Vwalai Kwipelula
1 Nsongwalume wajinga kafunga wa mikooko, waketekejile mwi Yehoba ne kushinda kitonzhi wa nzhita. (1 Sam. 17:45-47) Mwanamulume munonshi, wachinchikile lumanamo sa atekanya. (Yoba 1:20-22; 2:9, 10) Mwana Lesa naye wapaine lukumo kwi Shanji amba ye mwine mwina byambo byo afunjishenga. (Yoa. 7:15-18; 8:28) Mu babo bonse bakumwenako, bonse bepelwile. Ne atweba lelo jino, kwipelula kukebewa bingi mu bintu byo tupitamo.—Kolo. 3:12.
2 Pa Kusapwila: Byotuji ba mwingilo wa bwina Kilishitu, twipana kusapwila mambo awama ku bantu ba mitundu yonse, kechi tusalulula na mambo a mitundu, bisho, nangwa ko bafuma ne. (1 Ko. 9:22, 23) Umvwe bamo ke bobe misula nangwa ke betote ne kukana mambo awama a Bufumu, kechi twafwainwa kuba ketwichocheke nabo ne, atweba twafwainwatu kwibasha saka twatekanya ne kuya na kukeba bafwainwa. (Mat. 10:11, 14) Mu kifulo kya kufunjisha bantu maana etu nangwa bintu byo twafunda, atweba tufunjishako Byambo bya Lesa, mambo twayuka’mba bikebula bingi kukila byambo byo twakonsha kwamba. (1 Ko. 2:1-5, NW; Hebe. 4:12) Mu kuba byaubile Yesu, ne atweba tupana lutotelo lonse kwi Yehoba.—Mako 10:17, 18.
3 Mu Kipwilo: Kabiji bena Kilishitu bafwainwa ‘kuvwala michima ya kwipelula, sa beingijila abo bene na bene.’ (1 Pe. 5:5) Umvwe ke tulanguluke’mba bakwetu betukila mu kuwama, tumonangapo mashinda amo a kwibakwashishangamo balongo betu kukila kuketekelatu’mba abo betukwashe. (Yoa. 13:12-17; Fili. 2:3, 4) Kechi tukalanguluka’mba mambo twanema onkao mambo mwingilo nabiji wa kuwamisha mu Nzubo ya Bufumu kechi witufwainwa ne.
4 Kwipelula kwitukwasha ‘kwitekenya atweba bene na bene mu butemwe’ kabiji kuleta mutende ne kukwatankana mu kipwilo. (Efi. 4:1-3) Kwitukwasha kunekenena aba batongolwa kwitutangijila. (Hebe. 13:17) Kwitulengela kutambwila kufundwa nangwa lujimuno luji lonse lo bafwainwa kwitujimunako. (Sala. 141:5) Kabiji kwipelula kwitulengela kukinka manungo mwi Yehoba umvwe twaingila mingilo iji yonse yo twakonsha kupewa mu kipwilo. (1 Pe. 4:11) Nobe Davida, ne atweba twayuka’mba kushinda kechi kwiyako na mambo a maana a bantu ne, poso na ngovu ya Lesa.—1 Sam. 17:37.
5 Kwi Lesa Wetu: Kyakilamo kunema, twafwainwa ‘kwipelula atweba bene munshi ya kuboko kwa bulume bwa Lesa.’ (1 Pe. 5:6) Umvwe ketupite mu meseko, kimo kimye twakonsha kuba ketutonge bwikalo bwa mutende bukaletwa na Bufumu. Bino mu kifulo kya byobyo twipelula ne kutekanya satupembelela Yehoba kufikizha milaye yanji pa kimye kyanji kyatongolwa. (Yako. 5:7-11) Byonka byaubile Yoba muntu wa bulumbuluke, ne atweba kikatakata tukebesha’mba “jitotwe jizhina ja Yehoba.”—Yoba 1:21.
6 Ngauzhi Danyela ‘wipelwile ku meso a Lesa wanji’ kabiji watambwijile bibusa bya Yehoba ne mingilo ikwabo yawama. (Da. 10:11, 12) Ne atweba twayai tuvwale kwipelula saka twayuka’mba “mfweto ya kwipelula ne ya kwakamwa Yehoba bo bunonshi ne buneme ne bumi.”—Mana. 22:4.