Kunungako ku Mfungwa ya Tente Wetu
1 Kitusangajika bingi kumona bungauzhi bwa mu Baibolo byo bubena kufikizhiwa mu ano moba a kupelako. Bungauzhi bumo bo twimwena bwafikizhiwa muno mu Zambia ke bobwa bwanembwa kwi Isaya mo aambijile jimo amba awa “mucheche ukekala ke kisaka kyabaya, ne yewa wakepa ukekala ke mukoka wakosa.” (Isa. 60:22) Mu 1989 kimye kyatatwile mwingilo pa uno musampi wetu wa katataka, kwajingatu basapwishi 71,000 ne bipwilo 1,755 mu kyalo. Lelo jino jo tubena kwamba, tuji na basapwishi pepi nobe 120,000, kino kibelengelo kyabailako pepi nobe bimye bibiji kukilaila kyokya kya mu 1989, ne bipwilo byakilaila pa 2,000. Kino kibelengelo kyailako bingi palutwe!
2 Kufumatu kimye uno musampi wa katataka kyo apwile ne kumupana mu 1993, kukajilwa kwa bujimi bwetu kubena kuyilakotu palutwe. Kya kumwenako, Jibumba Jitangijila jalenga mabumba a batuntulula Kitonga, Kilubale ne Kikaonde kuba’mba kwikale kufika pa michima ya bantu bakebesha kufunda bukine mu ino milaka. Kyaketekelwa amba jibumba ja batuntulula mu Kilunda najo katatakatu jikalengwe. Kushimika Mazubo a Bufumu nako ke mwingilo wa teokalasi ubena kuyilakotu palutwe kutatulatu mu 1993. Kunungapo, mabuku avula abena kukebewa bingi kukilaila pa mabuku akebewanga mu bujimi bwetu myaka jikumi yapitapo.
3 Pa kuba’mba kwikale kukumbanya kwa bibena kukebewa na mambo a kubailako bujimi bwetu, uno musampi wetu ubena kukebewa kumubaishako. Isaya 54:2 wafundañanako bingi bulongo amba: “Bayisha tente wobe, unungekotu bisapi bikwabo ku tente ye waikalamo, kuzhinauka ne; kabiji unungeko ku mfungwa yanji ne kukosesha mpopo yanji.” Musakutemwa kuyuka’mba, mwingilo wa kunungako musampi wetu watatwile mu May 2002.
4 Mwingilo Ubena Kuyilako Palutwe: Pa kuba’mba kwikale mpunzha ya kwingijilamo jibumba jetu ja batuntulula jibena kuyilakotu na kubailako, lubaji lumo lwa kibamba kya peulu mu kishimikwa kyatungilwe amba kya kupulintilamo mabuku, mwatungiwa maofweshi. Bibamba bimo bya kwingijilamo byajinga peulu bebituntulwila panshi kuba’mba peulu pashale mpunzha yabaya ya kutungilapo maofweshi a katataka. Ano maofweshi beatunga na matafwali a kwingijisha shamende ne kubikako pulasita. Nangwa kya kuba ino mingilo pataiwa kimye kyabaya ne ngovu, bino ke jishinda jimo ja kwingijishatu biñambañamba ne basendwe ba muno monka mwetu.
5 Kyanema bingi kulama bamingilo bepana pa musampi. Onkao mambo, kubena kutungiwa kishimikwa kyatentakana jina kuya peulu. Kino kishimikwa kyanungwako kiji na bibamba 32 mukalaalanga kisemi kya Betele poso pakapite myaka jikumi pa kuba’mba kukakebewenga kwikibaishako jikwabo. Kupusanako na bishimikwa bijipo kala, abyo byatungiwe kwingijisha “bibumba byo balengela jimo panshi ne kwibimika,” kishimikwa kya katataka akyo kikatungiwatu kwingijisha matafwali a shamende ne kubika pulasita ku bibumbulu.
