo Lesa bo apana ku muntu. Mu nyimbo muntu mo akonsha kutotela, kutakaika Mulenga wanji ne kumwesha lusekelo. Kwimba ke lubaji lumo lukatampe lwa kupopwelamo Yehoba Lesa. Baibolo itongola nyimbo yavula mu bupopweshi bwa kine yo baimbanga pa kanwa pamo ne byombesha.—Nte. 4:21; 31:27; 1 Moba. 25: 1; Lum. 18:22.
2 Pa nzubo ya Lesa mu Yelusalema, kwimba kwajinga lubaji lukatampe mu mpopwelo. Bena Levi 4,000 bo baimbanga byombesha. (1 Moba. 23:4,5) Bano baimbilanga pamo na banyimbi. Nyimbo, pamo ne banyimbi beimbanga yajinga na lubaji lwanema bingi mu mpopwelo, kechi mu kunemekatu Mizhilo yonka ne, bino kyalumbulwilenga jishinda jafwainwa kupopwelamo. Banengezhezhanga jimo bulongo ne kutako bingi muchima ku luno lubaji lwa mpopwelo. (Tangai 1 Byambo bya Moba 25:7) Monai byo banemekele kwimbila Yehoba nyimbo ya kumutota. Byo bafunjilepo nyimbo ne kuyuka bulongo mwakwiimbila!
3 Atweba Bakamonyi ba kwa Yehoba, twayuka kuba’mba twafwainwa kumutota Yehoba. Ye Nkambo wa Kulengwa konse, Mwine Wakila, Mfumu wa myaka, Mulenga wetu kabiji witwikusha aye Nsulo ya bumi. Kwa kubula nangwa kuzhinauka ne, twafwainwa kumutota. Nanchi kimye kimo tulanguluka’mba kwimba nyimbo ya bufumu kechi kwanema ne, kyakuba twafumyako ne muchima nyi? Nangwa kya kuba betubujila jimo nyimbo yo tukemba pa kupwila kwa nkambi, javula ino nyimbo kechi imbwa bulongo ne. Bakulumpe mu kipwilo batundaikwa kunengezhezha kipwilo kimye kya kufunda nyimbo ikembwa pa kupwila kwa nkambi. Kwashai bonse pa muntu pa muntu kwikala na buku wa nyimbo. Baibolo imwesha kuba’mba twafwainwa kwimba nyimbo ya kumutota Yehoba.—Efi. 5: 18, 19; Lupu. 15:1.
4 Pa kuba’mba kitukwasheko kukokozha ne kwimba nyimbo bulongo pa Kupwila kwa Nkambi kwa uno mwaka kwa “Bafunjishi ba Mambo a Lesa,” Sosaiti yasala nyimbo yo tusakukemba: 8, 18, 29, 34, 37, 39, 52, 74, 100, 115, 158, 189, 195, 204, 205, 208, 209, 212. Twayai tupitulukilengamo jimo bulongo mu ino nyimbo pa kuba’mba tukembe nyimbo ya kumutota Yehoba na ngovu ne na kizaku.