Nkalata Kufuma Ku Jibumba Jitangijila

Balongo ne Banyenga Batemwe:

TUJI bingi na lusekelo pa kwimunembela ino nkalata! Kine tubena kwimutakaika bingi pa butemwe ne kwipana kwenu komubena kuba. Imwenai anwe bene mu Yearbook mingilo yawama yaingijiwe mu mwaka wapwa wa mwingilo. Twaingijile maawala avula bingi mu mwingilo wa kusapwila ne kufunjisha bantu, na kwibatundaika kufwenya kwipi ne Yehoba. Nanchi kechi kitusangajikapo pa kwikala ba mu mwingilo umo ne Lesa wa lukumo Shetu wa mwiulu ne nyi?—1 Ko. 3:9.

Byotubena kutala ku mwingilo ye tuji nanji palutwe, twaketekela namba mukatwajijila kulonda mukoyo ne lwitabilo lwa bakalume ba Lesa byonka byo balumbululwa mu Baibolo. Kya kumwenako, mutumwa Paulo wajinga bingi na kizaku kya kwingila na ngovu mu kutundaika mwingilo wa Bufumu. Kimweka nobe wanembejile nkalata yanji itanshi kipwilo kya bwina Kilishitu kya mu Kolinda mu mwaka wanji wapeleleko kwikala mu Efisesa. Wibanembejile moalangulukijile kuba’mba: “Nkekala ku Efisesa kufika ne ku kimye kya Pentekosta; mambo kibelo kikatampe ne kya kwingijilamo mingilo ikatampe kyanshinkukila, kabiji kuji balwanyi bavula.”—1 Ko. 16:8, 9.

Paulo wakebelenga kuya ku Makedonya ne ku Kolinda. Bino walangulukile kuba’mba sa akyangye kuya wafwainwe kwingila mwingilo mukatampe mu Efisesa. Onkao mambo, wapimpwile mulanguluko wanji mu jishinda jafwainwa byoamwene mwakutundaikila mwingilo wa Bufumu mu Efisesa. Kibelo kikatampe kya kwingijilamo mwingilo kyashinkukile kwi Paulo, kabiji wakebele kwingila mwingilo.

Mu uno mwingilo wasapwijilenga mambo awama ne kukosesha kipwilo kya mu Efisesa. Paulo waambijile banabalume bakulumpe mu kipwilo kya mu yewa muzhi amba: “Byo nabujile kuchina kwimubula nangwa kimotu kimuwamina, kasa nemufunjisha patoka, ne ku nzubo ku nzubo, kasa ne babujisha Bayudea ne Bangiliki, lulapilo lwa kwalulukila kwi Lesa, ne lwitabilo lwa kumwitabila Nkambo yetu Yesu Kilishitu.”—Byu. 20:20, 21.

Byonkabyo ne anweba balongo ne banyenga bavula batemwe, mubena kwingila mwingilo washinkuka kwi anweba. Mu mwaka wa mwingilo wapwa, bantu baingijile mwingilo wa bupainiya bajinga 798,938. Anweba bamo mubena kwingila mwingilo wa bumishonale mu byalo bingi. Mubena kusampanya mambo awama na mukoyo ne kukosesha bipwilo. Bakwabo mwafunda milaka ingi kuba’mba mukwashe bantu bamba milaka ikwabo bomwikala nabo kwipi. Kabiji bakwabo bapimpulako bwikalo bwabo kuba’mba bengile mwingilo mu nyaunda nangwa ku mapunzha kuji kukajilwa kukatampe. Bakwabo nabo batana kuba’mba kibelo kya kwingijilamo mwingilo kyashinkuka pa sukulu, pa nkito, nangwatu mu mashinda akwabo akonsha kwingijilamo busapwishi nabiji pa foni. Masawakya a mwingilo kuzhokoloka mwaya ntanda yonse, amwesha kuba’mba bantu ba Lesa bonsetu banyike ne bakulumpe, babena kwingila na ngovu kumonapo mashinda a kufunjishishamo bantu kuyuka maana a bukine.

Shiinwai kuba’mba Yehoba umona mwingilo wenu kabiji wimusanchila bingi. Baibolo yaamba kuba’mba: ‘Lesa kechi wabula koloka’mba, avulame mwingilo wenu ne butemwe bo mwijimwesha jizhina janji’ ne. (Hebe. 6:10) Twajijilai kumona mashinda omwakonsha kutwajilamo palutwe mpopwelo ya kine. Anweba bamo mwakonsha kubaishako mwingilo wenu. Ne atweba bonse twakonsha kwibikangako kwingila mwingilo wetu bulongo.

Pano bino mu mwingilo wetu mwikala ne betulengulula. Vulukai byaambile Paulo pa mambo akushinkuka kwa kibelo kikatampe kya mwingilo kyashinkukile kwi aye amba: “Kuji balwanyi bavula.” Bano balwanyi ba kwa Paulo bajinga Bayudea ne Bagentila. Bamo bamulukukilenga luntunanwa, bakwabo nabo bamubelamijilenga.—Byu. 19:24-28; 20:18, 19.

Ne atweba lelo jino tupita mu makatazho a yenka uno mutundu. Byo tubena kunangijila ku mpelo ya buno bwikalo bubi, twaketekela makatazho kuvujilako. Satana uji na “bukaji bukatampe” bingi, kikatakata ku bantu bengijila Lesa. (Lum. 12:12) Kange tuvulamenga kuba’mba Satana ye “mfumu wa panopantanda” ne. Yesu wabujile baana banji ba bwanga amba: “Inge mwaji ba panopantanda inge ba panopantanda bemutemwa, mambo batemwa babo bene: pakuba anweba byo mwabula ba panopantanda, ne amiwa nemusalulula mu ba panopantanda, ba panopantanda bemushikwa.”—Yoa. 14:30; 15:19.

Kechi twafwainwa kuleka muntu uji yense kukokesha lwitabilo lwetu mwi Lesa nangwa kwitubwezha panyuma mu mwingilo wetu wa kusapwila ne. Twayuka namba bantu bakatwajijila kwitulukuka ne kwitubelamina. Bino tutwajijila kusapwila mambo awama a Bufumu saka twaketekela kuba’mba Yesu ukavizha Satana ne bantu banji mu kimye kya Yehoba kyatongolwa. Balwanyi kechi bazhindamikilepo mutumwa Paulo ne, kabiji kechi bakonsha kuzhindamikapo bakalume ba Yehoba lelo jino ne. Pano bino nangwa kyakuba Satana wituzhingijila ne kupatwa ku bantu ba ino ntanda, mupashi wa Yehoba ubena kwingila na ngovu pa bantu banji. Byokitusangajikapo kine kuyuka kuba’mba bantu babena kutaya mbila ya mambo awama babafike 6,304,645!

Tubena kwimulombelelako namba mutwajijile kumona mashinda a kutwajilamo palutwe Bufumu bwa Yehoba bwa lukumo. Ketekelai kuba’mba twimutemwa anweba bonse pa muntu pa muntu byo tubena kwingijila pamo “na muchima umotu” mu mwingilo wa Yehoba, Lesa Mwine Wakila.—Zefwa. 3:9.

Atweba balongo benu,

Jibumba Jitangijila ja Bakamonyi bakwa Yehoba