Bya Kubijika

◼ Mabuku a kushajika mu January: Mwakonsha kushajika mabuku aji onse anembelwe mwaka wa 1988 saka akyangye kufika o muji nao pa kipwilo kyenu. Umvwe mufwao ano mabuku, mwane ipuzhai ku bipwilo byo mwatentakana nabyo umvwe bajipo na mabuku akala asubukapo o mwakonsha kwingijisha. Bipwilo byabula mabuku akala byakonsha kushajika buku wa Ukusapika Lesa Ukwa Mutundu wa Muntu. February: Palameni Kuli Yehova. Umvwe uno buku mufwaye, mwakonsha kwingijisha Life—How Did It Get Here? By Evolution or by Creation? (mukatampe nangwa mucheche) nangwa Ukusokolola—Akalume ka Kuko Kakalamba Nakapalama! March: Kuyuka Kutangijila ku Bumi Bwa Myaka. Pa kutatula mafunjisho a Baibolo, kikakebewanga kwibikako. Umvwe bantu baji nanji kala uno buku, mwakonsha kwibashajika buku wa Angweniko ku Kusesema kwa kwa Daniele! April: Shajikai Kyamba kya Usopa ne Loleni! Umvwe ke mubwele ku bantu bakeba kufunda Baibolo, yai ne ku boba batanwa ku Kivuluko nangwa ku batanwa ku lunengezho lukwabo lwa kipwilo bino babula ba mu jino jibumba. Teshai muchima kushajika buku wa Popwelai Lesa. Mwafwainwa kwibikako kutatula mafunjisho a Baibolo, kikatakata umvwe bantu bafunda kala buku wa Kuyuka nangwa buloshuwa wa Nanchi Lesa Ukebaka.

◼ Kutatula mu mulungu wa March 15, 2004, tukafundanga buku wa Palameni Kuli Yehova pa Lufunjisho lwa Buku pa Kipwilo.

◼ Kutatula mu February, kabiji kechi kukilaila pa March 7 ne, mutwe wa jashi ja katataka ja mvula bantu jikambanga bakulumpe ba bijiiji jikekala na mutwe wa kuba’mba “Mizhilo Ya Kwa Ñanyi Yo Mwanemeka?”

◼ Bipwilo byafwainwa kunengezha bulongo Kivuluko kya uno mwaka kikekalako pa Mulungu, April 4, pa kuzhika juba. Nangwa kyakuba jashi jakonsha kutatula bukiji, kupishamo bimpashañano kwafwainwa kutatulatu panyuma ya kuzhika juba. Ipuzhai bipamo bimona ñendelo yaluvula bemubule muyuke bulongo kimye kizhikilamo juba koko kwenu. Byo kiji kuba’mba kafwako kupwila kukwabo kukobiwa pa jino juba ne, kanatu konka kwa kuya mu mwingilo, mwafwainwa kunengezha kuba’mba mukafunde Lufunjisho lwa Kyamba kya Usopa juba jikwabo. Bakulumpe ba bijiiji bafwainwa kupimpula mutanchi wabo wa kupwila kwa yewo mulungu kwesakana na bwikalo bwakonkako. Nangwa kyakuba kyawama kipwilo kimo kimo kwikala na Kivuluko kyakyo, bino kechi jonse jo kyafwainwa kwikala byobyo ne. Umvwe bipwilo byavula bingijisha Nzubo ya Bufumu imo, kipwilo kimo nangwa bikwabo byakonsha kwingijisha kishimikwa kingi pa jino juba. Umvwe kyakonsheka, twikimona namba kyafwainwa kuwama inge kipwilo kimo kyapwisha kupwila, pafwainwa kupita maminiti 40 kikwabo saka kikyangye kutatula, pa kuba’mba bonse bakobe bulongo kivuluko. Mwafwainwa kukokela mizhilo ya pa mukwakwa, pa kwimikila myotoka, ne kumona papatamina ne papatukila bantu. Jibumba ja bakulumpe mu kipwilo jafwainwa kumonapo jishinda jimo jakonsha kwingila bulongo mu mpunzha yo mujiko.

◼ Mukulumpe utangijila mu kipwilo ne Munembeshi bafwainwa kupituluka mu bino bintu byalondelapo: Nanchi pajipo basapwishi bafuma mu kipwilo ne kuya ku bipwilo bingi katataka nyi? Abya mabulañano atumwa kala ku bakulumpe ba mu bipwilo byo bayako pa kuba’mba bano basapwishi bebatambwile ne kwibakwasha ku balongo bakoko ko baya nyi? Nanchi pajipo basapwishi baiya mu kipwilo kyenu katataka nyi? Abya munembeshi wanembejile banembeshi bakwabo ba mu bipwilo kwafuma bano nyi? Nga bikachi bya basapwishi byatumiwa kala nyi?

◼ Mu sawakya wa mwingilo wa September, 2003 kibelengelo kya basapwishi kyabwela panshi. Kiji bino na mambo a kuba’mba bipwilo 57 kechi byatumine masawakya abyo ku ofweshi ya Musampi ne. Onkao mambo, tubena kuvululako banembeshi mu bipwilo namba bakonkanyenga masawakya onse o bapana basapwishi ne kwiatuma pa 6 pa ñondo pa ñondo kwakubula kupembelela masawakya akwabo akelwa ne. Masawakya atambulwa kufuma ku basapwishi panyuma ya 6 ñondo uji yense afwainwa kwiavwanga ku oa a ñondo walondelapo.