6 Bishimikwa bikwabo bibena kuwamishiwa ke kibamba mwa kutekela, kibamba mwa kujiila, kibamba mwa kulungishisha ne kutula myotoka. Kuwamishiwa kwa kibamba mwa kutekela kwavwangamo ne kuwamishako ntekelo ya kajo ne biñambañamba bya kunengezhezhamo kajo, kubikapotu ne kubaishako mpunzha ya kwingijilamo. Kukekala ne kubaishako kibamba mwa kulamina kajo kubikapotu ne bibamba bikatampe muji mwela watalala mwa kusungila kajo. Kino kikalengela kwikala na bintu bikebewa ku ba mu kisemi kya Betele ne kwikikwasha kubula kukajilwa kajo pa kimye kimo.
7 Bishimikwa bya pa Betele bikwabo bya katataka bikatungiwa ke jishinda mwa kupichila jiji na mutenge jikekela pakachi ka kishimikwa kya katataka kya kulaalamo ne kibamba mwa kutekela ne kujiila, kukekala ne kutunga kishimikwa kyazhikankana mwa kubika myotoka ya pa musampi, ne kishimikwa kikwabo mwa kubika myotoka ikatampe kikekala na binzhilo bikashinkukanga kuya peulu.
8 Mwingilo byo Abena Kwingijiwa: Byoapewe mwingilo wa kutunga nzubo ya Lesa, Mfumu Solomone watongwele banabalume 550 ba kutangijila mwingilo. Abano bajinga basendwe bayuka mingilo. Wa kumwenako umo wajinga Hilama awo wajinga sendwe mu mingilo ya ngolode, siliva, lubemba, mabwe ne bya kuvwangavwanga. (1 Mfu. 7:13, 14) Byonkabyo ne luno kuji basendwe bayuka kusokeka biñambañamba bya mema, bayuka kusokaika malaichi, kutunga ne kupenta bapewa mwingilo wa kubaishako musampi wetu.
9 Jibumba ja bantungi luno jiji na balongo ne banyenga bonse pamo 81, ko kuba’mba 36 bamuno monka mwetu mu kyalo, 15 bamwingilo ba kwitemenwa mwaya ntanda yonse, ne 30 bamwingilo ba kimye kyonse mwaya ntanda yonse. (Sala. 110:3) Bamwingilo ba kwitemenwa belipilila mali abo bene kufuma mu byalo bingi nabiji United States, Canada, ne England kwiya na kwingila mingilo pa milungu icheche kufika ku bañondo basatu. Bamwingilo ba kimye kyonse mwaya ntanda yonse bapewa kwingila mwingilo ku Dipatimenti Itala pa bya Buntungi kabiji bafuma mu byalo 13 byapusana pusana. Bengila kufikilatu ne kimye mwingilo yense wapwa nangwa mwingilo ye bayuka wapwa kwingijiwa. Panyuma ya milungu ibiji, kipwilo kimo kya mu Lusaka bekibula kutuma bamingilo ba kwitemenwa kwiya na kwingila mingilo ibena kukebewa pa Kibelushi kyo bebabula amba bakeye. Abano bamingilo bakelela bengila mingilo yavula bingi kimye kyo bengila yenka uno mwingilo, kabiji ke jishuko bingi kwi abo kwingilako uno mwingilo wa kubaishako nzubo ya Lesa.
10 Pano nga Bonse Bakonsha Kukwasha Byepi?: Balongo ba mu Lusaka byo baji na jishuko ja kwipana ne kwingilako mwingilo, atweba bavula twashala kuba twaingilako ino mingilo atwe bene ne. Pano bino, kuji bintu byavula byo twakonsha kuba pa kuba’mba tukwashe. Mutumwa Paulo watundaikile bakwabo ba mu lwitabilo mu Kolinda kupana misashijilo kuba’mba byo atalañenenga na makatazho akonshe kupwisha bulongo mwingilo wanji. Byonkabyo, ne atweba twakonsha kulengela uno mwingilo wanema kwingijiwa bulongo umvwe ke tumulombelele. (2 Ko. 1:11) Ketekelai’mba misashijilo yenu kechi ikabulwa kukumbulwa ne.—Sala. 65:2; 127:1.
