Mapuso

Mapuso avula mufwa bantu amwekana mumikwakwa yetu. Kimo kimye muonka ano mapuso mutanyiwa nebakalume ba Yehoba. Popamotu, mapuso aleta lufu akonsha kumwekana pankito nepanzubo. Binembelo bikwasha bena Kilishitu kunemeka bumi kabiji nekumonapo mashinda akwivimbilamo kumapuso. Kino kilumbulula’mba twafwainwa kulamanga myotoka ne mazubo etu bulongo kyakuba’mba kechi byaleta mapuso ne. Pakuba’mba tukonkomwene pabukata bwaano mambo, tubena kubwezhapo “Mepuzho Kufuma Kubatanga” aipuzhiwe mu Kyamba kya Usopa, kya Kizungu kya August 15, 1963 mapeja 510-511. Bino byambo bikingila neluno kabiji mafunde ajimo akwasha bakulumpe mukipwilo kumonapo mashinda amo mobakonsha kubila kimye kyokwamwekana lufu lwamapuso. Kechi kyawama kuketekelatu pamasawakya a Bakapokola nangwa aba Inshuwalansi awo kampe akonsha nekubula kwamba bishinka byonsene.

¹ Umvwe mwina Kilishitu ubena kwendesha motoka watanyiwa mumapuso akuba mwafwa nebantu, nga kipwilo kyabwina Kilishitu kyakonsha kubapo byepi, kwesakana namambo akuzhatwa namashi? Ibyepi umvwe uno dalaivwa yewalala mizhilo ya “Kesala” yapamukwakwa nangwa kechi wajikutako maana pakwendeshane?

² Mu mapuso ana motoka mwafwa muntu nangwa bantu bavula, umvwe paji kuzhatwa namambo amashi, kije kyamambo mukipwilo muji yewo dalaivwa kyafwainwa kwambapo paoo mambo. Nangwa kyakuba kukochi batana kuba’mba dalaivwa kechi yewalengele oo mapusone, kyawama kije kyamambo mukipwilo kupesa-pesa nekumona umvwe kyakine dalaivwa wazhatwa namambo amashi nangwane. Kino kyanema bingi mambo kipwilo kechi kikeba bantu mukimasamasa kulanguluka’mba kyokiji namambo aoa mapuso mwafwa bantu, namambo akubula kutako maana kwa mwina Kilishitu nangwa kubula kulondela mizhilo yapamukwakwa ya “Kesala” ne.

³ Umvwe dalaivwa watanyiwa mumapuso mwafwa bantu ujipo namwingilo mukipwilo kabiji kyatanyiwa’mba wazhatwa namambo amashi, kechi wafwainwa kutwajijila nayeo mwingilone. Umvwe kubula kutako maana nangwa kubula kulondela mizhilo kokwalengela, awo dalaivwa wafwainwa kupewamo mambo.—Nga. 6:5, 7.

⁴ Umvwe mukwakwa pakilañenya ngyangyi kafwapo malaichi, ngengele nangwa binzhilo byakusopeshane, kyokimotu dalaivwa wajikufwainwa kujimuka nekukenkenta saakyangye kukilañanya. Inge kilongolo kyokibapupwilenga nekumuteka mfine, patanshi dalaivwa wakufwainwa kukimika motoka nekupwisha lolo lukatazho. Umvwe muntu waikela pakipona kyakunyuma yewakwambanga na dalaivwa, dalaivwa wakufwainwatu kuzanza meso mumukwakwa, kechi kuba aku nakwendesha aku nakutala kunyuma kwaikela yewo muntune. Inge kwajikutama kechi kwaji kukya bulongone, dalaivwa wakufwainwa kuteshako maana. Umvwe dalaivwa wajikukunukanga, wajikufwainwa kupa dailavwa mukwabo amba endeshe motoka, nangwa kwiimika kuba’mba akokolokeko kufikila tulo twapwa.

⁵ Byonkabyo, kije kyamambo mukipwilo kyafwainwa kupalanguzha oo mambo bukiji-bukiji nekumona umvwe dalaivwa wayeo motoka uji namambo alengela oo mapuso mwafwa bantu. Vulukai kuba’mba kala mubena Isalela, muntu yense waipayañana kyamapuso wanyemenanga mumuzhi wakufyamamo patanshi bakimutotolweshanga kubakulumpe bamuzhi saka bakyangye kumutwezha mumuzhi wakufyamamo moasakwikalanga kuchina’mba awa ushinkanya nanji namambo amashi wakeya kumwipaya.—Bala. 35:6-25.

⁶ Umvwe kwajinga bintu bimo byalengela amba mapuso amweke kyakuba dalaivwa wajikukankalwa byakuba, abya kechi wafwainwa kupewamo mambone, kabiji wafwainwa kutwajijila namwingilo wanji mukipwilo. Pano umvwe watanyiwa namambo, kyawama kumufumyapo pamwingilo yeengila kabiji kechi wafwainwa kwikalapo na mwingilo uji yense pamwaka mutuntulune. Kino kikamwesha kuba’mba kije kechi kikeba bantu bamukimasamasa kupamo kipwilo mambo a mapuso mwafwa muntu, amba kyafungawizha nekwimenako mulongo wazhatwa namambo amashi byokyamuleka’mba atwajijile nakwingila mwingilo yeajipone. Inge mulongo walenga mambo kechi ujipo namwingilo mukipwilone, panyuma yaano mambo, kechi wafwainwa kupewapo mwingilo pakyokyo kimyene. Pakuba dalaivwa byoabula kwikala wakumwenako wawama kujitanga, kije kikalangulukapo bulongo nekumona’mba pakipiteko kimye kyabaya kwakubula kumupapo jashi jiji jonse jakufunjisha kipwilo.

