Bakwenu Bakinka Manungo Mwianweba
1 “Jiso kechi jakonsha kwikwambila kuboko amba, kechi nakusaka obewa ne.” Umvwe jaamba byobyo, ñanyi wakonsha kwijilamwina kubilwanyi? Naonkao mambo, mutumwa Paulo waingijishe mubiji wamuntu nebibese byanji byapusana-pusana kulumbulula kishinka kyakuba’mba bonse umo umo twakinka manungo mubakwetu bamukipwilo. Wanembele nekuba’mba “abya bya mubiji byauba nobe byanekena byo bine byafwainwa.” Ee, twakinka manungo mubakwetu kabiji neabo bakinka manungo mwiatweba, ne ‘kwilama atwe bene na bene pamo’ mambo “atwe bene na bene twi bya mubiji umo.” (1 Ko. 12:21-27; Efi. 4:25) Akilangulukai pamashinda amo mingilo yomuba byoikwasha bakwenu.
2 Mukisemi: Balume nebakazhi bekosesha bene nabene kupichila mulwitabilo, bukose nekubambakana kobamwesha byobatangizhako bintu byakumupashi. Byonkabyo, byubilo byuba bansemi byakonsha kwalula pakatampe milanguluko yabaana babo pamambo akuya mumwingilo nekutanwa kukupwila kwabwina Kilishitu.
3 Mumwingilo: Kizaku kyenu kyakusapwila mambo awama a Bufumu kikosesha basapwishi bakwenu kwingila nangovu mumwingilo. Kwingila kwenu kulumbulula bingi byavula, byonka byomukwasha bakwenu kuba’mba bengileko mwingilo. (2 Tesa. 3:9) Bapainiya basanta bingi inge mwaya nabo mumwingilo. Kabiji bantu baji nalusekelo lwakukeba kufunda bukine bomwamba nabo mumwingilo wamubujimi bemuketekela anweba kubwelako nekwibakwasha kutana jishinda jabumi. Kechi kyawama kwibafichisha kumuchimane.
4 Mukipwilo: Kutanwa kwenu pakupwila nekukumbulapo kukosesha bingi balongo nebanyenga yenu. Umvwe mwabula kuyako, kechi yenka anwebatu mwapuswa pabyavulane. Bakwenu nabo kechi bamwenamo mfweto yobafwainwa kumwenamo umvwe pomujine. Bakulumpe mukipwilo nabo bakinka manungo mwianweba byonka anweba byomwakinka manungo mwiabo. Byubilo byenu byawama nebukwasho bwenu byakonsha kwibapezhezhako mwingilo wabo wakuketa jitanga.
5 Kupichila muñambilo nemubyubilo, twayai ‘atwe bene na bene twiubishe butemwe ne mingilo yawama.’ (Hebe. 10:24) Yehoba uketupesha pakwikala bakinkwamo manungo kabiji bakishinka.