Ikwashainga Anwe Bene na Bene Kwingilanga Kimye Kyonse

¹ Abya mwayuka kuba’mba umvwe basapwishi bonse muno mu Zambia batumina pamo sawakya wabo mu ñondo ujitu yense, kibelengelo kyonse pamo kya basapwishi ba mambo awama kyakonsha kukila pa 137,000 nyi? Pano nanchi, ikika kyo twafwainwa kubanga? Kyanema bingi kutumanga sawakya wenu pa ñondo pa ñondo, ee, sawakya wenu ulengela kibelengelo kubailako. Ibikilai kikonkwanyi kya kuyukanyikwa’mba mwi musapwishi wabambakana uji na kizaku kya kwingijila Yehoba pa kupwa kwa uno mwaka wa mwingilo. Ee kine, mwingilo wa ntanda yonse wa bantu ba Lesa wayilako palutwe mu mapunzha onse, kabiji kino kituvululako ne byambo bya bungauzhi pa mambo a Mfumu wa Yehoba amba: “Kafulumende wanji ukayanga kikuputu kabiji mutende wanji naye kechi ukapwa ne.”—Isa. 9:7, New International Version.

² Masawakya a bibelengelo bya batanwa ku Kijiilo kya Nkambo kya Mabanga ne pa kupwila kwa nkambi amwesha’mba basapwishi mu kino kyalo kyetu bakonsha kuvujilako. Onkao mambo, kino kyo kimye kya kutako muchima kumwingila bukiji uno mwingilo wa Bufumu. Umvwe atwe bene satwibikako na ngovu kwingila kimye kyonse, ‘kasa tukelwa kwingijisha mwingilo wa Nkambo,’ lwitabilo lwetu ‘lukashikimana,’ kabiji kechi ‘lukatelengela ne.’ Tukakonsha ne kukwasha bakwetu babula kwingila kimye kyonse nangwa boba bakoka. Twafwainwa kuyuka kuba’mba “mwingilo wetu wa mwi Nkambo kechi ye watu ne.”—2 Tesa. 3:1; 1 Ko. 15:58.

³ Munembeshi byoatuma Sawakya wa mwingilo wa mu bujimi ku ofweshi ya musampi pa juba ja pa 6 ñondo ne ñondo, atweba bonse twafwainwa kutumanga masawakya etu a mu mwingilo wa mu bujimi bukiji bukiji pa kupwa kwa ñondo ne ñondo. Kino kyo kilengela kwikala na sawakya wakine umwesha byaingijiwe mu bujimi. Nanchi mwingilanga lubaji lwenu lwa kutumanga sawakya wenu bukiji bukiji pa ñondo pa ñondo nyi?