Paingapo Bakwenu Bakajilwa
1 Yehoba witunengezhezha kajo kakumupashi ketufwainwa kupichila mwi “kalume” wakishinka. (Mat. 24:45-47) Kajo kavula kauno mutundu kaji mubumabuku, ma Baibolo, ma bound volume, mavidyo, matepu, nema kompyuta disiki akupesa-pesamo byambo byalumbulula Baibolo. Kimye kyonse Yehoba witupa bintu bituwaina kubula kuba’mba byonaikenga. Ukeba atweba kuba’mba tushilañanenga mulwetu, nekumona kuba’mba bonse twamwenamo.
2 Pataiwa mali avula bingi pakubatu’mba bino bipe bikokozhewe bulongo. Balongo mwaya ntanda yonse bobapana bupe bwakulipilila bino bipe. Akino kikatakata kyaikala kyakine kutatulatu kimye jibumba pojafuukwile’mba mabuku apanyiwenga kwakubula mutengo waimikwa, nekuketekela’mba byabupe byakwitemenwa byobilipililanga mali abena kutaiwa pakukokozha bino bipe. Kabiji misampi yavula itambula bino bipe ku Sosaiti pamutengo ulengela balongo kwikala nabya kwingijisha kukipwilo nemumwingilo wamubujimi nangwa kyakuba kechi baji namali avulane.
3 Byotwakonsha Kukwasha: Twakonsha kumvwina lujimuno lwakwa Paulo lwakupapo bakwetu “bakajilwa.” (Loma 12:13) Umvwe twapana bupe bwamali kumwingilo wantanda yonse, kokuba’mba tubena kupapo balongo betu mwaya ntanda yonse byotuji nabyo. Byotwayuka kino, bamo basungapo mali amo akupananga bupe pañondo pañondo kumwingilo wantanda yonse, byonkatu byobapana bupe bwamali akupotamo bibena kukebewa pa Nzubo ya Bufumu. Bayuka’mba ano mali kechi engijishiwatu kupulintila mabuku onkane, bino engijishiwa nemumingilo ikwabo. Akilangulukai mfweto ikatampe yobakonsha kumona balongo betu bonse mwaya ntanda umvwe bavula kebapane buno bupe kimye kyonse.
4 Kikwabo, twakonsha kwibapapo umvwe ketubule kuoda bipe byavujisha byotubena kukeba. Kuoda mabuku onka otukeba kikalengela balongo betu baji kumapunzha akwabo nabo kutambwila kajo kakumupashi kobakeba kwibakosesha nekutwala palutwe mwingilo wabusapwishi bwamambo awama mwaya ntanda.—Hebe. 13:16.
5 Kikatakata twafwainwa kuvulukanga kino, kimye kyotubena kukeba kuoda bipe bimo Sosaiti poitaila mali avula pakwibipanga. Bipe nabiji, mavidyo, ma CD-ROM, mabuku akatampe, nema bound volume. Mukifulo kyakuba’mba muntu yense mukisemi kyenu ekale nakipe aukyanji aukyanji, abya kuba kyawama kisemi kyonse kyaikalatu nakipe kimo nenyi? Umvwe twakepeshako kuoda bintu byakyetu kyetu, kikalengela nebakwetu nabo kutambulako byonka bintu bimo byawama byotukeba.—Fili. 2:4.
6 Mali amabuku otutambika mubujimi akonsha kwesakanako pacheche naoa abupe bwamwingilo wa Sosaiti wantanda yonse botupana mu Nzubo ya Bufumu nebupana boba bakeba kufunda bukine umvwe baswa kupana. Pano bino, umvwe tukeba mabuku akwingijisha atweba bene, nabiji mabuku anyimbo, ma Yearbook, ma Baibolo amutundu wa deluxe anekena nkupo, nemabukutu akwabo, kechi twafwainwa kuketekela bantu bangi kwitulipililane. Bakalume ba Yehoba bepana bobene bafwainwa kulipila ano mali. Byotwayuka kino, basapwishi bavula balanguluka mutengo wafwainwa kupotewapo bino bipe umvwe byajinga byabusulu, binopa bapanako bupe bwapashako bwakonsha kupotewamo kyokyo kipe. Kyakumwenako, Baibolo yamutundu wa deluxe yanekena nkupo yabembela kipale, yakonsha kupotwa pamutengo wa K80.000.00 nangwa kukilapo, buku mukatampe wakonsha kupotwa pa K160,000.00 nekuya peulu, kalenda wakulamika pakibumba muji bipikichala byawama, wakonsha kupotwa pamutengo wa K20,000.00, buku wa encyclopedia iji mukaselechi ka CD-ROM upotwa kutatula pamutengo wa K200,000.00 kufika ku K400,000.00 nangwa kukilapo, tumaselechi twa disiki muji nyimbo javula tupotwa pamutengo wa K80,000.00, nema vidyo amo javula apotwa pamutengo wabaya bingi. Umvwe ketubule kupanako bupe bwakonsha kufikizha mutengo watailwepo pakulenga bino bipe kikalengela jibumba kubula kwingila mwingilo yejafwainwa kwingila wakutwala mwingilo wantanda yonse palutwe.
7 Yesu waambile’mba bapopweshi banji bakine bakayukanyikilwa kubutemwe bwabo bwakwitemwa bene nabene. (Yoa. 13:34, 35) Bumpanyi bwetu bwakupana bintu byakumubiji nekubula butanyi bwakupapo bakwetu byobakajilwa omashinda awama akwiyukanyikishamo atweba bene amba nanchi twibena Kilishitu bakine.