Baana Babacheche Baletela Lesa Lusekelo
1 Nangwa kya kuba baana babacheche batemwa kukaya ne kubula kuta maana ku bintu, kechi twafwainwa kwibalengulula amba kuba baikala na lwitabilo ne kutokesha Lesa ku muchima ne. Kupopwela Yehoba kechi kuji amba kana jije jifumbi ne.—Mat. 21:15, 16; Yoe. 2:28, 29.
2 Na mambo a kumwesha lwitabilo ne lukokelo, bena Isalela bakyanyike baendele kufuma mu Ijipita ne kupita mu kiselebwa kuya na kuswana Ntanda ya Mulaye. (Kulu. 12:37) Samwela byo akijingatu mwanyike wa myaka ya kusemwa kampe isatu, watendekele kufunda bya kwingila ku tente wa lusambakeno. Byo akijingatu mwanyike, wimwesheshe mwine kwikala ngauzhi wachinchika. (1 Sam. 1:24-28; 3:18, 19) Na mambo a kumvwa lusa ne kwikala wa bukishinka ku byo ayukile’mba bya kine, kwatundaikile kamwale kusolomoka wakikulumpe na mushingi. Kyapeleleko, mwanamulume wa nzhita wakokejile ne kubukwa wabukilwe mu jishinda ja kukumya. (2 Mfu. 5:3; Luka 4:27) Ñumvwino ne ñambilo ya kwa Yesu yo aambilangamo bintu saka akiji mwanyike, yakebwile bingi bantu ba mu kimasamasa mo aikalanga.—Luka 2:46-48.
3 Banyike lelo jino banema bingi mukachi ka bantu ba Lesa. Bakonsha kwikala bakosa ku mupashi, kukebesha “kukana byatama ne kusalululako byawama” ne kwiyukanyikisha abo bene amba bakalume ba Lesa. (Isa. 7:16) Pa kuba’mba bobe bino, bakebewa bukwasho. Bansemi bakambizhiwa kukomesha baana babo, “na kwibafunjisha ne kwibajimuna monka mwaswila aye Nkambo.” (Efi. 6:4) Nanchi kechi kyakonsha kwimuletela anweba bansemi lusekelo ne lutakaiko kwikala na baana bafunjishiwa kwikala na kizaku kya kwingijila Mulenga kabiji ne kuyuka amba kupichila mu maana ne milangwe, mwanenu wafuukulapo kwingijila Lesa ne nyi?
4 Buku wa Sambilila Kuli Kasambilisha Mukalamba wanengezhiwa kukwasha baana betu kuyuka mwakukumbwila ne kwamba biji ku muchima wabo. Ukemukwasha kufunjisha baana benu maana a bukine mu jishinda ja mushingi, kabiji ja butemwe. Mepuzho ajimo aipuzhiwa ku bakyanyike, akebakwasha kuyuka amba ndangulukilo yabo yanema bingi kwi atweba. Bipikichala byawama nabiji byobya biji pa mapeja 91, 93, 216, 226, ne 237, bimwesha bingi bulongo bakyanyike buwame bwa kubila byawama.