⁷ Umvwe dalaivwa kechi wakutako maanane, kije kyafwainwa kumufunda nekumukwasha kumona bukata bwamambo oalenga. Kije kikamona umvwe wamona buno bubi kabiji walapila nekulomba lulekelo lwamambo kwi Yehoba Lesa kupichila mwi Yesu Kilishitu.

⁸ Umvwe kimye kyobamulekeshe mwingilo wanji kyapita, nekumona kuba’mba uno mulongo wikepesha kabiji wamwesha lulapilo lwakine, wakonsha kutongolwa jibiji kwingilako mingilo imo umvwe poiji yakonsha kwingijiwanga.

⁹ Pano bino, umvwe dalaivwa saatwajijilatu kubula kutako maana nangwa kubula kulondela mizhilo ya “Kesala” yapamukwakwa, kechi wafwainwa kutongolwa kwingila mwingilo uji yensene. Dalaivwa kechi wafwainwa kunyemesha motoka kukizha lubilo loabika “Kesala” mumikwakwa yanjine. Umvwe mwina Kilishitu wipana saakizhamotu kunyemesha motoka kukila pakipimo poafwainwa kupezha, kuno kechi kubulatu kupana byakwa Kesala kwi Kesala ne, bino ubena kwibika nemukizumba mufuma mapuso akonsha kuleta lufu.—Mat. 22:21.

¹⁰ Onkao mambo, aba baji namingilo mukipwilo bafwainwa kwikala bakumwenako bawama kimye kyobabena kwendesha myotoka. Ñanyi kyakumwenako mukulumpe mukipwilo kyoakonsha kumwesha kujitanga umvwe keabule kulondela mizhilo yapamukwakwa yakwa “Kesala”? (1 Pe. 5:3) Nga kikekala byepi kubakyanyike mukipwilo umvwe mukulumpe mukipwilo unyemesha bingi motoka? (Titu. 2:6, 7) Namambo akukosa kwamwingilo wakwendesha motoka, bansemi babwina Kilishitu baswisha baana babo babalume bakyanyike kwendesha motoka wabo bafwainwa kumona kuba’mba bebabula nekwibafunjisha bulongo byakwendesha. Kikatakata bafwainwa kwibafunjisha byobafwainwa kukokela “Kesala” nekukokela Lesa, kabiji nekwibafunjisha kuba’mba kechi bafwainwa kwendeshanga byonka byendesha banyike bakukyalo javula batanyiwa mumapuso aleta lufu, obiwa namambo akunyemesha masekenyine. Umvwe mwina Kilishitu wipana keendeshe motoka kutama nangwa kubula kulondela mizhilo, akyo kyakonsha nekonawishamo bipe byabene nangwa kukozha bantu bakwabo, kije kyamambo mukipwilo kyafwainwa kumupamo mambo akumujimuna monka mokyaila.

¹¹ Kunungapo, muñiñijilo yakipwilo nangwa mubintutu bikwabo, bena Kilishitu kechi bafwainwa kulaya bakwabo amba bebapembelelenga pampunzha nangwa pakifulo kimo pakonsha kwibalengela kulala mizhilo ya “Kesala” ne. Bafwainwa kumubujila jimo dalaivwa pakuba’mba akende bulongo kwesakana namwayila mizhilo yapamukwakwa. Onkao mambo, umvwe umo wakeba’mba mwina Kilishitu wakine akaye kumpunzha imo pakimye kyobaumvwañana, bino mwine wamona’mba kino kikamulengela kunyema masekenyi nekulala mizhilo ya “Kesala” yapamukwakwa, kyawama awo mwina Kilishitu kukokelako mizhilo ya “Kesala,” nekumona’mba kechi mambone nangwa kyakuba awo wamutumine wamupamo mambo akukelwa. Kyakumwenako, umvwe mukulumpe wankito muntu wakukyalo, kyawama mwina Kilishitu kumubujila jimo kuba’mba jiwi janji jamuchima jabwina Kilishitu kechi jimwitabizha kulala mizhilo yapamukwakwane.

¹² Nangwa byonkabyo, bimye byavula, kikale dalaivwa wayuka nangwane, kyawama aye watatulako bukiji-bukiji, nangwa kupimpula mutanchi wanji kuba’mba ekaleko nakimye kyawana kyakwenda bulongo. Kino kilengela mwina Kilishitu kumona kuba’mba kechi wipa mpanyishi nangwa kwitwezha mulweseko lwakukeba kwendesha masekenyi kukila poakonsha kwendesheshane. Kulondela ino mizhilo yapamukwakwa yabikako “bakulumpe balama kyalo” kechi kukavimbilatu dalaivwa kumapuso nekumambo amashi konkane, bino kukakwasha nekwikala najiwi jamuchima jawama, ajo janema kulupulukilo lwetu lwamyaka nemyaka.—Loma 13:1, 5; 1 Pe. 3:16.