Bya Kubijika

◼ Mabuku a kusha mu January: Shai buku uji yense wa kala wa mapeja 192 nangwa uji yense wanembelwe mwaka wa 1991 saka akyangye kufika. Umvwe bipwilo bifwao ano mabuku a kala, byakonsha kwingijisha buku wa Kuyuka nangwa buloshuwa wa Labainga Mukenkentenga! February: Shai buku wa Fwenyai Kwipi ne Yehoba. Umvwe uno buku pa kipwilo kafwapo, shai buku wa Ukusokolola nangwa buku mukwabo wa kala ujipo. March: Shai buku wa Baibolo Ufunjisha kabiji ne kwibikishako kutendeka mafunjisho a Baibolo. April: Kukekala kushila bantu Kyamba kya Usopa ne Awake! Kimye kya kubwelako ku bantu bamwesha lusekelo lwa kukeba kufunda, kubikapotu ne boba batanwa ku Kivuluko nangwa boba batanwako ku kupwila kukatampe bo tubula kupwila nabo jonse ne, bashilai buku wa Baibolo Ufunjisha, sa muji na nkebelo ya kutendeka lufunjisho lwa Baibolo.

◼ Kutatula mu February, bino kechi kukilaila pa March 4 ne, jashi ja mvula bantu ja bukumo jikambanga bakulumpe ba bijiiji jikekala na mutwe wa kuba’mba “Mu Ntanda Ipya ya Lesa—Ñanyi Ukatwelamo?”

◼ Mutanchi wa Vidyo ya Young People Ask—What Will I Do With My Life? ukafunjiwa pa Kupwila kwa Mwingilo mu April. Umvwe mubena kukeba ino vidyo, mwakonsha kuonda bukiji bukiji kupichila mu kipwilo.

◼ Bipwilo byafwainwa kunengezha bulongo Kivuluko kya uno mwaka kikekalako pa Kimo, April 2, panyuma ya kuzhika juba. Nangwa kya kuba jashi jakonsha kutatula bukiji, kupishamo bimpashañano kwafwainwa kutatulatu panyuma ya kuzhika juba. Ipuzhai bipamo bimona ñendelo ya luvula bimubule kimye kizhikilamo juba koko kwenu. Kipwilo kyonse kyafwainwa kwiikela na kivuluko kyakyo. Pano bino kino kechi kimye kyonse po kyakonsheka kubiwa ne. Umvwe bipwilo byavula bingijisha Nzubo ya Bufumu imo, kipwilo kimo nangwa bikwabo byakonsha kwingijisha kishimikwa kingi pa jino juba. Umvwe kyakonsheka, twikimona namba kyakonsha kuwama umvwe sa papitako maminiti 40 pakachi inge kipwilo kimo kyapwisha pa kuba’mba kikwabo kitatule, kuba’mba bonse bakamwenemo mu kupwanañena pamo panyuma ya kivuluko. Mwafwainwa ne kwilangulukilako pa mambo a pa kwimikila myotoka, pa kupatukila kabiji ne pa kupatamina bantu. Jibumba ja bakulumpe mu kipwilo jafwainwa kumonapo jishinda jakonsha kwingila bulongo ku mpunzha yo mujiko.

◼ Pa mambo a Kimye kya Kivuluko kya mu 2007, kechi kikakebewanga kuoda tubipepala twa Kwichilapo bantu ku Kivuluko ne, mambo tuno tubipepala tukatumwa ku bipwilo byonse kivuluko saka kikyangye kufika. Tuno tubipepala tukekala mu Kichewa, Kitonga, Kibemba, Kizungu, Kikaonde, Kilunda, Kilubale, Kiloshi ne Kiswahili. Kutendeka mu 2007 kuya kulutwe, pa tubipepala twa kwichilapo bantu ku Kivuluko kechi pakanembwanga mwine mwaka ne, kibena kulumbulula’mba tuno tubipepala twakonsha kusungiwa ne kwingijishiwa mwaka mukwabo. Onkao mambo, basapwishi bafwainwatu kunemba kimye ne keyala pa tuno tubipepala twa kwichilapo bantu kanatu ke tukebewe kupa bantu. Kino kiji bino mambo tubipepala tukashalangapo tukakonsha kwingijishiwa mu mwaka walondelapo umvwe kechi twanembwapo ne. Umvwe tubipepala twatumwa twakepa nangwa kampe kuji milaka ikwabo ibena kukebewa ya tuno tubipepala, mwakonsha kuonda kwingijisha pepala wa Literature Request Form (S-14.) Mwane mweshai kuba’mba mubena kunungapotu pa oda mwine mutanshi watuminwe.

◼ Mabuku a katataka ajipo:

Taiko Muchima Muyuke Kutanga ne Kunemba—Kikaonde