Bafunjishai mu Bintu Byanengezha Lesa Bayuke

¹ Kuyuka kutanga kukwasha bingi mu bumi. Kukwasha mu byubilo ne mu bwikalo bwa muntu. Kutanga kwitukwasha kubaishako lusekelo lwetu, ne kyakilamo kunema ke kya kuba’mba, kwitukwasha bya kulanguluka ne kwikala na lwitabilo atweba bene.—Byu. 17:10, 11.

² Kibelengelo kya muno mu Zambia kimwesha’mba bantu nobe 35 pesenti kechi bayuka kutanga ne. Ku mapunzha akwabo bantu baluba kutanga bafika ku 54 pesenti. Kwakubula nangwa kuzhinaukatu ne, pa bano bonse baluba kutanga paji ne Bakamonyi bakwa Yehoba bakebewa bukwasho bwa kuyuka kutanga. Bano bena Kilishitu babula kuyuka kutanga banema bingi, bavula mu bano baingijila Lesa mu bukishinka pa myaka yavula bingi, bachinchika makatazho na mambo a bupopweshi bwabo, kabiji bamwesha byo bamutemwa Yehoba kupichila mu kulondela mikambizho yanji.—1 Yoa. 5:3.

³ Bantu byo Bakonsha Kufunda: Kyanema bingi kukwasha bakwetu kuyuka kutanga, mambo kukomenako kwa muntu ku mupashi kwaimena pa kutanga. (Yosh. 1:8) Kikatakata bipwilo biji mu mapunzha muji bantu bavula baluba kutanga, byatundaikwa kutendeka kufunjisha bano bantu kwa kubula kutaya kimye ne, kwingijisha buku wa Sambilileni Ukubelenga no Kulemba.

⁴ Bakulumpe mu kipwilo bakatangijilanga ino sukulu kumona kuba’mba ibena kubiwa kimye kyonse, kabiji atweba bonse twakonsha kukwasha balongo betu ne balunda netu kupichila mu kwibatakaika pa kwibikishako kwabo ne byo banunguluka mu bukine. (Mana. 25:11) Bamo na mambo a kumvwa bumvu nangwa kukota, bakonsha kwiumvwa’mba kechi kyakonsheka abo kufunda kutanga ne. Pano akilangulukai pa mwanamulume wikala pa Jikuji ja Vancouver wa jizhina ja Thout wajinga na myaka ya kusemwa nobe 95 kimye kyo atendekele kufunda bukine. Byo abujile kuyuka kutanga, wikepeshe mwine ne kuswisha mukazhanji kumufunjishanga bya kutanga kuba’mba omvwenga byambo byanembwa mu Baibolo ne mabuku alumbulula Baibolo pa kwiatanga. Papichiletu moba acheche waishile kuyuka kutanga kabiji bonse babiji bamulume ne mukazhi bakomene ku mupashi kya kuba’mba bepaine kwi Lesa kupichila mu lubatizhilo lwa mu mema. (w94-CW 10/1 23) Ee, Thout kechi waumvwine bumvu nangwa kuchina amba mambo wakota kuba witangila mwine byambo bya Lesa ne.—Yako. 1:25.

⁵ Mfweto Ifumamo: Kutanga ne kunemba kechi kwitukwashatu kufunda amba tuyuke Lesa ne, bino kwitukwasha ne kuyuka bintu bikwabo. Kyakumwenako, kwitukwasha bingi kwingila pakatampe mu mwingilo nobe byonka byaubile Edson wikala ku Petauke. Nangwa kyakuba watanwanga ku kupwila kimye kyonse, kubula kuyuka kutanga kwamulengelanga kubula kusapwila pakatampe. Byoasakishe kwingila pakatampe ne kukeba kutanga Baibolo ku bantu bo asapwijilengako, wafuukwilepo kunembesha mu sukulu ya kufunda bya kutanga. Mu bañondotu bacheche, wafunjile kutanga kabiji wakebele ne kyola mwa kusendela mabuku a mu mwingilo. Kufumatu lonkalwa kufika ne kino kimye, ubena kusapwila bingi kabiji javula wingilako ne mwingilo wa bupainiya bwa kukwasha.

⁶ Mwane bipwilo byonse lekai bilondele uno mutanchi wa kutendeka kufunjisha babula kuyuka kutanga kwesakana na kukajilwa kujiko. Twakonsha kukwasha aba babena kukeba kuyuka kutanga kabiji ne kwibakwasha kumona mapesho afuma mu kutanga Byambo bya Lesa ne kulondela mikambizho yanji yaamba’mba: “Ukebilangulukenga mute ne bufuku.”—Yosh. 1:8.