11 Jishinda jikwabo jawama atweba bonse jo twakonsha kukwashañenamo ke kupichila mu kupanako bintu byetu bya ku mubiji. Byonkatu byo mwayuka, mingilo ya uno mutundu pataiwa mali avula bingi. Onkao mambo, kubena kukebewa mali afwainwa kupwishisha uno mwingilo. Twakonsha kupwisha byepi luno lukatazho?
12 Kimye kyatungiwenga bino bishimikwa byapwa kala, balongo bamwesheshe muchima muntutu umo wamweshiwe kimye Davida kyo aambile amba kwikale kupana bupe bwa kutungila nzubo ya Lesa mu Yelusalema. 1 Byambo bya Moba 29:9 byashimuna’mba: “Ponkapo bantu basangalele, mambo bapaine kwi Yehoba na muchima yense kabiji ne na muchima walumbuluka.” Byonkabyo, ne atweba balongo batuminenga bintu byo bakonsheshe kupana mu kukwasha kutunga musampi wetu. Akya kimye, bantu umo umo ne bipwilo mwaya kyalo kyonse bapaine bupe mu kutundaika mpopwelo ya kine. Bupe bwenu bwa kwitemenwa ku mwingilo wa ntanda yonse bukengila mwingilo wabaya bingi mu kupwisha mwingilo ye tuji nanji.
13 Mfweto ikafumamo yavula bingi kabiji yanema. Maofweshi anungwako a batuntulula akalengela kuvuzha mabuku muji bukine bupana bumi a mu milaka yambiwa muno mwetu. Bishimikwa bikwabo mwa kulaala ne kuwamishako ñiñijilo bikalengela ba mu kisemi kya Betele kutwajijila na kwingila bulongo mingilo ya teokalasi mu kino kyalo kyetu. Ketekelai’mba Yehoba ukemupesha pa kwibikishako kwenu mu kutundaika uno mwingilo. Twayai atweba bonse twingileko mwingilo wa ‘kunungako ku mfungwa ya tente wetu’ mu kutota ne kupana lukumo ku jizhina ja Yehoba.—Isa. 54:2.
[Kipikichala pa peja 3]
Kino kishimikwa kyanungwako kiji na bibamba 32 mukalaalanga kisemi kya Betele poso pakapite myaka jikumi pa kuba’mba kukakebewenga kwikibaishako jikwabo
[Kipikichala pa peja 4]
Kupwisha mwingilo ubena kwingijiwa wa kutunga maofweshi a katataka 47
[Kipikichala pa peja 4]
Kutenga mutenge kwingijisha mashiki o balenga na shamende
[Kipikichala pa peja 5]
Kupusanako na bishimikwa bijipo kala, abyo byatungiwe kwingijisha “bibumba byo balengela jimo panshi ne kwibimika,” kishimikwa kya katataka akyo kikatungiwatu kwingijisha matafwali a shamende ne kubikako pulasita
[Kipikichala pa peja 6]
‘Natemwa bingi kwikala mu bulongo bwa ntanda yonse bonatangangatu kya kutanga’
[Kipikichala pa peja 6]
“Kukwatankana kwa kine kwiyako na mambo a kwingijila pamo na ngovu ne kupwisha mingilo atweba bonse yo twayuka’mba kechi twakonsha kwiipwisha mu bulume bwetu ne, kana na mupashi wa Yehoba”
[Kipikichala pa peja 6]
“Kumona bukine byo bukwatankanya bantu bafuma ku bisho byapusana pusana kwakosesha lwitabilo lwetu”
[Kipikichala pa peja 6]
‘Uno mwingilo ke lunengezho lwa paladisa panopantanda’