Baibolo Ingila
1 Nyimbi wamasalamo Davida waipwizhe’mba: “Anweba Yehoba ñanyi ukekala bwenyi mu tente wenu? Ñanyi ukekalanga pa mutumba wenu wazhila?” Davida wakumbwile mubyambo bichechetu’mba: ‘Yeyenka wenda bulongotu ne kuba byaoloka, ne kwamba byakine na muchima wanji yense.’ (Sala. 15:1, 2) Ino mizhilo kechi yaalukane. Bonse beya nakupopwela mukipwilo kyabwina Kilishitu bafwainwa kuleka byubilo byatama nekupendwapendwa. Pakachi kabantu ba Yehoba kechi patanwa bantu balutobo, bamichima yatama, nangwa bamba bibine. Kikale twibamwingilo bakatataka nangwa babandamo, twafwainwa kwikala bakishinka mukulondela mizhilo iji mu Byambo bya Lesa.—Nga. 5:19-21.
2 Bavula bakatataka babena kupwañena pamo najibumba ja Yehoba. Banyike nebakulumpe bapimpula ndangulukilo yabo kuba’mba balondelenga mizhilo ya Lesa mubwikalo bwabo. Mumuzhi wa Kalomo, nsongwalume umo wamyaka yakusemwa 14, wafunjile bukine kubakwabo banyike mobafungila bañombe. Bamukisemi kyanji bonse bamukainyenga. Moba amo bamutananga nebyakuja. Bukishinka bwanji boafunjile mu Baibolo bwasangajikile bingi bansemi yanji. Kechi waibilenga byonka byaibanga bakwabo banyikene. Kyafuminemo mukwibikishako nangovu kwanji, bamukisemi kyanji 9 baalukile ke Bakamonyi bakwa Yehoba babatizwa. Pabano pajinga nebankambo yanji babakazhi bajinga namyaka yakusemwa 98, bashanji nebainanji babatizwe pakupwila kwankambi kwamwaka wapwa.
3 Byonkabyo, neatweba twafwainwa kutokeshanga Lesa pamuchima mubyubilo byetu byonse, “mu bololoke ne buzhile bwa bukine”. (Efi. 4:24) Umvwe tukeba kwikala mujibumba ja Lesa japasha mutumba, twafwainwa ‘kuvula bumuntu bwa kala ne byubilo byabo’ ne ‘kwivwika [atweba bene] bumuntu bupya, bo bubenakusangulwa ke bupya mu kumona maana’.—Kolo. 3:9, 10.
4 Mambo a Lesa, Alulula Bantu: Bumuntu bwa Lesa byonka byobwamweshiwa kwiatweba kupichila mu Baibolo bwakonsha kwalulula ndangulukilo nebyubilo byetu mujishinda jawama. (Loma 12:2) Byambo byanji biji nangovu yakwalulula ndangulukilo nekutalatala mumichima yabantu. (Hebe. 4:12) Binembelo byanembeshiwa bitufunjisha kuba’mba Lesa ukeba’mba twikale bantu babyubilo byawama, kuyanga kimye kyonse mumwingilo wamubujimi, nekukupwila kwabwina Kilishitu.
5 Mubino bimye byakatazha, makatazho abena kuya nakuvujilako akonsha kulengela mwina Kilishitu kuzhilulula mizhilo ya Lesa. Nangwatu ekale mwina Kilishitu wakosa byepi, umvwe keabule kwikala nalufunjisho lwapabunke, lwakisemi, nekukankalwa kutanwa kukupwila kwakipwilo nekuya mumwingilo wamubujimi, wakonsha kukumpulwa mulwitabilo, kimye kimo nekuponena mubyubilo byatama. Oene mambo mutumwa Paulo oanembejile Timoti kuba’mba: ‘Kasa wiketa obe mwine ne lufunjisho lobe pamo’ kabiji ‘Languluka byo ñamba.’—1 Timo. 4:16; 2 Timo. 2:7.
6 Kikale twibakatataka nangwa twaingila myaka yavula, twafwainwa kuta muchima kumizhilo ya Lesa, kuyanga kimye kyonse mumwingilo, nekwikala nalwitabilo lwakosa umvwe tukeba’mba lusungwe. (1 Pe. 1:13-16) Kyanema bingi kuba’mba pajuba nejuba tulamenga mizhilo yaoloka ya Lesa.
7 Ibikilai kikonkwanyi kyakuyanga mumwingilo wamubujimi mukino kimye kya kivuluko. Ikalai nakizaku kyakukwasha bakwenu kukoma mulwitabilo nekuba’mba bayenga kimye kyonse mumwingilo wamubujimi. (Loma 1:12) Langulukainga pabintu byawama kupichila mukwikala nalufunjisho lwapabunke, lwakisemi, nekutanwa kukupwila kimye kyonse. (Fili. 4:8) Kwibikako kwenu kwakulondela mizhilo ya Lesa kechi kukapelelamotu byonkabyone.—Kolo. 3:23, 24.